(( يا دنيا ارحميني )) .. قصة واقعية

[SHwarviskya]

( اللي تبي تنقل قصتي بمنتديات ثانيه ) ابيكم تكتبون بعد بسم الله الرحمن الرحيم .. القصه منقوله للكاتبة ReRez .. وتحطون هالجملة عن الساني / ما أحلل أي احد ينقل القصة ومايذكر اسمي ReRez /
-----------------------

بسم الله الرحمن الرحيم

بقلمي انا ReRez ابدي قصتي .. ابطالها ثنتين .. وحده تربطني معاها رابطة دم ( بنت بنت خالة امي ) .. والثانية رفيجتي .. بس انا ربطتهم مع بعض بالقصة

ولا تربكم كثرة الاسامي ماراح يهمكم الا ( ندى وفرح ) .. وهالمرة حابة اسمّي كل بارت باسم مختلف بناء على احداث هذا البارت ..

نبدي ..


- 1 / هدية اختي -

المكان : المدينة الترفيهية ( مدينة ملاهي بالكويت )
الوقت : الساعه 8 بالليل

ندى اقعدت اتطالع حواليها .. كل شي ازعجها الليتات والالوان واصوات صراخ الناس بالألعاب .. امسكت راسها واقعدت تمشي بممر تقريبا خالي ..
أحمد : ( لحقها ومسكها من زندها ) اشفيج وين رايحه
ندى : ( وخرت ايده عنها ) وخر عني
أحمد : ليش ؟
ندى : ( اتدزه من صدره وتصرخ ) أقولك وخر عنييي خلني بروحي
أحمد : انتي اشفيج ؟

- ندى فجأه طاحت عالارض واقعدت ترجف واطرافها كلها متصلبه ومشدودة -
( أحمد واقف يطالعها مصدوم واهي طايحه يم ريوله ومو عارف شيسوي )
---

- نرجع معاكم بعييييد .. قبل ولادة ندى –

(( فاطمة متزوجه واحد اسمه مشعل يشتغل بالجيش وحالته المادية تعبانه و عندها 5 بنات ( ساره 8 سنين – ريم 6 سنين - جنان 3 سنين – نوره سنتين – فرح سنه ) الله يحفظهم وماعندها صبي .. عندها اخت وحده اسمها أمل متزوجه – اخو مشعل ( سامي ) - بس حالته الماديه وايد احسن من حالة مشعل كان غني بسبة شغله الخاص وشركاته .. أمل صارلها 10 سنين متزوجه بس للأسف كانت عقيم بس سامي وااايد يحبها وكلش مافكر ان يتزوج عليها معنها وايد اصرت عليه بس ماكان راضي ))

- في بيت فاطمة –

فاطمة : ( تحط ايدها على بطنها ) انا وايد خايفه انها تطلع بنت
أمل : ( قلبها عورها ) لا تقولين جذي حمدي ربج ان عندج اعيال .. اشفيهم البنات يهبلون والله .. الله يخليهم لج
فاطمة : ادري انهم يهبلون بس انتي تدرين البنات يبيلهم رعاية و لازم احط بالي عليهم عدل .. غير هذا اهم للحين صغار خصوصا جنون وفروح ونواره .. واذا يبت بنت بعد .. ( اقعدت تبجي )
أمل : ( حطت ايدها على جتف اختها ) ليش تبجين ؟؟ تره العيال نعمه حرام اللي قاعدة تسوينة .. اهو مشعل قالج شي ؟ مهددج يعني؟
فاطمة : لا والله ماقالي أي شي بس اهو يبي ولد وانتي تدرين حالتنا المادية وايد صعبه مابي اكود بنات خلاص والله تعبت
أمل : استغفري ربج .. مايجوز اللي تسوينه
فاطمة : ( تبجي ) استغفرالله يارب
أمل : انتي الحين أي شهر ؟ و ليش ماشفتي نوع الجنين ؟ يمكن يكون ولد
فاطمة : انا بالسابع و مادري خفت كل ما اروح موعدي الزم عالدكتوره انها ماتقولي النوع .. لأني خايفه تكون بنت .. ومن نظراتها احس انها بنت
أمل : حمدي ربج غيرج يتمنى ظفر ياهل ( اسكتت وطالعت الأرض )

( يت الخدامه – سوما - شايله نوره وفرح .. ويمها جنان وكلهم كانو يبجون )

فاطمة : ( تصرخ ) اشفيكم يننتوني .. ليش يبجون ؟
سوما : ( بصوت عالي ) ماما سارو تكي جنون .. نواره فروح يبجي يبي هليب
فاطمة : ( ماسكه راسها ) خلاااص تعبتووني ماني قادره اتحمل اكثر
أمل : تعالي جنون يمه
جنان : ( راحت حق خالتها واهي ميته بجي )
أمل : ( شالتها قعدتها بحضنها ولمتها ) خلااص يمه لا تبجين الحين اروح اطق سارو
فاطمة : ( تكلم الخدامه ) عطيني فرح و روحي سويلهم حليب
سوما : اوكي ( عطتها فرح وخذت نوره وراحت )
فاطمة : ( اسدحت فرح على ايدها ) خلاص عفية لاتبجون .. ماما تعبانه
أمل : ( ماسكه جنان وتمسح على شعر فرح ) خلاص حبيبتي الحين اييبون حليبتج
( دشت سوما مره ثانيه معاها الحليبه مالت فرح )

سوما : ( عطت فاطمة الحليبه ) ماما هليب في شوويه بس هفاضه كلاس
فاطمة : ( خذت الحليبه وقاعده تشرب فرح ) عطيني التلفون
سوما : ( خذت تلفون البيت وحطته عالطاوله جدامهم )
فاطمة : اوكي خلاص روحي .. أمول دقيلي على مشعل .. اذا وخرت ايدي عن فروح تبجي اعرفها
أمل : ( شالت السماعه ) جم الرقم
فاطمة : ( نقلتها الرقم )
أمل : كاهو رن
فاطمة : حطيه على اذني
أمل : ( حطت السماعه على اذن فاطمة )
فاطمة : ألو
مشعل : ( معصب ) نعم؟
فاطمة : مشعل عفيه لا ترد البيت الا ومعاك حفاضات وحليب حق اليهال لا تنسى حليب جنان غير عن حليب فرح ونوره
مشعل : ( بعصبيه ) توني شاريلهم حليب شنو يسبحون فيه ؟؟!!
فاطمة : اي مشعل ماشاءالله عندي ثلاث يهال اكيد بيخلص
مشعل : ( يصرخ ) فاطمة انتي تدرين ان المعاش نصه ينسحب اقساط .. هذا غير الناس اللي تطالبني وواحد خسيس شاكي علي بعد
فاطمة : زين اشلون الحين ؟
مشعل : اشلون الحين عاللي شاكي علي ؟؟ ولا على الحليب والحفاض
فاطمة : لا عالثانيه طبعا .. الاولى متعوده عليها
مشعل : ( يصرخ ) مادري دبري عمرج ( سكر التلفون بويهها )
فاطمة : خلاص شيلي السماعه
أمل : ( ردت السماعة مكانها ) اشفيج ؟
فاطمة : مشعل مو قادر على مصاريفنا انا والبنات
أمل : الله كريم
فاطمة : لو يبت بنت ادري انه راح يحاول مره سابعه وثامنه وعاشره لين اييب صبي ومايهمه ان العيشه صعبه عليهم بسبة الفقر اللي احنا فيه .. اهو اللي مانعه ان يتزوج علي ان ماعنده فلوس يفتح بيت ثاني .. ولا اهو بيموت عشان اييب ولد بأي طريقه
أمل : انتي مالج ذنب .. اصلا علميا نوع الجنس يحدده الابو مو انتي
فاطمة : ( تضحك ضحكة قهر ) هه .. تعالي فهمي مشيعل
أمل : انا راح اقول حق سامي يساعدكم هذا اخوه
فاطمة : أمل من صجج ؟؟ جم مره عطاه بالآلاف عشان يسد ديونه بس قعد يلعب فيهم قمااار وضيعهم .. هذا مايتسنع كلش اعرفه عدل

( اليهال داخل قاعدين يصارخون ويبجون )

فاطمة : ( تصرخ ) ويعه انتي وياها بس سكتو لا اقوم لكم
- فرح كانت نايمه وفزت من صراخ امها واقعدت تبجي –

فاطمة : ( تصرخ ) بس انتي بعد

( جنان انزلت من حضن أمل وراحت داخل تركض )

أمل : فطوم خلاص لا تصرخين هدي اعصابج .. انا الحين لازم ارجع البيت .. لا تفكرين وايد راح تنحل ان شاءالله .. ( طلعت من بوكها 40 دينار ) هاج اكيد محتاجتهم
فاطمة : ( خذت منها الفلوس ) الله يسامحك يا مشعل عيشتني بفقر اكثر من الفقر اللي كنت عايشته في بيت اهلي
أمل : ( تضحك ) لا والله ماكو فقر اكثر من اللي كنا عايشين فيه
فاطمة : بلى والله هذا فقره العن
أمل : الله يفتح لكم ابواب الرزق ( قامت ) يللا مع السلامه
فاطمة : الله معاج
---

- بيت أمل –
( أمل قاعده عالغدى سرحانه )

سامي : حبيبتي امول اشفيج اكلمج ماتردين
أمل : ( انتبهت ) ها ؟ كلمتني؟
سامي : ( يضحك ) اي صارلي ساعه اكلمج وانتي سرحانه .. شتفكرين فيه؟
أمل : أفكر بحالة اختي
سامي : اي والله يكسرون الخاطر .. مشعل كل شوي متسلف مني وجان زين يسوي فيهم شي مفيد
أمل : لا والحين فطوم على ويه ولاده حتى حفاض وحليب حق اليهال موقادر اييب .. و بس فالح يخلف بهالعيال .. مايدرون ان العيال نعمة حرام يسوون فيهم جذي
سامي : ( حط ايده على ايد أمل ) هدي نفسج الحين ليش معصبه ؟ الله يفرجها احنا راح نساعدهم على قد مانقدر
---

- بيت مشعل –
( مشعل رد الساعه ثنتين بالليل وانسدح بدشداشته )

فاطمة : ( حست عليه وقامت اقعدت عالسرير ) مشعل؟
مشعل : خليني انام تره مالي خلق نفسي
فاطمة : رديت حق السم الهاري؟
مشعل : ششششششش خليني انااام
فاطمة : ( اتصرخ ) حرام عليك يا مشعل حرااام عندك بنات خاف الله .. ابعد عن طريج الشرب والقمار بسك .. حرام عليك
مشعل : ( قعد ) اوووو خلاص يننتيني .. خليني انام بعد شوي يقومون بناتج ويزعجوني
فاطمة : بناتي ؟؟ ليش مو بناتك بعد ؟ مشعل لي متى هالعيشه حرام عليك
مشعل : ( غصب ينفهم كلامه ) والله والله لو يبتي ولد راح اتعدل صدقيني
فاطمة : حرام عليك راح تذبحنا
مشعل : شوفي اقولج من الحين اذا بنت خليها بالمستشفى مانبيها
فاطمة : ( عيونها دمعت ) حسبي الله عليك يا مشعل
مشعل : ( طقها طراق ) شنووو .. تتحسبين علي يا بنت ال...
فاطمة : ( حطت ايدها على خدها ) اتطقني يا مشعل ؟
مشعل : واكسر راسج بعد
فاطمة : ( انسدحت وعطته ظهر واهي ميته بجي )

- بعد فتره –

مشعل : اووووو خلاص عاد بسج بجي خليني انام
فاطمة : اطلع بره ونام يعلك ماتقوم
مشعل : ( مو على طبيعته لأن شارب ) شكله ماينفع معاج الكلام ( مسكها من شعرها ولفها عليه وقعد يطقها طراقات ) تدعين علي هاا .. انا اعلمج الحين اشلون تدعين علي
( عقب ما طقها وايد خلاها تبجي وراح نام بالصالة )

- بعد 3 ساعات فاطمة من التعب والطق .. حاشها عوار الطلق –

فاطمة : ( ماسكه بطنها وقاعدة تبجي ) مشعااال .. الحقني الله يخلييك
- قامت من السرير جان ينزل ماي الرحم –

فاطمة : مشعااال راح امووت تعال الحقنيي

- مشعل لا حياة لمن تنادي –
( فاطمة اطلعت من الغرفة واهي غصب تمشي وراحت الصالة حق مشعل )

فاطمة : ( تصرخ من الألم ) مشعل قووم عفيه قوم ودني المستشفى راح اولد
مشعل : ( بطل عينه ) اشتبين ؟
فاطمة : ( ماسكه بطنها من تحت ) اقولك راح اولد ودني آآي
مشعل : ( للحين راسه ثقيل ودافنه بالغنفه .. مو مستوعب اللي قاعد يقوله ) زين زين من اصبح افلح

فاطمة : ( قاعدة تبجي وتتألم و راحت خذت التلفون ودقت على أمل )
---

[SHwarviskya]

- بيت سامي –
أمل كانت نايمه على صدر سامي جان يرن تلفونها

سامي : حبيبتي قومي تلفونج يرن
أمل : ( نايمه ) خله يولي
سامي : حبيبتي امول قومي الحين الفير اتوقع فيه شي مهم
أمل : ( مدت ايدها عالتلفون وطالعت الرقم ) هذي فطوم خير ان شاءالله
سامي : ردي شوفي اشفيها ؟
أمل : ( ردت عليها ) الو ؟
فاطمة : ( تبجي ) أمول الحقيني راح اموت
أمل : ( فزّت اقعدت ) اشفيج ؟ اشصار ؟
فاطمة : راح اولد
أمل : شنوو ؟؟ توج بالسابع اشلون ؟ ووين مشعل
فاطمة : مايقدر يوديني ..عفيه الله يخليج تعالي بسرعه
أمل : اوكي اوكي مسافة الطريج و اكون عندج .. صبري ( سكرت التلفون )
سامي : خير ؟
أمل : فاطمة بتولد ومشعل مادري وينه
سامي : يللا بسرعه قومي لبسي عباتج
أمل : اوكي ( قامت )

- أمل و سامي اوصلوا بيت فاطمة .. دقو عليها عشان تبطل الباب جان تطلع لهم .. امسكتها أمل وركبتها السياره –

أمل : وين مشعل ؟
فاطمة : ( هدت آلام الطلق ) مايقدر يوديني
أمل : زين اشلونج الحين ؟
فاطمة : أحسن .. بس كل شوي يرد الألم
سامي : ان شاءالله دقايق وانكون بالمستشفى

- اوصلو المستشفى ودشت فاطمة غرفة الولادة .. سامي دق وايد على مشعل بس ماكو أي رد .. بعد 4 ساعات –

سامي : وايد طولت الله يستر .. زين ماقالتلج مشعل وينه ؟ بالبيت ولا لأ؟
أمل : لا ماقالت
سامي : هالريال مادري متى راح يتعدل

- اطلعت الدكتورة –

الدكتورة : انت ريلها ؟
سامي : لا انا حماها
أمل : خير دكتورة بشري؟
الدكتورة : اولدت الحمدلله و صحتها بخير .. بس الطفلة تعبانة وحطيناها بالشيشة
سامي : بنت؟
الدكتورة : اي .. بس تعبانة ادعولها
أمل : الله يستر .. أقدر اشوف فاطمة ؟
الدكتورة : بعد شوي نوديها غرفتها وتشوفونها

- ثاني يوم الساعه 10 الصبح .. سامي راح الشغل وتمو أمل وفاطمة قاعدين بروحهم –

فاطمة : ( توها مسكرة التلفون من مشعل وعيونها دمعت )
أمل : ها اشقال ؟
فاطمة : يقول مايبي يسميها .. ولا له شغل فيها
أمل : استغفرالله .. اشلون يعني .. ماقلتيله انها مريضة ؟ ماراح ايي يشوفكم ؟
فاطمة : ( تمسح دموعها ) لأ ماراح ايي
أمل : لا حول ولا قوة الا بالله .. ميخالف حبيبتي هدي نفسج .. راح ايي بعدين صدقيني
فاطمة : انا ماهمني اهو .. انا احاتي هالبنت .. الدكتور يقول ان حالتها ماتسر .. فيها نقص اكسجين حاد وخايفين على مخها يعني تحتاج علاج وتكاليف ومتابعة
أمل : الله كريم وانا ماراح اخليج بكون معاج
فاطمة : انا قررت قرار .. واهو احسن شي لي ولها
أمل : شنو؟
فاطمة : انا قررت اعطيج اياها تربينها انتي
أمل : ( انصدمت ) شنوو!!!!
فاطمة : اي امول والله احسن لها .. انتي شايفه بناتي وشطانتهم يعني اشلون ابعدها عن هالاجواء ؟ واشلون اقدر اراعيها وبناتي صغار .. غير اني لازم على طول اوديها مراجعاتها ( دمعت عينها )
أمل : ( اسكتت مده من الصدمة ) .... انتي متأكدة ؟
فاطمة : اي متأكدة
أمل : ومشعل ؟
فاطمة : ماراح يقول شي .. والله احسن لها من العيشه معاي ماراح انتبه لها عدل .. ( امسكت ايد أمل ) وانتي اختي مو غريبه متى ما ابي اشوفها راح اييلج وانتي بعد راح تزوريني على طول
أمل : ( انزلت ادموعها ولمت اختها ) اييبها لج كل يوم لو تبين بعد .. وراح احطها بعيوني
فاطمة : ( تبتسم ) خلاص انا بروحي على طريف لا تبجيني معاج .. أدري اشكثر انتي تبين ياهل .. ومحد راح يهتم فيها كثرج
أمل : فطوم ؟ .. من اليوم بعتبرها بنتي لا تسوينها فيني على يوم وتاخذينها مني والله اموت
فاطمة : لا والله ما راح آخذها .. انا واثقه اني لو ربيتها راح تتعب أكثر .. ماراح اوفر لها الراحه والعلاج اللي تقدرين توفرينه لها .. بس انتي تقدرين عليها ؟ يمكن لا سمح الله نقص الاكسجين الحاد اللي فيها يسبب اعاقة بمخها او شي
أمل : ميخالف لو شنو كان فيها هم مستعدة اربيها.. والله والله راح ابديها على نفسي و أي شي تحتاج له اوفره لها ماراح احسسها بالنقص كلش .. بس حلفي انج ماراح تاخذينها مني
فاطمة : والله ماراح آخذها
أمل : ( قامت وخذت القرآن من على الطاولة اللي يمهم ومدته جدام فاطمة وايدها ترجف ) حلفي عالقرآن انج ماتاخذينها مني بيوم
فاطمة : ( فيها بجية بس حابستها ) انا مو طاهرة الحين بس والله العظيم ماراح آخذها .. احسن لها تكون عندج .. يللا قوليلي شنو راح تسمينها ؟
أمل : ( لمت القرآن ودموعها تنزل ) ابي اسميها ندى
فاطمة : ( ابتسمت ) حلو الاسم
---

- مشعل سمع بالخبر وما تضايق بالعكس قال حق فاطمة زين ماسويتي وين نقدر نربي بنت مريضه .. وسامي اول ما عرف مايدري يتضايق او يتستانس .. راح سأل مشعل اذا كان مقتنع بهالقرار وتأكد بنفسه ان مشعل متنازل عن بنته لهم .. حس بفرحة غريبة .. فرحة مو كاملة عدل –

( تمت ندى 3 شهور بالشيشة – الحضانة – .. وبعدها خذتها أمل وراحت بيتهم .. ام يديدة وبنت يديدة وعلاقة يديدة ... )

يا حبيب عمري أنا .. يا حياة روحي أنا
يا جناحي في الهوى .. يا بحوري في الهنا
شويه إن قلت أحتاجك .. شويه إن قلت أشتاقك
و شويه إن قلت أنا كلي لك .. و شويه إن قلت أهواك
لو تجمع حب العالم .. و احساس و شوق العالم
و كلام الحب وأغاني الحب .. ما تساوي يا عمري غلاك

[SHwarviskya]

- 2/ صدمة –

- حياة أمل وسامي تغيرت 180 درجة .. وخصوصا أمل صارت غير .. كانت كل ما تبجي ندى اهي تضحك وتقوم لها .. وسامي وايد ارتاح مو بس لأن صار عنده بنت .. بس لأن شاف أمل بصورة غير عن اللي كانت عليه .. صارت ضحكتها ماتفارقها –

أمل : ( شايلة ندى ) بس ماما بس يا قلبي انتي لا تبجين فديت عمرج
سامي : ( دش الغرفه ) حبيبتي امول .. فاطمة عالخط تبي تكلمج
أمل : قولها بس انوم البنت واكلمها
سامي : لا صوتها متضايق عطيني ندى وروحي كلميها
أمل : لالا باخذها معاي ( اطلعت من الغرفه ومعاها ندى )

- اقعدت بالصالة وارفعت السماعه –

أمل : الو .. هلا فطوم
فاطمة : ( تسمع بجي ندى ) اشفيها ليش تبجي ؟ مريضة ؟
أمل : لا تينن مافيها شي .. بس مستعسرة تبي تنام
فاطمة : ولهت عليها .. ودي اييج واشوفها
أمل : حياج متى ماتبين تعالي
فاطمة : تدرين .. لا تزعلين من كلامي صج ان معورني قلبي لأني عطيتج اياها بس..
أمل : ( تقاطعها ) فطوم انا اشقلت ؟؟؟ مو حلفتيلي انج ماتيبين هالسيرة ؟ صارلها 5 شهور عندي اهي بنتي الحين .. عفية لا تذبحيني بهالكلام

فاطمة : حبيبتي لا تحاتين والله ماراح اخذها .. اصلا داقه اقولج اني احمد ربي على القوه اللي عطانياها .. يوم عطيج البنت ( اقعدت تبجي ) والله بكل صلاة احمد ربي وادعي انها تعيش مرتاحه معاج .. أمول البنات مو مرتاحين .. والله كل فلوسه يضيعهم .. تخيلي طلبات البنات ماقدر اوفرها .. حتى خبز مو قادر يوفره لنا .. ضيع المعاش كله وضيعنا معاه .. الف حمدلله انها عندج ولا هالعيشة

أمل : ليش ماقلتيلي انج محتاجة ؟ فطوم انا اختج
فاطمة : خلاص أمل بس جم مره ساعدتينا انتي وسامي .. والله تعبت مع هالريال تعبت
أمل : زين خلاص اهدي وتعالي عندي منها تشوفين ندى ومنها اكلمج
فاطمة : اييلج بعد صلاة المغرب ان شاءالله

- وتمت فاطمة كل يومين اتروح حق اختها او العكس امل اتروح حق فاطمة ومعاها ندى .. يعني كانت فاطمة تشوفها على طول ومتطمنة عليها –

- بعد مرور خمس سنوات –

( سامي قاعد يقرى جريدة بالصالة .. و أمل قاعدة يمه تشوف تلفزيون .. وبنتهم ندى ( ان صح التعبير ) قاعدة يم سامي تقرى قصة انجليزية لأن ابوها وامها اللي اهم – سامي و أمل – دخلوها انجلش سكول )

أمل : ماما ندوي شنو تقرين
ندى : ( ارفعت القصه توري امها الغلاف ) the little princess .. ال مس قالت اقروها
أمل : الله .. اذا خلصتيها قوليلي قصتها لأني ماعرف انجليزي مثلج
ندى : ( تبتسم و اطلعت غمازتها بخدها اليسار ) بلى تعرفين سمعتج تكلمين فريدة انجليزي
- فريدة خدامتهم الفلبينية -
أمل : ( تضحك ) فديت بنيتي الذكية .. ميخالف هم قوليلي القصة اذا خلصتيها اوكي؟
ندى : اوكي ( ردت تقرى القصه )
أمل : اقول سامي .. عطيت مشعل المبلغ اللي طلبه ؟
سامي : ( واهو يقرى الجريدة ) اي وكالعادة ماراح يحل فيه ولا مشكلة من مشاكلة اللي موراضية تخلص
ندى : ( وقفت قراية جنها تذكرت شي .. حطت القصة يمها و قربت اكثر من ابوها ) بابا ؟
سامي : ( حط الجريدة على فخذه ولم ندى بيد وحده ) ها بابا
ندى : اليوم ال مس كانت تسوي مسابقه واكتبت اسامينا عالبورد .. و اكتبت اسمي ندى مشعل جان اقولها اسم بابا سامي بس ماصدقتني وقالتلي لا تجذبين مرة ثانية

- أمل تغير لونها وحست بدوخه وطالعت سامي بنظرات خايفه –

سامي : حبيبتي ندويه تدرين اشكثر انا وماما نحبج .. بس في شي..
أمل : ( قاطعته ) أول منزمااان ابوج كان اسمه مشعل بس بعدين غيره وصار اسمه سامي .. بس للحين بالأوراق اللي عند المدرسه ماغيرو اسمه
ندى : ( تطالع ابوها ) صج بابا؟ كان اسمك مثل اسم عمو ابو فروح ؟

( سامي خز أمل .. واهي كانت تطالعه بنظرة جنها تترجاه )

سامي : اي يبه صج
ندى : ( باست خد ابوها ) انا احب اسمك اليديد
سامي : ( يضحك ) مشكورة .. يللا بابا روحي اقري القصة بدارج .. بكلم ماما شوي
ندى : زين ( خدت القصة و راحت داخل )
سامي : ( بعصبية بس بصوت واطي ) لي متى ناوية تخشين عنها الصج ؟ لين تعرفه بروحها وتنصدم ؟ مو شايفه اشكثر البنت ذكية و مخها اكبر من عمرها ؟ صدقيني كلها سنة و راح تعرف بنفسها
أمل : ادري انها ذكية وايد ماشاءالله بس مادري خايفه مابيها تدري
سامي : راح تدري .. هالشي ماراح تقدرين تخشينه .. خلينا انقولها الحين صدقيني أحسن لأنها طفله بسرعه تنسى
أمل : ( حطت ايدها على ايده ) لا لا الله يخليك احلفك بالله ماتقولها شي
سامي : ( تنرفز ) اووو اللي بسويه حق مصلحتنا كلنا
أمل : لا .. عليك الله ماتقول لها
سامي : ( خذا جريدته ورد يقرى وحقرها )

- بعد جم يوم في بيت فاطمة –

فاطمة : يا هلا والله ( اتسلم على اختها )
أمل : هلا فيج اشلونج ؟
فاطمة : تمام الحمدلله .. اهليييين بالعسل ندوويه اشلووونج ( اقعدت عالغنفه وقعّدت ندى على حضنها )
ندى : زينه
فاطمة : اشلونج بالمدرسة ؟
ندى : زينه
فاطمة : ( تبوس ندى على خدودها وراسها ) فدييت الزينين
أمل : ( تطالع فاطمة وتحس بنغزه بقلبها ) فطوم خليها تلعب مع البنات
فاطمة : لا لاحقه عليهم انا ماشبعت من سوالفها
ندى : ابي اروح حق فروح و نواره
فاطمة : ( تبوس غمازتها حييل ) حلااات الغمااازه .. يللا روحي لعبي
ندى : راحت تركض
فاطمة : ( اسرحت ودمعت عينها .. جان تمسحها بسرعه )
أمل : ( تضايقت ) فطوم تره انا ماحرمتج من شوفتها كل يومين قاعدة ايي واييبها معاي
فاطمة : ادري بس اسم الله عليها كلها صحة وعافية و..
أمل : ( بطلت عينها مصدومة ) يعني لو كانت مريضة جان عادي ماقلتي شي .. بس ليش انها بفضل الله مافيها شي .. قاعدة تتحسرين وودج تاخذينها صح؟؟
فاطمة : لا والله ماقلت جذي بس..
أمل : ( الدموع معلقه بعينها ) مفهومة جملتج .. بس شوفي فطوم .. ندى بنتي انا .. وما اسمح لج لا انتي ولا مشعل انكم تفكرون لمجرد التفكير انكم تاخذونها مني
فاطمة : ( اسكتت مده وتنهدت ) خلاص خلينه من هالسالفه .. انا أفكر احمل
أمل : ( للحين متضايقه بس هالخبر فرحها شوي ) الف حمدلله .. وهالمرة مثل ماقلتلج .. راح اوديج خاص عشان يديرون بالهم عليج عدل
فاطمة : والله خايفه .. يطيح الجنين .. قلبي مايتحمل أكثر
أمل : لا تقولين جذي والحمدلله انج قررتي تحملين .. و راح تتابع الدكتوره حالتج اول بأول .. بوديج عند وحدة مشهورة وشاطرة

- فاطمة من بعد ولادة ندى .. احملت 3 مرات وكله الجنين مايكمل 4 شهور ويطيح .. والأخير كان ولد بس هم طاح .. بعدين اتعبت نفسيتها وقررت انها ماتحاول تحمل مره ثانية –

فاطمة : ( ترفع ايدها وتدعي ) يارب أسألك الحمل السليم و يارب ارزقني بولد كامل ومعافى يارب
أمل : آمين يارب

- بعد سنة –
( صار عمر ساره 14 .. ريم 12 .. جنان 9 .. نوره 8 .. فرح 7 .. وندى 6 سنوات .. و فهودي توه عمره شهرين )

فاطمة : ( سادحه فهود بسلة اليهال يمها ) كل ما اشوفه احمد ربي ليل نهار على هالنعمة
أمل : ان شاءالله يكبر وتشوفين عياله بعد
فاطمة : ان شاءالله
أمل : ها اشلون مشعل الحين ؟
فاطمة : متعدل وااايد ماشاءالله لا احسده .. تخيلي حتى الزقاير قطعها ؟؟
أمل : ( تضحك ) ايي اشعلييه فهودي قدر يغير اللي مايتغير
فاطمة : الف حمدلله .. تعدل حيل .. قطع سوالف الخرابيط اللي عنده .. بس المعاش للحين يطير حق الديون اللي راكمها عليه
أمل : كل شي راح يتعدل لا تحاتين .. دام يه فهود صدقيني كل شي راح يتعدل مع مشعل

[SHwarviskya]

- غرفة البنات –

ندى : جنون يعني انتي و نوره خوات .. وانا وفروح خوات اوكي ؟
نوره : لا مابي انا يعني اختج بعد مو بس فروح
ندى : لا بس ابي فروح اختي
فرح : اي انا بعد ابي ندى اختي .. وانتو يعني صديقاتنا
جنان : اوكي
نوره : ( تصرخ ) لا مابي .. شنو مايصير كله تختار فروح تكون اختها

( دشو عليهم ساره وريم )

ساره : اشفيكم تصارخون ها ؟
ندى : قاعدين نلعب
ساره : وجذي تلعبون بصراخ ؟
نوره : ندى ماتبيني اصير اختها باللعبه
ساره : وليش يعني ؟
ندى : بس مابي يكون عندي خوات وايد .. بس فروح كافي
ساره : وليش ماودج خوات وايد مو احلى ؟
ندى : لا مو احلى
ساره : ليش ؟
ندى : ابي باللعبه يكون عندنا العاب وايد وملابس وايد .. بس اذا صرنا وايد خوات راح تخترب اللعبه لأن ماراح نكون اغنياء
ساره : مو شرط .. عادي يعني كلكم خوات واغنياء وعندكم وايد ملابس .. اهي لعبه سويها على كيفكم
ندى : لا مايصير .. شوفي انتو وايد .. وماعندكم ملابس والعاب مثلي .. وانا لأني بس وحده كل شي عندي

ريم : ( منقهره حيل من عيشتهم ) وانتي مستانسه لأنج غنية صح ؟
ندى : اي
ريم : تدرين انتي اختنا
ساره : ( بصراخ ) ريم!!!
ريم : اي خنقولها .. ام السان هذي .. كل يومين اتقول انا غنية وانا غنية .. قاعده تقهرنا لأن كل شي عندها
ساره : زين بس خلاص امشي انروح غرفتنا
ريم : لا انا بقولها .. انتي اول ما انولدتي
ساره : ريم خلاص
ريم : ( احقرتها وكملت ) اول ما انولدتي خالتي امل خذتج وربتج عندها .. بس بالاساس انتي اختنا اللي اولدتج امي مو خالتي امل
ندى : ( تصرخ ) انتي جذابه
ريم : والله مو جذابه .. سامي يصير عمج مو ابوج .. وأمل خالتج مو أمج
ندى : ماراح اصدقج
ريم : يالغبيه شوفي شهادتج شنو اسم ابوج ؟
ساره : ريم اقولج خلااص
ندى : ( تصرخ ) ابوي كان اسمه مشعل بعدين غيره
ريم : غبيه قصو عليج .. والله انتي اختنا والله العظيم ما اقص عليج
ساره : انا راح اعلم امي ( اطلعت من الدار )
ندى : ( اقعدت اتصارخ وتبجي ) جذااابه جذااابه امي امل وابوي سامي .. ليش اتجذبين
فرح : ريم صج ندى اختنا ؟
ريم : اي والله العظيم صج .. بس امي عطتها خالتي امل

( ندى طاحت عالأرض واقعدت ترجف بطريقة تخوف.. وجنان ونوره و فرح اقعدو يصارخون .. و ريم اول ماشافتها اركضت غرفتها واقفلت عليها الباب )
--

- بالصاله –

ساره : يمه .. بكلمج شوي
أمل : تستحين من خالتج سااروو
فاطمة : ( تكلم ساره ) شتبين ؟ تكلمي .. مايصير اقوم عيب قاعدين انسولف انا وخالتج
ساره : بس يمه ...
أمل : ( تبتسم ) خلاص اصلا احنا نبي نروح .. نادي ندوي بسرعه خل نمشي .. و بعدين كلمي امج على راحتج
ساره : ( ساكته )
فاطمة : سويره اشفيج شسويتي ؟؟ اعرفج اذا ارتبكتي

- فجأه وصلهم صوت اليهال قاعدين يصارخون بهستريا وينادون امهم –

أمل : ( امسكت قلبها ) اشفيهم ؟
فاطمة : ( قامت ) يمه ساره قعدي يم فهود خل اشوف خواتج
ساره : يمه ريم قالت حق ندى الصج
أمل : ( تصرخ ) شنو؟؟ اشقالت ؟؟ تكلمي
ساره : ( اسكتت )
فاطمة : ( راحت غرفة بناتها واهي تركض )
أمل : ( الحقتها وايدها على قلبها )
--

- دشو الغرفه مالقو احد لأن اليهال من الخرعه اطلعوا بره الغرفة .. بس كانت ندى ترجف عالارض و رغوه تطلع من حلجها –

أمل : ( اول ماشافتها غطت ويهها واقعدت تصرخ ) بنتي .. اشفيها اشصار لها ؟
فاطمة : ( حاولت تمسك ندى وتهديها بس ماقدرت لأن ندى كانت ترجف حيل ) بسم الله الرحمن بسم الله الرحيم .. بسم الله الشافي .. خلاص ندوي قومي .. أمل دقي عالاسعاف بسرعه
أمل : ( تبجي ) اشفيها بنتي ؟؟
فاطمة : ( تصرخ ) أمل دقي عالاسعاف خلصيني
أمل : ( راحت بسرعه عشان تدق عليهم )
فاطمة : ( اقعدت تمسح حلج ندى بكلينكس وتقرى عليها قرآن )

- بعد دقايق ردت أمل الغرفه .. لقت ندى هدت من الرجفه شوي شوي لين صارت منسدحه من غير حركه –

أمل : ( اقعدت يمها و قلبها بغى يوقف ) اشفيها ؟
فاطمة : ( تمسح على شعر ندى ) ندوي حبيبتي ؟
ندى : ( افتحت عينها طالعت فاطمة مده .. بعدين طالعت أمل .. جان تبجي بصوت عالي ) ماما
أمل : ( امسكت ايدها ) ها ماما انا اهني
ندى : ( لمت أمل ) خل نروح بيتنا مابي ايي اهني مره ثانيه
فاطمة : ( قاعدة يمها ) ليش حبيبتي
ندى : ( دافنه راسها بصدر امل وتبجي ) بس مابيكم انتو جذابين ماتحبوني
أمل : حبيبتي كلنا نحبج
ندى : أدري انتي مو امي بس خذيتيني وحبيتيني بس اهي قطتني ماتبيني
أمل : ( انصدمت اتطالع فاطمة ودموعها تنزل )
فاطمة : ( دموعها انزلت ) انا ماقطيتج انا..
ندى : ( غمضت عينها وراسها بصدر امها أمل ) ماما بروح البيت
أمل : حبيبتي نطري شوي بنروح المستشفى اول خل يشوفج الطبيب
ندى : ( مغمضه عينها وماردت )
أمل : ندوي ؟
فاطمة : ( قامت واهي تبجي اطلعت بره الغرفه وخلتهم بروحهم )

- بعد 10 دقايق اوصلت الاسعاف .. امل شالت ندى واصعدت الاسعاف معاها –
- بالمستشفى –

الدكتور : اهي الحين نايمه لازم تاخذ راحه كافيه .. بس حسب حالتها الصحية اول ما انولدت.. وحسب اللي وصفتيه لنا.. فأتوقع اللي صارلها نوبة صرع
أمل : ( اشهقت ) صرع ؟
الدكتور : هدي نفسج مافيها الا العافيه ان شاءالله .. انا انصحج بالدكتور صالح ال.. اهو متخصص بالأعصاب

- اليوم الثاني عند الدكتور صالح –

د.صالح : نيرس اخذي ندى واشتريلها حلاو
الممرضه : اوكي دكتور
ندى : اتطالع ابوها
سامي : بابا روحي معاها

- بعد ما اطلعو –

د.صالح : مثل ماقال الدكتور اسامه بنتكم فيها صرع
أمل : بس بنتي ماكان فيها أي شي اشلون صار جذي فجأه
د.صالح : البنت انولدت وفيها نقص حاد بالاكسجين .. فجزء من الدماغ تأثر بهالنقص وظهر بهالصورة
أمل : ( دموعها بعينها ) مافهمت وليش يعني توه يالله بيّن هالشي ؟
د. صالح : اهو جذي .. ماله سن معين .. بس اغلب شي يبين بمراحل الطفوله الاولى .. وفي ناس تظهر عليهم اعراض هالمرض فترة المراهقة
سامي : واشلون نقدر نعالجه ؟
د. صالح : اول شي لازم اتعرفون كل شي عن هالمرض .. عشان تتفهمونه اكثر
سامي : اي اكيد
د. صالح : هالرجفه اتصير لأن في اضطراب بالمخ .. وفي فترة معينة مدتها دقايق معدودة ماتتعدى ال4 دقايق بالكثير .. يضطرب المخ وماتوصله ارشادات سليمة فتصير عند المريض حالة تشنجات مايقدر الجسم السيطره عليها .. بس بهالوقت اهي ماتكون حاسه بأي شي حواليها واذا قامت لازم تطمنونها ان ماكو أي شي يخوف .. لازم ترتاح وتنام بعد النوبة
أمل : يعني ممكن ترجع لها الحالة مره ثانيه؟
د. صالح : ترجع من فترة لي فترة وان شاءالله مع الايام تروح هالنوبات .. وانا راح اعطيكم حبوب .. لازم تمشي على الجرعات يوميا وبالظبط مثل ما اقول عشان نسيطر عالحاله .. و انا اقترح ان يشوفها طبيب نفسي .. لأن هالمرض هم يحتاج مساعدة الطبيب النفسي عشان تقدر تتأقلم مع حالتها اليديده .. عندي واحد شاطر وايد بس جلساته راح تكلفكم
سامي : مو مهم الفلوس المهم البنت
امل : ( اقعدت تبجي ) اخ يا بنتي عين وصابتج
سامي : ندى بخير الحمدلله لا تقولين جذي
د. صالح : البنت لازم تحس براحه ومايصير اتشوفج تبجين .. عشان تتفهم حالتها اكثر

- وقعد الدكتور يشرح لهم كل شي عن مرضها .. وقالهم ان قبل النوبة بدقيقتين تقريبا .. المريض يحس بخدر بأطرافه وبراسه وهالعلامات تكون بمثابة تحذير عشان ينسدح بمكان آمن مافي اشياء ممكن تأذيه اذا صارت النوبه -

- بالليل بغرفة ندى –
( سامي وامل قاعدين يكلمون ندى واهي منسدحه بتنام )

ندى : بس ليش خلتني وماتبيني ؟
سامي : اهي ماخلتج .. بس لأن امج امل كانت وايد تحبج وودها تعيشين عندها مثل بنتها .. عشان جذي امج فاطمه وافقـ..
ندى : لا .. امي امل و بس .. مابي ام ثانيه .. ومابي ابو ثاني .. وماراح اروح اهناك كلش
سامي : ( باس راسها ) خلاص اللي تبينه راح يصير .. نامي الحين
أمل : ( باستها ) تبيني انام يمج اليوم ؟
ندى : ( تبتسم ) اي .. وانت بعد بابا
سامي : ( يضحك ) لا ماقدر بعدين ينكسر السرير
أمل : ( انسدحت يم بنتها ) يللا سامي سكر الليت وخلنا ننام
ندى : باي بابا
سامي : تصبحون على خير ( سكر الليت وطلع )

[SHwarviskya]

- 3 / دلال –

- صار عمر ندى 20 سنه .. وهذي ثاني سنه لها بكلية الهندسة تخصص هندسة كبيوتر.. و فرح 21 سنه معاها بنفس الكلية ونفس التخصص واهي بسنة ثالثة .. و نوره 22 سنة بكلية العلوم يمهم وهم اهي بسنة ثالثة لأنها كانت محوله تخصصها -

اما الباجي :
( ساره 28 متزوجه وعندها 3 صبيان .. ريم 26 هم متزوجه وعندها ولد وبنت .. جنان 23 توها متزوجة وسافرت مع ريلها يكملون دراستهم بره .. والأخير فهد عمره 14 سنة )
طبعا ماراح يهمكم الا ندى و فرح مثل ماقلنا اول شي .. خل اوصفهم لكم

ندى : ( ناعمه حيل ) بيضة و عيونها ناعسه ورموشها ماشاءالله وايد .. خشمها حلو وحلجها عادي لا كبير ولا صغير .. عندها غمازة قوية بخدها اليسار تطلع حتى لو ابتسمت ابتسامة خفيفة .. شعرها لي نص ظهرها ولونه بني بس بالشمس تبين لمعته ذهبية – مو متحجبه -.. ضعيفه ( من المرض لأن نفسيتها كانت وايد تتعب فما تاكل عدل ) بس عندها صدر فصاير شكل جسمها حلو .. طولها 160..

فرح : بيضه و عيونها كبار وباجي ملامحها متناسقه .. عندها خدود .. نقدر نقول حلوه .. شعرها اسود قصير – متحجبه - .. جسها حلو وهم عندها صدر ( طالعين على امهم ) .. طولها 163 ..
--

من اليوم اللي اعرفت فيه ندى ان امها الصجيه اهي فاطمة .. واهي ماترضى تروح اهناك الا بالمناسبات .. و علاقتها مع خواتها بارده حيل ماعدا فرح كانت وايد تنام عندها وتسليها وصارو وايد قراب من بعض .. اما عن حالتها الصحية ف اهي تروح حق الدكاتره بشكل دوري ( حكم أمل وسامي ) .. و النوبات اتييها بين فترات بعاد عن بعض مرات من غير سبب ومرات من الاضاءة والارهاق .. وطبعا على طول تاخذ ادويه و ماتقطعها..

- كلية الهندسة –

فرح : حياتي ندوي والله امي كل ليلة تبجي حرام عليج عاد .. روحيلها طيبي خاطرها شوي
ندى : اووو فروح جم مره اقولج لاتفتحين معاي هالموضوع
فرح : بس امي..
ندى : اي بالظبط اهي امج انتي مو امي انا
فرح : اوكي خلاص اعتبريها خالتج و طلي عليها
ندى : ماصارت مناسبة عشان اروح .. وصراحه بس اشوفها اتذكر وحدتي طول هالسنين .. واشلون انتو كلكم مع بعض وانا بروحي
فرح : حرام عليج .. انا كل ويك اند نايمه عندج
ندى : انا اتكلم عن لمتكم انتو كلكم خوات مع بعض الا انا .. قطتني لأني مريضة ولأني بنت صح ولا لأ؟؟
فرح : ليش تقولين جذي ؟
ندى : لأن هذا الصج .. انتو بناتها ومافكرت تتخلى عن أي وحده فيكم .. بس انا عادي قطتني بكل سهوله
فرح : لو تبين الصج حياتج وايد احلى من حياتنا
ندى : ( بعصبيه ) مو كل شي ينقاس بالفلوس .. حنان الام يسوى فلوس الدنيا .. صج ان امي مو مخليه علي قاصر وحنانها مكفي وموفي بس هم مادري كل ما اتذكر اموت قهر .. حتى اعيال سارة و ريم مايعرفوني عدل
فرح : انتي اللي قطعتي ريلج عن بيتنا
ندى : منو المسؤول عن هالشي ؟
فرح : حمدي ربج انج عند خالتي امل والله لو كنتي عندنا جان حالتج اسوء
ندى : خلاص عفيه فروح تونا بداية الدوام بليز لا تعكرين مزاجي اكثر .. وفكيني من هالاسطوانه اللي انعيدها كل يومين
فرح : اوكي خلاص على راحتج
ندى : اشعندج وقت الغدى ؟ خاطري اتغدى بره الكلية
فرح : نطري خل اشوف ( اوقفت اتدوّر جدولها بالجنطه )
ندى : وانتي للحين ماحفظتي وقت محاضراتج ؟
فرح : لا طبعا .. تونا بسم الله صارلنا اسبوع مداومين شلون احفظه ؟
ندى : كا انا حافظة جدولي وحافظة القاعات بعد
فرح : انتي مخج كبيوتر ماشاءالله انا مخي على قدي
ندى : ( تضحك ) زين خلصيني اشعندج بعد الوحده ؟
فرح : ( تطالع جدولها ) مممم خل اشوووف .. ماعندي شي فاضيه .. والله اليوم جدولي يهبل الساعة 11 ونص اخلص
ندى : ويي .. انا عندي داتا ستركجر من 11 لي وحده .. خلاص شوفي .. انا احضر اول ساعه بعدين استأذن
فرح : صار عيل اذا طلعتي دقي علي ناطرتج
ندى : اوكي سي يو
فرح : باي
( كل وحده راحت محاضرتها )

- بيت ام فهد ( فاطمة ) –

فاطمة : والله يا أمول اني كل يوم احلم فيها .. احس بعذاب والله
أمل : ( حطت ايدها على جتف اختها ) ادري والله حاسه فيج
فاطمة : ( بعصبيه ) لا مو حاسه فيني .. محد حاس فيني
أمل : والله اني كله اقولها اتطل عليج بس مو راضية وبصراحة اخاف اضغط عليها .. تدرين بعد حالتها الصحية تتعب و..
فاطمة : ادري ادري .. بس والله ولهت عليها وعلى ريحتها مايصير جذي ماتخليني اشوفها الا وين ووين
أمل : ( اسكتت )
فاطمة : وحتى لو ييت بيتكم تحبس روحها بغرفتها .. والله لو مو حالتها الصحية جان اجبرناها بالقوة انها اتزورنا انا وابوها
أمل : ( معصبة ) فاطمة انتي يوم عطيتيني البنت حلفتيلي انج ماراح تطالبين فيها .. وبعدين عن أي ابو تتكلمين ؟؟ مشعل اصلا مو عادها وحدة من بناته .. وهذا احسن عالأقل كان قد كلمته يوم عطاها اخوه
فاطمة : ( اقعدت تبجي ) أمل لا تحرقين قلبي اكثر الله يخليج تره انا اللي سويته حق مصلحتها .. والله لو كانت عايشه عندي جان حالتها الصحية و النفسية اسوء من اللي اهي فيه .. بناتي ما ترقعوا الا يوم تزوجوا .. طفولتهم ماكانت مثل غيرهم .. والحين شوفي نوره وفرح .. اهي سيارة وحده يتشاركونها معاي وكل يوم هوشة عليها
أمل : ( اكسرت خاطرها ) الله يعينكم .. تره والله لج اجر باللي سويتيه فرحتي قلبي بضنى وخليتيني احس باحساس كنت محرومه منه
فاطمة : ( ساكته )
أمل : ( تحاول تغير الموضوع ) وعلى طاري السيارة انا قلت منزمان خليني افتح لكم سيارة ثانيه حق فرح بس انتي الله يهداج مو راضية
فاطمة : لا مشكورة مانبي شي .. كافي بس تخلين بنتي تحبني .. تكفين حاولي فيها
أمل : ( تضايقت يوم اسمعتها اتقول بنتي ) ان شاءالله بكلمها بس ماراح اضغط عليها

- كلية الهندسة -
( بالمحاضرة .. ندى قاعده يم رفيجتها دلال و كل شوي تشوف التلفون وتجيّك عالساعه )

دلال : ( بصوت واطي ) اشفيج كل شوي تطالعين التلفون ؟
ندى : لأني بتغدى مع بنت خالتي فرح تأخرت عليها لازم اطلع الحين
( طبعا جدام الناس اهي وحيدة امها وابوها وماعندها خوات )
دلال : واي عاد انا ميته يوع واكره هالمحاضرة
دكتور ثامر : انتي وياها اذا عندكم سالفة مهمة كملوها بره القاعة
ندى : ( انحرجت حيل ) عفوا دكتور بس انا لازم استأذن عندي شغلة مهمة لازم اروح لها
دكتور ثامر : ( بنفسية ) حياج
ندى : ( بصوت واطي ) يللا اخليج استانسي بالدرس ( قامت )
دلال : ( بصوت عالي ) دكتور انا بعد بستأذن
( ندى طالعتها مصدومه .. بعدين سيدة طالعت الدكتور .. جنها تبيه يعارض طلعة دلال )
دكتور ثامر : روحوا فكووني خل اعرف اشرح
دلال : ( تضحك ) ثانكس داك
ندى : ( تتحلطم بصوت واطي واطلعت )
دلال : ( اطلعت وراها ) عبالج بخليكم تاكلون عني وانا ميته يوع
ندى : ( تبتسم ومالها خلقها ) كلمتي العنتر مالج اخاف مايرضى
دلال : لا ماراح اقوله مو ناقصه عوار راس
ندى : اوكي خل ادق على فروح

- دلال وايد حلوه برونزيه وشعرها لي جتفها كله تسويه كيرلي .. و وايد جريئة .. معنها رفيجة ندى و معاها بأغلب المواد .. بس للحين مو قادرة تتأقلم مع جرأتها سواء بطلعاتها معاها او بطريقة كلامها مع الدكاترة .. وطبعا فرح كلش ما تبلعها وكله تترجى ندى انها تقطع علاقتها بهالبنت –

--
راحت ندى عند سيارتها – بي ام سوده موديل السنة - و كانت فرح واقفه اهناك تنطرها بس اول ماشافت دلال معاها انقلب ويهها

فرح : ( لايعه جبدها ) ها دلال اشلونج
دلال : ميته يوع
فرح : اها .. انا بعد الحمدلله زينه
دلال : ( تضحك ) زين وين بناكل
ندى : بسم الله اول ركبو السياره وبعدين انشوف وين نروح
فرح : ( اتخز ندى ) لا خلينا ناكل اهني بالكفتريا
ندى : فرح صعدي السيارة و بلا سخافه
فرح : اوكي عطيني السويج انا بسوق
ندى : ( بطلت السيارة واقعدت ) لا حبيبتي السيارة سيارتي وانا اللي راح اسوق
( فرح اقعدت يمها .. ودلال اقعدت وره )
فرح : جنج ذالتني لأني ماعندي سيارة ولأنج كل يوم تمريني
ندى : وااي فروح شكو هذا باللي قلته ؟
دلال : خلاص انتي وياها تره اليوع يخليني اعصب الحين انزلكم من السيارة ثنتينكم واروح اكل بروحي
فرح : ( بصوت واطي ) قطييعة يعني شوفوني دمي خفيف
ندى : ( تسولف مع دلال عشان لاتسمع تحلطم فرح ) زين يا ام اليوع وين بتروحين ؟
دلال : لا يبه خلي فرح تختار شكلها معصبه اخاف اختار شي مايعجبها
فرح : ندى وديني ماك البحر
ندى : اوكي
---

[SHwarviskya]

- اوصلو ماكدونالز البحر اسفطت سيارتها .. وكان بره متروس سياكل وشباب –

دلال : وااي وناسه .. خل ننزل حدي يعت
فرح : ( لفت على دلال ) والله انج مستانسه عالسياكل مو عالاكل
دلال : وانتي ليش كله حاطه دوبج بدوبي؟
ندى : بس بنات خلاص عاد .. ننزل ولا نروح مكان ثاني؟
دلال : لا شكو مكان ثاني اهي اختارت ماك وراح تنزل ( بطلت الباب وانزلت )
فرح : ويع وييع اشهالبنت ؟؟ ندوي شكو يبتيها تكفين الحين تلم علينا الشباب كلهم
ندى : خلاص عاد لا تنكدين علي .. امشي ننزل وراها دشت بروحها حرام
فرح : حرام؟؟!!! .. والله تلقينها مستانسة عبالج تخاف؟
ندى : زين نزلي عفية قاعدة اترجاج
فرح : اوكي امشي الله يستر

( انزلوا ودشوا داخل لقو دلال حاجزة طاولة قريبه من طاولة شباب وقاعدين يطالعونها كلهم واهي تتبوسم )

فرح : شايفتها ؟؟ والله ماراح نقعد يمها امشي نقعد اهناك ودقي عليها قوليلها اتييلنا ( راحت حق طاولة بعيده ومافي يمها احد )
ندى : آآخ منكم بتحوشني جلطة بسبتكم ( اقعدت يم فرح ودقت على دلال )
دلال : ( ردت عليها بصوت دلع ) الوه .. وينكم؟
ندى : احنا داخل بس صوب الزاوية .. تعاليلنا
دلال : ( تطالع الشباب ) لااا عاااد ندوووي والله حجزتلكم طاولة تهبل
ندى : اوكي ماتبين اتيين خليج اهناك بروحج باي ( سكرت الخط )
فرح : زين تسوين فيها

- ثواني ويت لهم دلال .. تحلطمت شوي وبعدين اطلبو و خذوا الاكل واقعدوا مكانهم ياكلون –
شوي جان اييون نفس الشباب واقعدو جدام طاولتهم .. و بس دلال انتبهت عليهم لأن فرح وندى كانو ماعطينهم ظهر

ندى : فروح اليوم الدكتور ثامر عصب وفشلني شنو تمنيت الأرض تنشق وتبلعني
فرح : ويع ياكرهه هالثامر سامعة عنه وايد ان يغازل البنات
ندى : اي عينه زايغة شوي

- فرح وندى طالعو دلال ولا عينها كانت بعييد مو صوبهم .. متعديتهم .. و شوي من المايونيز موصخ شفايفها وكانت تلحسه عالبطيئ .. فرح التفتت وراها وشافت الشباب قاعدين يخزونهم ويضحكون –

فرح : هي انتي ما تستحين اشهالحركات القذرة ؟
ندى : خلاص فروح .. تعوذي من ابليس
دلال : ليش يمه اشسويت ؟
فرح : ( قامت ) والله ما اقعد وهذي معانا .. لا ليش تلحسين شفايفج جذي روحيلهم وخلصي عمرج
ندى : عيب فرح اشهالحجي
( دلال منصدمه قاعده اتطالع الشباب )

واحد من الشباب : هذي يعني عايشه دور الأم المربية
دلال : ( اضحكت )
فرح : ( خزت الصبي بعدين اطلعت من المطعم )
ندى : ( قامت ) انا رايحه بتيين تعالي ماتبين خلي أي احد يردج
دلال : لا شوي والحقج بس خل اتهنى بالصمونة
ندى : ( خلتها واطلعت ورا فرح )

- بره المطعم –

ندى : ليش سويتي جذي ؟ جان حقرتيها إلا تخربين الطلعه؟
فرح : ندووي اشفييج ؟؟ ماشفتيها شتسوي ؟؟ ماتستحي اشكره قاعده تغازلهم
ندى : أي و احنا شكو فيها
فرح : لا والله ؟؟ اهي طالعة معانا .. لمت علينا الشباب ماشفتيهم غيرو طاولتهم واقعدو يمنا ؟؟؟
ندى : زين خلاص اهدي وركبي السيارة
فرح : ( واهي تبطل الباب ) قطيعة هذا وعندها حبيب جذي تسوي
( اركبوا السيارة وانطروا دلال )


( كان في اثنين واقفين بره يم سيارتهم – لمبرجيني حمره – سافطينها يم سيارة ندى .. واحد من هالشباب كان يدخن .. مز مزة من الزقارة وقطها وداس عليها .. و أشر حق رفيجه عشان يركبون السيارة )

- أول ما يت دلال اصعدت ورى .. والبست الهاند فري وعلت على اغنية بتلفونها –

فرح : سويتي هالحركة السخيفة عشان ما اتكلم يعني ؟
ندى : تكفين فروح خلاص طاف
فرح : زقمتني والله ماتهنيت بالوجبة
ندى : تعالي بيتنا والله امي تسوي احلى من ماك بألف مرة
فرح : اشرايج انتي اتيين تتغدين عندنا
ندى : ( تبتسم ) لا مشكورة
فرح : اوكي انتي الخسرانة

( بعد فتره لفت فرح على دلال لقتها تسمع اغاني ومعليته حده حتى الصوت طالع بره الهاند فري وقاعده تكتب مسجات بتلفونها )

فرح : اقطع ايدي اذا ماخذت رقم واحد فيهم
ندى : زين واحنا شكو فيها ختولي
فرح : لا بس اهي عندها حبيب شكو تاخذ ارقام ؟
ندى : عاد اشدراني عنها .. اتصدقين هالسيارة ورانا من حركنا من المطعم
فرح : تهقين جمهور دلال لاحقنا ؟
ندى : ( تضحك ) يجوز
فرح : الله يستر من هالبنت
---

- بسيارة الشباب –

شاب1 : اي كيفي ولا تتدخل
شاب2 : يعني بنقعد اليوم كله وراهم منصجك ؟
شاب1 : اي طبعا منصجي واليوم ماراح ارجع بيتنا الا واهي ماخذه رقمي
شاب2 : وايد واثق
شاب1 : ( ابتسم وحط زقارة بحلجه وولعها ) بتشوف..

[SHwarviskya]

- 4/ عقلية الشباب ماتقبل الرفض –

( اوصلو البنات عند الكلية )


ندى : يللا دلول نزلي انا بمشي
دلال : والله ماتهنيت بهالطلعة كلش .. مرة ثانيه خل نروح انا وانتي بس
فرح : نعم نعم؟!! عيدي بالله منو اللي ماتهنى ماسمعت ؟؟
ندى : خلااااااص ذبحتووني .. دلول نزلي والله مالي خلق
دلال : نازله يللا جاااو حبي ( انزلت وسكرت الباب )
ندى : اشفيج فروح ؟ خلاص عاد كل شوي داقرة البنت
فرح : احسن تستاهل ام الرياييل .. عندها واحد شكو ماتصونه ؟
ندى : اوو خلينا من سيرتها وقوليلي .. بتروحين مع نوره ولا انا اوديج بيتكم ؟
فرح : مادري والله خل اشوفها ( طلعت تلفونها ودقت على اختها )
نوره : الو
فرح : ها نواره خلصتي ولا ارجع مع ندى ؟
نوره : انا اخلص بعد ساعة
فرح : اوكي خلاص ارد معاها .. يللا باي
نوره : باي ( سكرت التلفون )
فرح : ( التفتت على ندى ) اتخلص بعد ساعة .. وديني انتي
ندى : اوكي ( حركت السيارة ) .. امبيه فروح السياره للحين ورانا اتصدقين
فرح : حلفي؟؟!!
ندى : والله اهي نفسها اللمبرجيني الحمره
فرح : ( التفتت طالعت السيارة وردت بسرعه اتطالع جدام ) اي والله للحين .. زين شنو ماشافوها انزلت ؟
ندى : يمكن مايبونها اهي
فرح : عيل اكيد يبونج
ندى : واشمعنى انا يعني؟؟ يمكن حقج انتي
فرح : زين خلاص خيولون مالنا شغل فيهم

- اوقفوا عند الاشارة عالسايد اليسار جان توقف يمهم اللمبرجيني واللي يسوق بطل الدريشه وقعد يأشر لهم –

ندى : واقفين يمج واللي يسوق قاعد يأشر
فرح : ندوي لاتطالعينه خيولي
ندى : اوكي ( لفت ويهها وتطالع الرصيف ) احس شكلنا يفشل جدام السيارات
فرح : اي والله

- صارت الاشارة خضرة و مشت ندى سيدة وبنفس الوقت سيارة الشباب بتاخذ الاشارة يسار .. جان يدعمهم –
( ندى وفرح اشهقو من الخرعة )

ندى : دعمني ويعه تويعه ان شاءالله
فرح : ( ماسكة قلبها ) دش فيني
ندى : ( تأشر حق الصبي ) هي انت اشفيك مينون ؟؟
شاب1 : ( يأشر لها تروح يسار وتسفط )

( ندى راحت يسار واسفطت واهو سفط وراها ونزل شاف سيارتها بعدين راح عند دريشتها )

- الشاب حنطاوي طويل وعريض .. جسمه رياضي .. شعره مخففه .. عيونه طوال وحواجبه مرسومين وعراض .. خشمه عادي .. وشفايفه غامجه من الزقاير .. مخفف شواربه ولحيته ديرتي –

شاب1 : اختي بس بفهم شغلة وحده.. متى خذيتي الليسن ؟
ندى : نعم ؟؟!! انا متى خذيته ولا انت ؟
شاب1 : لا والله انتي .. يعني حضرتج واقفه عالسايد اليسار وبتاخذين الاشارة سيدة؟؟ اشلون فهميني ؟
ندى : شنو شلون تعلمني بالقوانين يعني؟؟ اي عادي بروح سيدة مافيها شي انت تبي يسار جان وقفت ورانا ولا لأنك بتغازل واقف يمنا وعلى كيفك بتلف يسار
شاب1 : صارلي ساعتين أأشرلج عشان تخليني اروح يسار ويعني داقة الثقل وماتبين تشوفيني
ندى : انا ثقيلة غصبن عليك
فرح : ندوي خلاص مو وقته هالحجي .. اقول اخوي الحين شنو انكلم اهلنا يعني ولا الشرطة ولا اشلون ؟
شاب1 : ( ابتسم ) اقص الساني قبل لا افكر انادي الشرطة
ندى : ( اتطالع فرح ومبطلة عيونها ) عشتووو
فرح : ( خزت ندى بعدين طالعت الصبي ) زين اندق على اهلنا ؟
شاب1 : شوفي صراحة اهي غلطانة لأن اللي واقف عاليسار لازم يلف مو يمشي سيدة .. يعني الحق معاي وبجذي القانون يقول انها تصلح سيارتي فوق سيارتها بعد .. بس انا بسامحها عشان خاطر عيونج انتي

( ندى توها تبي تتكلم جان فرح تمسك ايدها عشان تسكت )

فرح : تسلم
شاب1 : زين اقدر ايي شوي عند دريشتج ؟ اخاف اقول شي بعدين هذي اتطقني
فرح : اشدعوه مو لهالدرجة ؟ قول اشبغيت
شاب1 : لا والله بروح صوب دريشتج ( راح من جدام السيارة ووقف عند دريشة فرح )
فرح : ( بطلت الدريشة ) هلا اشبغيت ؟
شاب1 : اظن انتي شفتيني لاحقكم من البحر لي اهني عدل؟
فرح : ( انحرجت ) اي
شاب1 : من غير لف ودوران انا سمعت اللي صار مع رفيجتكم والشباب وعجبني موقفج وصراحة حاب اكلمج
فرح : ( تبتسم ) يعني دام سمعت الموقف واني كنت رافضة هالشي عيل اشلون تطلب مني هالطلب؟
شاب1 : يعني انتي رافضة تكلمين نهائيا ً؟؟ ولا كنتي معصبة لأنها لمت عليكم الشباب بتصرفاتها ؟ ابي الصراحة
فرح : ( اسكتت وطالعت ندى )
شاب1 : يللا عاد والله اني ميت يوع وكنت بدش آكل بس انتي خليتيني للحين على لحم بطني وفوق هذا ادعمتني هذي اللي يمج
ندى : انا دعمتك ولا انت دعمتني؟؟ وبعدين هالشي صار لأنك غشيم
شاب1 : ( يكلم فرح ) وهم متحمل اهاناتها عشانج ماكسرت خاطرج ؟
فرح : ( تبتسم )
شاب1 : يللا سجلي رقمي عندج وبعدين فكري فيني وانا متعذب يوع ودعمة واهانات
ندى : ( بطنازه ) اتصدق قطعت قلبي
شاب1 : ( حاقرها و يكلم فرح ) ها ؟ اشقلتي
فرح : ( امسكت تلفونها وماتكلمت )
شاب1 : ( واهو يبتسم ) 9905 ( وكمل لها الرقم واهي تسجل بتلفونها )
فرح : سجلته
شاب1 : دقي علي رنه
فرح : انت مو قلتلي فكري خلاص بفكر
شاب1 : زين دقي اشتخسرين والله والله ماراح ارفع الخط وماراح يروح من رصيدج ولا فلس .. بس بجرب شغله دقي انتي الحين
فرح : لا خلاص قلت افكر
شاب1 : يللا عااد
ندى : لو سمحت انا ميته يوع وراي اقطها بيتهم بعدين برجع البيت عشان آكل ممكن تتكرم وتروح ؟
شاب1 : توج ماكله ماك
ندى : ماكلينا شي و مو مجبوره اشرحلك
شاب1 : ( يتنهد ويكلم فرح ) خلاص انا بخليكم بس تكفين فكري واكثر شي ابيج تتذكرينه الاهانات اللي حصلتها
فرح : ( تبتسم ) خلاص بفكر
شاب1 : الله يجبر بخاطرج .. ( يطالع ندى ) ولاتخافين سيارتج ماصار فيها ولا شي .. مجرد خدش .. يللا ديرو بالكم ( رجع سيارته )
ندى : ( مشت ) بتدقين عليه؟؟!!
فرح : مادري والله
ندى : ماحبيته كلش حسيته سخيف
فرح : ( تبتسم ) لا بالعكس والله دمه خفيف
ندى : والله من هالجملة متأكدة انج راح تدقين عليه
فرح : مادري مادري
ندى : توج زافه دلول .. والحين مفكره تدقين على هذا ؟؟
فرح : اتشبهيني فيها ؟؟؟ اهي وين ماتروح تاخذ ارقام .. يعني عندها حبيب وتكلم غيره الف ؟؟ تشبهيني فيها ؟؟
ندى : لا والله ادري انج احسن منها بألف مره
فرح : عبالي بعد
ندى : بس تبين الصج .. ويهه حلو
فرح : اي شفتيه .. لونه عجيب
ندى : اي صح

- اوصلو عند بيت فرح –

فرح : يللا مع السلامه
ندى : راح تدقين صح؟
فرح : والله مادري يمكن لأ
ندى : زين أي شي يصير معاج قوليلي .. واذا تبين رايي تره انا مو حابته
فرح : اي اكيد لأن دعمج
ندى : اي ولأنه سخيف و غشيم
فرح : زين زين يا الفهيمه .. يللا باي ( انزلت من السيارة )
ندى : باي
---

- دشت فرح بيتهم –

فرح : هلا بأمي حبيبتي
فاطمة : تعالي فروح قعدي يمي شوي
فرح : يمه توني راده خل ابدل وانزل
فاطمة : لا تعالي شوي سولفيلي
فرح : ( اقعدت يم امها وباست راسها ) اهي بخير مافيها الا العافية
فاطمة : حاطه عينج عليها عدل؟ ماصارلها شي
فرح : لا والله يمه لا تحاتين جم مره اقولج الحمدلله والله ماردت لها الحالة من 7 شهور تقريبا
فاطمة : الف حمد وشكر لك يارب
فرح : ها شنو طابختلنا؟؟
فاطمة : كل شي يحبه قلبكم .. اول ماترجع نواره احط لكم الأكل
فرح : زين ابوي وفهيد ما ارجعوا للحين ؟
فاطمة : بالطريج توني مكلمتهم
فرح : يللا عيل خل ابدل و اصلي يكون الكل واصل

- راحت غرفتها بدلت ودشت الحمام – عزكم الله – غسلت وتوضت واطلعت صلت الظهر واقعدت على فراشها وماسكه التلفون بيدها –

( شافت الرقم بالسند واحفظته باسم ( الغشيم ) .. اضحكت وحطت التلفون تحت مخدتها وانزلت تحت )
---

- بيت سامي و أمل –

دشت ندى البيت لقت امها قاعدة بالصالة .. اقعدت يمها ولمتها و تمت حاطه راسها على صدرها

ندى : الله لايحرمني منج يا اغلى البشر
أمل : ( باست راس بنتها ) ولا يحرمني منج يا عيون امج .. يللا حياتي روحي بدلي ملابسج ابوج الحين بيوصل ويبي الغدى جاهز
ندى : ( ارفعت راسها ) ها شنو سويتيلي اليوم ؟
أمل : اليوم ما طبخت لج .. بس سانوم ( الطباخ ) سوه برياني دياي
ندى : يمه تدرين اني احب اكلج اكثر .. جان سويتيلي شي من ايدينج الحلوين
أمل : حبيبتي انا اليوم تعبانه ماقدرت اطبخ ميخالف اكلي الموجود
ندى : تعبانه اشلون يعني اشفيج ؟؟
أمل : مافي شي بس تعب بسيط
ندى : زين ليش مارحتي الطبيب ؟
أمل : ندووي مافيني شي خلاص عاد .. روحي غرفتج ولاتنسين تاخذين ادويتج
ندى : اوكي اكيد راح اخذهم وانتي تعطين الواحد مجال عشان ينسى ( باست خد امها وقامت بتروح غرفتها )
أمل : ( ابتسمت ) الله يخليلج لي ويحفظج من العين
ندى : ( ارجعت ) اي صج يمه قبل لا انسى .. تره في واحد غبي دعمني و
أمل : ( منصدمه ) شنو؟!!
ندى : يمه اشفيج .. كاني واقفه جدامج مافيني شي
أمل : مافي شي عورج ؟
ندى : لا يمه والله مافيني شي .. بس اقولج تره السيارة شوي راح لونها وصار فيها خفس شوي مو وايد
أمل : فدوى يمه .. بالحديد ولا فيج .. اليوم اخلي ابوج ياخذها ويردها مثل ماكانت
ندى : اوكي يللا خل اروح ابدل ( اطلعت من الصاله رايحه غرفتها )
أمل : ( بصوت عالي ) ولاتنسين الدوا
ندى : ( بصوت اعلى ) ماراح انسى
---

- بعد الغدى .. بغرفة فرح –

( فرح منسدحه على سريرها وماسكه التلفون ومترددة حيل اتدق ولا ماتدق ؟؟ .. فجأه رن التلفون واهو بيدها جان تنقز من الخرعه ولا تطلع اللي داقة ندى )

فرح : ( بصراخ ) الووو خرعتيني
ندى : بسم الله انتي اللي خرعتيني في وحده ترد جذي؟
فرح : ( تضحك ) زين اشبغيتي ؟
ندى : اشبغيت يعني .. بشوفج دقيتي عليه ولا لأ؟
فرح : لا والله مادقيت مادري حدي متردده و خايفه
ندى : انا غير ربعي اللي بالمسن مابي ولا افكر اكلم
فرح : اي انا بعد .. والله مادري حدي متردده
ندى : تبين تدقين دقي بس انا قلتلج رايي
فرح : لا لا خلاص مابي ادق
ندى : احسلج
فرح : بخلي الرقم عندي وبفكر.. بس الاحتمال الاكبر اني ما ادق
ندى : اووو تره زعجتيني كيفج سوي اللي تبين .. الحين انا بنام شوي وراي اسوي هوم وورك برمجة ويع
فرح : انا بعد عندي هوم ووركات مو واحد .. يللا خل ننام عيل
ندى : سويت نايت ميرز (( كوابيس سعيدة ))
فرح : ( تضحك ) باي يالهبلة
ندى : باي

[SHwarviskya]

- بعد 3 ايام .. بكلية الهندسة .. نهاية الدوام –

فرح وندى قاعدين يمشون بيردون حق سيارتهم .. جان اتيي دلال ورى ندى وانغزتها من صوب خاصرتها

دلال : ( واهي ناغزتها ) اشلون الحلو
ندى : ( انقزت واشهقت جان يطيح الموكا من ايدها وطشر على الجينز والكعب ) ويعه ان شاءالله
فرح : هيي انتي مينونه ؟؟
دلال : ( ميته ضحك ) اشفيكم تيك ات ايزي
ندى : لا صج اشفيج يعني مايصير جذي بالله طاح عالكتب ناقصه انا ؟
دلال : خلاص ماماتي ماصار شي .. امشي الحمام انا انظفه لج بعد اشتبين ؟
فرح : ( حدها ماتحب دلال ) ندوي انا سابقتج السيارة عطيني السويج
ندى : هاج ( عطتها اياه )
فرح : ( خذته و خلتهم وراحت تمشي بروحها حق السيارة )

- شوي جان يمشي يمها شاب –

.... : وانتي كله تعصبين اذا شفتيها ؟
فرح : ( طالعته وحدها منصدمه ) انت؟؟ اشيايبك اهني؟
شاب1 : ( راح وراها .. وخله مسافه بينه وينها ) شسوي مادقيتي صارلج جم يوم .. قصيتي علي .. ولا كسرت خاطرج .. قلت ايي ادور السيارة ولقيتكم الحمدلله
فرح : اشلون لقيتنا ؟
شاب1 : شوية تفكير ونطره بالشمس .. والحمدلله طلعتي اخيرا
فرح : زين خلاص روح في ناس قاعده تشوفنا
شاب1 : لاتحاتين محد يدري اني معاج .. و عشان لا الفت الانظار عليج مادخلت السيارة بالمسافط .. قاطها صوب الشارع وياي مشي وناطرج اهني بالشمس .. لفي علي شوفي ويهي اشلون تعبان والله اكسر الخاطر
فرح : ( منزله راسها واهي تمشي ) خلاص روح عفيه
شاب1 : والله بروح .. بس اول دقي علي دقة وسديه
فرح : خلاص والله راح ادق روح عفيه
شاب1 : لا اول دقي
فرح : ( مرتبكه حدها .. طلعت تلفونها ودقت عليه رنه وسدته ) خلاص جذي زين ؟
شاب1 : ( يه يمها ) وريني شنو مسيفه اسمي
فرح : لا مابي خلاص رووح
شاب1 : بس بشوف بعدين اروح
فرح : ( ورته الشاشه ) شفت ؟ خلاص روح عاد
شاب1 : ( ميت ضحك ) كله من السخيفه اللي تماشينها اهي قالت لج تسجليني الغشيم مو ؟
فرح : لا والله مو اهي
شاب1 : زين غيريه وسجليه حمد
فرح : ( من الربكة دشت السيارة وسكرت الباب وماردت عليه )

[SHwarviskya]

- 5 / حيرة –

- بالسيارة –

ندى : شفتيها اشلون خلتني اطيّح الموكا؟ .. عليها دفاشة موطبيعية
فرح : ( سرحانه )
ندى : فرووح ؟؟ وين وصلتي قاعده اكلمج ؟
فرح : ها ؟ اشفيج ؟
ندى : انا اللي فيني ولا انتي اللي فيج
فرح : الصراحه حمد ...
ندى : ( منصدمه ) شنو ؟ منو ؟ اشقاعده تخربطين ؟؟؟
فرح : الصبي اللي قبل جم يوم دعمنا...
ندى : انتي كلمتيه ؟؟ مو قلتيلي انج ماراح تدقين عليه
فرح : لا لا انا مادقيت .. اهو قبل شوي يه اهني و..
ندى : اهني؟؟ اشلون يعني ؟ متى ؟
فرح : ندوي خليني اكمل عاد
ندى : كملي
فرح : توه يه اهني وكلمني قالي ليش مادقيتي ومارضى يروح الا يوم دقيت عليه رنه
ندى : زين واشلون دل مكانج ؟
فرح : مو لحقنا المره اللي طافت لي المسافط .. والحين عرفنا من سيارتج .. الظاهر كان يدورنا هاليومين لين لقانا
ندى : صراحه انا كلش مو مرتاحتله يخرع شنو وين قاعدين يدورج عشان تكلمينه
فرح : ( تبتسم ) مادري عنه
ندى : ( اتطالع فرح ) وانتي مستانسه ؟؟ عاجبتج حركاته مو ؟
فرح : ( زادت ابتسامتها ) مادري
ندى : الحمدلله والشكر
---

- غرفة فرح –

( فرح اصعدت غرفتها بعد الغدى .. انسدحت جان يرن تلفونها )
الغشيم يتصل بك .. للحين ماغيرت الاسم .. قاعدة تطالع الشاشة ارتبكت و ردت عليه من غير الو

فرح : ....
حمد : الو ؟
فرح : ....
حمد : الو ؟
فرح : ( بصوت واطي ) الو
حمد : اشفيج ساكته عبالي التلفون فيه شي
فرح : .......
حمد : لو رفيجتج تسلفج ربع السانها جان عرفنا انسولف
فرح : .......
حمد : زين ما عرفت اسمج
فرح : انا صراحه مادري اشلون قاعده اكلمك
حمد : عيل ليش من الاساس وافقتي تاخذين رقمي ؟
فرح : لأنك ماكنت ناوي تروح و اللي معاي كانت مستعيله
حمد : زين الحمدلله انج خذيتيه تره انا خوش واحد وراح تعرفيني اكثر ومتأكد انج بترتاحين لي
فرح : زين بسألك سؤال
حمد : آمريني
فرح : مايامر عليك عدو .. بس ليش قعدت تدورني ؟ دام مادقيت عليك ليش رجعت ؟
حمد : صراحه لأني حاب اكلمج مادري حسيت انج غير ماشاءالله عليج .. عجبني تصرفج يوم طلعتي من المطعم .. مادري يعني بس ماقدرت اشيلج من بالي عشان جذي دورتج ونطرتج يم سيارتكم
فرح : ....
حمد : معاي ؟
فرح : اي
حمد : زين يللا قوليلي شسمج ؟
فرح : اسمي فرح
حمد : الله وايد حلو .. وانا راح اخليه اسم على مسمى
فرح : الحمدلله اهو للحين اسم على مسمى
حمد : يعني حياتج عاجبتج ؟
فرح : اي الحمدلله
حمد : كاملة ؟
فرح : شنو ؟
حمد : حياتج تحسينها كاملة ولا في شي ناقصها
فرح : مممم مافي شي كامل
حمد : اهي كان ناقصها شي والحين موجود وبيكملها لج
فرح : ....
حمد : اليوم مابيج تسكتين .. قوليلي جم عمرج وشنو تخصصج وبأي سنة .. سولفي
فرح : عمري 21 و..
حمد : اشعليييج يعني راشده .. الحين أي غلط تسوينه سيدة المركزي ماكو غشمرة
فرح : اسم الله علي اعوذ بالله
حمد : ( يضحك ) اتغشمر معاج يبه اشفيج .. كملي التخصص والسنة و سولفي عن نفسج
فرح : تخصصي هندسة كمبيوتر وهذي ثالث سنة لي
حمد : حلو
فرح : وانت جم عمرك ؟
حمد : لااا ما اتفقنا على جذي كملي سولفي عن نفسج عن خواتج اخوانج وبعدين اقولج كل شي عني

( وتمت فرح تسولف عن نفسها وعن خواتها وعن اخوها فهد .. اما ندى فاكتفت بجملة انها بنت خالتها ومعاها بالكلية .. ماقالت اكثر من جذي )

فرح : وانت ؟
حمد : لا للحين في شي ماقلتيه
فرح : شنو بعد ؟ كل شي قلته
حمد : شنو عايلتج ؟ ووين ساكنة ؟
فرح : عايلتي تو الناس عليها .. ووين ساكنة ف انت دعمتنا تقريبا يم بيتنا ؟
حمد : الرابية ؟ الرحاب ؟ الفروانية ؟
فرح : الرحاب
حمد : وماراح تقولين عايلتكم ؟
فرح : مممم لا مو الحين
حمد : زين عيل .. انا حمد ال.. عمري 26 وبيتنا بالقادسية .. وعندي اخو واحد اصغر مني بسنتين .. و 3 خوات بس وحدة متزوجه .. اشتغل مدير علاقات عامة بشركة ....

( وتمو يسولفون مدة لين دشت ندى خط ثاني )

فرح : حمد معاي ندى عالخط خل ارد عليها اوكي ؟
حمد : اوكي

[SHwarviskya]

فرح : ( ردت على ندى ) الو
ندى : هااا ويتنق ؟ قاعده تكلمينه ؟
فرح : اي
ندى : لا يكون قلتيله اسمج الصجي ؟
فرح : اي بس ماقلت اسم عايلتنا
ندى : لاااا صج ؟؟ فرحتيني
فرح : ندوي لا تتطنزين خلاص عاد
ندى : تبين تقولين أي شي عن نفسج قولي بس والله اذا قلتيله شي عني وبالأخص عن مرضي يكون آخر مابينا
فرح : وشكو اقووول؟؟
ندى : اخليج الحين باي ( سكرت التلفون )

( فرح طالعت الشاشه منصدمة منها .. جان تلقى حمد للحين هولد .. ردت عليه وكملو سوالف )
---

- بعد اسبوعين –
( بالويك اند .. فرح بتنام عند ندى )

فرح : واي ندووي قلبي يرقع خايفه حيييل
ندى : لا تروحين انا بعد خايفه قلبي مو مرتاحله .. خليج عالمطاعم .. والجمعيات لا تركبين معاه
فرح : مادري والله قلبي احس بيطيح .. جني مراهقة خايفة
ندى : لا حرام عليج لا تظلمين المراهقات .. جرحتي جرأتهم
فرح : ( تضحك ) اي والله صح .. هالايام اهم اللي يعلمونا ماشاءالله عليهم
ندى : زين لاتروحين
فرح : ندوي اللي يسمعج يقول بروح معاه بيتهم .. كلها سيارة نفتر شوي ونرجع
ندى : زين لا تخلينه يجيسج
فرح : اكيد ماراح اخليه .. ادعيلي والله احس قلبي بيوقف .. حلو شكلي ؟
ندى : اي حلو .. فروح الحين الساعه 8 لا تتأخرين انا قلت حق امي انج بتروحين اتييبين لنا شبس وعصير وهالسوالف حق الفلم اللي بنسهر عليه
فرح : اوكي .. باي

( فرح كانت لابسه قميص سلفر بأسود لي نص الفخذ .. مع جينز سكيني اسود .. وكعب سلفر .. وحاطه مكياج سموكي خفيف ولابسة ملفع دبل فيس رمادي واسود )

- اطلعت فرح بسيارة ندى .. اول ما اوصلت مسافط الجمعية لقته سافط يمها بسيارة ( مرسيدس cls ) لونها رمادي غامج –

حمد : ( يكلم فرح بالتلفون ) نزلي يللا
فرح : مادري خايفه حيل
حمد : نزلي خلصيني تره انزل انا واصعد معاج
فرح : زين اول هذي سيارة منو ؟
حمد : نزلي خلصييني بعدين اقولج
فرح : زين باي ( سكرت التلفون وانزلت وبسرعه اركبت معاه )
حمد : ( يطالعها ) يا بخت الكشن
فرح : ( منحرجه ) حمد لا تطالعني جذي
حمد : ( شغل السيارة ورجع )
فرح : ليش حركت ؟ وين بنروح ماقدر اتأخر
حمد : ماراح نروح مكان بس نفتر احسن من وقفتنا جدام الناس
فرح : ( لازقه بالباب ) زين هذي سيارة منو ؟
حمد : سيارتي
فرح : والثانية مو سيارتك ؟
حمد : بلى بس هذي خاصة بالدوام .. ومابغيت اييلج باللمبرجيني هذي رسمية اكثر
فرح : ( تبتسم ) اي صح
حمد : ( مسك ايد فرح ) اشفيج لازقه بالباب
فرح : ( اسحبت ايدها ) لا ماكو شي
حمد : اشفيج فروح .. خايفه مني ؟
فرح : لا لا شكو
حمد : والله شكلج خايفه ( سفط عند حديقة عامة مالت المنطقة )
فرح : ليش وقفت ؟
حمد : اشفيج فروح حيل مرتبكة والله ماراح آكلج
فرح : ( قلبها شوي ويوقف ) ادري

( قعد حمد يسولف لها عن ولد اخته عمره 4 سنين و ورّاها صورته وفرح اضحكت وايد على سوالفه )

فرح : ( طالعت الساعه بالتلفون ) حمد انا وايد تأخرت خل نرجع
حمد : اوكي الحين نمشي

( قعد يطالعها شوي بعدين قرب منها جان تلزق بالباب ولفت ويهها عالدريشه )

فرح : عفية ودني السيارة
حمد : ( رد مكانه وشغل السيارة ورجع ) اوكي مثل ماتبين جم فرح عندي .. بس وحده وقاعدة تتدلل علي
---

ارجعت فرح البيت ومو شاريه ولا شي .. سيدة راحت غرفة ندى

فرح : ندووي والله قلبي كان بيوقف
ندى : ( منسدحه ) وين الأغراض
فرح : اقولج قلبي كان بيوقف سألي عني قولي اشفيج شي
ندى : مايهمني
فرح : ندووي بلا سخافة .. ( اقعدت يمها عالسرير ) بغى يبوسني
ندى : ( قامت اقعدت ) واشسويتي ؟
فرح : ماخليته .. بس قلبي كان بيوقف
ندى : وبعدين اشسوى ؟
فرح : ولا شي ردني حق السيارة
ندى : لا تركبين معاه مره ثانية
فرح : اي اصلا بزفه على هالحركة
ندى : هديه اصلا
فرح : اشدعوه؟!!
ندى : زين خلاص لا تسولفين عنه قومي بدلي خنشوف الفلم
فرح : ( ابتسمت ) عنده غير اللمبرجيني .. سي ال اس
ندى : الله يزيده
فرح : كله احلم اني اتزوج واحد غني
ندى : ( تضحك ) منصجج انتي ؟
فرح : اي والله اشفيج
ندى : زين بس لا تطيرين وايد لا تطيحين وتنكسر ارقبتج .. خل نشوف فلم بلا هالموضوع
فرح : واي ندوي محد يسولف معاج .. كله تحبطين الواحد
---

- بعد شهرين –
( كلية الهندسة .. محاضرة الدكتور ثامر – داتا ستركجر )

دلال : ( بصوت واطي واهي مبتسمه ) امس الدكتور تحرش فيني
ندى : وايد مستانسه ؟
دلال : اكيد بستانس .. بضمن الa بهالمادة العلة
ندى : ( ماردت عليها وقاعده تطالع الكمبيوتر )
دكتور ثامر : ندى انتي معانا ؟
ندى : اي دكتور
دكتور ثامر : لا مو مبين لأنج قاعدة تكلمين زميلتج
ندى : ( طالعت دلال بطرف عين واسكتت )

- خلصت المحاضرة واطلعو بره –
( ندى دقت على فرح بتشوفها وين بس لقتها ويتنق .. سكرت التلفون وتمشت مع دلال )

دلال : ( تضحك ) شفتيه اشلون ماقالي شي
ندى : زين اوكي لا يقولج شي .. بس انا شكو كل شوي حاط علي ولا لأني ما اعطيه ويه
دلال : اشدراني عنج .. عطيه ويه اشتخسرين
ندى : لا والله ؟؟
دلال : زين لا تعطينه اهو ويه عطي احد ثاني
ندى : شنو يعني ؟
دلال : حبيب قلبي علي ..
ندى : ( تقاطعها ) هذا أي واحد .. ضيعت بينهم
دلال : ندى عن الاستهبال تدرين اني ماعندي حبيب الا علي .. الباجي ربعي بس
ندى : زين كملي اشفيه ؟
دلال : يعني انا سولفتله عنج وايد واهو شايفج كذا مره واحنا طالعين .. وصراحه يبيج حق رفيجة
ندى : ( تضحك ) لا شكرا مابي
دلال : ليش عاد والله وناسه انا وانتي واهو ورفيجه نطلع مع بعض
ندى : لا انسي اذا بفكر احب ما احب من طرف احد باجر مشاكلكم تخرب علينا او احنا انخرب عليكم
دلال : لا شكو شكو ؟؟؟ ماله شغل .. يللا عاااد تكفيين فكري
ندى : ( شافت فرح تتمشى وتتكلم بالتلفون ) خلاص دلول اكلمج بعدين
دلال : اوكي انا بطلع مع ريلي
ندى : ديري بالج .. باي ( راحت حق فرح )

فرح : يللا حبي اكلمك بعدين بدخل القاعة الحين .. باي ( سكرت التلفون )
ندى : ( واهي وراها ) وهذي حالتي معاج
فرح : ( التفتت عليها ) ها اشفيج ؟
ندى : شنو اشفيني يا اني كلش ما اشوفج الا وقت طلعتنا من الدوام .. او اني امشي معاج وانا ساكته اوصلج لي القاعه وانتي تسولفين معاه
فرح : يعني ندوي تكفين شسوي .. كل شوي يدق وما اقدر ما ارد عليه
ندى : هذا مو عنده دوام ؟؟ شكو كل شوي داق ويع غثيث
فرح : حرام عليج ندوي لاتقولين عنه جذي
ندى : دشي محاضرتج .. يللا اشوفج بعدين ( خلتها ومشت )
فرح : ندووي
ندى : ( لفت عليها )
فرح : ( عطتها بوسه بالهوا ) لا تزعلين والله احبج
ندى : ( ابتسمت ) والله انا بعد احبج
فرح : يللا باي ( دشت القاعه )

- ندى اقعدت تتمشى بروحها وتفكر .. خلال هالشهرين فرح وايد انشغلت عنها .. اذا راحو مطعم لازم ايي حمد يشوف فرح ويقعد معاها واهي تقعد بروحها تنطرها .. واذا يت تنام عندها تروح تشوفه عند الجمعية أو تقعد تتكلم بالتلفون لي الفير بعدين تنام .. وهذي حالتها –

( واهي تمشي اسمعت وحده تناديها بصوت عالي )

ندى : ( التفتت بتشوف منو يناديها ) هلا نوره
نوره : ( منقطع نسمها ) صارلي ساعة اناديج مخليتني اركض وراج
ندى : ماسمعتج جان دقيتي علي
نوره : ماعندي رقمج .. المهم بطلبج طلب ضروري
ندى : خير ؟
نوره : محتاجة فلوس
ندى : ليش ؟
نوره : ندى لا تسأليني ليش .. تعطيني ولا لأ ؟؟ تدرين فلوسنا على قدنا مو مثلج .. ولو ما اني محتاجه ضروري والله ماطلبت منج لو شنو
ندى : ( تضايقت من كلامها ) زين جم تبين ؟
نوره : 200 دينار
ندى : ( انصدمت ) حق شنو 200 ؟
نوره : اووو قلتلج لا تسألين .. بس ابيهم ضروري
ندى : اي بس امي اكيد راح تسألني وين وديت هالمبلغ
نوره : ليش .. اهي خالتي اتشوف بطاقتج جم سحبتي منها ؟
ندى : لا بس..
نوره : خلاص عيل ماكو عذر .. قولي انج مستخسرة هالجم فلس على اختج
ندى : لا نوره لا تقولين جذي والله ماقصدت
نوره : عيل عطيني اللي طلبته
ندى : خلاص الحين اسحبهم
نوره : اوكي بنطرج اهني
ندى : اوكي

- راحت ندى اسحبت الفلوس وردت عطتهم نوره –

نوره : ( خذت الفلوس .. وباست خد ندى ) مشكورة اخدمج بالأفراح
ندى : العفو
نوره : اي وماله داعي تدري فرح عن شي .. وعفيه لا تقولين ليش
ندى : ( اسكتت )
نوره : يللا عندي محاضرات اخليج باي
ندى : ( بصوت واطي واهي مستغربه ) باي

[SHwarviskya]

- 6 / مشاعر مختلفة -

- راحت ندى اقعدت بالسيارة فتره طويله وقاعدة تفكر بفرح اللي تغيرت و لهت عنها .. واكثر تفكيرها راح صوب نوره –

ندى : ( بقلبها ) صج انها اختي بس عمرها ماحسستني بهالشي .. يصدف مرات بالكلية تمر من يمي وماتسلم علي .. حتى رقمي مو عندها .. والحين يوم كلمتي اطلبت فلوس!!

( رن تلفونها .. فروحه.. )

ندى : ( بصوت متضايق ) الو
فرح : وينج ؟ مريت الكافتريا مالقيتج
ندى : قاعده بالسيارة
فرح : اشعندج
ندى : جذي مالي خلق شي
فرح : زين بييلج .. باي
ندى : باي ( سكرت الخط )

- شوي ويت فرح واقعدت يمها بالسيارة –

فرح : بعد شوي عندج برمجة مو ؟
ندى : ( اتطالع ساعة التلفون ) اي بعد ربع ساعه
فرح : ( مبتسمه ) زين عيل بغيت سيارتج
ندى : ليش ؟
فرح : بطلع
ندى : بتشوفينه ؟
فرح : اي شوي ماراح اطول .. يعني بس تخلص محاضرتج تلقيني عندج
ندى : ( اسكتت و عينها عالسكان )
فرح : اشفيج ؟
ندى : ( للحين عينها عالسكان ) تعبانه وبروح البيت
فرح : توه مافيج شي وكنتي بتروحين محاضرتج
ندى : لا ماكنت بحضرها .. وخلاص نزلي بروح البيت
فرح : ( طالعتها بنظرة بعدين انزلت وسكرت الباب بقوه )

- ندى البست نظارتها الشمسية وبالطريج اقعدت تبجي حييل ماكانت تدري شالسبب وعلى شنو قاعدة تبجي بالظبط –

( اوصلت البيت امسحت دموعها وانزلت .. دشت الصالة .. لقت خدامتهم تنظف )

ندى : شيريل وين ماما ؟
شيريل : داخل غرفه
ندى : ( راحت غرفة امها .. طقت الباب ) يمه ؟
أمل : تعالي يمه
( ندى بطلت الباب لقت امها منسدحه )

أمل : ندوي مو جنج رادة مبجر ؟
ندى : ( طالعت الأرض )
أمل : ( اقعدت ) اشفيج ؟
ندى : ( راحت يمها ولمتها حيل ) احبج يمه
أمل : ( تمسح على شعرها ) اشفيج حبيبتي اشصار معاج ؟
ندى : ( اقعدت تبجي واهي لامه امها ) مادري بس تعبانه
أمل : اشفيج ؟ اشصاير ؟
ندى : مادري بس احس اني مختنقة
أمل : من شنو يا بعد عمري ؟
ندى : مادري والله مادري
أمل : اوديج حق الدكتور صالح ؟
ندى : لا
أمل : زين تبين تكلمين الدكتورة غالية ؟ (( غالية الدكتوره النفسيه ))
ندى : ( امسحت دموعها ) لا يمه مافيني شي
أمل : خلاااص دام مافي سبب عيل مابي دلع روحي بدلي ونزلي قعدي معاي
ندى : ( ابتسمت ) كنتي بتنامين ؟
أمل : لا بس دخت شوي قلت انسدح يللا بدلي وتعالي ناطرتج
ندى : اوكي
--

( اصعدت غرفتها واهي تفكر .. انا ليش دقرت فرح ؟؟ .. انا غيرانه لأن عندها احد تحبه ويحبها ؟ ولا غيرانه لأن خذاها مني ؟؟ .. بكل الحالات انا كنت انانية )

- بدلت ملابسها وانزلت اقعدت مع امها مده بعدين يه ابوها واقعدوا يتغدون –

سامي : ها اشلون الدوام معاج ؟
ندى : الحمدلله
سامي : عسى دوم
أمل : اليوم بنتك متضايقة ورادة قبل نهاية الدوام
سامي : افا .. ليش عسى ماشر يبه ؟
ندى : ( هدت القفشه وطالعة امها )
أمل : حبيبتي احنا مانبي نضغط عليج بس نبي انعرف شنو مضايقج يمكن نقدر نساعدج
ندى : صدقوني مافي شي بس شوي ضيقه يتني من غير سبب وراحت
سامي : ندوي اذا تعبتي قوليلنا على طول لا تخشين عنا الموضوع
ندى : اذا قصدك ان صارتلي نوبة.. فارتاحو والله ماصار هالشي
سامي و أمل : الحمدلله
ندى : ( قامت ) الحمدلله شبعت
أمل : ماكليتي شي
ندى : بلى الحمدلله .. يللا انا بصعد نام شوي
أمل : نوم العوافي حبيبتي
---

- غرفة فرح –

حمد : ميخالف حبيبتي دقي عليها هذي بنت خالتج والظفر مايطلع من اللحم
فرح : ادري والله .. بس اهي احرجتني .. حسستني اني طرارة وقاعدة اطر سيارتها
حمد : هذا اللي زعلج ؟؟ يبه انا اييبلج السيارة اللي تبينها انتي بس اشري
فرح : لا مشكور .. تسلم ماتقصر
حمد : شنو مشكور و تسلم ماتقصر ؟ فروح انا صارلي معاج تقريبا ثلاث اشهر بس لي متى هالرسميات يعني ؟
فرح : زين يعني لو قلتلك ييبلي جيب لكسز بتييبه لي ؟
حمد : واييبلج ابوه بعد
فرح : ( تضحك ) و منو ابوه ؟
حمد : مادري امه الله يستر عليها ما كانت خوش وحده فما عرفنا ابوه للحين
فرح : ( تضحك )
حمد : فدييت هالضحكة
فرح : ( اسكتت )
حمد : فروح
فرح : هلا
حمد : عمري جم مره اعلـّم فيج ؟ اذا قلت فروح قولي عيونها أو قولي قلبها عطيني جذي كلام هيجي مشاعري
فرح : ....
حمد : بس اشرايج بكلمة هيجي مو حلوه ؟ تره تعبت عليها
فرح : ( تضحك ) بلى اعجبتني
حمد : والله انتي اللي عجبتيني وفريتي مخي فر .. تدرين فروح ؟؟ والله ماقمت اطلع باللمبرجيني كله ياخذونها الربع والسبة اني ما احركها .. صاير ماحب اروح معاهم واتمشى عالبحر
فرح : ليش ؟
حمد : بعد خلاص رحت ولقيت اللي ابيه
فرح : شنو يعني ؟
حمد : يعني لقيتج انتي .. خلاص بعد ليش اروح اهناك
فرح : تتمشى عادي ولا يعني لازم اذا رحت اهناك تشوف بنات
حمد : عسى تنعمي عيني قبل لا افكر اشوف فيها غيرج .. فروح والله احبج
فرح : ....
حمد : وانتي ؟ ماحبيتيني ؟
فرح : ( مستحية ) مادري
-----

- غرفة ندى -
( ندى منسدحة تطالع تلفونها وتفكر بفرح )

ندى : ( بقلبها ) انا قسيت عليها ودي ادق و اراضيها .. بس انا هم زعلانة اهي ليش ماحست فيني ؟؟

--

- عند فرح –

حمد : من سوالفج عنها عرفت نوعيتها هالبنت .. خلي ندى تبعد عنها احسن
فرح : والله حاولت فيها وايد ماكو فايدة تقول رفيجتي ومالي شغل بسوالفها
حمد : اوكي ندى كيفها انا مالي شغل فيها .. بس شوفي يا فرح طلعة فيها دلال ماتطلعينها ماشي ؟
فرح : والله ماقدر امي موصيتني عليها ماترضى اخليها بروحها
حمد : شنو يعني ؟؟ وبعدين عفوا بس امج شكو ؟ و اهي ياهل عشان ماتخلينها بروحها ؟
فرح : ( توهقت وبنفس الوقت دشت ندى خط ثاني ) حمد ندى قاعدة تدق
حمد : اوكي حبيبتي ردي عليها .. اكيد بتكلمج عن اللي صار بينكم
فرح : اوكي
حمد : وبعدها على طول نامي.. وانا بعد بنام و قعديني اول ماتقومين
فرح : اوكي نوم العوافي مع السلامه
حمد : مع السلامه حبيبتي

- ردت على ندى –

فرح : هلا ندى
ندى : اشغلتج عن شي ؟
فرح : لالا ماعندي شي كنت بنام الحين
ندى : انا كنت احاول انام بس ماقدرت
فرح : ( ساكته )
ندى : فروح انتي زعلانه مني صح ؟
فرح : شوي
ندى : ادري ان تصرفي بايخ بس مادري اشفيني
فرح : اسامحج على شرط
ندى : شنو
فرح : تعالي بيتنا
ندى : فروح انتي تدريـ
فرح : مابي اسمع كلام زيادة بتيين بيتنا اسامحج ما تيين خلاص كيفج تحملي زعلي
ندى : متى ؟
فرح : اذا قمنا من النوم
ندى : خالتي بتكون موجودة ؟
فرح : ندى خلاص عاد .. بنام الحين وبقوم القاج عندي
ندى : اوكي باي
فرح : باي
---

[SHwarviskya]

- بعد ما قاموا من النوم راحت ندى بيت فرح وكان قلبها يدق بسرعه .. لأن اخر مرة شافت فيها امها الصجيه فاطمة .. كانت قبل لا يدامون بشهر يعني ماراحت لها تقريبا 4 أشهر –

( ندى توها دشت البيت .. لقت فاطمة قاعدة بالصالة بروحها مبين انها ناطرتها )

فاطمة : ( قامت اوقفت ) هلا ندى هلا يمه
ندى : ( راحت تسلم عليها ) هلا خالتي اشلونج
فاطمة : ( باست خدها ولمتها ) هلا يا عمري هلا حبيبتي اشلونج يمه ؟
ندى : الحمدلله
فاطمة : ( امسكت ايد ندى ) قعدي شوي .. الحين بخليج تروحين حق فرح
ندى : ( اقعدت واهي ساكته )
فاطمة : ( تنعم على شعر ندى ) اشلونج مع الدوام ؟
ندى : الحمدلله
فاطمة : سولفيلي
ندى : ( فيها بجية ) ميخالف وقت ثاني ان شاءالله الحين لازم اروح حق فرح
فاطمة : ( امسكت ايد ندى و اقعدت تبجي ) خلاص حبيبتي انا كبرت ومحد ضامن عمره مابي اموت و انتي زعلانه .. يمه انا سويت اللي سويته عشان مصلحتج انتي
ندى : ( منزله راسها وعيونها غورقت )
فاطمة : الله يخليج كلميني لا تسكتين
ندى : ( طالعت فاطمة وادموعها انزلت ) تبيني اقول سامحتج .. اوكي انا سامحتج .. والحين شنو صار ؟ ردت السنين لي ورى ؟؟ حسيت بلمة الخوات حوالي ؟؟ حسيت ان ابوي و امي مافرقو بيني وبين أي واحد من اعيالهم ؟
فاطمة : لا تقولين جذي والله قلبي قاعد يتقطع
ندى : وانا ؟؟ مافكرتي بقلبي شقاعد يصير فيه ؟؟ ( قامت بسرعه اطلعت بره البيت )
فاطمة : ( قامت ) ندى يمه تعالي لحظة

- يت فرح لقت امها قاعدة عالغنفة وتبجي –

فرح : ( لمت امها ) خلاص يمه الله يخليج لا تبجين
---

- بنفس هالوقت أمل حست بتعب ودقت على سامي ياخذها المستشفى .. راحوا وسوولها الفحوصات اللازمة –
( عند الدكتورة )

الدكتورة : ( تبتسم وتطالع أمل وسامي ) مبروك انتي حامل
أمل : ( تطالع سامي مو مستوعبة اللي اسمعته ) سامي اهي ماتدري اني ( اسكتت وطالعت الدكتورة )
سامي : عفوا دكتورة بس اكيد في غلط .. احنا صارلنا 30 سنة متزوجين وكنا نعالج والأطباء قالو ان مرتي مافيها عيال
الدكتورة : التحاليل أكدت ان المدام حامل .. بس عشان نتأكد كلنا تفضلي خل افحص عالجنين
أمل : ( بصوت عالي ) انتي شقاعدة تقولين .. انا مافيني اعيال دورتي شهر اتييني و عشرة لأ .. ماعندي الا بويضات قليلة حيل وضعيفة .. سامي قولها
سامي : ( مسك ايدها ) أمل شوي اهدي
الدكتورة : اوكي انتي اشراح تخسرين قومي معاي خل افحص عليج
سامي : حبيبتي قومي معاها

( أمل والدكتورة قامو بيروحون ورى الستارة )

أمل : تعال معاي
سامي : اوكي ( قام معاها )

- اقعدت الدكتورة تفحص عليها وتطالع الجهاز –

الدكتورة : ( ابتسمت و أشرت عالشاشة ) شوفو كا هذا الجنين .. وعمره الحين حوالي 3 أشهر
أمل : ( ماسكة ايد سامي حيل وتحس قلبها بيوقف )
سامي : دكتورة انتي متأكدة ؟؟
الدكتورة : لحظة .. سمعوا .. هذي دقات قلبة
أمل : ( اقعدت تبجي ) اشلوون ؟؟ اشلوون حامل ؟؟ دكتورة انا عمري 47 .. وكل هالسنين ماحملت معقولة الحين اكون حامل!!!
الدكتورة : مافي شي بعيد عن الله .. اذا اراد شيئا فإنما يقول له كن فيكون .. وكاهو الجنين شوفيه ( تأشر عالشاشة )
سامي : ( ماسك ايد امل وباس راسها ودموعه تنزل ) الحمدلله الف حمدلله
أمل : ( لمت سامي واهي ميته بجي ) الحمدلله والشكر لك يارب
الدكتورة : ( وخرت الجهاز وغطت بطنها ) تفضلو معاي

- راحو اقعدو عالمكتب .. و أمل للحين تبجي وسامي ماسك ايدها –

الدكتورة : انا راح اوصيج على وايد شغلات واكتبلج على كذا دوا .. واهم شي الراحه التااامة
أمل : ( بس تبجي واهي حاطه ايدها على بطنها )
سامي : ( عيونه فيها دموع ) ان شاءالله كل اللي بتوصينها عليه راح يصير

[SHwarviskya]

- 7 / حزني كبير -

- ندى اطلعت من بيت فرح واهي تبجي اصعدت السيارة وحركت واهي تفكر بحياتها –
امي قطتني حتى لو ظروفها كانت صعبة ونيتها صافية بس قطتني!! تخلت عني وانا باللفة .. ليش جذي صار .. الله حطني برحمها ليش ارفضت هالنعمة

( تمت تبجي طول الطريج وكانت فرح تدق عليها بس ماترد .. لين اوصلت البيت .. وانزلت مالقت احد غير الخدامه .. راحت دشت دارها واقفلت عليها الباب .. شوي جان فرح اتدق بس ندى حطته مغلق ولمت المخدة واهي تبجي )
---

- دشو سامي وامل البيت وكانت أمل للحين مو مصدقه وعيونها متفوخه وحمر من البجي –

سامي : ( ماسك ايد أمل ) خلاص أموله لا تبجين اذا بتسوين شي قعدي ادعي وحمدي الله على النعمه والبجي مانبيه
أمل : ( تمسح دموعها ) والله معني شفته و سمعت قلبه بس للحين مو قادرة اصدق

- راحو غرفتهم –

أمل : اشلون انقولها الخبر ؟ اخاف تتضايق
سامي : لا ليش تتضايق ؟ في احد مايحب يكون عنده اخو أو اخت ؟
أمل : اي بس ندى غير .. أكيد راح تحس بـ...
سامي : لا ماراح تحس بأي شي .. ندى بجرنا واهي تدري انها بتبقى على طول جذي
أمل : انا اقول انكلم الدكتورة غالية أول .. يمكن نفسيتها ماتسمح انها تسمع جذي خبر
سامي : ( تنهد ) احنا لو مانعامل ندى بطريقة خاصة جان منزمان تعدلت حالتها
أمل : اي بس اخاف تحط في بالها اني بفرق بينها وبين اللي ببطني .. سامي انا وايد خايفه عليها
سامي : خلاص انتي قعدي اهني وانا اروح اقولها
أمل : لا .. بيي معاك
سامي : اوكي
---

- راحوا عند غرفة ندى –

سامي : ( يطق الباب ) ندى ؟
أمل : ( كانت بتبطل الباب بس لقته مقفول ) ندوي يمه انتي نايمه ؟
سامي : ( يطق الباب حيل ) ندى .. ندى ؟

- ندى بطلت الباب وردت انسدحت وعطتهم ظهرها –
( أمل وسامي اقعدو على طرف السرير )

أمل : يمه ندوي اشفيج ؟
ندى : مافيني بس شوي تعبانه
سامي : يبه اوديج الطبيب ؟
ندى : لا لا بس انام اصير احسن
أمل : قومي قعدي وخلينا انوديج الطبيب قومي يمه عشان خاطري
ندى : ( اقعدت ) يمه والله ماله داعي مافيني شي بس شوية ارهاق
أمل : زين خذتي ادويتج ؟
ندى : لا
سامي : ليش اشناطره يعني ؟
ندى : كا الحين اخذهم
أمل : صارلج شي وانتي عند فرح ؟
ندى : ( اسكتت )
سامي : في احد كلمج ؟
ندى : اي خالتي فاطمة .. كلمتني بالموضوع اللي ماحب اتكلم فيه
سامي : يبه مهما كان تره لها حق عليج
ندى : ( سكرت اذنها ) خلااص عاد هالسالفه مابي اسمعها والله تعبت ارحمووني
أمل : ( طالعت سامي ) خلاص خلها تنام الحين
سامي : يللا يبه ارتاحي .. تصبحين على خير
ندى : وانتو من اهله
---

- اليوم الثاني بالكلية –
( مكتب الدكتور ثامر )

ندى : دكتور بغيت اكلمك بخصوص الهوم وورك .. ادري اليوم التسليم بس صارتلي ظروف امس وماقدرت اكملة.. بس اكيد باجر الصبح راح أسلمه كامل
دكتور ثامر : ( يأشر لها عالكرسي ) أول تفضلي ليش واقفه
ندى : لا ماقدر عندي محاضرة بس قلت اعطيك خبر اني ماقدر اسلمه اليوم
دكتور ثامر : قعدي شوي نتفاهم ماراح اخذ من وقتج
ندى : ( اقعدت )
دكتور ثامر : قوليلي شنو هالظروف اللي ما خلتج تسوينه ؟
ندى : ظروف خاصة دكتور
دكتور ثامر : ( يبتسم ) قوليها اسمعج
ندى : ماقدر
دكتور ثامر : زين الفلاش معاج ؟ لأني لازم اشوفه عشان اعرف صج اشتغلتي فيه الاسبوع اللي طاف ولا لأ ؟؟
ندى : اي معاي بس مو كامل
دكتور ثامر : ميخالف عطيني اشوفه
ندى : ( طلعت الفلاش من جنطتها وعطته الدكتور ) تفضل
دكتور ثامر : ( خذاه منها واهو يبتسم .. وركبه بالكمبيوتر اللي على طاولته ) أي واحد فيهم ؟
ندى : بفولدر داتا ستركجر .. اسمه ندى هوم وورك3
دكتور ثامر : وايد عندج فولدرات .. تعالي طلعيه
ندى : ( قامت راحت صوب كرسي الدكتور )
دكتور ثامر : ( دزلها الماوس ) هاج
ندى : ( حطت ايدها عالماوس وانزلت شوي عشان تطلـّع الملف )
دكتور ثامر : ( يطالعها ) تبيني اقوم و تقعدين مكاني
ندى : ( مو عاجبها الوضع ) لا ماله داعي الحين اطلعه
دكتور ثامر : ( تم يطالعها واهي تدور الملف ) عطرج وايد حلو شسمه ؟
ندى : ( هدت الماوس وعدلت وقفتها ) كاهو بطلته
دكتور ثامر : ( يبتسم ) زين شسم العطر ؟
ندى : مادري ناسيه .. دكتور ممكن تاخذ منه نسخه الحين لازم اروح متأخرة
دكتور ثامر : اوكي .. ( نسخ الملف عنده وعطاها الفلاش ) تفضلي .. المره اليايه تعالي بوقت تكونين فيه فاضية
ندى : ( خذت الفلاش ) ان شاءالله .. مع السلامه ( اطلعت )
---

- راحت ندى محاضرتها وكانت معاها دلال .. و أول ما خلصت اطلعت من الكلاس لقت فرح ناطرتها عند الباب –

فرح : ( معصبه ) ممكن اتيين شوي بروحنا ؟
ندى : اشفيج ؟
فرح : اشفيني ؟؟!!! ندى لا تسوين روحج ماتدرين .. امشي بروحنا لا اقول كل اللي بقلبي جدام هذي
دلال : هيي هيي انتي شنو هذي ؟؟ ماما تره عندي اسم .. مو تقعدين تطلعين حرتج على راسي
ندى : ( اتطالع دلال ) خلاص دلول مالي خلق نجرتكم
فرح : ندى امشي شوي
ندى : اوكي بس دقيقة خل اخلص موضوعي مع دلال واييلج
فرح : لا انا بقول اللي عندي الحين
ندى : ( تنرفزت ) اوو فروح خلاص عاد قلتلج بعدين
فرح : انتي ماتخافين من ربج ؟؟ هذي امج حرام عليج قاعده تبجينها كل يوم .. تره الجنه تحت ريلها مو تحت ريل خالتي
ندى : فرح خلاص
فرح : لا مو خلاص .. بس عاد .. كافي .. حرام عليج من امس لي اليوم مانامت و بس قاعده تبجي
دلال : ( ساكته وتطالعهم مو فاهمة شي )
ندى : امشي دلال
فرح : ( امسكت ندى من زندها ) لا ماتروحين مكان .. توقفين وتسمعيني

- كان فيه الناس واقفين يطالعونهم .. لأن صوت فرح كان عالي –

ندى : ( بصوت واطي ) فرح هديني عيب في اوادم
فرح : عيب!! واللي قاعده تسوينه بأمي شنو اسمه ؟ ندى انتي كبيرة و تفهمين ان اللي سوته امي كان حق مصلحتج ( هدتها ) ويللا روحي وين ماتروحين بس تذكري انها امج ولها حق عليج وباجر ربج راح يحاسبج عليها ( خلتهم ومشت )
ندى : ( واقفه بمكانها ماتحركت )
دلال : هذي اشخربطت مافهمت ولا شي
ندى : ( ساكته )
دلال : الوو ؟؟ ندى .. فهميني اشصار ؟
ندى : امشي نطلع احس اني مختنقه
دلال : اوكي

- راحو اهي ودلال يم السيارة –

ندى : ( عطتها السويج ) هاج انتي سوقي
دلال : ليش ؟
ندى : بس مالي خلق
دلال : اوكي

( اصعدوا السيارة و راحو على الخط السريع )

دلال : زين ممكن الحين تتكلمين وتفهميني اللي صار ؟ حسيت نفسي غبية مافهمت شي من اللي قالته
ندى : شنو مافهمتي ؟ اهي قالت كل شي وخلصت
دلال : مادري مافهمت انتي الحين زعلتي امج ؟ ولا امها
ندى : ( تضحك ضحكة قهر ) كلهم واحد
دلال : شنو يعني ؟
ندى : يعني امها اهي امي .. بس من انولدت قطتني على خالتي اللي اهي الحين امي .. عرفتي ؟
دلال : ( انصدمت ) وليش ؟؟
ندى : اتقول عشان اعيش احسن لأني مريضة وين تتحملني واهم على قد حالهم .. بس انا اقول اهي سوت هالشي لأن تبي صبيان وملت من كثرة البنات
دلال : امبيه حدج صدمتيني وليش ماقلتيلي منزمان ؟
ندى : يعني شايفه ان هذي سالفة تنقال ؟؟
دلال : زين عمري ندوي صج فكري فيها .. صج احسلج انج عشتي عند خالتج .. حالتهم المادية وايد احسن .. و انتي يا كثر ماتروحين مستشفيات و جلسات و عفيسة
ندى : و لو مو منحقها تتخلى عني .. زين اهي مو عطتني اختها ؟ اشتبي الحين ؟ خل تعتبرني ميته
دلال : لا ندوو عاد ادري ان انتي اطيب من جذي .. و اكيد اهي ندمانه طوفي عاد خلاص
ندى : ( اسدحت الكشن وغمضت عينها ) دلال سفطي يمين
دلال : وين اسفط احنا عالخط السريع
ندى : اخذي حارة الأمان
دلال : ( طقت فليشر واسفطت عالأمان ) اشفيج ندوي ؟

( ندى ساكته ومغمضة عيونها .. وبعد دقيقة يتها النوبة .. قامت ترجف و كل اطرافها تصلبت )
( دلال كانت لابسه جاكيت قصير فوق بدي حفر .. افصخته بسرعة ولفت الجم على كفها وحطتها بحلج ندى .. لأن قبل صارت حق ندى نوبة واهي معاها وموصيتها تحط بحلجها شي ليّن مو يابس )

دلال : ( تمسح على راس ندى بيدها الثانية ) اسم الله عليج ندووي خلاص قومي والله اخاف

- بعد 3 دقايق .. هدت نوبة ندى –

دلال : ( وخرت ايدها ) ندوي ؟
ندى : ( بطلت عينها ) همم
دلال : اشلونج الحين ؟
ندى : الحمدلله .. ( ابتسمت ) مشكورة دلول
دلال : على شنو ؟ ماسويت شي
ندى : مشكورة لأنج ما انحشتي وخليتيني
دلال : صراحة بغيت انحاش بس انا عالخط خفت اطلع واندعم
ندى : ( ابتسمت اكثر )
دلال : لا والله اتغشمر معاج
ندى : ادري فيج
دلال : زين اشلون الحين اذا رديت الكلية منو يردج البيت ؟ مايصير تسوقين وانتي تعبانة
ندى : لا عادي اقدر .. بس امانة دلول لا تقولين حق فرح لأن مابي امي تدري
دلال : ليش ؟ انا اقول لازم يدرون
ندى : لا مو لازم عفية لا تقولين .. والله بعدين تاخذ السيارة مني اقل شي 3 اشهر .. ما تتذكرين المرة اللي طافت ؟
دلال : اي صح .. خلاص والله ماراح اقول
ندى : زين يللا روحي الكلية خل اقطج و اروح البيت برتاح
دلال : اوكي

[SHwarviskya]

- ارجعت ندى البيت .. وكانت وايد تعبانة .. دشت لقت امها وابوها قاعدين بالصالة –

ندى : السلام
سامي : هلا ببنيتي وعليكم السلام والرحمة
أمل : ها يمة رادة مبجر
ندى : اي ماعندنا شي .. يبه مو رايح الدوام ؟
سامي : بلى بس توني راد قلت اقعد مع امج أونسها
ندى : اوكي انا بروح ارتاح
سامي : لا يبه قعدي شوي بنسولف معاج
ندى : عن موضوع خالتي ؟
سامي : لا لا .. موضوع يخصنا احنا الثلاثة .. قعدي اهني ( حط ايده على الغنفه بينه اهو وأمل )
ندى : ( اقعدت بينهم )
أمل : ( ساكته تطالع سامي )
سامي : بنقولج خبر و انا متأكد ان الشي راح يونسج
ندى : شنو هالخبر ؟
سامي : يبه امج حامل
ندى : ( طالعت امها واهي منصدمة ) ها ؟ اشلون ؟
أمل : ( تبتسم وعيونها مغورقة ) مادري سبحان الله .. قدرة ربج
سامي : راح يصير عندج اخو صغير
ندى : ( للحين مصدومة ) بأي شهر الحين ؟
أمل : تقريبا بالثالث
ندى : ( بعصبية ) وليش توكم تقولون ؟
سامي : يبه احنا امس درينا وكنا بنقولج بس شفناج متضايقة
ندى : ( اسكتت مدة )
أمل : ( حطت ايدها على ايد ندى ) اشفيج يمه ؟
ندى : ( دمعت عينها وماردت )
سامي : يبه ندوي تأكدي ان هالياهل ماراح يفرق عنج .. انتي واهو اعيالنا وما راح انفرق بينكم .. بالعكس انتي الغالية وبتبقين الغالية لأنج البجر
أمل : اي والله انتي بجري ندوي وماراح اعزه اكثر منج
ندى : ( انزلت ادموعها ) اهو صبي ؟
أمل : ماندري للحين .. بس والله يا يمه اثنينكم طلعتو من هالبطن ( تأشر على بطنها )
ندى : ( طالعت بطن امها فترة بعدين لمتها حيل ) مبروك يمه
أمل : ( بجت وباست راسها ) حياتي انتي كنت خايفه انج تتضايقين
ندى : ادري اشكثر تتمنين ياهل والحمدلله ان صار عندج
أمل : ( وخرتها ) لا يمه لاتقولين جذي انا صار عندي ياهل من 20 سنة .. انتي بنتي يا يمه والله انتي بنتي واحس اني انا اللي ولدتج
ندى : ( ردت لمتها ) الله لا يحرمني منج
سامي : زين وانا ؟
ندى : ( لمت ابوها ) وانت بعد الله لا يحرمني منك

- اقعدت تسولف معاهم شوي بعدين قالت لهم انها بتنام وماتبي غدى واصعدت غرفتها عشان ترتاح –

( انسدحت واقعدت تفكر باللي اسمعته من امها وابوها .. وباللي صارلها مع فرح .. وباللي راح يصير لها بعد ولادة الياهل .. فكرت بكل شي .. وبعدها اقعدت تبجي حييل .. لين سكتها صوت التلفون ..وكانت اللي داقة دلال )

ندى : ( بصوت تعبان ) الو ؟
دلال : ( تضحك ) خلاص عاد عليوي يوز
ندى : الوو
دلال : الو اشوه لحقت عليج عبالي نمتي
ندى : اي كنت بنام .. اشبغيتي
دلال : اشلونج الحين ؟
ندى : الحمدلله احسن .. بس ودي انام
دلال : خلااص عاد علي قاعدة اكلم البنت
ندى : طالعه معاه ؟
دلال : اي
ندى : متى مداج ؟
دلال : ( تضحك ) قطيتيني صعدت سيارتي ورحت اشوفه .. المهم ندوو تعالي معانا السينما باجر .. رفيج علي بيي معانا عفية تعالي
ندى : لا دلال مابي
دلال : حياتي انتي لا تقولين لأ فديتج
ندى : خليني انام دلول اكلمج بعدين
دلال : ماراح اخليج تنامين الا اذا قلتي اوكي
ندى : اوكي خلاص زين بس فكيني
دلال : تره وعد الحر دين .. مو تغيرين رايج والله ازعل عليج
ندى : اوكي ماراح اغيره الحين خليني انام
دلال : اوكي فديتج .. نوم العوافي .. باي ( سكرت الخط )
---

- العصر في بيت فرح –

( فرح كانت تمشي يم غرفة نورة اسمعتها تبجي وتتكلم بصوت عالي )

نوره : مو قلت انك مريض وتعبان وبتسوي فحوصات شاملة ؟؟؟ مو قلت انك محتاج فلوس حق أشعة الرنين ؟؟ ( نوع اشعة غالي ) تقص علي وتسافر فيهم عشان تخربط ؟؟ الشرهه مو عليك علي انا الخبلة اللي صدقتك .. يللا الحين روح قص على غيري خل تعطيك فلوس ( سكرت التلفون وردت تبجي )

فرح : ( دشت عليها الغرفة ) نوره ؟
نوره : ( تصرخ ) طلعي بره وسكري الباب وراج
فرح : تره صوتج عالي سمعت كل شي .. قصريه لا يسمعج احد
نوره : اقولج طلعي بره ماتفهمين ؟؟
فرح : ( اطلعت وسكرت الباب ) الحمدلله والشكر عبالها عايشه بروحها جنه امي ناقصها مشاكل

[SHwarviskya]

- 8 / كرهت السينما -

( فرح اطلعت من غرفة نورة و راحت غرفتها .. اتفكر )

فرح : والله نوره اطلعت اتحب وانا مادري .. و من وين دبرت فلوس ؟؟ والله خايفه على اختي .. صج انها اكبر مني بس مخها مخ ياهل عمره 7 سنين .. ( راح تفكيرها صوب ندى )
آآه يا ندى .. ادري قسيت عليج بس هذي امي .. امي اللي مافي بالدنيا اغلى منها

- رن تلفونها ... وكان اللي داق ( حمد ) –

فرح : ( ردت عليه ) الوو .. هلا حبي
حمد : هلا بحياة روحي انتي
فرح : ها تغديت ؟
حمد : اي الحمدلله
فرح : بألف عافية ان شاءالله .. حمد ؟
حمد : عيوونه
فرح : تسلم عيونك .. قاعدة افكر بندى .. مادري شاللي صار لنا .. عمرنا ما تهاوشنا بهالطريقة
حمد : اي صج ذكرتيني .. قلتي بعدين اتقوليلي .. شنو سبب هوشتكم ؟
فرح : ( مترددة ) الصراحة مادري شقولك
حمد : افا فروح .. انا حمد لا تخشين علي شي
فرح : بصراحة ندى ... ( قالتله كل شي )
حمد : من صجج ؟؟
فرح : اي والله
حمد : وليش خاشه عني هالشي ؟؟
فرح : مادري
حمد : بطوفلج هالمره .. بس اذا دريت ان في شي خاشته عني ماراح يصير خير اوكي ؟
فرح : حمد اشفيك عصبت .. والله ماقصدت اني اخش عنك
حمد : اوكي خلاص .. قلتلج هالمره بعديها
فرح : تسلم حبيبي
حمد : بس جد جد اكسرت خاطري
فرح : حتى انا تكسر خاطري وايد .. بس هم امي مسكينة
حمد : والله لو هذي امي مافكر اكلمها ولا ابي اعرفها
فرح : حمد لا تقول جذي امي مافيه اطيب منها والظروف حدتها على هالشي
حمد : الله يكون بعونهم ثنتينهم
فرح : آمين .. حبيبي عفية موضوع مرضها لا يطلع كلش واذا حصل وكلمتها بيوم سو روحك ماتدري .. لأنها وايد حساسة
حمد : ان شاءالله .. اصلا انتي توج عن شنو كنتي تسولفين ما اذكر ؟
فرح : ( تضحك ) اي كفو .. ابيك جذي على طول
حمد : حياتي انتي .. خلينا منهم وقوليلي .. متى تشوفيني ؟
فرح : ان شاءالله متى ماقدرت اقولك
حمد : فديتها بنيتي

- بعد ربع ساعة –

حمد : يللا تلحفي عدل .. اقومج الساعة 7 اوكي ؟
فرح : اوكي .. قعدني بضمير لأن وراي دراسة
حمد : اوكي حياتي نوم العوافي
فرح : مع السلامه ( سكرت التلفون وحطته تحت مخدتها )

( توها بتغفي جان تسمع صوت امها عالي بس ماتدري شنو قاعدة تقول .. خافت جان تنزل تحت )

- دشت الصالة –

فاطمة : ( بصوت عالي ) تقول انها حامل انت مستوعب يا مشعل ؟؟ مستوعب هالحجي ؟
مشعل : زين انتي اشفيج منفعلة وايد .. الله يحبها ورزقها بالحمل
فاطمة : بس اشلوون ؟؟ وندى اشراح يصير عليها ؟
مشعل : اشراح يصير يعني ؟ ماراح يصير شي
فاطمة : مشعل هذي بنتنا .. اذا اهي الله رزقها بياهل من بطنها خل ترجعلي بنتي
مشعل : فاطمة خلاص بس عاد البنت عطيناها اياهم من اول ما انولدت اتيين بعد 20 سنة اتقولين بنتي ؟
فاطمة : اي بنتي و بعد امية سنة هم بقول انها بنتي
مشعل : والله هالبنت ما احسها بنتي ولا شي .. دمها ثقيل مادري اطلعت على منو .. شكله سامي دلعها عالآخر
فرح : خالتي امل حامل ؟
فاطمة : اي توها مكلمتني وقالتلي
فرح : و ندى درت ؟
فاطمة : اي
فرح : ( تضايقت ) ماكنت ادري .. لو ادري مازعلتها اكيد الحين اهي وايد متضايقة
فاطمة : وليش زعلتيها ؟
مشعل : انا رايح انام ( قام وخلاهم )
فرح : ( اقعدت يم امها ) انا تهاوشت معاها عشانج .. اهي وايد ظالمتج وانا ماقدر اسكت اكثر
فاطمة : ( لمت فرح ) يا يمه ميخالف .. انا هم اللي سويته بحقها مو شوي .. لا تزعلينها مره ثانية
فرح : خلاص انا باجر اكلمها واراضيها
---

- ثاني يوم بالكلية –
( بعد المحاضرة )

دلال : ( تتكلم بالتلفون ) اي اي خلاص نص ساعة بالكثير انكون اهناك .. باي حياتي ( سكرت التلفون )
ندى : دلول ماودي اروح تكفين خلاص مو لازم
دلال : لا حبي .. انا من امس متفقة معاج
ندى : شوفي انا وافقت اروح بس مو معناته اني موافقة اكلم هذا مادري شسمه
دلال : اسمه مازن
ندى : مايهمني اسمه المهم ماراح اكلمه
دلال : على راحتج بس امشي
ندى : الله يستر
دلال : ندوي ريلاكس وين ماخذتج انا كلها سينما .. راح نروح بسيارتي
ندى : لا سيارتج وايد تلفت الانظار .. خلينا بسيارتي احسن
دلال : قلت سيارتي يعني سيارتي .. وامانه ندوي حاولي ماتييلج الحالة
ندى : ( تضايقت من كلمتها ) لا تخافين ماراح افشلج جدامهم
دلال : لا مو قصدي جدامهم .. اقصد جدامي .. تره انا والله خوافه امس زين ما انحشت
ندى : تره ماراح يطلع مني يني .. كلها دقايق وارد طبيعية
دلال : ادري ندوي لا تصيرين سخيفة بس مادري هم يخوف شكلج
ندى : ( اسكتت ومشت معاها )

- اصعدوا سيارة دلال ( بي ام باب واحد .. لونها أسود ) و مشوا –

ندى : انا ليش طاوعتج
دلال : اووو ندوي بسج حنه
ندى : استغفرالله
دلال : زين ماراح تبطلين شعرج ؟
ندى : لا مابي
دلال : مو حلو عليج جذي
ندى : كيفي

( اوصلوا سينما ليلى .. ودلال دقت على ( علي ) )

دلال : الوو .. ها حياتي وينك ؟
علي : وراكم قلبي فتحي عيونج شوي
دلال : اوو هذا انت ؟ .. عشان تعرف حبيبتك ماتشوف غيرك
علي : اي ادري فديتها تربيتي
دلال : ( تضحك ) زين يللا نزلو قبلنا لاحقينكم
علي : اوكي يللا باي
دلال : باي ( سكرت التلفون ) واي فدييته
ندى : ماتطالعين غيره ها ؟
دلال : ( اضحكت ونزلت المنظرة وقاعدة تحط حمرة فوشية ) اي بعد شنسوي انعيش شبابنا عدل .. وانحلله لأن مسيرنا باجر نتزوج و ننحبس بالبيت
ندى : ( طالعتها وهزت راسها ) الله يشافيج
دلال : ( حطت الحمرة بجنطتها ) نزلي نزلي والله محد مينون اهني الا انتي ( بطلت الباب وانزلت )

( ندى كانت لابسة جينز اسود مع قميص قصير احمر في خطوط متعرجه بسيطة بالأسود له زراير صغار .. ولابسه كعب احمر .. وشعرها رابطته ذيل حصان )
( دلال كانت لابسه بدي اسود جابنيز .. مع تنورة تركواز لي الركبة .. و لابسة اكسسوارات.. وشعرها كالعاده كيرلي )

- صارو تقريبا عند البوابة لقو علي واقف مع واحد طويل ومعضل حيل ( عضلاته اوفر يعني ) .. وويهه يخرع ملامحه عصبية –

ندى : ( تكلم دلال ) دلول منصجج ؟ شوفيه يخرع انا برجع السيارة
دلال : ( امسكتها ) لا يويلج والله اذبحج
ندى : ( مشت معاها وودها تنحاش )

- اوصلوا عند الشباب –

علي : اهليين ندى اشلوونج ؟
ندى : الحمدلله تمام
علي : ( باس خد دلال ) اشلونج حبيبتي
دلال : تمام بشوفتك فديتك
علي : اعرّفكم .. مازن رفيج عمري .. هذي دلال شايفها من قبل .. وهذي رفيجتها ندى
مازن : هلا ندى
ندى : اهلين

- دشو السينما .. راح علي مع البنات داخل .. و مازن راح يشتريلهم بوب كورن و عصير –
( دشوا البنات مع علي جان يقعد عند الممر و خله يمه دلال ويم دلال ندى )

ندى : ( بصوت واطي ) دلال قوليله يخلي رفيجه يقعد مكانه واحنا اندني شوي مابيه يقعد يمي
دلال : اوف ندى عادي اشفيج
ندى : دلول قوليله خلصيني
دلال : عمري علي دن شوي .. خل يقعد مكانك مازن
علي : لا حبيبتي يمكن ايي واحد يقعد يمها مايصير لازم احنا نقعد يمكم
ندى : بس هذا مكان عوايل يعني اذا فرضنا ان في واحد راح يقعد يمي فعادي راح يكون اهله معاه
علي : لا لا هم مايصير شنو احنا مو رياييل ؟
ندى : ( بقلبها ) مسويلي فيها كلش يعني الرجوله ذابحته

[SHwarviskya]

- بالكلية عند فرح –
( فرح قاعدة تدق على ندى بس كله يطلع لها الجهاز مغلق )

فرح : وينها هذي ؟؟ المفروض تكون بالكفتريا الحين
( دقت على حمد )

فرح : الو ؟
حمد : هلا حبيبتي .. ها كلمتيها ؟
فرح : لا ماحصلتها وجهازها مغلق
حمد : يمكن اطلعت مع دلال
فرح : هذا اللي خايفه منه .. اكره طلعاتها معاها
حمد : زين حبيبتي اشعندج الحين ؟
فرح : ماعندي شي الحين
حمد : زين عيل خل اطلع من الدوام واييلج
فرح : اشلون آخذ السيارة ؟ شقول حق نوره ؟
حمد : قوليلها بتتمشين مع رفيجتج
فرح : اوكي
حمد : يللا انا بطلع وادق عليج
فرح : اوكي باي
حمد : باي
---

- بالسينما –
( ندى قاعدة على اعصابها لأن اللي يمها من كثر ما عضلاته اوفر بارزه كانت تحوشها .. واهي كل شوي تلزق يم دلال )

دلال : ذبحتيني اشفيج .. تعالي قعدي بحضني بعد
ندى : ( بصوت واطي ) سكتي عني بروحي معصبه
مازن : ششش مايصير تسولفون بالسينما
ندى : ( اسكتت وقاعده تحرك تهز ريلها من العصبية )

---

- سيارة حمد المرسيدس -

حمد : ( ماسك ايد فرح ) تبين أمر على بيتنا تشوفينه من بره ؟
فرح : ( استانست ) صج حبيبي ؟
حمد : اي والله الحين اوديج .. بس اول قوليلي كلمة السر
فرح : ( تضحك ) احبك
حمد : فديتج انا .. زين ماتعطيني شي ؟
فرح : شنو يعني ؟
حمد : بوسة خد مثلا ؟
فرح : مممم .. اول ورني بيتكم
حمد : من عيوني

- وصل القادسية .. ووقف شوي بعيد .. و أشر لها على فيلا وايد حلوه كبيره حيل .. لونها ابيض ببيج –

فرح : هذا بيتكم ؟
حمد : اي حبي .. ماتشوفين اللمبرجيني سافطة ؟
فرح : اي صح .. ماشاءالله وايد حلو
حمد : عيونج الحلوة فديتج
فرح : زين امش لا يطلع احد ويشوفنا
حمد : اوكي
---

- بالسينما –

مازن : ( حط ايده ريل ندى ) اهدي شوي وايد تحركين ريلج
ندى : شيل ايدك عني
مازن : اشفيج منفعله وايد يعني ؟
ندى : اقولك شيل ايدك ( بتدز ايده مو قادره )
دلال : خلاص مازن قالتلك شيل ايدك
مازن : واشسويت لها انا عشان تنفعل جذي ؟
ندى : ( بغت تقوم بس مازن مسكها من ايدها وقعدها )
مازن : وين رايحه تعالي خلاص ماراح اسوي شي
ندى : ( صرخت ) لا تمسكني
علي : خلاص مازن بس .. في اوادم اهني
مازن : ( شال ايده ) يايبلي وحده معقده يعني بتضبطني عليوي ؟
ندى : ( قامت وخلتهم )
دلال : اوو مازن تره زودتها .. علي انا بروح باي
علي : خلاص حبيبتي روحي ديرو بالكم

( دلال خلتهم واطلعت بره الحقت ندى )

دلال : ندوي نطري شوي
ندى : ( اوقفت ) نعم اشتبين ؟؟ والله العظيم كرهت السينما بكبرها
دلال : اشدعوه اشسوالج عشان تصرخين جذي ؟
ندى : شكو يمسكني ؟؟
دلال : واي ندوي اشصار الحين ؟ كلها مسكة ايد
ندى : لا والله ؟؟؟ ومنو قالج عادي عندي هالشي ؟
دلال : بس خلاص موزين عليج الانفعال
ندى : ( طالعتها مده بعدين خلتها ومشت راحت حق السيارة )
---

[SHwarviskya]

- 9 / أسوء موقف -

- عند الكلية انزلت ندى من سيارة دلال .. وكانت فرح توها راده وشافتها –

فرح : ( انزلت من السيارة وراحت حق ندى ) ندى
ندى : ( التفتت عليها بس ماقالت شي )
فرح : ندى انا يايه اعتذر عاللي صار امس .. ماكنت قاصدة اقول اللي قلته
ندى : لا عادي ماصار شي بس كلهم درو ان اهلي قطوني من اول ما انولدت
فرح : لا اشدعوه ندوي محد درا .. بس هم اعتذر والله ماقصدت .. بس حطي نفسج مكاني
ندى : ( ساكته )
فرح : ندى خلاص عاد
ندى : خلاص طاح الحطب
فرح : اكييد ؟؟
ندى : اي اكيد
فرح : ( لمت ندى ) مشكوورة والله خفت انج ماتسمعيني
ندى : خلاص فروح الاوادم راح يشكون فينا
فرح : ( تضحك ) خيولون شكو فيهم .. وصج تعالي انتي شكو طالعه معاها بروحكم ؟
ندى : فروح الف مره اقولج دلال رفيجتي و سوالفها مالي شغل فيها
---

- ردت علاقتهم مثل ماكانت .. و بالويك اند فرح نامت عند ندى –

فرح : شفت بيتهم من بره يهبل ماشاءالله حيل كبير
ندى : زين اشدراج ان هذا بيتهم ؟
فرح : سيارته الثانية سافطة بره
ندى : يعني مايصير يكون بيت رفيجه ؟
فرح : لا ندوي والله حمد مايجذب
ندى : مادري بس انا مو مقتنعه احسه نصاب
فرح : لا والله اهو مو جذي .. بالعكس حده طبيعي
ندى : ان شاءالله يكون كلامج صح .. بس هم ديري بالج منه
فرح : اوكي لا تحاتين .. طافج في شي عرفته قبل جم يوم عن نوره
ندى : شنو عرفتي ؟
فرح : نوره اطلعت تكلم واحد قاص عليها مسوي روحه مريض ومحتاج فلوس واهي عطته .. بس مادري من وين دبرتهم خايفه عليها والله
ندى : ( انصدمت ) انتي متأكدة انها عطته فلوس ؟
فرح : اي والله سمعتها بأذني تتهاوش معاه وعرفت انها عطته فلوس واهو سافر فيهم وطلع قاص عليها لا مريض ولا شي
ندى : ( حيل تضايقت لأن نوره استغلتها )
فرح : اشفيج ساكته ابي تعليق شي ؟؟!!
ندى : ( انسدحت وتلحفت ) ماعندي شي اقوله .. بنام الحين تصبحين على خير .. وعفيه اذا بتكلمينه حدج 10 دقايق لأني دايخه
فرح : اوكي ( انسدحت ودقت على حمد )
---

- صار نهاية الكورس وخلصوا امتحانات الفاينل .. كانت نتايج فرح وايد حلوه .. و ندى درجاتهم انزلت بس تقريبا زينين ماعدا مادة الدكتور ثامر كان حاطلها d .. اما دلال فطبعا خذت فيها a بجدارة –

دلال : ( تكلم ندى بالتلفون ) حلفي حاطلج دي ؟
ندى : اي والله شفتيه ؟ كل هذا لأني ماعطيته ويه والله ودي اشتكي عليه بس ادري ماراح يسوولي شي ولا يغيرون درجتي
دلال : قلتلج عطيه ويه .. شنو يضرج اذا ابتسمتي مع شوية دلع ؟
ندى : ( دقت عليها فرح خط ثاني ) فروح داقة خل ارد عليها
دلال : ويع قطيعه يللا عيل اخليج باي ( سكرته )
ندى : ( ردت على فرح ) هلا فروح
فرح : ها نزل الدرجات ؟
ندى : اي .. حاطلي دي
فرح : الله ياخذه حقير
ندى : اي والله حده باط جبدي
---

- عطلة الربيع .. شهر واحد –

فرح : ( تكلم حمد بالتلفون ) حسافة المفروض الحين احنا مسافرين
حمد : يعني انتي كل عطله كنتي تسافرين معاهم ؟
فرح : اي بس هالعطلة حسافة مانقدر لأن خالتي حامل وتعبانه
حمد : انا اهني وراح اخلي عطلتج احلى من السفرة بألف مره
فرح : ( تضحك ) الله يخليك لي
حمد : ويخليج لي يا حياتي

( كانت العطلة وناسة بالنسبة للبنات .. فرح تطلع مع ندى يتمشون بس طبعا البحر محرم عليهم .. لأن حمد موراضي .. بس هم كانو وايد يستانسون بالطلعات .. وفرح كل يومين تشوف حمد يتمشون بالسيارة وبعدين يردها .. اما دلال فكانت ترز ويهها مرات مع فرح و ندى .. ومرات تطلع مع ندى بروحهم .. بس ما تنادي احد من ربعها .. و فاطمة اسكتت عن ندى وماصارت تقول شي لأن كل ماحاولت تتكلم اتحس ان الكل ضدها .. اما أمل فأغلب شي بالفراش لأن الحمل كان وايد متعبها )
---

( مرت الايام و أمل صارت بنهاية الشهر السادس .. وكان اللي ببطنها ولد .. وسامي حاط عينه عليها عدل و مايخليها تتحرك وايد .. وبهاليوم كان توه مخلص من غرفة البيبي وجهزها كلها من الى )

سامي : ( لام امل من وراها ودخلها الغرفه ) الحين تقدرين تشوفينها اشرايج بذوقي ؟
أمل : ( دمعت عينها ) تهبل .. مادري شقولك كل شي فيها حلو ( لفت عليه ولمته ) الله يخليك لنا

- اطلعت ندى من غرفتها شافتهم لامين بعض بغرفة الياهل و أمل كانت تبجي من الفرحه –

(ندى حست بشعور خايس .. ماكانت مستانسه مثلهم .. بالعكس اتحس انها مكتئبة حيل و كان مخوفها هالاحساس )

سامي : ( انتبه ان ندى واقفة عند الباب .. وعلى طول وخر عن أمل ) ندى حبيبتي تعالي شوفي غرفة اخوج توهم اليوم خلصوها
ندى : ( دشت الغرفة واقعدت تطالعها ) اي حلوه
أمل : بس انتي يوم كنتي صغيرة كانت غرفتج احلى .. كان كل شي فيها وردي
ندى : لا طبعا هذا صبي اكيد بتكون غرفته احلى ( خلتهم واطلعت )
أمل : ( تكلم سامي ) غيرانه صح ؟
سامي : عادي شي طبيعي تغار لأن طول عمرها متعودة انها وحيدتنا بس ماعليج راح تتعود و آنا متأكد انها راح تحبه وايد
---

- بيت فرح .. غرفة نورة –
( نوره منسدحه وقاعده تبجي وفرح قاعده يمها عالسرير وتمسح على شعرها )

فرح : اهو مو طلع جذاب شكو رديتيله ؟ والحين هم قاعد يخونج ؟؟ اشتبين فيه
نوره : ( تبجي ) فروح احبه .. بس اهو وايد استغلالي
فرح : خلاص خليه يولي دوسي على قلبج
نوره : انتي لو تحبين جان عرفتي احساسي الحين
فرح : الصراحه انا احب
نوره : صج ؟؟ من متى ؟
فرح : منزمان .. بس انتي وايد لاهيه عني وماعندي وقت اسولفلج
نوره : اهو زين ؟
فرح : اي والله وايد زين
نوره : ديري بالج .. والله اغلب الشباب يلعبون
فرح : ادري لاتخافين دايره بالي .. وخليج مني .. اهم شي انتي .. لا تخلين امي تحس عليج بروحه نفسيتها تتعب وايد هالايام
نوره : ( تمسح دموعها ) كله من ندى الانانية
فرح : اي صح بس والله تره قلبها ابيض
نوره : ابيض ؟؟؟ كل هالحقد على امي وتقولين ابيض ؟

- دشت عليهم امهم –

فاطمة : ها بنات يصير اقعد معاكم ؟
نوره : ( قامت اقعدت ) افا عليج فطوم .. لو ماشالتج غرفتي اشيلج بعيوني
فاطمة : ( اقعدت يمهم ) الله يحفظكم .. واشفيها عيونج حمر ؟
نوره : دايخه شوي
فرح : ( حطت راسها على جتف امها ) الله يطول لنا بعمرج
فاطمة : فروح ماراح تروحين حق اختج ؟
فرح : بلى بعد شوي البس وراح تمر تاخذني
فاطمة : اي يمه روحي نامي عندها ونسيها
فرح : ان شاءالله .. يللا عيل انا رايحه ابدل ( باست امها ) مع السلامه
فاطمة : الله معاج يمه

[SHwarviskya]

- بنفس هاليوم بالليل فرح خذت سيارة ندى وراحت تشوف حمد عند الجمعية –
( اصعدت معاه السيارة .. وراح سفط عند الحديقة العامة )

حمد : فرح انا جم صارلي اعرفج ؟
فرح : تقريبا 6 اشهر
حمد : ( مسك ايدها وباسها )
فرح : ( ساكته تطالعه وقلبها يرقع )
حمد : 6 اشهر وانتي للحين مو واثقه فيني ؟
فرح : منو قال اني مو واثقة فيك ؟
حمد : تصرفاتج اتقول هالشي .. تره آنا ريال مايصير تعامليني جذي
فرح : حمد اشفيك ؟ عن شنو تتكلم ؟
حمد : يعني فروح انتي مو ملاحظة ان مر وقت كافي عشان تكسرين الحاجز اللي حاطته
فرح : اشلون يعني مافهمت ؟
حمد : ( قرب منها ) يعني حسي فيني شوي
فرح : ( قلبها يرقع ) حمد آنا ...
حمد : ( مسك راسها من ورى وقربها منه وباسها )
فرح : ( قاعدة تدزه من صدره بس اهو ماوخر عنها .. بعدين رخت ايدها )
حمد : ( وخر عنها وقعد يطالع عيونها ) فرح والله ورحمة ابوي احبج ( باس عيونها الثنتين )
فرح : ( من قوة دقات قلبها قاعده تحس انها تسمعهم )
حمد : ( رد يبوسها ووخر الملفع شوي عن ارقبتها وقعد يكمل )
فرح : ( دزته ) خلاص حمد
حمد : اشفيج حياتي ؟
فرح : بس مابي خلاص عفية
حمد : ( باس ايدها ) على راحتج

- بهالوقت يت دورية واسفطت يم دريشة حمد .. ونزل منها شرطيين –

فرح : ( حست بهبوط وايدها ترجف عدلت ملفعها و دموعها نطت بعينها ) حمد ؟؟!!!
حمد : ( عدل قعدته ) لا تخافين

- وقف شرطي صوب دريشة حمد والثاني راح وقف صوب فرح –

حمد : هذا اللي يمج لو شنو لا تبطلين له الدريشه ولا تردين عليه ( بطل الباب ونزل )
فرح : ( دموعها تنزل وعينها على حمد مو قادره تطالع الشرطي اللي يمها )
شرطي1 ( اللي عند حمد ) : اثباتاتكم لو سمحت
حمد : ( طلّـع بوكه وعطاه البطاقة المدنية )
شرطي2 : ( يطق الدريشة على فرح ) اختي بطلي لو سمحتي
حمد : ( التفت عليه ) خلها ماراح تبطل .. كلامك معاي مو معاها
شرطي2 : نبي بطاقتها
حمد : ماراح تعطيكم شي
شرطي1 : ( يطالع بطاقة حمد ) انت ولد الفلاني ؟؟ يصيرلك العقيد محمد ال...
حمد : اي عمي
شرطي1: خلاص توكل على الله هالمرة بس مانبي نشوف هالشي متكرر
حمد : ( خذا بطاقته من ايد الشرطي وصعد السيارة ومشى )
فرح : ( للحين قاعدة تبجي )
حمد : ( متنرفز ) خلاص بس لا تبجين ماصار شي
فرح : شنو ماصار شي ؟؟ اشهالموقف اللي حطيتني فيه ؟
حمد : ( مسك ايدها ) خلاص عدت السالفه اشفيج الحين
فرح : ( اسحبت ايدها ) شنو اشفيني ؟؟ ماشفت اللي صار ؟؟
حمد : ( ولع زقارة وقعد يدخن بعصبية )
فرح : لا تدخن يمي مابي الريحة تصير بملابسي
حمد : ( قط الزقارة من الدريشه وقعد يصرخ ) اووو عاد خلاص بس ذبحتيني
فرح : ذبحتك ؟؟ ليش اشسويتلك ؟؟
حمد : ( يصرخ ) كل شي لأ لأ لأ .. اي لي متى يعني ؟؟
فرح : ( تمت تطالع الشارع واهي ساكته بس دموعها تنزل من الموقف الخايس اللي انحطت فيه )

- وصلها عند السيارة ومشى واهو معصب –

( راحت بيت ندى امسحت دموعها و انزلت وبسرعه راحت غرفة ندى )

فرح : ( دشت الغرفه بسرعه واقفلت الباب وراها )
ندى : اشفيج بسم الله خرعتيني في احد يدش جذي ؟؟
فرح : ( اقعدت تبجي ولمت ندى )
ندى : ( منصدمه ) فرووح اشفييج ؟؟ اشصار ؟؟ سوالج شي ؟
فرح : يت الشرطه ندووي .. بغو ياخذوني المخفر
ندى : شنووو ؟؟؟ وين كنتو ؟؟
فرح : ( دموعها تنزل ) كنا سافطين عند الحديقة
ندى : واشصار بعدين ؟؟
فرح : اهو كلمهم جان يروحون .. ندى كنت ميته خووف والله قلبي كان بيوقف
ندى : ( معصبه ) قلتلج لا تطلعين معاه انا مو مرتاحتله
فرح : ( بجت زيادة )
ندى : ( تتنهد ) زين خلاص اهدي الحين الحمدلله الله ستر
فرح : والله هذا اخيس موقف مريت عليه بحياتي كلها
ندى : خلاص حبيبتي اهم شي انج الحين بالبيت

( فرح قامت بدلت ملابسها وراحت الحمام وردت واهي للحين دموعها تنزل )

ندى : خلاص فروح لا تبجين والله ضيقتي خلقي
فرح : انتي ماحسيتي باللي حسيت فيه
ندى : ادري والله الموقف كله يخوف .. خلاص هدي حمد
فرح : ندى اهو والله زين .. لو غيره خذاني شقه .. صارلي معاه 6 اشهر ومافكر بهالشي ولا طراه لي
ندى : اهو الحين عرضج حق موقف خايس .. اليوم ربج ستر .. باجر ماتدرين شيصير
فرح : خلاص ندى الله يخليج والله تعبانه

- رن تلفون فرح .. وكان اللي داق حمد .. –

فرح : ( تطالع الشاشه وتمسح دموعها ) هذا حمد
ندى : لا تردين عليه
فرح : ( اقفلت الجهاز واهو قاعد يدق .. وردت تبجي )
----

[SHwarviskya]

- 10 / قررت اسامح -

- فرح خلت جهازها مغلق 4 ايام .. صج ان حمد حل موضوع الشرطة بسرعه بس هم ماكانت تقدر تكلمه .. تحس ان اهو حطها بهالموقف .. بس ماقدرت اتطول اكثر .. اشتاقت له وافتحت الجهاز .. وصلها مسج ان كان داق 4 مرات .. دقت عليه لقت جهازه مغلق .. مر يوم يومين اسبوع اسبوعين .. شهر !! وللحين حمد مو مبين –

- بيت ندى -

فرح : ندى مر شهر شسوي ؟؟
ندى : خلاص احسلج انسيه
فرح : ماقدر اشتقت له وايد
ندى : الحين احنا على امتحانات الفاينل لازم تشدين حيلج ماراح يبقالج الا سنه وحده بس
فرح : ( فيها بجيه ) ماراح اقدر ادرس الا اذا تطمنت عليه .. ندوي عفية وديني بيتهم
ندى : نعم ؟؟ بيتهم؟؟!! من صجج انتي ؟
فرح : اي والله بس عالأقل بشوف البيت بشوف سيارته ابي اشوف أي شي يريحني .. حيل ولهت عليه
ندى : خلاص فرح انسيه اهو طول هالايام مسكر الجهاز عشان مايبي يكلمج تلقينه فاتج خط يديد وقط هذا .. خلاص عاد كبري عقلج استوعبي ان مايبي يرجعلج
فرح : وعلى شنو كل هذا ؟؟ ليش انا اشسويت له ؟
ندى : مادري بس شكله مل ومايبيج خلاص خليه يولي
فرح : ( قامت تلبس الملفع ) انا باخذ سيارتج وبروح .. اذا ماتبين اتيين معاي كيفج
ندى : لا خلاص راح اروح معاج

- كانت الساعة 9 بالليل .. وفرح تسوق داخل منطقة القادسية –

ندى : داله البيت عدل ؟
فرح : اي كاهو
ندى : الفيلا البيج ؟
فرح : ( قلبها معورها وقاعده تطالع المرسيدس سافطة بره ) اي وكاهي سيارته يمكن طالع بالثانية
ندى : زين الحين امشي خلاص
فرح : ( طلعت تلفونها ودقت عليه ) للحين مغلق
ندى : اوكي خلاص ليش واقفين اهني ؟ رجعي البيت
فرح : بنطر شوي يمكن اشوفه
ندى : فرح خلاص لا تصيرين مينونه امشي البيت
فرح : ودي اكتبله رساله احطها على سيارته
ندى : فرح نزلي خليني اسوق والله انتي ينيتي وبتيننيني معاج
فرح : ( حركت السياره واطلعت من المنطقة )
ندى : خلاص فروح لو يبيج جان رد منزمان
فرح : ( ساكته وادموعها تنزل )

انادي والصدى ردد نداي
انادي بصوتي المبحوح
حبيبي كل شي بعدك وراي
ابيك وخاطري مجروح
قريب انت وبعيد
وفي بالي الوحيد
وحبك دنيتي وآخر مداي
---

- خلصت امتحانات الفاينل آخر شهر 5 .. وبدت عطلة الصيف .. و حمد صارله غايب تقريبا شهر ونص .. أمل باقيلها اسبوعين تقريبا تدش شهرها –

- بالليل في بيت ندى –

( ندى كانت نايمه و احلمت بأمها فاطمة كانت ماسكتها من ايدها ودخلتها مكان كله زرع أخضر بس قبل لا تخليها باستها وقالت لها أحبج يابنيتي )

- قامت ندى من الحلم واهي متضايقه حيل .. واقعدت تبجي مده لين ردت نامت –

- اليوم الثاني ( العصر ) بيت فرح –

فاطمة : ليش يمه هالدرجات عاد انتي شاطره
سارة ( الاخت العوده ) : عاد لا انا ولا ريم دشينا الجامعة وجنون سافرت فقلنا انتي ونوره تتخرجون وتونسونا بس والله حسافة عليج فروح
فرح : ( متضايقه ) اشدعوه الحين اشفيكم ؟ صج ان درجاتي نازله بس الحمدلله نجحت
فاطمة : فرح مابقى شي بس سنه وحده وتتخرجين نبي نشوف درجاتج اعلى من جذي
فرح : ان شاءالله
فاطمة : زين طمنيني اشلون درجات ندى ؟
فرح : زينه
فاطمة : الحمدلله .. يارب تتخرجون من الجامعة بامتياز و اشوفكم كلكم عرايس عشان اتطمن عليكم
نوره : ( توها هاده اللي تعرفه وتخاف تضعف وترجع له ) اي والله يمه ودي اتزوج بأسرع وقت
ساره : نورو احترمي امي عيب
فاطمة : بنات هالوقت كل شي عندهم عادي .. زين انتي كنتي وايد تنخطبين بالعروس بس ترفضينهم شاللي تغير الحين ؟
نوره : بس جذي مليت من حياتي بتزوج
فاطمة : خلاص باجر عندي عرس بنت رفيجتي ام سالم تعالو انتي وفرح معاي اكيد راح يخطبونكم
فرح : ( قامت ) لا شكرا مابي .. بروح انام عند ندى اليوم
فاطمة : ابوج يدري ؟
فرح : اي قلتله امس .. يللا رايحه اجهزلي ملابس ( راحت غرفتها )
---

- اوصلت ندى عند بيت فرح –

فرح : ( تكلم ندى بالتلفون ) كاني بس البس ملفعي وانزل
ندى : انا بنزل انطرج بالصالة
فرح : صج والله ؟؟؟
ندى : اي صج .. بعدين اذا شفتج بالسيارة اقولج شاللي خلاني انزل
فرح : اوكي حبيبتي باي ( سكرت التلفون )
--

( ندى طقت الجرس وافتحت لها الخدامه .. وبريل مترددة وقلب يرقع دشت الصالة .. لقت امها و سارة و نوره قاعدين )

فاطمة اول ماشافت ندى قامت اوقفت مو مصدقة ان اللي داشة عليهم اهي ندى .. بنتها الصغيرة

فاطمة : ندى ؟
ساره : اهلين ندى
ندى : ( للحين واقفه عند باب الصالة ) اشلونكم ؟
نوره : يمه انا بروح انام شوي قعديني على أذان المغرب ( اطلعت من الصالة وماسلمت على ندى )
فاطمة : ( مدت ايدها ) تعالي حبيبتي
ساره : ( راحت يم ندى وسلمت عليها ) اشلونج ؟
ندى : الحمدلله انتي اشلونج ؟
ساره : الحمدلله .. تفضلي انا رايحه شوي وراده ( خلتهم بروحهم عشان ياخذون راحتهم )
ندى : ( تطالع فاطمة وللحين واقفه بعيد )
فاطمة : يمه ندى تعالي يمي
ندى : ( راحت لها وماتكلمت )
فاطمة : ( لمت ندى بعدين قعدتها يمها عالغنفه ) الله يحفظج ماشاءالله تهبلين
ندى : ( دمعت عيونها وبسرعه امسحت دموعها قبل لاتطيح )
فاطمة : لا تبجين ياروح امج
ندى : ( ادموعها انزلت على خدها ) انا قررت اسامحج بس بشروط و يمكن يضايقج هالشي بس بعتبرج خالتي مو امي .. امي اهي أمل وبتقبى اهي امي لين اموت
فاطمة : ( ردت لمت ندى بس هالمره واهي تبجي ) اسم الله عليج حبيبتي و ميخالف يمه راضيه بس اهم شي لا تحرميني من شوفتج
ندى : ( قلبها معورها .. مو حابه هالموقف ) انا الحين لازم اروح
فاطمة : ( وخرت عنها ) ليش ؟؟ توج ييتي مامداني اشبع من شوفتج
ندى : ( بنبره حزينه ) لو قعدت معاج سنه كامله هم ماراح تشبعين مني لأن اللي راح اكثر
فاطمة : ( حست انها انجرحت من كلام ندى ) صح كلامج
ندى : ( قامت ) بس راح امر عليكم وقت ثاني ان شاءالله
فرح : ( داشه الصاله واهي تبتسم ) ها نمشي ؟
ندى : اي يللا
فاطمة : يمه ديرو بالكم
ندى و فرح : ان شاءالله ( اطلعو من البيت )
---

- بالسياره –

فرح : ندى اشلووون ؟؟ وشاللي غير رايج ؟ والله كنت بموت من الكآبة بس بحركتج هذي ونستيني وايد
ندى : في شي ماقلتلج اياه بس تره انا تقريبا كل شهر احلم فيها .. احلم انها تحبني و توديني اماكن حلوه .. وامس بالليل هم حلمت فيها .. فيمكن الله يبي يبين لي شغله انا مو قادره اشوفها
فرح : والله احس وايد ارتحت .. لأن امي كانت كل يوم تبجي .. ماني مصدقه انج حنيتي عليها
ندى : انا بعد مو مصدقه .. بس تره اتفقنا انها تكون خالتي وبس
فرح : اوكي احسن من ولا شي

( كملو طريجهم واهم ساكتين .. ندى كانت تفكر بأمها فاطمة .. ودها تعطيها اكثر من جذي بس ماتقدر حدها لي اهني وهذا اقصى شي تقدر تسويه .. وفرح كانت تفكر بنفس الموضوع بس بعدين راح تفكيرها صوب حمد .. اشتاقت له حيل .. تحس انها مو عايشه من بعده )

- اوصلو البيت وانزلوا –

ندى : روحي غرفتي انا بطل على امي و ألحقج
فرح : انا بعد بسلم عليها
ندى : لا اهي تنام هالحزه بس اطل عليها شوي والحقج
فرح : اوكي ( خلتها وراحت الغرفة )

- ندى راحت غرفة امها طقت الباب .. واسمعت امها تقولها دشي .. بطلت الباب وراحت اقعدت يم امها عالسرير –

أمل : ها يمه اشفيج ؟
ندى : اشلونج الحين ؟
أمل : زينه و لو ان اخوج وايد يرافس ومتعبني
ندى : ( تبتسم بضيق ) يحليله
أمل : ها يمه اشفيج ؟ ويهج مو عاجبني
ندى : رحت كلمت خالتي اليوم
أمل : متى ؟
ندى : قبل شوي يبت فرح ونزلت سلمت عليها
أمل : واشصار ؟
ندى : ماصار شي بس قلتلها انتي خالتي وراح اطل عليج بين فتره و فترة
أمل : ( امسكت ايد ندى ) حبيبتي ادري هالشي قوي عليج بس والله ربج راح يآجرج عليه
ندى : ( ابتسمت ) ادري
أمل : ندى حبيبتي انا ادري اني لهيت عنج وايد وماقمت اروح معاج المواعيد بس والله ...
ندى : ( قاطعتها ) ادري يمه الحمل وايد متعبج بس عادي ابوي مو مقصر وقاعد يروح معاي
أمل : راح اعوضج صدقيني
ندى : ( ابتسمت ) انا متأكده اذا انولد عبود راح ياكل كل الجو
أمل : لا يا قلبي والله انتي الكل بالكل
ندى : ( باست راس امها وقامت ) يللا انتي ارتاحي .. فروح ناطرتني بالغرفه خل اروح لها

- ندى اطلعت وراحت غرفتها بطلت الباب لقت فرح ماسكه تلفونها وقاعده تبجي –

ندى : ( راحت اقعدت يمها ) لي متى بتمين على هالحال ؟
فرح : لين يرجع .. شوفي مسجاته القديمه .. كله يكتب ان عمره ماراح يتخلى عني .. وينه الحين ؟
ندى : اشكره غير خطه خلاص عاد طلعيه من بالج
فرح : المشكله اهو مو بس ببالي .. اهو اهني ( تحط ايدها على صدرها )
ندى : ( تغير الموضوع ) في وحده راح تصير عيوزه بعد يوميين
فرح : ( ساكته )
ندى : يللا عاد فروح عيد ميلادج بعد يومين .. وانا من الحين عازمتج على فرايديز البحر زين ؟
فرح : لا مابي
ندى : بلا سخافه عاد
فرح : ( امسحت دموعها ) اوكي مقبوله عزيمتج بس مو البحر
ندى : من صجج ؟؟ تره خلاص راح .. لي متى بتقاطعين البحر ؟
فرح : انا حاسه ان راح يرجع والله حاسه
ندى : ( ترفع ايدها تدعي ) ياربي ريحها وخلها تنساه لأني تعبت وانا احاول فيها

[SHwarviskya]

- بعد يومين .. صار عيد ميلاد فرح وخذتها ندى مطعم بالسالمية بس كلش مو صوب البحر –

ندى : ها حلو المكان ؟
فرح : اي زين .. و اكلهم حلو
ندى : يحلييلج صار عمرج 22 يالعيوزه انا للحين عمري 20 اشحلاتي بعز شبابي
فرح : لا والله ؟ الشهر الياي انتي تكملين 21
ندى : ( تضحك ) اي خليني اقص على نفسي شوي
فرح : نسيت اقوولج .. نورو انخطبت
ندى : حلفي ؟؟!!
فرح : اي والله .. راحت مع امي عرس وماخلت اغنية ما ارقصت عليها .. جان يخطبونها
ندى : واهي موافقه ؟
فرح : اي قالت خل اييون بتشوف الصبي
ندى : يعني اهي مستانسه ؟
فرح : مادري عنها مرات احس انها متضايقه ومرات احسها مستانسه .. اتوقع للحين تحب اللي كانت تكلمه
ندى : هذا النصاب اللي طلب منها فلوس ؟
فرح : اي هذا ماغيره قطيعه .. احسن لها خل تتزوج وتفتك منه
ندى : ( ابتسمت ) يللا الفال لج
فرح : ( انقلب ويهها ) ولج بعد ان شاءالله

- خلصوا اكلهم واطلعو تمشو شوي بعدين ردو البيت .. شافو فلم دي في دي و أول ما خلص ناموا –

( قامت فرح الساعه 7 الصبح على صوت تلفونها يرن .. طالعت الشاشه مو مصدقة عيونها .. تطالع الرقم وقلبها يرقع .. ردت عليه بس ماقدرت تتكلم صوتها ماطلع )

حمد : الو ؟
فرح : ( اقعدت تبجي مو مصدقه انها اسمعت صوته )
حمد : فروح ؟ قاعده تبجين ؟
فرح : ( زادت بجي )
حمد : ( صوته تعبان ) فرح حبيبتي لا تبجين والله انا توني واصل الديره صارلي 38 ساعه مو نايم و حيل تعبان بس قلت والله ما انام الا اذا سمعت صوتج
فرح : ( بصوت متقطع واهي ميته بجي ) ليش ما كلمتني صارلك تقريبا شهرين ؟ وينك عني ؟ والله بغيت اموت
حمد : ماينفع اكلمج الحين .. فرح ودي اشوفج و اقولج كل اللي صار

- ندى قامت على بجي فرح .. بطلت الليت وراحت يمها –

ندى : هذا حمد ؟
فرح : ( تبجي والسماعه على اذنها ) قولي الحين قاعده اسمعك
حمد : ماقدر الحجي طويل وانا مو قادر اشوف جدامي .. حيل تعبان خليني انام واول ما اقوم ابي اشوفج عند الجمعيه واقولج كل شي
فرح : اكيد راح تدق ؟
حمد : ورحمة ابوي الغالي راح ادق ابي اشوفج وافهمج كل شي
فرح : تحبني للحين ؟
حمد : اكثر من عيوني والله
فرح : ( زادت بجي )
حمد : خلاص عمري لا تبجين الله يخليج .. والله اني هلكان خل انام وانا مرتاح
فرح : خلاص نام نوم العوافي ان شاءالله
حمد : اول ما اقوم ادق عليج .. يمكن اقوم 8 بالليل لأني حيل تعبان
فرح : اوكي مع السلامه
حمد : باي حياتي ( سكر الخط )
فرح : ( ردت تبجي اكثر ) دق .. سمعت صوته ندى .. مو مصدقه والله سمعت صوته
ندى : ( لمتها ) ادري خلاص اهدي الحين
فرح : يقول توه راد الكويت .. وراح يفهمني كل شي اذا شافني
ندى : ( وخرت عنها ) يبي يشوفج ؟
فرح : اي اليوم عل9 يمكن .. عند الجمعيه
ندى : هذا منصجه ؟ مايخاف عليج عقب اللي صار ؟
فرح : مادري بس انا لازم اشوفه اشتقت له حيل وبعرف كل اللي صار
ندى : خلاص نامي الحين .. والله يستر منه .. انا راح اوديج ماراح اخليج تروحين بروحج
فرح : ( انسدحت ) ان شاءالله
ندى : ( قامت سكرت الليت وانسدحت على سريرها )

- فرح كانت وايد مرتاحه صج انها مو فاهمه شي .. بس عالاقل اسمعت صوته وراح تشوفه اليوم .. اما ندى فكانت مو متطمنه كلش حق رجعته -

[SHwarviskya]

- 11 / فرحتي برجعتك غير -

- قامت فرح من النوم الساعه 10 الصبح .. وطول الوقت قاعده تطالع الساعه متى يقوم من النوم ومتى تروح تشوفه .. حتى عالغدى كانت سرحانه تفكر –

سامي : يبه فرح اشفيج ؟
فرح : مافيني شي ( ردت تاكل )
أمل : اي صح شكلج كلش مو معانا
فرح : لا خالتي عادي .. بس مو يوعانه وايد
ندى : يبه تره بنطلع اليوم
سامي : وين ؟
ندى : نتمشى ونروح نشتري افلام وخرابيط حق السهر
أمل : ( تبتسم ) من وانتي صغيره كنتي مدمنة افلام
ندى : اي بعد عطلة و مومسافرين هالسنه شنسوي بعد ماكو غير الافلام
سامي : بس خل تولد امج بالسلامه ان شاءالله .. اول عطلة تمر علينا راح نسافر وانتي فرح بتكونين معانا اكيد
فرح : ( سرحانه )
سامي : فرح ؟
ندى : ( تدوس على ريل فرح من تحت الطاوله )
فرح : آي اشفيج ؟؟
ندى : ( خزتها ) ابوي يكلمج
فرح : هلا عمي ؟
سامي : ( يبتسم ) لا يبه انتي اليوم بعالم ثاني
فرح : مادري عمي بس يمكن لأني تعبانه شوي .. الحمدلله ( قامت )
ندى : آنا بعد شبعت الحمدلله ( الحقتها )
سامي : اشفيهم البنات ؟
أمل : والله مادري عنهم
سامي : خلينا منهم اشلونج انتي واشلون عبود
أمل : والله متعبني وايد يحليله
---

- غرفة ندى -

ندى : لا ليش جذي كل شوي سرحانه .. فضحي عمرج مره وحده و اشكيلهم الحال
فرح : خلاص عاد ندوي والله قلبي قاعد يعورني .. متى اشوفه بعرف كل شي بعرف ليش غاب كل هالفتره ؟
ندى : الله يستر منه ماحبيته كلش
فرح : اوو ندى بس عاد

( رن تلفون ندى .. دلول يتصل بك )

ندى : او هذي دلول منزمان مادري عنها
فرح : قطيعه خليها تولي لا تردين
ندى : ( احقرت فرح و ردت عليها ) اهليين دلووله اشلونج ؟
دلال : تمااام وينج يالقاطعه قلنا عطله بس عاد دقي علي سألي عني شي
ندى : بعد شسوي لهيت والله حقج علي
دلال : زين وينج خل نطلع اليوم متملله حدي
ندى : ماقدر فرح نايمه عندي
دلال : ويع هذي ماعندها بيت كل ما اكلمج القاها عندج
ندى : ( تضحك ) اي بعد انتي اشلونج ؟
دلال : اهي يمج الحين ؟
ندى : اي والله وبعد اشعندج ماعندج ؟
دلال : يللا عيل اخليج اذا راحت بيتهم كلميني
ندى : خلاص عيل .. مع السلامه ( سكرت الخط )
فرح : اشبغت ؟
ندى : ماكو تسلم و كانت تبي تطلع معاي
فرح : لا تطلعين معاها بعدين مافي واحد بالكويت مايلحقكم
ندى : استغفرالله ماخلصنا من هالموضوع ؟؟
فرح : بلى خلاص خلصنا مالي خلق اتكلم عنها .. واي قلبي يعورني متى يقوم من النوم ويدق علي
ندى : الحمدلله والشكر تسكر موضوع بايخ وتفتح موضوع ابيخ
فرح : ( احذفت عليها المخده ) ويعه ندوي زين
---

- مر الوقت وصارت الساعه 7 ونص جان يدق حمد –

فرح : ( ردت بسرعه ) الووو ؟
حمد : ( صوته توه قاعد من النوم ) هلا حياتي
فرح : ( قلبها يرقع جنها اول مره تكلمه ) توك قاعد ؟
حمد : اي والله حتى للحين ماقمت من فراشي
فرح : صح النوم
حمد : صح بدنج .. ها متى اشوفج ؟
فرح : متى ماتبي
حمد : خلاص عيل انا بقوم اسبح والبس واييلج عند الجمعيه
فرح : اوكي
حمد : يللا باي حبيبتي
فرح : مع السلامه ( سكرت التلفون وحطته على قلبها ) ماني مصدقه راح اشوفه والله ماني مصدقه
ندى : ( تهز راسها ) مو مرتاحتله كلش
فرح : كيفج مولازم ترتاحيله خل اقوم ابدل ( قامت بسرعه )
ندى : زين شوي شوي لاتطيحين بس
---

- راحت ندى مع فرح مسافط الجمعيه .. وكان حمد سافط اهناك .. اسفطت ندى يمه بس من صوب دريشة فرح –

فرح : مادري اشفيني قاعده ارجف ( لفت على حمد طالعته وبسرعه ردت تطالع ندى ) وايد ضعفان
ندى : زين نزلي خلصيني انا بنزل الجمعية اذا خلصتي دقي علي
فرح : اوكي

( انزلوا ثنتينهم .. ندى راحت الجمعيه وفرح اصعدت مع حمد )

فرح : ( طالعت حمد جان تنزل دموعها )
حمد : ( مسح دموعها باصبعه ) لا تبجين عمري
فرح : ليش خليتني ؟
حمد : أقدر احرك ؟
فرح : لا اخاف خلنا اهني
حمد : ماراح اطلع بره بس بسفط بالمسافط اللي فوق
فرح : اوكي

- حمد راح المسافط الي فوق .. سفط بعيد عن السيارات .. طفى السياره وقعد يطالع فرح –

فرح : يللا قولي ليش خليتني ؟
حمد : ( مسك ايد فرح ) تصدقين اذا قلتلج والله العظيم احبج
فرح : مادري بعد مارحت وخليتني ماقمت ادري عن شي
حمد : انتي تدرين ان ابوي متوفي .. وماكو الا امي عندنا واهي نور بيتنا
فرح : اي ادري انكم تحبونها وايد الله يخليها لكم
حمد : فرح امي صار فيها المرض الخبيث بعيد الشر عنج وعن اللي يعز عليج
فرح : ( انصدمت مادرت شتقول )
حمد : وبنفس اليوم اللي شفتج فيه آخر مره .. رحت البيت لقيت امي ويهها اصفر ومبين عليها التعب .. رحت وديتها المستشفى و سوولها فحوصات و طلع اشتباه بالخبيث .. حولوها مستشفى مكي جمعه مع التقارير ملوتها واكدو ان فيها سرطان بالدم ( سكت شوي و عينه تلمع فيها دموع متعلقه )

( فرح انزلت دموعها لأن حمد مبين ان تعبان وباذل جهد كبير واهو يقولها هالشي )

حمد : ( حط اصبعه على رموشه عالسريع عشان لا تطيح دموعه ) تقريبا 4 ايام وانا اراكض بأوراقها ماكنت اقدر ادق الا آخر الليل ارد هلكان وادق عليج بس القاه مغلق .. بعدها خذيت كل التقارير و سافرت مع امي لندن سويت لها دخول اهناك و تونا اليوم الصبح ردينا وعلى طول دقيت عليج
فرح : اشلونها الحين ؟
حمد : عطوها علاج مكثف بس قالو لازم الجسم شوي يرتاح ونرجع لهم بعد 3 اشهر
فرح : ماتشوف شر ان شاءالله
حمد : الشر ما اييج
فرح : زين ليش مادزيتلي مسج عالاقل ؟؟ .. والله كنت احاتيك
حمد : كنت متضايق من كل شي .. متضايق على امي .. ومتضايق منج لأنج مسكره جهازج .. وصراحه كنت وقتها ما افكر الا بأمي
فرح : الله يشافيها يارب
حمد : اشتقتيلي ؟
فرح : ( بجت ) وايد والله
حمد : ( لمها ) بس حبي لا تبجين والله دموعج غالية علي
فرح : يعني بعد 3 اشهر راح تسافر مره ثانيه ؟
حمد : ( وخر عنها وباس ايدها ) واللي يقولج بملج عليج اول ؟
فرح : ( مو مصدقه ) شنو ؟؟
حمد : ( يبتسم ) اي والله بتزوجج فروح
فرح : ( منصدمه ) بس اشلون تتزوج وامك مريضه ؟
حمد : ( تضايق ) الصراحه امي مصره تبي تزوجني ودها تشوف احفادها
فرح : يعني انت ما ودك تتزوج بس انجبرت ؟
حمد : لا والله موجذي بس يعني ماكنت مفكر اني اتزوج حاليا .. ويوم امي اصرت انها تخطبلي .. قلتلها اني اعرف وحده وابيها .. فرح والله احبج وابي اتزوجج انتي مو غيرج اشقلتي ؟
فرح : ( مو عارفه شتقول بس قاعده تطالعه وادموعها تنزل )
حمد : يرحم امج بس عاد تعبت وانا اشوف دموع .. انتي تبجين .. خواتي يبجون .. اخوي يبجي بس عاد تكفوون ابي اشوف ضحكه
فرح : ( تضحك وتبجي بنفس الوقت )
حمد : ( لمها ) اعتبرها موافقه ؟
فرح : ( لمته زياده ) اي
حمد : ( وخر عنها ) خلاص عيل عطيني رقم امج
فرح : ( تبجي وتنقله اياه ) 6705 .. ( وكملت له الرقم واهو يسجله بتلفونه )
حمد : ( طقها على راسها ) بس عاد خلااص
فرح : حمد والله احبك

(حمد مسح دموعها بعدين قرب منها وباسها .. واهي مادزته )

فرح : ( وخرت عنه مخترعه من رنه تلفونها )
حمد : اشفيج نقزتي خرعتيني .. منو داق عليج ؟
فرح : ( تطالع الشاشه ) هذي ندى
حمد : يللا خلاص قوليلها دقيقة وتكونين عندها ( شغل السياره ونزل من المسافط )
فرح : ( ردت عليها ) الو ؟
ندى : انتي وينج ؟ ليش مشيتو ؟ ماتخافين يصير مثل المره اللي طافت ؟
فرح : خلاص دقيقه واكون عندج
ندى : لا تطولين
فرح : اوكي باي ( سكرت التلفون )
حمد : كلها يومين بالكثير وامي تدق على امج
فرح : ( تبتسم )
حمد : ( وصلها عند سيارة ندى ) يللا حبيبتي اول ماتوصلين البيت دقي علي
فرح : اوكي مع السلامه ( انزلت )

- اركبت سيارة ندى واهي ساكته –

ندى : ها شنو ترقيعته ؟
فرح : ( ساكته ماردت عليها )
ندى : هيي اشفيج قاعده اكلمج ؟ شنو قال وصدقتيه ؟
فرح : ( طالعتها ) خذا رقم امي ويبي يخطبني
ندى : شنوو ؟؟ انتي هبله تعطينه رقم امج ؟
فرح : ليش هبله ؟ اشلون الواحد يخطب ؟
ندى : لا هذا غير .. يخوف يمكن يهددج او شي
فرح : ( تنرفزت ) ندى خلاص عاد .. امه مريضة فيها سرطان وتبي تزوجه بسرعه .. يمكن حاسه انها بتموت او شي مادري عنها بس حرام عليج وايد تشكين فيه
ندى : ( اسكتت شوي ) زين واشمعنى انتي يعني ؟
فرح : يحبني بعد شنو اشمعنى ؟
ندى : لا مو لأن يحبج بيخطب .. لأن امه مريضه وبيتزوجج عشانها اهي
فرح : ( بصراخ ) يعني ماكان يقدر يتزوج أي وحده امه تختارها ؟ مايقدر يتزوج أي بنت من عايلتهم ؟ ليش موراضيه تصدقين ان يحبني و علشان جذي اختارني انا .. ندى خلاص وايد قمتي تقهريني وانا اسكت على تعليقاتج اللي مالها داعي
ندى : ( كملت طريجها واهي ساكته وماعلقت )
---

[SHwarviskya]

- اوصلو البيت .. انزوا وكل وحده متضايقه من الثانيه –
( دشو الغرفة و محد يكلم الثاني )

( فرح بدلت و اقعدت على فراشها دقت على حمد )

فرح : الو ؟
حمد : هلا عمري ها انتي بالبيت ؟
فرح : اي في بيت ندى
حمد : سلمي عليها
فرح : وقت ثاني
حمد : ليش اهي مو يمج ؟
فرح : بلى بس وقت ثاني
حمد : والله احس هالبنت كارهتني
فرح : لا تقول جذي
حمد : زين فروح يمكن اندق على امج باجر
فرح : لا مو باجر .. لأن باجر بييون ناس يخطبون اختي
حمد : الله يوفقها .. خلاص عيل متى تبينا اندق ؟
فرح : بعد 3 ايام يناسبكم ؟
حمد : خلاص اوكي .. تدرين حبي .. اهو صج اني ماكنت ناوي اتزوج حاليا .. بس والله كنت مفكر اذا بتزوج ابيج اتكونين انتي العروس .. تخيلت حتى اعيالنا اشلون اشكالهم وشنو اساميهم .. بس ماكنت بتزوج قبل لا اعرفج عالاقل سنه
فرح : ليش يعني ؟
حمد : مادري والله .. بس شوفي هل 6 اشهر اللي عرفتج فيهم والله دشيتي قلبي و صرت كله افكر فيج .. وانتي اول وحده طرت على بالي يوم امي قالتلي تزوج
فرح : امك تدري ان ابوي على قد حاله ؟
حمد : اي تدري و هم تدري انج نادره ومافي مثلج ثنتين بهالدنيا
فرح : ( استحت )
حمد : الو ؟ فروح معاي ؟
فرح : اي

( دشت وحده على حمد وقالتله " حمد امي تبيك " )

حمد : اوكي الحين اروح لها .. الو ؟
فرح : الو
حمد : اختي اتقول امي تبيني بروح اشوفها بعدين ادق عليج
فرح : اوكي حبيبي .. سلامتها ان شاءالله
حمد : الله يسلمج من كل شر .. باي
فرح : مع السلامه ( سكرت الخط )

ندى : ( قاعده عالسرير تطالعها )
فرح : اشفيج ؟
ندى : لا ماكو شي
فرح : ندى انتي ليش مو مستانسه عشاني ؟
ندى : بلى مستانسه
فرح : ( قامت واقعدت يم ندى عالسرير ) لا والله احس انج كلش مو مستانسه
ندى : ( دموعها انزلت ) صراحه مادري اشفيني
فرح : ( لمت ندى ) والله ماراح اخليج بروحج اذا كنتي جذي مفكره
ندى : حبيبتي فروح الله يوفقج
فرح : ويوفقج يارب ( وخرت عنها ) والله ندوي ماني قادره اصدق انا وحمد راح نكون بنفس البيت
ندى : ( تبتسم ورموشها مبلله ) اي وبنفس الغرفه بعد
فرح : ( طقت جتف ندى ) ويعه ندوي اشهالحجي
ندى : ( اضحكت بس بنفس الوقت كانت حاسه بغصه )

- اقعدوا يسولفون مع بعض و صار وقت العشى انزوا يتعشون عقب اصعدو الغرفه و ندى نامت وفرح اقعدت تكلم حمد بصوت واطي لين نومها –
---

- ثاني يوم .. فرح ردت بيتهم .. وصار وقت وصول الناس اللي بيخطبون نوره .. كانو ساره وريم موجودين بعد .. و فرح اطلبت من ندى انها اتيي بس ندى تحججت انها لازم تقعد مع امها بالبيت وماتخليها بروحها .. يو الناس وشافتهم نوره وارتاحت حق الريال وقالت حق امها انها موافقه –

( بعد يومين .. صار الوقت اللي اتفقو فيه فرح وحمد ان امه تدق على امها )

فرح : ( قاعده مع نوره وقلبها يرقع ) نورو حدي خايفه
نوره : شكو تخافين اهو مو قال بيقولون انج رفيجة اخته ؟
فرح : اي بس مادري حدي مرتبكه
نوره : خليج طبيعيه عشان امي لا تحس
فرح : اوكي
نوره : يللا الحمدلله طلع خوش ولد وخطبج وما نصب عليج وطلب فلوس
فرح : يالخبله اهو غرقان بالفلوس المفروض انا انصب عليه مو اهو
نوره : يللا الحمدلله صار من نصيبج

- بعد دقايق دشت امها عليهم واقعدت يمهم –

فاطمة : ( مبتسمه ) فرح
فرح : ( قلبها يرقع ) هلا يمه
فاطمة : ام رفيجتج عبير دقت علي قبل شوي .. انتي عطيتيها رقمي صح ؟
فرح : اي اطلبته مني قبل جم يوم وعطيتها
فاطمة : من وين تعرفين هالبنت ؟
فرح : معاي بالكلية بس مو رفيجتي حيل
فاطمة : اخطبوج قبل شوي حق ولدهم العود
فرح : ( ويهها قام يقط الوان بس تحاول تكون طبيعيه ) ها ؟؟ جم عمره ؟
فاطمة : 26 سنه
نوره : لا يمه مانبيه وايد كبير عليها
فرح : ( تطالع نوره )
فاطمة : لا كبير ولا شي .. وماشاءالله اهو ولد ال... الله يزيدهم عندهم خير
فرح : زين يمه اشقلتيلهم ؟
فاطمة : قلت حياكم الله .. وبيون الخميس ان شاءالله
نوره : يعني بعد 4 ايام ؟؟ يمه هذي ماعندها شي تلبسه يصير انزل لهم انا ؟؟
فاطمة : سكتي انتي خلاص انخطبتي ومبينين خوش ناس
نوره : ( تضحك ) اي ادري بس كنت اتغشمر
فاطمة : ( لمت فرح ) انخطبتو ثنتينكم مع بعض الحين تطمنت عليكم .. بس باقي اخر وحده ابيها تتزوج عشان ارتاح
فرح : ( راسها على صدر امها ) نسيتي فهد يمه
فاطمة : فهد ريال ماينخاف عليه الخوف عليكم انتو
فرح : الله يخليج لنا حبيبتي
نوره : ( لمت امها من وره ) انا بعد يمه ابي حنان
فاطمة : ( حاوطت بناتها بيدها ) انا كلي لكم حبايب قلبي
---

[SHwarviskya]

- 12 / الخطبة -

- صار يوم الخميس .. يوم وصول الخطاب ( حمد واهله ) –

( ندى توها واصله عند بيت فرح .. سمت بالرحمن وانزلت )

فاطمة : هلا بحبيبة قلبي ( باست ندى ولمتها )
ندى : هلا خالتي اشلونج
فاطمة : ( ماتحب تسمع هالكلمة بس شتسوي راضية بالقليل ) الحمدلله كلنا بخير الا فرح شكلها بتهون وماتنزل حق الأوادم
ندى : ( تبتسم ) خلاص عيل خل اصعد لها
فاطمة : روحي يمه ويا عساني اشوفج عروس بعدها على طول قولي آمين
ندى : ( كملت طريجها جنها ما اسمعت شي )
--

- غرفة فرح –

ندى : ( طقت الباب ودشت لقت فرح ونوره قاعدين عالسرير ) السلااام عليكم
فرح : ( قامت لها بسرعه ولمتها ) ندوووي حديي خايفه مادري شسوي
ندى : ( بصوت واطي ) وليش خايفه ؟ مو انتي تحبينه ؟
فرح : خايفه من اهله مادري احس ماراح اعجبهم
ندى : مالج شغل المهم عجبتيه اهو
نوره : اقول ندى يعني مع فرح عرفتي الواجب .. ومعاي انا تحججتي بحجج فاضية ها ؟
فرح : نوره خلاص عاد
ندى : ( تبتسم ) لا يمكن لأن فرح غير
نوره : ( هدت المكياج اللي بيدها ) اقول فرح خلي هذي تضبطج انا رايحه غرفتي ( خلتهم و اطلعت )
فرح : ( اقعدت عالسرير ) اووو ليش جذي ندوي والله خربتو علي هاليوم
ندى : ( راحت اقعدت يمها ) ماعليج من اللي صار والله الحين اسويج احلى عروس .. اشوف وريني شعرج

(فرح عطتها ظهر عشان تشوفه .. كان شوي مرفوع نص بف ومن وره حاطه مشبك ذهبي حلو والشعر اللي نازل مسويته ويفي )

ندى : سويتيه بصالون ؟
فرح : اي
ندى : وايد حلو
فرح : زين ندوي تره بعد ساعه راح اييون والله قلبي بيوقف
ندى : بعد ساعه ؟؟ عيل شناطره تمكيجي
فرح : ماقدر حاولت بس ايدي ترجف والآي لاينر مايضبط .. عفست الدنيا قبل شوي ورحت غسلته
ندى : كسرتي خاطري حالتج كسيفة .. خلاص انا راح احلطج
فرح : اي يللا عفية ماكو وقت
ندى : بتلبسين اوف وايت بذهبي صح ؟
فرح : اي
ندى : احلى شي حق المكياج قعدي عدل خل احطلج

- ندى اقعدت تحط حق فرح مكياج خفيف ذهبي على نحاسي و اهي قاعده تحط لها مسكرا رن تلفونها جان تنقز ووصختها على خدها –

ندى : فروح اشفيج ليش نقزتي جذي ؟ دمرتي ويهج
فرح : مادري مادري والله حدي مرتبكه ( خذت التلفون وردت عليه ) الو هلا حبيبي
حمد : حبي تره بعد شوي بنطلع من البيت قلت اقولج عشان تستعيلين ادري للحين ماخلصتي
فرح : ها ؟؟ ليش اتيون الحين تو الناس
حمد : شنو تو الناس ؟ المفروض يايين منزمان .. خلصي بسرعه تره اول شي ينزلون امي وخواتي وبكون ناطرهم بره اذا دقو علي راح ادش وبكحل عيني فيج وشكلي راح ابوسج جدامهم
فرح : ( حدها ارتبكت زيادة ) حمد عااد حرام عليك بروحي مو ناقصه
ندى : ( حطت طرف الكلينكس بقلاص ماي يمها واقعدت تمسح خد فرح ) فروح خلصيني سكريه ورانا شغل
حمد : يللا حياتي اخليج الحين باي ( عطاها بوسه وسكره )
فرح : ( قاعده ترجف وحطت التلفون يمها ) يقول يايين الحين
ندى : اشدعوه علييج فروح ليش قاعده ترجفين الدخله اليوم ولا شالموضوع ؟
فرح : والله مادري اشفيني .. خلصي مكياجي يللا بحاول ما اتحرك

( اقعدت ندى تكمل لها المكياج وحطت اللمسات الأخيره بلاشر و حمره وكان شكل فرح وااايد حلو وكانت حيل ناعمة )

فاطمة : ( دشت عليهم ) ها بنات كل شي تمام ؟
فرح : مادري يمه احس حدي خايفه
فاطمة : ماشاءالله تبارك الرحمن اتهبلين فروح
فرح : ندى مكيجتني
فاطمة : ايي وانا اقوول ليش طالعه قمر
ندى : ( ابتسمت )
فرح : ( معصبه ) لا والله ؟؟ يعني انا سحت ؟؟
فاطمة : ( راحت لمتها واهي تضحك ) لا ياقلبي انتي اتيننين و ندوي اعرفت اتطلع جمالج عدل

(ندى تطالعهم وحاسه بغصه .. هذي امها بس كلش ماحست بحنانها مثل ما قاعده تحسه فرح بهاللحظه .. وبكل لحظة )

فرح : يمه البنات يو ؟
فاطمة : اي ريم وساره تحت قاعدين يبخرون ويحطون الحلو وهالسوالف .. نورو وينها ؟
فرح : بغرفتها
فاطمة : زين خلصي لبسي ( اطلعت وخلتهم )
---

- خلصت فرح لبس وكانت طالعه حدها اتينن .. كانت لابسه نفنوف ناعم لونه اوف وايت طوله لي نص الركبة جمومه طويله بس شفافه وبنهايتها صوب الاطراف ذهبي .. وصوب الصدر هم كله شيفون شفاف لي الرقبة وبعدها في مثل الطوق ذهبي حواليها .. والبست تراجي ناعمين –

ندى : ماشاءالله فروح اتيننييييين
فرح : ( حدها مستانسه واقفه عند المنظره ) صج ؟؟
ندى : اي والله صج
---

- اوصلوا ( ام حمد و خواته ثنتين .. هدى 28 سنة .. مشاعل 25 سنة ) –

فاطمة : حياكم الله تفضلوا
ام حمد : ( ويهها اصفر ومبين عليه التعب ) الله يحييج دام فضلج
هدى ومشاعل : الله يحييج ( اقعدو يطالعون الصالة بطريقة غريبة )

( صالة فاطمة حلوه و شرحه وأثاثها متناسق بس فرق كبير بين صالتهم وبين أصغر صالة من صالات بيت أم حمد )

- ام حمد اقعدت تسولف مع فاطمة وتعرفها على بناتها .. ونفس الشي فاطمة اقعدت تعرفهم على سارة و ريم -

ساره : ( صبت لهم قهوة وعطتهم اياها مع حلو حطته عالطاولة جدامهم ) حياكم الله
هدى : ( مالها خلق ) الله يحييج
مشاعل : ( تساسر هدى ) يعني حمد من صجه ؟
هدى : خلاص سكتي
فاطمة : ها عيل وين بنيتنا عبير ماشفناها
هدى : قاعده مع اعيالي مرضى اسم الله عليهم عاد انا بغيت اجابلهم بس شنقول بعد اضطريت ايي مع امي
ام حمد : ( تبتسم ) اي والله اعيالها صغار و يبيلهم احد يحط عينه عليهم مانقدر نعتمد عالخدم ينخاف منهم
فاطمة : اي والله صاجة
ام حمد : نادو العروس خل نشوفها
فاطمة : يمه ريوم نادي اختج
ريم : ان شاءالله ( قامت دشت داخل )
---

- فوق عند فرح –

فرح : ( تتكلم بالتلفون ) حمد مااقدر احس ريلي ماراح تشيلني
حمد : عمري هدي نفسج .. وتره ماراح ياكلونج عادي يعني خليج طبيعيه
فرح : الله يستر

- دشت ريم –

ريم : فروح امي تقول يللا نزلي
فرح : ( قلبها طاح ) اوكي روحي لاحقتج
ريم : يللا لا تتأخرين ( اطلعت )
فرح : بسم الله وجعلنا من بين ايديهم سدا ومن خلفهم سدا فأغشيناهم فهم لا يبصرون .. خلاص حمد يللا باي بنزل الحين
حمد : ( ميت ضحك ) تدرين والله كسرتي خاطري خلاص مو لازم انا هونت
فرح : حمد خلاص عاد باي
حمد : ( للحين يضحك ) باي
ندى : ( تضحك ) رايحه تجهادين انتي ؟
فرح : ( معصبه ) خلاص انتي الثانيه
ندى : يللا روحي
فرح : ( قامت غصب وتحس معدتها تقلب ) بسم الله الرحمن الرحيم ( اطلعت بره الغرفة واهي تقرى المعوذات )
ندى : ( اقعدت عالسرير وتنهدت ) الله يوفقج
---

[SHwarviskya]

- فرح دشت الصالة وريلها غصب شايلتها –

فرح : السلام عليكم
ام حمد : وعليكم السلام ماشاءالله اشلونج فرح
فرح : ( سلمت عليها خد بخد ) الحمدلله بخير

- راحت تسلم على خواته بس كانت نظراتهم ماتريح –

هدى : هلا
مشاعل : انتي فرح ؟
فرح : اي
مشاعل : ممم

- راحت فرح اقعدت يم امها .. وام حمد اقعدت تسولف معاها واهي ترد على قد السؤال ماتقدر تسولف من الاحراج –

مشاعل : ( تكلم هدى بصوت واطي ) شكلها اعجبته .. باينه مو هينه ولا شكو لزّم الا ياخذها اهي
هدى : مادري عاد حدهم دون المستوى
مشاعل : اكسسواراتها مو اصلية اشكره مبينين أي شي
هدى : زين خلاص بعدين امي تنحرج بسبتنا .. والله لو مو مرضها جان ماوافقت على جذي نسب
ام حمد : بندخّل حمد اذا ممكن
فاطمة : يمه فرح قومي لبسي ونزلي بسرعة
فرح : ( حست قلبها بيطلع من مكانه ) ان شاءالله يمه ( اصعدت فوق )
---

- بعد 10 دقايق انزلت لابسة ملفع و تحت النفنوف ليقينز بني وحطت عليها جاكيت بني قصير اللي يكون بس جم –

حمد : ( طالعها وابتسم )
فاطمة : يمه قعدي عالغنفة اهناك ( أشرت لها على غنفة بعيده عنهم )
فرح : ( ماقدرت تقول شي بس راحت واقعدت )
فاطمة : قوم حمد يمه اقعد يمها اكيد في اشياء تبون تعرفونها عن بعض
حمد : ( قام واهو يبتسم ويطالع امه )

- راح قعد يم فرح واهي حييل منحرجة –

حمد : ( بصوت واطي ) اشفيج جنج اول مره تشوفيني .. رفعي راسج طالعيني
فرح : ( طالعته )
حمد : اشحلاتها حبيبتي قمر والله قمر
فرح : خلاص حمد لا يسمعونا
حمد :لا تخافين قاعدين يسولفون مو معانا كلش
فرح : وايد حلوه عليك الدشداشه والغترة
حمد : اي اعجبج
فرح : ( تبتسم )
حمد : اخت فرح انتي أي سنه الحين وشنو تخصصج ؟
فرح : ( تطالعه منصدمه ) شنو ؟
حمد : ( يبتسم ) لا بس قلت اعيش الدور اني ياي اخطب وجذي
فرح : ( تضحك )

- الكل التفت عليهم واهي ماتت من الاحراج .. بعدها ام حمد اقعدت تسولف مع فاطمة عشان لا يحرجونهم –

حمد : فضحتينا
فرح : ( شوي وتبجي ) كله منك

- بعد ماخلصو زيارتهم .. مشو حمد واهله –

فاطمة : والله الام عسل وتدخل القلب بس خواته دمهم ثقيل
فرح : ( تبتسم ) اي الام شكلها طيبه
فاطمة : واشلون الولد ؟ شكلج خذيتي عليه بسرعه
فرح : ( ويهها قام يقط الوان ) باين ان دمه خفيف
فاطمة : بس تره يدخن
فرح : قال ان شاءالله راح يقطع قاعد يحاول من الحين
ريم : ماشاءالله حلو و شكله خوش واحد
فاطمة : يعني انتي موافقة ؟
فرح : ( اسكتت وهزت راسها )
فاطمة : ( لمتها ) عيل الف مبروك

- ندى انزلت واستأذنت انها بترد البيت لأنها تأخرت .. اطلعت وخلتهم مع بعض .. خوات و أم يضحكون ويباركون واهي تبارك عالماشي وتطلع من البيت اللي المفروض يكون بيتها و ترجع حق البيت اللي كان بالاساس مو بيتها –

( دشت البيت لقت سامي توه بيدش غرفته )

سامي : ها يبه ندوي ؟ اشلون الخطبه ؟
ندى : زينه الحمدلله .. وين امي نايمه ؟
سامي : اي يبه امج اليوم تعبانه ولازم ترتاح
ندى : اقدر اشوفها ؟
سامي : نايمه يبه خليها وقت ثاني
ندى : اوكي عيل انا رايحه غرفتي
سامي : الله معاج يبه ( دش الغرفه وسكر الباب وراه )

- ندى راحت بدلت ملابسها و اسبحت واطلعت انسدحت تطالع تلفونها –

ندى : محد يدق الا فرح ودلال .. والحين فرح خلاص الله يوفقها .. مابقت الا دلال وهم مناشبيني لأني اكلمها ( دقت على دلال )
دلال : الو
ندى : هلا دلول ها شتسوين ؟
دلال : طالعه مع علي
ندى : دلول ويعه الساعه 10
دلال : اي بعد شوي ارجع اشفيج عادي
ندى : زين واشرقعتي حق امج وين قلتي انج رايحه ؟
دلال : ( تضحك ) طالعه معاج طبعا .. ليش احنا مو طالعين مع بعض ؟
ندى : بلى بلى طالعين مع بعض بس لا تطولين ردي بسج عاد
دلال : اوكي عمري اموواح بايوو
ندى : باي ( سكرت التلفون ) والله هالبنت على هبالها بس متى مادقيت احصلها .. وكله تسأل يحليلها

- دزت حق فرح مسج " مبروك حياتي .. يللا الفال حق العرس .. تصبحين على خير " .. بعد شوي وصلها مسج .. " وانتي من اهله حبي " –

ندى : ( بقلبها ) اكيد قاعده تكلمه ولا جان دقت .. الله يهنينها .. ( حطت التلفون تحت مخدتها ونامت )
--

- الساعه 12 بالليل .. غرفة أمل –

سامي : حبيبتي قومي مايصير لازم اوديج الحين
أمل : وندى ؟
سامي : خليها نايمه ماراح نقعدها
أمل : ( متألمه ) سامي انا خايفه
سامي : ( باس راسها ) لا تخافين فكري انها كلها جم ساعه وتشوفين عبود اللي طول عمرج ناطرته
أمل : ( دموعها انزلت مو مصدقة انها بتشوف ولدها ) يللا عيل ييبلي عباتي و خل نروح
سامي : ( قام يابها ولبسها اياها ) يللا قومي

( مسك ايدها وقومها واطلعو من البيت )

[SHwarviskya]

- 13 / بداية حياة يديدة -

- بالمستشفى –

الدكتورة : الياهل صاير بالعرض لازم نسويلج قيصرية
سامي : وليش قيصرية ماتقدرون تحركونه ؟
الدكتورة : لا تخافون تره القيصرية احسلها و مابي اجازف واحرك الياهل واهو داخل الرحم .. أمل ماراح تتحمل
أمل : ( عالسرير .. وماسكه ايد سامي ) سامي دق على فاطمة ابيها تكون اهني
سامي : ان شاءالله بس انتي تطمني ماكو الا الخير
الدكتورة : بناخذج الحين غرفة العمليات
أمل : لا اول ابي اشوف فاطمة
سامي : ( باس راسها ) الحين اكلمها ثواني بس

( طلع بره بالممر ودق على مشعل )

سامي : الو مشعل وينك ؟
مشعل : طالع ديوانية الربع ليش ؟
سامي : بغيتك اتييب فاطمة واتيي مستشفى رويال حياة .. أمل بتولد
مشعل : تطلع بالسلامة ان شاءالله بس والله ماقدر اييبها انا بعيد
سامي : اقولك أمل تبيها .. مو راضية تدش العمليات قبل ماتشوفها
مشعل : خل أي احد اييبها بناتها كلهم يسوقون
سامي : انت اشفيك ؟ الساعه الحين وحدة ونص
مشعل : مو مشكلة فهد ايي معاهم .. خل ادق عليها
سامي : قولها لا تطول خل اتيي بسرعه
مشعل : خلاص صار .. مع السلامه
سامي : ( سكر التلفون و رد لها داخل )

أمل : ( تعبانه ) ها كلمتها ؟
سامي : كلمت مشعل لا تحاتين راح اتيي
الدكتورة : خلاص امل لازم انوديج العمليات موزين عالطفل
أمل : ( اقعدت تبجي ) ابي فاطمة بوصيها اول
سامي : أمل حبيبتي تعوذي من ابليس و سمي بالرحمن .. صدقيني ماراح تبطلين عينج الا و عبود بحضنج
أمل : ( اقعدت تتألم حيل ) سامي .. حط بالك على ندى عدل .. الله يخليك لا تخليها ولا تردها لهم .. ندى اهي بنتك انت
سامي : تعوذي من ابليس امل اشهالكلام

( دشت الممرضة)

الممرضة : لو سمحت في اوراق لازم توقعها عشان نسوي العملية
سامي : ان شاءالله
أمل : لا تروح
الدكتورة : يا امل احنا لازم ناخذج الحين .. توكلي على الله ولا تخافين
سامي : ( باس راس امل ) احبج تشجعي .. الله معاج

( راح سامي يوقع الاوراق وامل خذوها العمليات )
---

- بيت فاطمة –

( بعد مادق مشعل على فاطمة قامت بسرعه تقعـّد نوره من النوم .. بس نوره ماقامت .. بعدها راحت حق فرح )

فاطمة : ( دشت على فرح و بطلت الليت ) فرح ؟
فرح : ( حطت التلفون يم خصرها ) هلا يمه ؟
فاطمة : نايمه ؟
فرح : لا بس كنت بنام اشبغيتي ؟
فاطمة : قومي يمه وديني حق خالتج بالمستشفى قاعده تولد
فرح : ( اقعدت ) ندى تدري؟؟ لأنها ماقالتلي شي
فاطمة : مادري يمه خلصي قومي بروح البس عباتي وبقوّم فهد عشان ايي معانا
فرح : اوكي
فاطمة : بسرعه لاتطولين ( اطلعت )
فرح : ( حطت التلفون على اذنها ) الو ؟
حمد : بتروحون المستشفى ؟
فرح : اي امي اتقول ان خالتي بتولد ولازم اوديها الحين
حمد : اخوج بيروح معاكم
فرح : اي
حمد : اوكي حبيبتي ديري بالج انا بنام و طمنيني اذا اولدت بالسلامه ان شاءالله
فرح : اوكي .. نوم العوافي مع السلامه
حمد : مع السلامه
---

- راحت فرح مع امها واخوها فهد المستشفى لقو سامي ينطر بره غرفة العمليات –

فاطمة : ها سامي اشقالولك ؟
سامي : بيسوولها قيصرية وان شاءالله يكون كل شي بخير
فاطمة : يالله سترك يارب ارحمها برحمتك و احفظ الياهل .. بروح اكلم الممرضات خل يدشون ويطمنوني ( راحت )
فرح : عمي ندى درت ؟
سامي : لا والله يبه كانت نايمه مامدانا نقولها شي
فرح : بس لازم نقولها .. لأن تعرفها اهي تزعل بسرعه
سامي : ادري والله بس مابغيت اخوفها قلت اخليها تنام احسن
فرح : لا والله عمي الاحسن انها تدري والحين انا وفهد انروح انييبها
سامي : لا لا يبه خلي خالتج تطلع بالسلامه اول بعدين انقولها
فرح : اوكي
---

- خلصت العملية و دو أمل حق غرفتها بس كانت نايمه للحين تأثير البنج ماراح –

الدكتورة : لا تحاتي اهي بخير بس نايمه
سامي : الف حمدلله زين واشلون الياهل ؟
الدكتورة : الحمدلله وزنه 3 كيلو
سامي : شنو يعني ؟؟ زين ؟؟
الدكتورة : اي الحمدلله تعال شوفه و أذن باذنه بعد

( الكل راح معاها وشافو عبدالله .. الولد اللي أمل وسامي طول عمرهم ينطرونه .. شاله وقعد يأذن باذنه .. والأثنين يبجون الأبو يبجي .. والولد يبجي )

فاطمة : الله يخليه لكم يهبل ماشاءالله
فرح : ( انزلت دموعها عالمنظر ) يتربى بعزك عمي
فهد : يتربى بعزكم
سامي : ( يشم ريحة عبود ) مشكورين
فرح : عمي اروح اييب ندى
سامي : لا لا انتو الحين روحو وتعالي معاها الصبح
فاطمة : اي يمه روحو .. انا بنطر أمل لين تقوم
فرح : اوكي .. يللا فهد
فهد : يللا
---

- ردت فرح مع فهد البيت .. دقت على حمد قعدته من النوم وقالتله اللي صار وانها عالساعه 7 الصبح بتمر على ندى تقعدها وتاخذها معاها المستشفى –

- صارت الساعه 7 قامت فرح البست وراحت حق ندى .. انزلت طقت جرس بطلت لها الخدامه .. و على طول اصعدت غرفة ندى –

فرح : ( اقعدت عالسرير ) ندى ؟ ندوي قومي
ندى : ( افتحت عينها ) فروح ؟
فرح : اي قومي بكلمج
ندى : ( غصب تبطل عينها ) جم الساعه الحين ؟
فرح : مبجر توها ماصارت 8
ندى : ( اقعدت ) اشفيج يايه هالحزه ؟
فرح : ندى ... خالتي اولدت
ندى : ( بطلت عينها حيل من الصدمه ) امي ؟؟
فرح : اي اولدت الفير و ..
ندى : ( تصرخ ) وليش توني ادري ؟
فرح : كنتي نايمه وعمي مارضى يقعدج
ندى : واشلونها الحين ؟
فرح : زينه سوولها عملية قيصرية
ندى : ( اسكتت مده )
فرح : يللا قومي لبسي خل نروح المستشفى
ندى : ( قامت معصبة و راحت الحمام )

- اطلعت البست بسرعه وراحو .. طول الطريج ندى ساكته –
( اوصلوا المستشفى .. راحو الغرفة .. لقوا فاطمة و سامي قاعدين و أمل عالسرير بيدها عبود )

- ندى اول مادشت اوقفت اتطالع امها ( أمل ) بس ما راحت لها –

أمل : ( تبتسم ) تعالي ندى
ندى : ( واقفه بمكانها ) اشلونج يمه
أمل : تعالي حبيبتي شوفي اخوج
ندى : ( قربت يمها .. وباستها ) الحمدلله على سلامتج
أمل : الله يسلمج يارب .. شوفي هذا عبوود
ندى : ( طالعت الياهل مده ) حلو
أمل : تبين تشيلينه ؟
ندى : لا ماعرف
سامي : ( وقف يم ندى وشال عبدالله ) بسم الله .. هاج مدي ايدج
ندى : ( ارجعت لي وره ) لا لا يبه ماعرف
فرح : انا بشيله
سامي : سمي
فرح : بسم الله ( شالته شوي شوي )
ندى : ( قاعده تطالعهم واهي ساكته )
----

- مر اسبوعين .. و مشعل سأل عن حمد واهله و شاف انهم خوش ناس و عطوهم خبر انهم موافقين .. و نوره املجت بس من غير حفلة بس يه الملاج وملج عليهم .. و أمل كله بغرفتها مع سامي والياهل –

( بيت فاطمة )

فاطمة : ( تتكلم بالتلفون ) والله انا مالي أي راي بهالموضوع خل اكلم فرح وارد لكم خبر .. مع السلامة ( سكرت التلفون وقامت بتروح غرفة فرح )

- غرفة فرح –

فرح : ( تكلم حمد بالتلفون ) بنفس اليوم ؟؟ ليش ؟؟
حمد : اي عادي عمري اشفيج

- دشت فاطمة عليها –

فرح : خلاص ندى اكلمج بعدين ( سكرت التلفون بويه حمد )
فاطمة : ( اقعدت يم فرح ) يمه فروح توه ام حمد داقة علي وقالتلي انهم يبون يخلون الملجة والعرس بنفس اليوم
فرح : يعني بعد شهر ؟
فاطمة : اي و انا قلت لها لازم يصير فيه فترة ملجة عشان ياخذون على بعض بس اهي تقول انهم بيحطونج بعيونهم .. حبيبتي الشور شورج فكري ورديلي خبر واذا ماتبين هالشي كيفج محد راح يجبرج
فرح : لا يمه .. انا موافقة
فاطمة : متأكدة ؟
فرح : اي يمه متأكدة
فاطمة : وانتي ماتبين تعرفينه اكثر ؟ يعني مثل اختج نوره الحين قاعده تطلع مع ريلها وتاخذ عليه كل يوم اكثر من اللي قبله .. لأن يمه الزواج عمر مايصير اتشدينه وانتي مو مستعدة عدل
فرح : ( نزلت راسها ) اهو شكله زين وامه بعد شكلها وايد طيبة و خلاص يمه قوليلهم موافقه
فاطمة : ( تبتسم ) باجر اقولهم انج وافقتي .. مايصير اروح الحين بعدين يقولون مستعيلين اكثر منهم
فرح : ( ويهها صار احمر ) اوكي
فاطمة : الله يوفقكم يارب ( قامت واطلعت من الغرفه )
فرح : ( امسكت التلفون دقت على حمد )
حمد : هلا حياتي
فرح : ليش بنفس اليوم ؟؟ امس كنا انسولف عن الملجة ومايبتلي طاري هالشي متى قررت ؟؟
حمد : يا عمري يا حياتي اشفيج منفعلة ؟ يعني ليش انسويها طواله .. انا احبج وانتي بعد تحبيني خلاص عيل خلينا نتزوج بنفس يوم كتب الكتاب
فرح : اي بس مادري يعني ماتوقع يمديني
حمد : بلى يمديج و بس امج ترد خبر حق امي راح نعطيكم المهر و من هاليوم تبدين تجهزين .. عاد ما وصيج باللبس والاشياء ابيج تضبطيني عدل
فرح : ( استحت )
حمد : مهرج الفين كافي مو ؟
فرح : لا والله ؟؟
حمد : زين 3 الآف ؟؟ وخلاص بعد شنو ماكو اكثر من جذي
فرح : ( اسكتت )
حمد : السكوت علامة الرضى ؟
فرح : كيفك كيفك
حمد : ( مات ضحك ) يالخبله اشفييج ؟؟ تكلمي زفيني شي .. تره باجر اذا تميتي على هالطبع عادي جدا اشوف غيرج وانتي ماتقولين شي
فرح : والله اذبحك
حمد : اي جذي ابيج .. مو مسكينه وكله ساكته .. يللا خل نعيد .. بعطيج مهر 3 الآف كافي صح ؟
فرح : ( تضحك ) لا طبعا مو كافي
حمد : جم تبين عيل ؟
فرح : جم اسوى ؟
حمد : ولا شي .. ( يضحك ) لا والله اتغشمر تسوين 100 مليون .. بس انا بعطيج 8 الآف
فرح : صج ؟
حمد : اي والله
فرح : جنه وايد
حمد : لا مو وايد واللي يزيد حطيهم بحسابج
فرح : الله يخليك لي
حمد : ويخليج لي يا ام نواف
فرح : ( تضحك ) وينه اهو
حمد : راح ايي على طول والله

[SHwarviskya]

( مرت الأيام و ندى كل يوم صارت تطلع يا مع دلال او مع فرح .. ماتحب تقعد بالبيت كلش .. لأن طول ما اهي قاعده كانت تحس بضيقه .. لأن امها وابوها ماصارو يقعدون معاها مثل قبل وكله قاعدين بالغرفه وبحضنهم عبود )

- أما فرح فهي كل يوم تروح السوق مره مع ندى ومره مع نوره ومرات مع ريم .. و أهل حمد احجزو صالة الزمردة وتكفلوا بكل شي حتى بلبس العروس –

(( يوم الملجة والعرس ))

- كانت ندى لابسه نفنوف وردي طويل ضيج عالجسم من غير علاق ومن تحت صوب الفخذ يبدي يصير واسع و متروس شك سلفر من تحت ويخف كل ما صعد فوق .. وكانت رافعه شعرها و منزلة خصل ويفي ومكياجها وردي ناعم .. ولابسة اكسسوارات سلفر .. كانت جد حلوه بهاليوم –

( أمل كانت موجودة وخلت عبدالله نايم بغرفة داخل.. بس كل شوي تطل عليه )

- دشت فرح .. وكان شكلها ياخذ العقل .. كانت حاطة مكياج سلفر بأسود .. بس كان السلفر غالب .. و مسويلها تسريحه مع تاج و من ورى نازلة طرحة طويلة مع نفنوف ثلجي شكله حيل راقي –

دشت على ~هالزفة ~

هب السعد هبايبه لرياحي
ويا شاريه لعباد وين صلاحي

ويا زينه ياعلج و السعد ذبالي
وهبوبي حيج من وليج يلعالي

هب السعد هبايبه لرياحي
ويا شاريه لعباد وين صلاحي

وشبهت الزينه و الصبا حين لين دنه
ولا القمر و اربعه واثناني

- الزفه شغالة وفرح تمشي شوي شوي واهي مرتبكة وتطالع امها وخواتها .. وطاحت عينها على ندى .. كانت تصفق ودموعها تنزل .. بغت تبجي معاها بس خواتها أشرولها عشان تبتسم .. لفت ويهها عنهم وكملت طريجها والكاميرات تصورها –

هدى : امبيه لأ لأ بمووت .. من قالهم يحطون هب السعد ؟
مشاعل : اهي بعد من غيرهم
هدى : لا مو طبيعيين .. غبار غبار ماكو اقدم من هالزفه ؟ وبعدين العرس عرسنا شكو يغيرون الزفه على كيفهم ؟
مشاعل : تخلف الحمدلله والشكر

- راحو خوات فرح صوروا معاها .. وبعدها يت ندى خذت لها صورة معاها وباستها وقامت ترقص لها .. معنها مو متعوده على هالجو .. امل كانت دايما تبعدها عن الحفلات والازعاج .. بس مع هذا قامت وارقصت جدام فرح –

( مر الوقت ويه المعرس .. بدشداشته وبشته و دش معاه عمه ووراهم شباب وايد أهله اعيال عمه وربعه .. وقف عطى ظهره حق الكوشة .. والشباب يرقصون بعدها اطلعو كلهم .. واهو راح حق فرح باس راسها وقعد معاها .. صورو وكلو من الكيكة وبعدها قام وقف معاها عشان يطلعون من الصالة .. اقعدو يمشون والزفه شغالة )

ندى : ( تصرخ بصوت عالي لأن صوت الزفه كان اعلى من صوتها ) يمه انا بروح اشوف عبود
أمل : ( استغربت وبنفس الوقت استانست لأن ندى ولا مره سوتها ) اوكي يمه روحي

- ندى راحت بسرعه الغرفه .. اول مادشت اقفلت الباب عليها .. كان كل شي فيها منمل .. درت انها بعد دقيقة راح تطيح .. عشان جذي اركضت لي الفرفه بعيدة عن فرح .. آخر شي تتمناه انها تخرب عليها هذا اليوم –

( انسدحت وغمضت عينها وبدت نوبتها .. اقعدت ترجف من راسها لي اصابع ريلها .. ندى ترجف .. والزفه تعلى .. والمعاريس ماسكين ايد بعض .. طالعين من هالصالة .. لي حياة يديدة )

[SHwarviskya]

- 14 / مصيبة دلال -

- بعد 3 دقايق هدت نوبة ندى .. وبطلت عينها على صوت امها ( امل ) تناديها وتطق الباب وبنفس الوقت عبدالله كان يبجي .. تمت منسدحه مكانها تحس بألم وطعم دم بحلجها –
أمل : ( تطق الباب حيل ) ندى يمه اخوج قاعد يبجي
ندى : ( حاولت تقوم بس حست بدوخه )
أمل : ندى ليش قافله الباب ؟؟ بطليه بسرعه

( ندى قامت خذت كلينكسات و امسحت فيها السانها كان الدم يصب وايد صج ان الجرح غزير .. بس الحمدلله يت على جذي .. لأن اذا مانحط شي بالحلج وقت النوبه ينخاف من الأسوء اما احتمال ان يصير شلل بالسان من قوة العضات عليه .. او لا سمح الله تختنق وتموت نتيجة بلع اللسان )

أمل : ندى بطلي الباب
ندى : كاني ييت ( راحت بطلت لها الباب )
أمل : ( تصرخ ) ليش قفلتيه ها ؟ ( راحت اركضت حق عبدالله وشالته ) بس يمه خلاص
ندى : ( واقفه تطالعها وماتكلمت )
أمل : ( استوعبت اللي صار ) ندى حبيبتي ليش مارديتي علي وانا اطق الباب ؟؟ صارتلج نوبه قبل شوي ؟
ندى : ( طالعتها و من غير أي كلمة خلتها واطلعت من الغرفة )
أمل : ( طالعت عبدالله واهو بايدها .. بعدها ارفعت راسها عالباب .. واسألت نفسها ) معقوله انا قاعده افرق بينهم ؟؟؟
---

- بالفندق –

حمد : ( قاعد يم فرح واهي بلبس العرس ) حبيبتي مستانسه ؟
فرح : ( تهز راسها – اي -)
حمد : ( وقف يشيل طرحتها ) اذا عورتج قولي .. لأني ماعرف اشلون يشيلونها
فرح : اوكي
حمد : ( بعد عناء قدر يشيلها وبطل تسريحتها )
حمد : قمر والله قمر
فرح : ( ساكته وحيل منحرجه )
حمد : حياتي مستحية ؟
فرح : ( تبتسم واهي ساكته )
حمد : ( مسك ايدها وباسها ) احبج
فرح : وانا بعد
حمد : وانتي بعد شنو ؟
فرح : ( تبتسم ) وانا بعد احبك
حمد : فديت عمرج .. اساعدج تبدلين ؟
فرح : لا .. انا ابدل بروحي
حمد : ( يبتسم ) يللا عيل بدلي
فرح : ( قامت ) بروح ابدل بالحمام
حمد : لا والله اتبدلين اهني وجدامي بعد
فرح : حمد عااد !!!
حمد : لا عاد ولا ثمود .. اتبدلين اهني يعني اهني
فرح : حمد مايصير جذي
حمد : شنو مايصير انتي مرتي خلاااااص حلالي
فرح : اي بس انت ماعطيتني فترة ملجة عشان آخذ عالوضع
حمد : فرووح اللي يسمعج يقول عرفتيني امس
فرح : لا بس يعني مادري اشلون
حمد : زين تبين عشى ؟
فرح : لأ
حمد : ولا انا ( قرب منها وباسها )
فرح : ( ارجعت لي ورى ) حمد عشان خاطري خلني اروح اغسل وابدل
حمد : اوكي خلاص .. بس اليوم بسمحلج
فرح : ( ابتسمت وقامت )
حمد : لا تتأخرين
فرح : ماراح اتأخر
---

- غرفة ندى –

سامي : خلاص ندى بلا كثرة كلام باجر راح تروحين معاي المستشفى
ندى : بس للحين باقي وايد على موعدي
سامي : ميخالف بنروح قبل الموعد .. خل يشوفج الدكتور
ندى : اوكي يبه خلاص بروح معاك و الحين ممكن انام ؟
أمل : حبيبتي لا تتضايقين والله يمه هذا كله حق مصلحتج
ندى : ( اسكتت )
أمل : ( باست خد ندى ) يا روح امج كلميني ليش تسكتين
ندى : انتي حتى ما سألتيني اذا فيني شي او لأ
أمل : يمه اخوج كان يبجي حيل و ما انتبهت انج ...
ندى : خلاص عفية خلوني الحين برتاح وباجر اروح معاكم وين ماتبون
سامي : خلاص أمل امشي ( قامو اهو وامل )
أمل : تصبحين على خير حبيبتي
ندى : وانتي من اهله
سامي : اي يبه قبل لا انسى .. عطيني سويج سيارتج
ندى : ليش؟؟
سامي : ندى حبيبتي تدرين ان الدكتور محذرنا من هالشي .. ماراح اردلج السيارة الا اذا مر وقت طويل عاللي صار .. عشان نتطمن أكثر
ندى : اشكثر يعني طويل ؟
سامي : مادري خل يفحصج الدكتور واهو يقرر
ندى : ( خذت السويج من الميز يمها وعطته ابوها واهي معصبه )
سامي : ( خذاه منها ) يللا يبه نامي ولا تفكرين بشي ( اطلعو من الغرفة )

( ندى انقهرت حيل .. انقهرت من كل شي .. اقعدت تبجي لي الفير .. بعدها نامت )
----

- الصبح بالفندق –

حمد : ( يبوس خد فرح ) حبيبتي ( يبوس ارقبتها ) روحي
فرح : ( بطلت عينها وابتسمت واهي مستحيه ) صباح الخير
حمد : صباح العسل يا عمري .. نمتي مرتاحه ؟
فرح : ( تبتسم ) اي
حمد : ( قرب منها ) اشتقت لج
----

- بالمستشفى -

سامي : يعني بتكون احسن ؟
الدكتور : النوبة ردت لها بسبة الضجة اللي بالمكان .. بس لا تحاتي طول ما اهي بمكان هادي ماراح ترجع لها ان شاءالله .. بس لا تنسى النفسية ضروري تكون مرتاحة
سامي : زين عادي نخليها تسوق ؟
الدكتور : حاليا لأ .. انطر شهر عالأقل اضمن
سامي : سمعتي يبه ؟
ندى : امم
الدكتور : ندى انتي بنت عاقلة وفاهمة ماشاءالله .. يعني تدرين ان هالشي لصالحج
ندى : ( ساكته )
الدكتور : ( يبتسم ) و كلها سياره عادي يعني
ندى : بعد هالشهر اقدر اسوق ؟
الدكتور : اذا ماصارت نوبه اكيد تقدرين .. والادويه اهم شي تاخذينها بوقتها
ندى : اي ادري
سامي : يللا عيل ( قام ومد ايده حق الدكتور ) مشكور دكتور
الدكتور : مع السلامه
---

- بالفندق –

حمد : امشي نسبح
فرح : لا انت اسبح قبلي
حمد : لا تعالي نسبح مع بعض و مو شرط تفصخين القميص اللي عليج
فرح : لا مابي
حمد : بلى تبين
فرح : لا والله مابي
حمد : اشق التذاكر والله
فرح : شكو ؟
حمد : بس اذا ماسبحتي معاي .. ماكو سفره باجر
فرح : ماتسويها!!
حمد : والله اذا ماقمتي معاي راح اشقهم
فرح : حمد ليش تحلف ؟
حمد : عشان اجبرج تقومين
فرح : خلاص شقهم عيل .. لأني ماراح اقوم
حمد : ( قام من السرير وراح صوبها وشالها ) ماينفع معاج الا هالشي
فرح : ( تصرخ ) حمد نزلني .. مابي مو غصب .. نزلني يللا عاد
حمد : ( دش الحمام واهي ترافس وتدزه وحطها بالبانيو غصب .. حاولت تطلع بس مسكها حيل وبطل الماي عليها )
فرح : ( اقعدت تبجي والماي يصب عليها )
حمد : ( مات ضحك ) يالياهل شكو تبجين ؟
فرح : ( و اهي تبجي ) قلتلك مابي مو غصب
حمد : ( قعد يمها تحت الماي ) عادي اشصار الحين لا تبجين يالسخيفه
فرح : ( تضحك وتبجي بنفس الوقت )
----

- حمد وفرح قررو يسافرون اكثر من شهر بيروحون ايطاليا بيقعدون فيها اسبوع وبعدها يروحون سويسرا و النمسا و آخر شي فرنسا عشان تتسوق فرح –
- أما ندى من بعد ماخذو سيارتها صارت دلال كل يوم تمرها .. يا اما يطلعون يتمشون او انهم يقعدون مره ببيت ندى ومرة ببيت دلال -
---

- و بيوم دقت دلال على ندى .. كانت الساعه 8 بالليل –
ندى : الو هلا دلال
دلال : ( ميته بجي ) دلول تعالي اخذيني
ندى : اشفيج تبجين ؟؟ من وين آخذج ؟
دلال : ( تبجي ) تعاليلي حولي الله يخليج ندى بسرعه
ندى : اهدي شوي خل افهم من وين آخذج بالظبط ؟ وشنو صاير ليش تبجين ؟
دلال : الحين انتي طلعي من بيتكم وانا افهمج بس امانه لا تطولين
ندى : زين زين خلاص يللا يايه باي

- انزلت ندى بسرعه اتدور ابوها .. بس مالقته .. وامها اساسا كانت قايلتلها انها عند فاطمة .. دشت غرفتهم وخذت سويج سيارتها من الدرج .. و واطلعت من البيت –

ندى : الو انا واصله حولي وينج انتي ؟
دلال : شفتي البانزين اللي كنا نترس عنده ؟ لفي اللفة اللي وراه بعدها اخذي يمين و .. ( وكملت لها باجي الطريج )
ندى : بس اهني كله عماير
دلال : ( ردت تبجي ) اي ثالث وحده لونها بني .. اوقفي عندها الحين انزلج
ندى : ( انصدمت ) شموديج اهني ؟؟
دلال : ( تشاهق ) ندى الله يخليج لا تطولين حيل تعبانه

- ندى اسمعت صوت يم دلال يقول " خلاص اهدي عطيني اكلمها " –
ندى : منو هذا علي ؟؟
دلال : اي .. عفية ندى وينج ؟؟
ندى : كاني وصلت
دلال : الحين انزل ( سكرت التلفون )
ندى : الله يستر شمسوية هالبنت

- بعد ثواني دلال انزلت واصعدت مع ندى السيارة –

دلال : ( اقعدت تبجي حيل واهي ماسكة بطنها ) ندى انا راح اموت وديني الطبيب الله يخليج
ندى : ( للحين واقفه ماحركت السيارة ) ليش ؟؟ اشفيج دلول ؟؟
دلال : ( حطت ايدها على فخذها من تحت نفنوفها وطلعتها متروسة دم ) حاشني نزيف وحيل تعبانة الله يخليج ساعديني مالي الا انتي
ندى : ( انصدمت اقعدت تطالعها ) دلال انتي اشسويتي ؟
دلال : ( تشاهق ) مو وقته عفية وديني اقولج تعبانة الله يخليج وديني
ندى : ( ماسكه راسها ) انتي اشسويتي ؟؟ ليش رضيتي يجيسج ؟؟
دلال : مادري ماكان قاصد .. ندى والله راح اموت تكفين امشي
ندى : ( هزت راسها ) ماقدر .. خليه اهو يوديج .. هذي مسؤولية والله ماقدر
دلال : ( ميته بجي ) ندى حرام عليج وديني والله ما اتحمل اكثر
ندى : ( بجت معاها ) ماقدر والله ماقدر .. دلال خليه اهو يوديج الله يخليج لا تدخليني بهالموضوع
دلال : ( امسكت بطنها وانزلت واهي تشاهق )
ندى : ( تطالع الكشن عليه دم دلال .. وداست حيل واهي ميته بجي )
---

[SHwarviskya]

- ردت البيت كانو اهلها للحين مو رادين .. نادت الخدامه وقالتلها تغسل الكشن وماتقول حق امها وابوها أي شي .. اصعدت غرفتها –

ندى : ( تبجي ) ليش دلال .. ليش سويتي بنفسج جذي

- رن تلفونها وكانت اللي تدق دلال .. طالعت الشاشه بس ماردت عليها .. كانت حيل منقهره منها وماتبي تكلمها .. تم التلفون يرن مره مرتين .. عشر مرات .. اخر شي قعد يدق عليها رقم غريب أكثر من 7 مرات .. جان ترد –

ندى : الو ؟
.... : ندى ؟
ندى : اي منو ؟
.... : انا علي
ندى : ( بعصبية ) اشتبي ؟؟
علي : ندى تره دلال رفيجتج .. وقاعده تنزف للحين .. تبينها تموت يعني ؟
ندى : ( فيها غصة ) و آنا شكو ؟؟؟ انا اللي خليتها تنزف ولا انت ؟؟ روح انت ودها المستشفى
علي : اروح بصفتي شنو ؟
ندى : دام تدري ان مالك أي صفة عيل ليش سويت فيها جذي ؟
علي : مو وقت معاتب الحين .. انا داق و ابي منج طلب بسيط بحكم الصداقة اللي بينكم
ندى : اشبغيت ؟؟
علي : ابي رقم ملفج الصحي
ندى : ملفي انا ؟؟ ليش ؟
علي : ندى انا ادري انج مريضة .. دلال قالتلي .. وادري ان عندج ملف .. خليها اتدش باسمج .. اكيد ماراح يدققون على الدخول لأنج وايد تراجعين عندهم
ندى : لا آسفه ماقدر
علي : ماراح يصير شي صدقيني بس تدخل باسمج و يوقفون النزيف وبعدها والله مانطب هالمستشفى
ندى : ( تبجي وتصارخ ) قلتلك ماقدر خلاص لا تدق ( سكرت الخط واقفلت الجهاز بكبره ) دلال ليش سويتي جذي لييييييييش
---

- ثاني يوم .. أمل قاعده مع ندى بالصالة –

أمل : ندى حبيبتي .. شيريل قالت لنا انج طلعتي امس بالسيارة .. والكشن اللي يمج كان فيه دم
ندى : ( ارتبكت ) دم ؟؟ منو قال ان هذا دم ؟
أمل : شيريل
ندى : شيريل غبية .. الحمدلله والشكر واشياب الدم حق الكشن ؟؟ هذا شاني طاح مني وقلها تغسلة
أمل : زين ليش طلعتي بالسياره ؟ ابوج وايد عصب بس انا حلفته مايكلمج بالموضوع
ندى : يمه مر تقريبا 3 اسابيع .. خلاص والله تعبت
أمل : زين مو لو مستأذنتا احسن ؟ يمه احنا مانقدر انخلي البيت من غير سيارة .. و المفتاح حاطينه بالدرج بس حق الشي الطارئ لا سمح الله
ندى : خلاص ماعيدها
أمل : بعد عمري .. ادري فيج تسمعين الكلام وتره مابقى شي و نردلج المفتاح
ندى : ( اسكتت )
---

- مرت 3 ايام وندى للحين جهازها مغلق –
( الساعه 7 بالليل )

شيريل : ندوي .. تحت صالة في واحد مره يبي بابا و ماما
ندى : منو هذي ؟ تعرفينها ؟؟ اول يت بيتنا ؟؟
شيريل : لا انا مايشوف اول
ندى : قلتيلها محد موجود
شيريل : اي انا قول بس هيا مايبي روح
ندى : خلاص انا الحين انزل
شيريل : اوكي ( اطلعت من الغرفة )

- انزلت ندى ودشت الصالة لقت بويهها ( ام دلال ) –

ندى : ( انصدمت بس راحت تبي تسلم عليها ) هلا خالتي
ام دلال : تخلخلت اعظامج قولي آمين
ندى : ( منصدمة تطالعها ) ليش؟
ام دلال : ( تصرخ ) يالوصخه تخربين بنتي ؟؟ انا اعلمج والله لخليهم يذبحونج اليوم نطري علي يالقذره ياللي اهلج ما اعرفو يربونج
ندى : ( دموعها بعينها ) ليش انا اشسويت ؟؟
ام دلال : جب كلامي مو معاج يا عديمة التربية

(ندى من الصدمة ماعرفت شتقول .. بس كانت دموعها تنزل .. دشت غرفة امها وخذت المفتاح وعلى طول اطلعت من البيت اتسوق السيارة واهي ميته بجي )

[SHwarviskya]

- 15 / غيبوبة -

- تمت ندى تسوق واهي تبجي .. مو عارفة وين رايحة بالظبط –

ندى : ( واهي تشاهق ) زين انا شكو ؟؟ ليش يت بيتنا تسبني ؟

- بيت ندى –
( أمل وسامي توهم رادين البيت .. وتفاجئو من وجود ام دلال بالصالة )

ام دلال : ( اوقفت وبدت تصرخ ) و اخيرا الأهل شرفو
أمل : منو حضرتج ؟
ام دلال : انا ام دلال .. دلال اللي قصت عليها بنتكم و دخلتها بعالمها الوصخ
سامي : ( بصوت عالي ) هيي انتي استحي على ويهج شهالكلام
ام دلال : ( تصرخ حيل ) بنتكم الوصخه اللي ماعرفتو تربونها اضحكت على بنتي و خذتها شقة
أمل : ( شايلة عبود واهو يبجي ) انتي اشقاعده تخربطين ؟؟
سامي : ( يصرخ ) شيريل شيريل
شيريل : نام بابا
سامي : أمل عطيها عبود
أمل : ( عطتها اياه ) ممكن تفهميني اشقاعده تقولين ؟
سامي : ( حده معصب وواقف يطالع ام دلال )
ام دلال : بنتكم اللي عبالكم انكم عرفتو تربونها .. ضاحكة على بنتي الخبله .. وماخذتها معاها شقه الظاهر انها متعودة تروح لها
أمل : ( داخت جان تقعد ) سامي قولها تطلع بره مابي اسمع اكثر
سامي : روحي ارتاحي داخل .. انا بقعد اسمعها
أمل : ( تصرخ ) لا ماتسمعها .. داشه اتجذب و تقط بلاوي بنتها على ندى
ام دلال : ( تصرخ من قمة راسها ) بنتي طول عمرها ما اغلطت .. والحين اهي بالفترة الاخيره كله مع بنتكم 24 ساعه معاها .. اتييني بيوم وليلة شرفها ضايع واهي بين الحيا والموت ؟؟؟ و قاعده تنزف .. ( بجت واهي تصرخ ) والله شكلها انغصبت على هالشي من تحت راس بنتكم
سامي : وليش متأكده ان بنتي السبب ؟؟
ام دلال : ( بصراخ ) اقولك اهي 24 ساعه مع بنتكم .. كله تطلع معاها .. منو يعني علمها على هالاشياء ؟؟ وليش بنتكم صارلي جم يوم ادق عليها مسكره جهازها ؟؟؟ والحين يوم شافتني انحاشت .. كل هذا شيدل عليه ها ؟
أمل : سامي دق على ندى نادها
سامي : ( معصب حده ومسك التلفون يدق عليها بس يطلع الجهاز مغلق )
أمل : ها ردت ؟
ام دلال : لا اكيد ما ترد هالوصخه ام الشقق
سامي : ( يصرخ ) لو سمحتي طلعي بره
ام دلال : انا بطلع الحين .. وكنت اقدر ادخلكم مخافر بس مابي بنتي تتأذى بسبتكم اكثر من جذي .. ونصيحة مني .. روح افحص على بنتك
سامي : ( يصرخ ) طلعي بره
ام دلال : ( خزتهم مده بعدين اطلعت من البيت )
أمل : ( اقعدت تبجي ) يارب رد بنتي سالمة .. اكيد خرعتها وخلتها تطلع
سامي : ( بصراخ ) وهذي دام مو مسوية شي ليش اطلعت ؟؟ و ليش جهازها مغلق ؟
أمل : ( مصدومة ودموعها تنزل ) سامي انت مصدقها ؟؟؟
سامي : لا طبعا مو مصدقها بس ليش خذت السياره وراحت واحنا موصينها ماتسويها ؟؟؟ و شنو الدم اللي كان بسيارتها وقالت عنه شاني ؟؟
أمل : ( ماعرفت شتقول بس اقعدت تبجي )

- تم سامي رايح راد ينطر ندى و اهو على اعصابه –

سامي : دقي على اختج يمكن راحت اهناك
أمل : فرح مو بالكويت .. اكيد ماتروح لهم بس بشوف .. ( دقت على فاطمة )
فاطمة : الوو هلا أمول
أمل : اشلونج فاطمة
فاطمة : الحمدلله متملله والله .. البيت فضى علي من عقب البنات
أمل : يعني ماكو احد عندج ؟
فاطمة : والله نوره طالعه مع ريلها السينما يحليلها .. ومشعل وفهد طالعين وهذي انا قاعده بروحي مجابلة التلفزيون
أمل : ( تأشر حق سامي ان ندى مو اهناك ) فاطمة سامي قاعد ينادي .. اكلمج بعدين .. مع السلامه
فاطمة : مع السلامه ( سكرت الخط )
سامي : ( يصرخ ) وين بنتج يعني ؟؟؟
أمل : سامي اهدى شوي .. الحين بترجع
---

- ندى كانت ناسية تلفونها بغرفتها واهو مغلق من 3 ايام .. و بعد ما بجت و ارتاحت .. قررت ترجع البيت .. اول ما اوصلت سمت بالرحمن وانزلت –

ندى : ( بقلبها ) يارب مو صاير شي ( دشت الصاله )
سامي : ( اول ماشافها كان حده مفوّر .. فصخ عقالة وطقها فيه على زندها ) وين كنتي ها؟؟
أمل : ( امسكت ايد سامي ) سامي انت اشقاعد تسوي ؟
ندى : ( صرخت من الألم )
سامي : ليش طلعتي من البيت ؟؟ وانا قايلج ماتاخذين السياره ؟؟ الا اذا كان كلام ام دلال صح
ندى : ( تصرخ واهي تشاهق ) صدقتها ؟؟ وييت اتطقني ؟؟؟
سامي : ( حده معصب ) ليش طلعتي من البيت اذا ما كنتي غلطانه
ندى : ( واهي ميته بجي ) كيفي .. كيفي بطلع متى ما ابي اطلع هذا مو بيتي
سامي : ( ماقدر يمسك اعصابه وطقها طراق قوي خلاها تطيح )
أمل : ( اشهقت ) سامي لييش ؟
ندى : ( واهي عالارض .. امسكت خدها واقعدت تخز سامي ودموعها تنزل )
أمل : ( انزلت يم ندى تبي تقومها ) يمه قومي معاي فوق
ندى : ( دزت ايد أمل ) و اركضت غرفتها

- ندى دشت غرفتها واهي ميته بجي .. اقفلت عليها الباب و قطت عمرها عالسرير .. وبعد ثواني حست ان كل شي فيها بدى ينمل .. درت انها بعد شوي راح تنصرع .. ملت من حالتها واقعدت تصرخ حييييل –

ندى : ( بصراخ ) خلاااااص بس تعبت تعبت

( اوقفت واقعدت تكسر كل شي واهي تصرخ .. بعدها امسكت القطعه اللي عطاها اياها الدكتور وحطتها بحلجها بآخر لحظة و طاحت .. وبدت ترجف )

أمل : ( يت على صوت الصراخ والتكسر بس لقت الباب مقفول ) ندى يمه بطلي الباب .. ندى بطلييه حبيبتي

( أمل حطت اذنها على الباب اسمعت صوت ندى وقت النوبه .. يكون مثل صوت ونات مقموته )

أمل : ( تصرخ ) سامي تعال اكسر الباب ندى يتلها النوبة
سامي : ( يه بسرعه .. وحده خايفه عليها ) اهدي الحين تقوم وتبطل لنا
أمل : ( اقعدت عالارض وحطت ايدها عالباب واهي تبجي ) ندى امج اهني لا تخافين حبيبتي
سامي : ندى والله يبه ماقصدت بس انقهرت لأنج طلعتي وانتي مو غلطانه .. يبه كان المفروض تقعدين وتفهمينا السالفه عدل

- مرت تقريبا 5 دقايق و أمل للحين تسمع الصوت نفسه اللي يطلع من ندى وقت النوبه –

أمل : ( حدها خايفه ) سامي اشفيها للحين ماقامت .. الطبيعي 3 دقايق
سامي : اخاف اكسر الباب تكون وراه
أمل : ( قامت وامسكت سامي من دشداشته ) سو شي .. انت المسؤول عن اللي صارلها
سامي : ( خر أمل عنه وبدى يشوت الباب ويدزه بجتفه بقوه )

- بعد اكثر من 10 محاولات .. انكسر القفل وتبطل الباب –

( دشو لقو ندى بنص الغرفة طايحة وطالعة رغوه من حلجها .. واهي للحين ترجف بس عالخفيف )

أمل : ( راحت لمتها واهي تصرخ ) يمه بنتي قومي ندوي
سامي : ( قعد يمها وانزلت دموعه ) يبه ندى انا آسف والله ماقصدت خلاص حبيبتي قومي

- بس ندى للحين كانت مغيبة –

سامي : ( طلع تلفونه ودق عالاسعاف وعطاهم العنوان )
أمل : ( لامه ندى و اهي تبجي ) يارب قومها بالسلامه .. رحمتك يارب
سامي : ( يطالعهم وعيونه تدمع )
أمل : ( تصرخ ) انت السبب باللي صارلها
---

- اوصلت الاسعاف وخذوا ندى .. و أمل اصعدت معاهم .. وسامي خذى الخدامه و عبود وداهم بيت فاطمة –

سامي : خلوه عندكم .. ةندى تعبت شوي وبنوديها المستشفى
فاطمة : ( حطت ايدها على قلبها ) اشفيها بنتي ؟
سامي : ان شاءالله نطلعها اليوم .. وراح نطمنج بالتلفون لا تحاتين .. مع السلامه ( خلاهم وطلع طاير حق المستشفى )
---

- بالمستشفى –

الدكتور : حاشها انهيار عصبي قوي و مع الحالة اللي تعرضت لها أدى هذا الى دخولها غيبوبة
أمل : ( اشهقت ) اشلون يعني ؟ راح تقوم منها ولا لأ ؟
سامي : ( توه واصل ) ها دكتور بشر ؟
أمل : ( تطالع سامي وقلبها محترق على بنتها ) انت السبب باللي صارلها كله منك
الدكتور : اهدي لو سمحتي .. ان شاءالله بتقوم من غيبوبتها
سامي : ( منصدم ) غيبوبه ؟
الدكتور : المؤشرات كلها سليمة .. و ان شاءالله جم يوم وترجع لكم مثل اول واحسن .. بس تحتاج الراحه النفسية قبل كل شي
سامي : نقدر نشوفها ؟
الدكتور : اكيد .. تعالو معاي
أمل : ( خزت سامي و دموعها تنزل ) والحقت الدكتور

- مر اسبوع .. و ندى للحين ماقامت .. و ماقالو حق فاطمة الصج .. بس اللي اعرفته ان ندى تعرضت حق نوبة وماصحت منها –

فاطمة : ( حاطه ايدها على راس ندى و قاعده تبجي ) يا بعد عمري يا بنتي
أمل : خلاص فاطمة .. الدكتور محذرنا مانبجي جدامها
سامي : ( قاعد و حاس بذنب كبير )

- فرح بهاليوم ارجعت من السفر .. و راحو بيت حمد –

فرح : ( توهم بيدشون البيت ) حمد مادري ليش احس بخوف
حمد : لا تخافين عمري والله ماراح ياكلونج ( مسك ايدها ودشو البيت )
ام حمد : هلا بولدي حبيبي
حمد : ( راح باس راس امه وايدها ) هلا فيج يمه .. هلا بشمعة هالبيت
ام حمد : ( لمت حمد ) الف حمدلله على سلامتكم
فرح : ( واقفه تطالعهم )
ام حمد : اشلونج فرح ؟
فرح : ( راحت سلمت عليها ) بخير اشلونج خالتي ؟
ام حمد : الحمدلله بخير دامكم بخير
حمد : عيل وين خواتي ؟ ماشوف احد مستقبلنا ؟
ام حمد : هدى في بيتها اتيي اليوم بالليل .. و مشاعل وعبير نايمين الساعه 4 العصر لازم يقيلون هالحزه
حمد : ( قعد و مسك ايد فرح قعدها يمه ) عاد يايبلهم هدايا بس شكلي بهون وماني ماعطيهم شي
ام حمد : وانا ؟ اشيبتلي ؟
حمد : انتي الزين كله .. يبتلج من كل دوله شيين
ام حمد : بعد عمري حبيبي انت
فرح : ( ساكته وتطالعهم واهي مبتسمه .. اعجبتها علاقت حمد بأمه )

- بعد ساعة –

حمد : خلاص عيل دامهم للحين نايمين .. عيل احنا بنروح عند خالتي ام فرح
ام حمد : على خير يمه .. سلمولي عليها
فرح : الله يسلمج خالتي
حمد : مع السلامه ( باس راس امه وقام )
فرح : مع السلامه خالتي
ام حمد : مع السلامه الله معاكم

[SHwarviskya]

- اوصلت فرح بيتهم .. مالقت الا فهد بالصالة يطالع تلفزيون –

فرح : ( سلمت على فهد ) اشلونك حبيبي وين امي وابوي ؟
فهد : مادري عنهم
حمد : اشلونك فهد عساك بخير
فهد : بخير يالنسيب وانت اشلونك ؟
حمد : الحمدلله
فرح : نوره وين ؟
فهد : بدارها
فرح : اوكي بروح اشوفها

- خلت فهد وحمد قاعدين بالصالة و راحت حق نوره –

فرح : ( دشت على نورة ولمتها ) اشتقلتج وايد
نوره : انا بعد يالخايسه طولتي حيل
فرح : واي كان حده وناسه
نوره : اي اكيد تستانسين بعد صرتي مره مع الويه
فرح : ( ابتسمت ) زين فشله حمد قاعد بروحه مع فهود .. وين امي وابوي ؟ ( طالعت عبود نايم عالسرير ) و هالحلو شيسوي اهني ؟
نوره : مادريتي ؟؟
فرح : عن شنو ؟
نوره : عن ندى
فرح : ( خافت ) اشفيها ؟؟
نوره : ندى صارلها اسبوع واهي بغيبوبه
فرح : ( حدها انصدمت ) لييييش ؟؟
نوره : مادري يقولون يتها النوبه بعدين ما قامت
فرح : ( اشهقت ) الله يستر أي مستشفى ؟؟
نوره : ( قالت لها المستشفى )
فرح : اوكي انا رايحة لها الحين

- انزلت بسرعه وقالت حق حمد اللي صار و راحو المستشفى على طول –
( اوصلوا ودقت على امها ودلتها مكانهم )

( فرح دشت عليهم .. سلمت على امها و خالتها وعمها سامي .. ونفس الشي سلم عليهم حمد )

فرح : ( راحت عند راس ندى و اقعدت تبجي ) ندى حبيبتي .. انا فرح .. رجعت اليوم
أمل : يمه فرح مايصير تبجين عندها .. موزين
فرح : ( امسحت دموعها ) ندى قومي الله يخليج .. خالتي من شنو صارلها جذي ؟
أمل : ( اسكتت )
فرح : اشفيكم ؟؟ من شنو صارلها جذي ؟؟
أمل : تعرفين دلال ؟
حمد : ( طالع فرح على طول .. ماتوقع يسمع اسم دلال اهني )
فرح : ( انصدمت ) وهذي شكو بالموضوع ؟
سامي : امل خلاص مو وقته
أمل : تعالي معاي ابي اكلمج
فاطمة : اشفيكم ؟؟
أمل : لا بس بسألها عن شي

- اطلعت فرح مع أمل بره الغرفة –

أمل : اتعرفين دلال عدل ؟
فرح : اي اعرفها و ما اطيقها كلش .. وكله احذر ندى منها .. ليش اشسوت ؟؟
أمل : اشلون اخلاقها ؟
فرح : مو زينه كلش
أمل : عيل ليش بنتي تمشي معاها ؟
فرح : مادري عنها .. كله تقول انا مالي شغل بسوالفها
أمل : يعني عندها سوالف ؟
فرح : مادري خالتي بس اللي اعرفه انها مو مضبوطه .. ليش اهي شكو باللي صار حق ندى ؟
أمل : ( قالت لها كل اللي صار وقالتلها ان سامي صرخ على ندى لأنها اطلعت من البيت وما انطرتهم .. بس ماقالت شي عن الطراق والعقال )
فرح : ( انزلت دموعها ) لا حول ولا قوة الا بالله .. والله كله احذرها من هالبنت
---

- ثاني يوم بالمستشفى .. ندى حركت ايدها وبطلت عينها –

أمل : ( مو مصدقه ) ندى يمه بنيتي

( الكل يه يمها مو مصدقين عيونهم وحدهم مستانسين )

ندى : ( تطالعهم وماتكلمت )
فاطمة : فرح يمه نادي أي احد بسرعة
فرح : ان شاءالله يمه ( اطلعت تركض )

- يه الدكتور مع ممرضات و طلعهم من الغرفه وشاف ندى .. فحصها وشال الاجهزة عن صدرها وايدها -

الدكتور : ندى اشلونج الحين ؟ شتحسين فيه ؟
ندى : ابي امي
الدكتور : ان شاءالله الحين اناديهم بس لا تعبين نفسج ( طلع من الغرفه )

الدكتور : لا تخافون .. ندى بخير .. بس راح تقعد عندنا يومين نتطمن عليها ونكمل باجي الفحوصات .. الحين تقدرون تشوفونها بس لا تخلونها تنفعل
أمل : ( دموعها تنزل من الفرحه ) ان شاءالله

- أمل وسامي وفاطمة و فرح دشوا عليها الغرفة –

ندى : ( تبتسم حق امل ) يمه
أمل : ( باست ندى ) هلا يا عمري .. الف حمدلله على رجعتج لنا
فاطمة : ( راحت باستها ) حمدلله على السلامه
ندى : الله يسلمكم ( طالعت فرح ) متى رديتي
فرح : ( اضحكت و دموعها تنزل ) امس .. خوفتيني والله
سامي : ( باس راس ندى ) الحمدلله على سلامتج يبه
ندى : ( طالعت سامي مده طويله ) يمه
أمل : هلا يمه ؟؟
ندى : انا بعيش عند خالتي فاطمة

[SHwarviskya]

- 16 / سامحيني ماقدر اكمل -

سامي : ( باس راس ندى ) الحمدلله على سلامتج يبه
ندى : ( طالعت سامي مده طويله ) يمه
أمل : هلا يمه ؟؟
ندى : انا بعيش عند خالتي فاطمة
فاطمة : ( مو مصدقة اللي تسمعه ) صج ؟؟ والله راح احطج بقلبي وعيوني و...
أمل : ( اشهقت وامسكت ايد ندى ) لا يمه حبيبتي والله كل شي راح يتصلح لاتقولين جذي
سامي : ( حده متضايق ) يبه آنا آسف .. سامحيني ماقصدت امد ايدي عليج
ندى : ( لفت ويهها على امل ودموعها تنزل ) يمه الله يخليج خليني اروح
أمل : لا ماتروحين بيتج موجود ماتروحين مكان غيره
فاطمة : أمل خلاص خليها على راحتها البنت تعبانه
سامي : ( حاس بتأنيب ضمير ) صح أمل خلاص خليها مانبي نضغط عليها اكثر
أمل : ( قلبها محترق وعيونها مغورقه ) بخليج تروحين اسبوع و ابيج بهالوقت تفكرين فيني عدل .. تره انا امج انا اللي ربيتج وكبرتج .. لا تنسين هالشي
ندى : ( ابتسمت ودموعها تنزل ) عمري ماراح انسى
---

- مر اسبوع وندى اطلعت من المستشفى .. و راحت بيت فاطمة –

( بيت أمل )

أمل : خلاص مابي اسمع اكثر .. البنت اطلعت من اهني بسبتك انت
سامي : آنا يمكن تصرفت بتسرع بس تره ردة فعلي مثل ردة فعل أي ابو يحب بنته ويخاف عليها

- عبود قعد يبجي .. شالته أمل ولمته على صدرها –

سامي : أمل صدقيني كلها جم يوم وترجع ماراح تتحمل تعيش اهناك
أمل : ( بعصبية ) خلاص سامي .. قلتلك مابي اسمع شي زياده .. اطلع بره خلني بروحي
سامي : ( سكت مدة بعدين طلع من البيت )

( أمل حطته عبود بسريره وراحت خذت التلفون ودقت على فاطمة )

أمل : ( بصوت متضايق ) الو .. فاطمة ؟
فاطمة : هلا أمل
أمل : فاطمة الله يخليج لا تنسين مواعيد الأدوية .. انا كتبتلج كل شي وحطيته بالجيس مع أدويتها
فاطمة : أمل تره هذي هم بنتي .. صدقيني ماراح انسى
أمل : ( صوتها بدى يتغير فيها بجية ) الله يطمنج .. مع السلامة
فاطمة : مع السلامة
أمل : ( سكرت التلفون واقعدت تبجي ) يا بعد عمري يابنيتي .. ماتمنيت طلعتج من هالبيت تكون بهالطريقة
---

- بيت فاطمة –
( بغرفة فرح – سابقا - )

نوره : ( توها داشه الغرفه ) العشى انحط
ندى : ( منسدحه ) لا مابي مشكورة
نوره : ليش يعني متعوده اييبون الاكل لي عندج ؟
ندى : لا بس اذا يعت اروح المطبخ آكل أي شي لا تحاتون
نوره : ومنو قال قاعده احاتيج .. بس امي ودها تشوفج عالاكل .. الحمدلله والشكر يايه تنشر نكدها اهني ( اطلعت وخلت الباب مفتوح )
ندى : ( قامت سكرت الباب وراها وردت انسدحت و دموعها انزلت )
---

- بيت حمد –

فرح : حبيبي انت مو ملاحظ ان هدى ومشاعل مايحبوني ؟
حمد : ( مسك ايدها ) يا عمري حتى لو مايحبونج انتي شكو فيهم ؟ المهم آنا احبج .. مو كافي ؟
فرح : ( لمته ) بلى والله كافي .. الله يخليك لي
حمد : ( باس خدها و اهو لامها ) عندي لج مفاجأة
فرح : ( وخرت عنه ) صج ؟ شنو اهي ؟
حمد : اشلون تصير مفاجأة اذا قلتها لج ؟
فرح : ومتى اشوفها ؟
حمد : باجر الصبح
فرح : زين لمحلي شوي والله ماقدر انام وانا افكر
حمد : خلاص عيل سهري
فرح : ( تضحك ) حمد يللا عفية قووول
حمد : والله ماراح اقول ( رن تلفون شقتهم و رد عليه ) الو ؟
ام حمد : يمه حمد العشى انحط ماتنزلون ؟
حمد : بلى يمه الحين نازلين
ام حمد : يللا ناطرينكم مع السلامه
حمد : مع السلامه ( سكر الخط ) .. فروح حبيبتي يللا بدلي خل ننزل نتعشى
فرح : حمد الله يخليك مابي عشى والله مالي خلق انزل
حمد : لا عاد فروح عشاني قومي بدلي خل نتعشى ونرجع
فرح : وراي سباحة وعفيسة .. وغير هذا كلش مالي خلق البس ملفع وأخاف اخوك يكون موجود
حمد : انا مابيج تسبحين الحين .. سبحي قبل لا تنامين .. و اذا عالملفع عادي كلها ساعه بالكثير ونصعد .. و بعدين اذا ما نزلتي ماكو مفاجأة باجر
فرح : زين خلاص كاني قمت ( قامت واقعدت تبدل جدامه )
حمد : ( يطالعها ) تصدقين شكلي خلاص بهون مانبي عشى
فرح : ( غطت نفسها بملابسها ) اوو حمد خلاص عاد الا تفشلني كل مره ؟
حمد : ( يضحك ) فديت اللي تستحي يللا بدلي بسرعه ماراح اشوف ( عطاها ظهر )
فرح : ( بدلت ملابسها عالسريع ) خلصت .. بس شوي اعدل شكلي وننزل
حمد : يللا لا تطولين
فرح : اوكي ثواني بس
---

- خلصت فرح وانزلوا تحت .. كانو بالصالة ام حمد و مشاعل وعبير ( 18 سنه ) -

حمد : ( باس راس امه و ايدها اليمين ) اشلونج يمه
ام حمد : هلا حبيبي
مشاعل : مت من اليوع وانا انطر تره مايصير جذي
حمد : ( يضحك ) يحليلج شعوله محسستني انج بطه
مشاعل : ماله شغل بطه ولا رشيقه في شي اسمه التزام بالمواعيد
حمد : اقعد يالبزنس
عبير : ( اضحكت )
ام حمد : خلاص يمه بسكم نجرة قوموا نروح ناكل

- قاموا كلهم غرفة الطعام .. كان فيها طاولة كبيرة فخمة مع كراسيها و عالطاولة حاطين اصناف اكل مختلفة ( نظام بوفيه ) –

عبير : ( تبتسم ) اشلونج فرح ؟
فرح : الحمدلله تمام
ام حمد : يمه مشاعل نجبي حق فرح
مشاعل : ( امسكت صحن واهي تخز فرح و تحط لها من كل شي شوي )
فرح : ( تبتسم واهي منحرجه ) مشكورة بس آنا ما آكل ربيان ولا فليه سمج
مشاعل : ( حطت الصحن جدام فرح بعصبية ) لا تاكلينه كيفج انا شكو ؟؟
حمد : ( يخز مشاعل ) بس عاد ( خذه صحن فرح حطه جدامه .. وياب صحن يديد و مسكه وطالع فرح ) ها حبيبتي شنو تبين احطلج ؟
فرح : ( انحرجت ) عادي أي شي
مشاعل : ( تخزها ) توج ما آكل هذا و ما آكل ذاك
ام حمد : مشاعل خلاص .. احترمي النعمة عالأقل

- حمد حط حق فرح أكل و اقعدوا ياكلون واهو يسولف اغلب الوقت مع امه بس فرح كانت ساكته تبي وقت العشى يمر بسرعة عشان تنحاش شقتها –

- بعد ما خلصوا العشى .. اقعدوا شوي مع ام حمد بالصالة و مشاعل راحت غرفتها –

ام حمد : متى بإذن الله اشوف حفيدي ؟
حمد : ان شاءالله بتشوفينه
ام حمد : لا يعني اقصد مر شهرين على زواجكم .. يعني ما تأخرت عليج ؟
فرح : ( ابتسمت ) بلى تأخرت جم يوم .. عاد ما ادري اذا حمل او لأ
ام حمد : ( ترفع ايدها وتدعي ) يارب يكون حمل .. و يكون سليم بفضلك يارب
حمد و فرح : ان شاءالله
عبير : وااي وناسه واخيرا راح اصير عمه
حمد : قولي ان شاءالله .. للحين ماندري اذا حامل او لأ
ام حمد : زين يمه متى تروحين تحللين ؟
فرح : بعد اسبوع
ام حمد : على خير

- دش اخو حمد ( أحمد .. عمره 24 سنه ) –

أحمد : السلااااااام عليكم
الكل : وعليكم السلام
ام حمد : يمه انت وين كنت ؟ و ليش ماتعشيت معانا ؟
أحمد : ( قعد يمه امه وباس خدها ) كنت مع ربعي .. و لا تحاتين تعشيت خروف كامل
ام حمد : ( تضحك ) بألف عافية حبيبي
أحمد : الله يعافيج .. ها بوحميد اشلونك ؟
حمد : مستقر ومرتاح الفال لك
أحمد : عسى دوم .. بس انا تو الناس علي
ام حمد : لا مو كيفك راح ازوجك
أحمد : لا يمه والله انا للحين مو قد المسؤولية تبيني أأذي بنت الناس معاي ؟
عبير : اي يمه كلش ولا أحمد .. والله ان ياهل مو قد المسؤولية
أحمد : ( حذف الكوشية على عبير ) آنا جم مرة اقولج كلميني عدل
ام حمد : خلاص انت وياها بس عاد عيب
حمد : ( يبتسم ويطالعهم ) يللا عيل احنا نستأذن ( مسك ايد فرح وقام ) تصبحون على خير
الكل : وانتو من أهله

[SHwarviskya]

- بيت فاطمة ( غرفة فرح سابقا ) –

فاطمة : يا قلبي يا حبيبتي مايصير كله قاعدة بروحج اهني
ندى : و بشنو مضايقكم هالشي ؟
فاطمة : نبي نشوفج .. نبي نسولف معاج مايصير حابسه عمرج جذي
ندى : ( ساكته )
فاطمة : زين يمه خذيتي أدويتج ؟
ندى : اي قبل شوي خذيتهم
فاطمة : الحمدلله .. يمه ندى والله ما تدرين اشكثر انا مستانسة لأنج اهني
ندى : بلى ادري مستانسة وايد
فاطمة : ( امسكت ايد ندى واهي تبتسم ) لا والله ماتدرين اشكثر آنا طايرة من الفرح
ندى : ( طوفت الموضوع ) اي صج خالتي ذكرتيني .. اشلون فرح ؟ مستانسة مع ريلها ؟ ماقعدت معاها عدل عشان اسألها
فاطمة : الحمدلله اتقول وايد مرتاحة
ندى : الحمدلله

- وتمت فاطمة تسولف مع ندى مدة طويلة لين خلتها تنام وراحت غرفتها –

---

- ثاني يوم الساعه 11 الصبح –

حمد : ( باس خشم فرح ) قومي قلبي .. بسج عاد وايد نمتي
فرح : ( افتحت عينها لقت حمد قاعد يمها عالسرير واهو لابس دشداشة و غترة ) رايح مكان ؟
حمد : أول قولي صباح الخير صباح العسل
فرح : ( تبتسم ) صباح كل شي حلو
حمد : ( باسها عالسريع ) اي جذي زين الحين تقدرين تسألين عن اللي تبينه
فرح : ( تبتسم ) ليش كاشخ رايح مكان ؟
حمد : لا .. راد من مكان
فرح : داومت اليوم ؟
حمد : لا بس رحت طليت عالشغل ومن باجر ارجع اداوم .. وابيج الحين تلبسين لأن صار وقت المفاجأة
فرح : ( اقعدت ) عيل اروح اغسل وابدل ثواني بس
حمد : يللا ناطرج

- فرح راحت بسرعه غسلت و اطلعت البست ملابسها –

فرح : شوي بس اتمكيج عالسريع
حمد : يللا يا قلبي والله طولتي تعبت وانا ناطرج
فرح : ( واقفة عند المنظره تحط كحل ) ثواني والله بس كحل و مسكرا
حمد : زين خلصي لا تسولفين
فرح : اوكي

- كملت شغلها عالسريع .. والبست ملفعها .. و البست كعب لايق على بدلتها –

فرح : خلصت .. شفت اني سريعة ؟
حمد : ( قام واهو يبتسم ) اي اسم الله عليج سونيك بالسرعة
فرح : ( تضحك ) شخباري سونيك كنت تلعبة قبل ؟
حمد : ( مسكها من ايدها واهم طالعين من الشقة ) اقول امشي بس امشي

- اطلعو من باب البيت لقت جيب لكسز عليه شريطة حمره جنه هدية وكان سافطها يم سيارته المرسيدس cls –

فرح : ( تطالع السيارة واهي مبتسمة حييل وبعدها طالعت حمد مو مصدقة ) هذي لي ؟
حمد : اي يا عمري طبعا لج
فرح : ( مو عارفة شتقول بس كانت حاطه ايدها على حلجها واهي تضحك )
حمد : العفو يا عمري تستاهلين والله
فرح : ( من الوناسة لمت حمد و تحس انها شوي وتبجي ) مشكوور قلبي والله احبك حيل .. انت احلى شي صار بدنيتي
حمد : ( وخرها عنه وعطاها سويج السيارة ) فديت عمرج يللا هاج ودينا أي مكان تبين
فرح : ( خذت السويج و اركبت السيارة واهو قعد يمها ) قلبي والله ماني عارفة شقولك
حمد : ( يضحك ) خلاص حياتي .. مو لازم تقولين شي .. اهم شي اني شفتج مستانسة
فرح : ( شغلت السيارة واهي تبتسم ) اكيد تذكرت يوم قلتلك اني احب هالسيارة ؟
حمد : وانا اقدر انسى شي قلتيه ؟
فرح : الله يخليك لي يارب
حمد : والله انتي تستاهلين كل خير .. يللا حركي
فرح : وين تبي اوديك ؟
حمد : مادري كيفج افتري فينا الكويت وبعدين خل نرجع نتغدى مع امي
فرح : ( تبتسم ) اوكي .. زين وين اللمبرجيني ؟ من ردينا من السفر ما شفتها
حمد : ما احتاجها و بعتها على رفيجي
فرح : احسن
---

- بعد اسبوع –

الدكتورة : مبروك حامل .. ببداية الشهر الثاني
حمد : ( حده مستانس ) صج ؟؟ الله يبشرج بالخير
فرح : ( تبتسم حيل ) الحمدلله يارب
حمد : ( قام ) بدق على امي ابشرها ( طلع بره الغرفة )
الدكتورة : ريلج وايد مستانس
فرح : ( تبتسم ) اي .. وايد كان يدعي اني احمل .. احسه يبي هالشي اكثر مني
الدكتورة : الله يتمم عليكم هالفرحة
فرح : آمين .. مشكوره دكتورة
الدكتورة : راح اكتبتلج على ادوية تاخذينها بالوقت المحدد .. وان شاءالله يكون حملج سهل و خفيف عليج

- اكتبت لها الأدوية .. و عطتها موعد حق الفحص الثاني .. واطلعت مع حمد –

حمد : ( ماسك السكان بيد و الايد الثانية حاطها على بطن فرح ) قوم بابا كلمني
فرح : ( تضحك ) توه قطعة دم شيقولك يعني
حمد : كيفي مالج شغل ابيه يقولي بابا
فرح : ( تضحك ) راح يقولها ان شاءالله بس اصبر عليه شوي
حمد : والله هذا احلى احساس ممكن يمر عالانسان
فرح : اي صح سبحان الله .. زين اشقالت خالتي ؟
حمد : استانست وايد
فرح : يحليلها
---

- انتشر خبر حمل فرح بالعايلة كلها .. والكل استانس لها حتى ندى وايد استانست اكثر من وناستها باخوها عبود -

- مر شهر وصار عرس نوره .. الكل راح وندى اعتذرت خافت تتعب و تمت قاعده بالبيت .. بعدها بجم يوم بدت الدوامات و ندى للحين عند فاطمة و كانت كل يوم تنزل تقعد معاها .. بس اذا دش مشعل بسرعة تصعد ماكانت تحب تقعد معاه واهو ماكان يهمه اذا اقعدت او لأ .. و أمل كل يوم تزورها و تقنعها ترجع بس طبعا من وره فاطمة .. ما حبت تقول هالشي جدامها –

أمل : ( مقعده عبود بحضنها ) يمه ندوي .. خلاص عاد ردي البيت حبيبتي انتي
ندى : راح ارد .. لأني اشتقت لكم وايد
أمل : صج يمه ؟؟ زين عيل شناطره ؟
ندى : ( ساكته )
أمل : يمه والله ابوج يبجي يبيج خلاص انسي اللي صار
ندى : ( دمعت عينها ) والله انا بعد ولهت عليه حيل
أمل : خلاص عيل قومي لمي أغراضج ورجعي معاي
ندى : ( تبتسم ) ان شاءالله بس مو اليوم خليها باجر .. واليوم حابه اقعد مع خالتي
أمل : ( تبتسم مو مصدقة ) الحمدلله يارب و اخيرا راح تقر عينا برجعتج
---

- بالليل –

ندى : ( اقعدت يم فاطمة بالصالة ) خالتي ؟
فاطمة : هلا يمه
ندى : ( امسكت ايد فاطمة وباستها ) والله اني احبج و مسامحتج من كل قلبي
فاطمة : ( عيونها دمعت ولمت ندى ) حبيبتي والله كلامج فرحني وايد
ندى : بس آنا لازم ارجع
فاطمة : ( وخرت عنها ) ترجعين ؟
ندى : ( دموعها انزلت ) اي برجع حق امي و ابوي
فاطمة : و آنا ؟
ندى : ( اسكتت وامسحت دموعها ) راح ازورج على طول .. بس سامحيني ماقدر اكمل .. انا تعودت عالعيشة اهناك
فاطمة : ( تنعم على شعر ندى ) ما اقدر امنعج .. انا بالبداية اخترت انج تعيشين عند اختي و لازم اتحمل .. بس والله هذا احلى شهر مر علي
ندى : يعني مو زعلانه مني ؟
فاطمة : لا والله مو زعلانه .. بس تضايقت لأني كنت حابة انج تعيشين معاي على طول
ندى : ( لمتها حيل ) باجر بعد الدوام راح ارجع
فاطمة : على راحتج يا قلبي
ندى : ( وخرت عنها و باست خدها ) تصبحين على خير ( قامت وخلتها بالصالة )
فاطمة : ( دموعها بعيونها ) وانتي من اهله حبيبتي
---

- الساعه ثنتين بغرفة حمد وفرح –

حمد : ( يلعب بشعر فرح واهي نايمه على صدره ) يعني ما بينت دلال للحين ؟
فرح : لا والله مختفية مادري اشسوو فيها يمكن ذابحينها
حمد : ( يبتسم ) والله ما يندرى .. زين مادقت على ندى كلش ؟
فرح : لا مادقت من ذاك اليوم
حمد : واشلون ندى الحين ؟
فرح : الحمدلله زينه .. للحين قاعده عند امي
حمد : الله يسهل امورها
فرح : اقول عمري ؟
حمد : هلا قلبي
فرح : ليش ما نطلع كلنا و يكون أحمد معانا يمكن تعجبه و نوفق راسين بالحلال
حمد : والله مادري ما احسها خوش فكرة
فرح : ( ارفعت راسها شوي واقعدت تطالعه واهي متسنده على صدره ) ليش حياتي ؟ والله ندى تهبل خوش بنت
حمد : يعني .. انتي تدرين انها مريضة و أحمد يمكن يتضايق من هالشي و الله مادري
فرح : لا تقوله انها مريضة .. مو شرط يدري بعدين اذا حبها بيتقاضى عن هالشي .. وبعدين مرضها مو معدي مسكينة
حمد : والله مادري كيفج
فرح : ( ابتسمت ) خلاص انا اكلم أحمد .. بس ماراح اقوله شي عن مرضها وانت بعد لاتقول تره والله تزعل وما تكلمني كلش
حمد : خلاص سوي اللي تبينه انا مالي شغل
فرح : ( باست حنجه ) أحبك
حمد : يللا نامي لا تجنين على نفسج و يروح علينا الدوام باجر
فرح : ( حطت راسها على صدره واهي تضحك ) اوكي .. تصبح على خير
حمد : وانتي من اهله حبي
----

- ثاني يوم بكلية الهندسة –

فرح : وامي اشقالت ؟
ندى : قالت كيفج هذا قرارج وامس ماقدرت انام حسيت بتأنيب الضمير .. بس شسوي ماقدر ابعد عن امي وابوي اكثر من جذي
فرح : ( اسكتت )
ندى : زين اشلونج مع الحمال ؟
فرح : ( ابتسمت ) الحمدلله للحين اوكي
ندى : الحمدلله
فرح : ندوي اشرايج نطلع انا وانتي و حمد و عبير و احمد ؟
ندى : احمد هذا جم عمره ؟
فرح : ( ابتسمت ) 24
ندى : وشكو اروح معاكم .. لا يبه استحي مابي
فرح : يللا عاد عفيه خل نطلع كلنا السينما او أي مكان
ندى : اتصدقين من قلتي سينما اقنعتيني اكثر اني اروح معاكم
فرح : ( استانست ) صج ؟
ندى : لا طبعا مو صج .. والله لو شنو مارحت السينما الا مع بنات وبس
فرح : ( تضحك ) ليش يعني ؟
ندى : بس جذي
فرح : لا صج ليش ؟
ندى : في شي مابي اتذكره .. اقوله لج بعدين الحين مو وقته
فرح : زين خلاص مو سينما .. انروح مطعم أو أي مكان عفية عاد وافقي
ندى : وشكو تاخذون هذا معاكم ؟
فرح : بس جذي اهو من العايله و بنطلع كلنا وقلت ابيج تغيرين جو واتيين معانا .. وتره عبير اهناك بعد و اهي خوش بنت والله عمرها 18 ابيج تتعرفين عليها
ندى : خلاص اوكي .. و منها خل اغير جو والله من تزوجتي وآنا مو مترقعة
فرح : ( تضحك ) خلاص اول ما نتفق معاهم اقولج على طول
ندى : اوكي الحين بروح محاضرتي اشوفج بعدين
فرح : انا بعد .. يللا باي
ندى : باي

[SHwarviskya]

- 17 / تجربة يديدة -

- بعد الدوام ردت ندى بيتها .. اسفطت سيارتها وانزلت .. لقت امها ( أمل ) بالصالة –

ندى : ( راحت لها ولمتها ) اشلونج يمه
أمل : هلا حبيبتي هلا يا بعد قلبي
ندى : ابوي مو اهني ؟
أمل : ( اقعدت ولامه ندى على صدرها ) الحين ياي قلتله انج بتيين و حيل استانس
ندى : ولهت عليه وايد
أمل : والله اهو كل يوم ماعنده غير طاريج
ندى : و اشلون عبود ؟
أمل : ( وخرتها عنها واقعدت تطالعها واهي مبتسمه ) ودج تشوفينه ؟
ندى : ( هزت راسها – اي - )
أمل : ( قامت ) تعالي معاي اهو نايم بغرفتي
ندى : ( قامت معاها ) يمه تره جنطتي بالسيارتي خل يدخلونها
أمل : خلاص بعدين اخلي شيريل تييبها

- دشو الغرفة .. وكان عبود نايم على سرير أمل وسامي –

ندى : ( راحت انسدحت يمه وباست خده ) عبودي انا اختك ندى ولهت عليك
أمل : ( واقفه عند الباب واهي مبتسمه ) الله يخليكم لي

- دش سامي الغرفة ووقف ورى أمل –

سامي : نوّر البيت برجعتج يبه
ندى : ( قامت اوقفت واهي تطالع ابوها ودموعها انزلت )
أمل : ( حطت ايدها على جتف سامي و اطلعت من الغرفة قبل لا تبجي جدامهم )
سامي : ( مد ايده ) تعالي يبه
ندى : ( قطت نفسها على صدر ابوها ولمته واهي ميته بجي )
سامي : ( ينعم على شعرها وباس راسها ) خلاص يبه .. اللي فات مات
ندى : ولهت عليك يبه
سامي : و آنا ولهت عليج اكثر .. طولتي الزعل .. لا تعيدينها
ندى : ( وخرت عنه واهي تمسح دموعها ) ان شاءالله وانت بعد لا تعيد اللي سويته
سامي : ( ضحك ورد لمها ) والله عمري ماراح اعيدها
---

- بيت حمد –
( بعد الغدى بالصالة )

فرح : والله ندوي تهبل لازم نطلع كلنا عشان تتعرفين عليها
عبير : حمد بيطلعنا ؟
فرح : اي اهو قال اتفق معاكم ونشوف يوم ونطلع انا وانتي واحمد بعد
عبير : ومشاعل ما تيي معانا ؟
فرح : ( تغير ويهها ) لا خليها بس احنا احسن
عبير : ( اسكتت )
فرح : راح اتيين صح ؟
عبير : اي
فرح : ( تبتسم ) والله حدي متحمسه حق هالطلعة

- مشاعل توها داشه الصالة –

مشاعل : أي طلعة اللي متحمسين لها ؟
عبير : ( اسكتت واقعدت تطالع فرح )
مشاعل : اشفيكم ساكتين ؟
فرح : لا بس كنا مفكرين نطلع انا وعبير و حمد
مشاعل : اهااا .. يعني انا مو بالحسبة
فرح : اذا تبين اتيين تعالي .. بس كنت بعرف عبير على اختي
مشاعل : أي وحدة اللي تزوجت توها ؟
فرح : لا وحدة ماتعرفينها .. اصغر مني
مشاعل : يعني بتكون طلعة يهالوه ؟
فرح : اي بالظبط
مشاعل : ( خزت فرح وبعدها اطلعت من الصالة )
عبير : اشفيكم انتو ؟
فرح : اهي مادري اشفيها .. وايد حابتني
عبير : صراحة انتي بعد مو مقصرة
فرح : ( ابتسمت ) اي القلوب عند بعضها
---

- فرح كلمت أحمد و قالتله عن الطلعة و وافق يطلع معاهم .. وصار الويك اند واطلعو كلهم راحو المركز العلمي –

ندى : ( اسفطت سيارتها يمهم وانزلت واهي منحرجه )
فرح : ( انزلت من السيارة ويمها عبير واقعدت تعرفهم على بعض ) عبير هذي ندى اختي و صديقة عمري .. ندوي هذي عبير اللي كلمتج عنها
عبير : ( سلمت على ندى ) اهلين اشلونج ؟
ندى : ( تبتسم ) تمام انتي اشلونج ؟
عبير : الحمدلله

- يه حمد و أحمد يمهم –

فرح : وهذا ريلي حمد
ندى : ( تضحك ) لا اتصدقين ماعرفته
حمد : ( يضحك ) من عقب الزف اللي خذيته منها اشلون تنساني
أحمد : زين ليش حسستوني اني شبح .. آنا أحمد .. اخو هالجيكر
ندى : ( ابتسمت واهي منحرجة ) هلا والله
حمد : تخسي انت الجيكر
عبير : خلاص لا تزعلون اثنينكم جياكر
أحمد : ( طق عبير على راسها عالخفيف ) انتي اخت انتي ؟؟ لو بيدي تبريت منج والله
ندى : ( اضحكت وطالعت أحمد بعدين لفت ويهها بسرعة )
حمد : يللا بنتم واقفين اهني اشكثر ؟ امشو ندخل

- أحمد طويل مثل اخوه .. بس لونه أفتح شوي .. شعره كثيف عكس حمد .. عيونه حلوه .. و خشمة شوي كبير بس مو مخرب عليه .. مسوي قفل و باجي لحيته ملمعها عدل -

( دشو داخل و اقعدوا يتمشون ويطالعون السمج )

أحمد : ( يطالع ندى و يبتسم )
ندى : ( لفت ويهها على فرح ) هذا وايد يخز
فرح : شكله انعجب فيج
ندى : ( ابتسمت واسكتت )

- خلصوا من المركز العلمي واطلعو يتمشون عالبحر –

أحمد : ( يمشي يم ندى ) جم عمرج ندى ؟
ندى : 21
أحمد : العمر كله يارب
ندى : تسلم
أحمد : الله يسلمج
ندى : ( ابتسمت وكملت طريجها )
عبير : مزعج صح ؟
أحمد : عبور العقل زين
عبير : ( تضحك ) اي والله وايد زين العقل
أحمد : ( خزها جان تخاف وراحت يم حمد ) والله هالبنت على يوم راح اذبحها
ندى : تونس يحليلها
أحمد : أي تونـّس ؟ الا تلوع الجبد
ندى : ( ابتسمت )

حمد : ( يكلم فرح بصوت واطي ) شكلها خطتج مشت عدل
فرح : اي انا بعد اقول جذي
ندى : يللا عيل انا برجع الحين
أحمد : ليش تو الناس ؟ ماتعشينا
ندى : والله ماقدر اطول اكثر
فرح : خلاص عيل سلمي على خالتي وعمي وايد
ندى : الله يسلمج
أحمد : اوكي انا اوصلها لي السيارة وارجع لكم
حمد : ( طالعه وابتسم ) اي دير بالك لحد يزعجها بس
أحمد : اي اكيد بدير بالي

- مشى مع ندى يوصلها لي السيارة واهي ساكته –

أحمد : ان شاءالله راح نشوفج مره ثانيه ؟
ندى : والله مادري
أحمد : ( ابتسم ) صراحة انا حاب اشوفج مره ثانية
ندى : ( حطت شعرها ورى اذنها واهي منحرجة وماردت عليه )
أحمد : ( يأشر على سيارتها ) وصلنا
ندى : ( بطلت السيارة بالريموت ) مع السلامه
أحمد : ( فتح لها الباب ) تفضلي
ندى : ( ابتسمت واركبت ) مشكور
أحمد : العفو .. اشوفج على خير ( سكر الباب و مشى )

- ندى طول الطريج كانت تفكر فيه .. وحست انها ارتاحت له –

- بالبيت عقب ماردو من الطلعة –

أحمد : ( يكلم فرح ومحد كان يسمعهم ) فرح يا مرت اخوي الوحيد
فرح : ( تضحك ) شنو هذي مرت اخوي الوحيد .. شكلج تبي شي
أحمد : ( ابتسمت ) يحليلج عرفتيلي على طول .. اي والله ابي شي
فرح : تفضل
أحمد : صراحة من غير لف ولا دوران .. حاب اتعرف على اختج اكثر .. والله حسيتها خوش بنت .. وماتدرين شنو ممكن يصير .. يمكن تشوفينها معاج اهني بنفس البيت
فرح : ( ابتسمت ) والله ودي .. بس يا أحمد لو كنت بتلعب على اختي والله حمد راح يذبحك
أحمد : لا حشى والله مو آنا اللي العب على بنات الناس
فرح : خلاص آنا آخذ رايها اول
أحمد : اي عاد انتي مدحي فيني ماوصيج
فرح : ( تضحك ) اوكي خلاص روح .. مشاعل قاعده تخزني خز مو ناقصة آنا
أحمد : يبه مالج شغل فيها هذي اذا ماعندها احد تروح تطالع نفسها بالمنظرة وتتهاوش مع صورتها
فرح : ( اضحكت بصوت عالي )
مشاعل : اشعندكم تطالعوني وتضحكون ؟
أحمد : مافينا شي بس قاعدين نسولف
فرح : يللا تصبحون على خير( قامت وخلتهم )

- اصعدت شقتها و دقت على ندى –

فرح : الو ندوي ؟
ندى : هلا فرح
فرح : ندى .. أحمد حاب يكلمج
ندى : بسم الله فروح توني شايفته اشيبي يقولي يعني ؟
فرح : ندوي عن العبط .. الريال حاب يتعرف عليج و بعدين تره اهو خوش واحد .. مثل اخوه يعني لو مو ضامنته ماجان كلمتج عنه
ندى : زين اهو يدري اني ...
فرح : لا مايدري محد قاله شي
ندى : احسن لا تقولون
فرح : هالشي انتي بروحج لازم تقولينه
ندى : ماراح اقول الا اذا عرفت نيته عدل .. اذا يبي يتزوج قلتله غير جذي اهو مو منحقه يعرف
فرح : اوكي على راحتج .. زين اعطيج رقمه ؟
ندى : لا فشلة اشفيج
فرح : عيل اشلون ؟
ندى : مادري .. ولا اقولج خلاص مابي خليني جذي احسن
فرح : اوو فروح والله اهو قال بالحرف الواحد .. ابي اعرفها عدل عشان اتزوج .. والله اهو خوش واحد اشفيج
ندى : تدرين فرح قبل جم يوم قعدت افكر اني مليت من عيشتي جذي .. ودي اتزوج و اييب يهال
فرح : ان شاءالله راح تتزوجين و تييبين درزن مو بس واحد
ندى : تتوقعين اقدر ؟
فرح : اي تقدرين شناقصج انتي ؟
ندى : الصحة يا فرح .. ناقصتني الصحة
فرح : لا تقولين جذي .. والله مافيج شي الحمدلله .. غيرج حالتهم اصعب ومتزوجين و مستانسين بدنيتهم
ندى : الله كريم
فرح : خلاص ندوي خلي موضوع أحمد علي
ندى : اشبتسوين ؟
فرح : مالج شغل .. يللا نامي الحين لا تفكرين بشي
ندى : اوكي تصبحين على خير
فرح : وانتي من اهله باي

[SHwarviskya]

- اليوم الثاني –
( فرح و أحمد قاعدين بالصالة )

فرح : أمس كلمتها
أحمد : و اشقالت ؟
فرح : اسكتت .. بس قالت مبين انك خوش واحد
أحمد : يعني وافقت تكلمني ؟
فرح : اهي اسكتت بس ما ارفضت
أحمد : زين شنو يعني ؟
فرح : يعني انت دق عليها وكلمها
أحمد : اخاف تسكره بويهي
فرح : يمكن تسويها .. لأن اهي مو متعودة على هالشي
أحمد : ادري والله باين عليها .. ولا تخافين فرح والله اني ماراح أأذيها
فرح : أدري فيك .. لو مو واثقة منك والله ماخليتك تكلمها لو شنو .. يللا اخذ رقمها
أحمد : ( طلع تلفونه و سجل الرقم ) تسلمين مرت اخوي
فرح : ( تضحك ) لا تقول هالكلمة والله تحسسني اني عيوزه
أحمد : عاد اذا ولدتي صج راحت عليج .. لا شباب بعد اليوم
فرح : ( قامت واهي تضحك ) خل اروح فوق احسلي ( اطلعت من الصالة واصعدت غرفتها )
---

- غرفة ندى –
( ندى كانت قاعدة تشتغل على هوم وورك ومندمجة جان يرن تلفونها )

ندى : ( ردت عليه ) الو ؟
أحمد : الو .. ندى ؟
ندى : ( اعرفته على طول و حدها استحت ) اي منو حضرتك ؟
أحمد : آنا أحمد
ندى : ( تسوي نفسها مستغربه ) أحمد ؟؟
أحمد : اي اخو حمد .. آسف اذا دقيت عليج من غير اذنج بس آنا كلمت فرح وقلتلها اني حاب اتعرفج عليج اذا ماعندج مانع
ندى : ( اسكتت )
أحمد : جني ازعجتج صح ؟
ندى : مادري والله
أحمد : ندى آنا والله مو من النوع اللي يكلم عشان يلعب عالبنت و بعدين انتي اخت فرح يعني اللي يضرج يضرها عدل ؟
ندى : اي صح
أحمد : زين انتي مشغوله الحين ؟
ندى : لا
أحمد : يعني اقدر اسولف ؟
ندى : كيفك
أحمد : شنو كيفك؟ قولي يا اي او لأ
ندى : مادري والله كيفك
أحمد : اوكي بصير ملقوف وبسولف
ندى : اوكي
أحمد : ( يضحك ) ماكو محشوم ولا شي ؟
ندى : محشوم
أحمد : ( ضحك ) ندى لا تستحين مني اعتبريني اخوج الصغير
ندى : ( اضحكت )
أحمد : اي الحين اقدر اسولف

- قعد احمد يسولف معاها و اهي ساكته وتسمعه .. اول مره تحس هالاحساس .. وكانت مستانسه بس هم خايفه –

- مر شهر و كانو أحمد وندى بس عالتلفون سوالف وضحك ينومها وبعدين ينام وهذي حالتهم كل يوم –
----

( فرح افحصت وطلع اللي فيها ولد .. و بهالشهر صايره عصبية زيادة بسبة الحمال .. وكل شي ينرفزها .. وحمد على قد ما يقدر كان يحاول يرضيها )

- العصر .. فرح دشت شقتها لقت حمد منسدح –

فرح : ( انسدحت يمه ) عمري نمت ؟
حمد : ( فتح عينه ) على وشك .. اشفيج حبيبتي ؟
فرح : لا ماكو .. بس مشتهية باسكن
حمد : يا قلبي ويني ووين الباسكن الحين والله حدي هلكان
فرح : اوكي خلاص
حمد : زعلانه حبي ؟
فرح : لا بس لو طلع بويه الياهل شي انا مالي شغل
حمد : ( ابتسم ) اي قطيها براس الياهل .. لحظة اشوف هذا وينه ( مسك تلفونه ودق على أحمد ) الو ؟ أحمدو وينك ؟
أحمد : بالدوانية اشبغيت ؟
حمد : ماراح اتيي البيت ؟
أحمد : ليش ؟ اشفيكم ؟
حمد : ماكو شي بس قلت يعني لو بتيي بعد شوي ييب معاك برّد من باسكن فرح متنسية عليه
أحمد : حمد والله ما اذكر اني ابو الولد .. يعني لو كنت ابوه ذكرني بس يمكن أكون ناسي
حمد : اقول جب بس جب خلك مع ربعك ( سكر التلفون بويهه )
فرح : ماراح اييبلي ؟
حمد : خل يولي .. آنا بقوم اييبلج
فرح : يعني ماشاءالله عندكم خير ليش ماكو سايق ؟
حمد : يعني اشنبي فيه اذا الكل يسوق ؟
فرح : زين تبيني اروح معاك ؟
حمد : والله اذا فيج روحة روحي بروحج وخليني انام شوي
فرح : لا والله مالي خلق .. بس انت شكلك تعبان كسرت خاطري
حمد : ( باس خدها وقام ) ميخالف بالكثير نص ساعة و ارد انام
فرح : ( اتطالعه واهي مبتسمه ) فديتك عمري
حمد : ( لبس ملابسه وخذه السويج ) أي نوع تبين ؟
فرح : أوريو
حمد : اوكي

- حمد طلع يابلها باسكن ورد لقاها نايمه –

حمد : فروح .. فرح قومي ( حط الباسكن عالطاوله وقعد يمها عالسرير ) فروح ؟
فرح : ( نايمه وماترد )
حمد : ( يهزها ) فرح قومي يبتلج اللي طلبتيه .. فرح ؟؟
فرح : ( ماترد )
حمد : ( خذه قفشة من البرّد و حطه على شفايفها واهي نايمه )
فرح : ( فزت من نومها ) اشفيك ليش؟؟
حمد : شنو ليش قومي مو هذا اللي طلبتيه ؟
فرح : ( خذت كلينكس و مشت حلجها واهي معصبة ) زين جذي يسوون ؟؟
حمد : يللا عاد اكليه خلصيني
فرح : مابي اكله انت ( خلته وراحت الصالة مالت شقتهم )
حمد : ( طالع الباسكن وقال بصوت عالي ) والله الشرهه علي آنا اللي متعني ويايبه لج ( فصخ ملابسه و تم عالشورت و نام )

- فرح نامت بالصالة .. وحمد نام بالغرفة .. والباسكن تم عالطاولة لين ذاب –
---

[SHwarviskya]

- 18 / صدمة الموقف -

حمد : ( طالع الباسكن وقال بصوت عالي ) والله الشرهه علي آنا اللي متعني ويايبه لج ( فصخ ملابسه و تم عالشورت و نام )

- فرح نامت بالصالة .. وحمد نام بالغرفة .. والباسكن تم عالطاولة لين ذاب –
---

- غرفة ندى -

ندى : ( تكلم أحمد بالتلفون ) أحمد في سر انت خاشه ماقلته لأنك خايف من ردة فعل الشخص اللي راح تقوله اياه ؟
أحمد : اشلون يعني ؟ مافهمت
ندى : يعني في مره خشيت بقلبك موضوع اتخاف اذا قلته تصير اشياء ماتبيها تصير ؟
أحمد : يعني مثل خليها بالقلب تجرح ولا تطلع بره وتفضح ؟
ندى : ( تضحك ) اي بالظبط
أحمد : لا صراحة ماعندي شي خاشه .. بس اكيد انتي عندج قوليه ولاتخافين صدقيني ماراح يصير شي
ندى : ( خافت ) لا اصلا انا كنت اسألك لأني بشوف اذا في شي خاشه عني او لأ
أحمد : اكيد ؟
ندى : اي اكيد
أحمد : زين ندوي متى اشوفج ؟
ندى : مادري خل اشوف فروح وحمد متى يدبرون طلعة
أحمد : ( سكت )
ندى : اشفيك ؟
أحمد : ماكو شي .. بس كان ودي اشوفج بروحنا حتى لو نتمشى بمكان عام .. جمعية مثلا
ندى : لا أحمد .. احنا متفقين منزمان ان مانطلع الا معاهم
أحمد : اوكي خلاص اللي تشوفينه
ندى : ( اسمعت صوت امها تناديها ) أحمد اخليك الحين امي قاعده تناديني
أحمد : اوكي .. مع السلامة
ندى : باي

- سكرت الخط و راحت حق امها –

ندى : نعم يمه ؟
أمل : حبيبتي تقدرين تخلين عبود عندج ؟ انا و خالتج بنروح السوق
ندى : لا يمه والله ماعرفله
أمل : ماراح تسوين شي بس تقعدين يمه و أي شي يحتاجة شيريل موجودة
ندى : ( صج انها تحبه بس للحين مو متعودة عليه ولا تبي تتدخل بالعناية فيه ) لا لا يمه الله يخليج اخذيه معاج
أمل : استغفرالله .. اوكي خلاص روحي مشكورة
ندى : يمه لا تزعلين بس ماعرفله
أمل : انتي اصلا ماتبين تعرفيله
ندى : ( اسكتت مدة بعدين راحت غرفتها )
---

- شقة حمد –

( قامت فرح من النوم .. راحت الغرفة لقت حمد نايم على بطنه والبرّد عالطاولة صاير حليب )

فرح : ( تذكرت اللي صار .. راحت يم حمد و اقعدت تدلك ظهره )
حمد : ( فتح عينه ) وخري عني آنا زعلان
فرح : ( باست ظهره ) آنا آسفه
حمد : ( رد غمض عينه ) مابي لا تراضيني
فرح : زين سامحني بس مو عشاني آنا .. عشان نواف
حمد : ( قلب على ظهره ) يا هالنواف اللي مخليته شماعتج
فرح : ( ابتسمت وماقالت شي )
حمد : عمري يعني يصير جذي تقوميني من فراشي و اتعنى اييبه لج آخر شي تكشتين وتنامين ؟
فرح : ( تضحك ) حمد اللي يسمعك يقول وديتك الوفرة
حمد : يعني بالله عليج هذا رد ؟؟ ان شاءالله لو كنتي نزلتيني المطبخ تحت وكشتي فيني هم غلط وعيب
فرح : ( تقرص خده ) فدييت اللي يتدلعون
حمد : ( ضحك ومد ايده ) تعالي انسدحي يمي
فرح : ( انسدحت على ايده ) زين ماراح تييبلي باسكن ؟
حمد : فروح قومي قومي .. ماتنعطين ويه انتي
فرح : زين خلاص خل يطلع بويه الياهل
حمد : والله لو يقولولي ان راح يطلع منقط وكله اوريو بويهه هم ماراح اييبلج
فرح : ( تضحك ) حمد عاد حرام عليك
حمد : فرح سكتي عن الموضوع احسن
فرح : زين خلاص بسكت
حمد : شاطره
---

- مر شهرين و علاقة ندى و أحمد صارت اقوى .. و فرح دشت شهرها السادس –

- غرفة ندى -
( فرح زايرتها )

ندى : ( تمسك بطن فرح ) يللا نواافووو اطلع بشووفك
فرح : ( تضحك ) شيطلعه ؟ توه داش السادس امس
ندى : يللا هانت .. فديته مشتاقتله
فرح : ( تضحك ) راح تشوفينه ان شاءالله

- دشت أمل عليهم –

أمل : ها ندوي .. مستانسه على بطن فرح ؟
ندى : اي وايد
أمل : يا بختج فروح .. معاي انا ماكانت مستانسة كلش
ندى : ( اسكتت )
فرح : ( تطوف السالفه ) اي صج خالتي وين عبودي
أمل : نايم .. شخبار نوره مع الزواج ؟
فرح : الحمدلله ماشي حالها
أمل : الحمدلله .. يللا عيل اخليكم تسولفون على راحتكم رايحه اطل على عبود
فرح : ( ابتسمت ) اوكي خالتي
ندى : ( انطرت امها تطلع من الغرفة ) اشلون ريلج مع الزقاير ؟
فرح : من حملت ما اخليه يدخن .. بس اشم ريحته زقاير اقلب الدنيا عليه
ندى : ( تضحك ) مسكين
فرح : لا مو مسكين احسن .. ليش يدخن يعني شالفايدة
ندى : اي والله احسله .. زين راح نطلع باجر ؟
فرح : اي ان شاءالله
ندى : وين ؟
فرح : المدينة الترفيهية
ندى : من صجج ؟؟ اشلون تمشين انتي وبطنج
فرح : عادي شكو .. ماراح العب واذا تعبت اقعد ياكثر الكراسي اهناك
ندى : زين غيرو المكان آنا اخاف اروح اهناك
فرح : لا تخافين ماكو شي .. وبعدين انتي متى ناويه تقوليله ؟
ندى : قلتلج لين اعرف اذا السالفة فيها زواج اقوله .. غير جذي مو منحقه يدري .. ماحب اقول حق احد
فرح : على راحتج

[SHwarviskya]

- بالليل بعد ماراحت ندى –
( أحمد يكلم ندى بالتلفون )

أحمد : كلمتج فرح عن الطلعة باجر ؟
ندى : اي قالت بتروحون الترفيهية
أحمد : عاد بس انا وانتي وعبير اللي بناخذ راحتنا ونلعب اما حمد المسكين بس راح يتمشى مع البطه فرح
ندى : حرام عليك مو بطه مسكينه
أحمد : شايفه كرشها انتي ؟
ندى : ( تضحك ) يحليلها ... زين تره انا ماراح العب
أحمد : ليش ؟
ندى : بس ماحب
أحمد : تخافين يعني ؟
ندى : لا بس أدوخ
أحمد : ماراح العبج شي يدوخ
ندى : لا مابي العب شي بس بتمشى معاكم
أحمد : انروح اهناك ويصير خير
---

- اليوم الثاني .. أحمد خذى عبير وراح بسيارته .. و حمد وفرح مرو على ندى وخذوها معاهم .. و تلاقو عند البوابة –

أحمد : ( يطالع ندى و اهو مبتسم ) اشلونج ندى
ندى : ( استحت من عبير ) الحمدلله انت اشلونك ؟
أحمد : تمام الله يسلمج
عبير : ( سلمت على ندى ) اشلونج ندى
ندى : الحمدلله
حمد : ( قص التذاكر و يه صوبهم ) يللا

- دشو المدينة واقعدو يتمشون .. وأحمد كل شوي يطالع ندى –

عبير : ( بصوت واطي ) بسك عاد .. عيب خزيت البنت خز
أحمد : ذلفي اهناك
عبير : زين زين ( راحت يم حمد ) حمد خل نروح قطار الموت
حمد : فرح ماتقدر تركب
عبير : عادي فروح تنطرينا بره ؟
فرح : اوكي مو مشكلة

- اوصلوا عند قطار الموت .. حمد وعبير دشو ينطرون دورهم –

ندى : انا بنطر مع فرح اهني
أحمد : ليش ؟
ندى : ( ابتسمت ) بس مابي اركب
أحمد : يللا عاد امشي .. والله مايقلب ولا شي
ندى : ادري بس والله مابي
أحمد : ندوي عاد والله ماراح يصير شي راح اركب يمج اذا تبين
فرح : ميخالف أحمد خلها .. اهي مو متعوده تركب جذي العاب .. اصلا هذي اول مره اتيي اهني
ندى : ( خزت فرح )
أحمد : ( انصدم ) صج ؟؟؟
ندى : اي صج
أحمد : عيل الحين الا تركبين معاي .. دام هذي اول مره صدقيني بتحبين هالتجربة
فرح : خلاص ندوي جربي ان شاءالله مايصير شي
ندى : ( تضايقت لأن غصبها وماحبت ترفض اكثر ) اوكي بس هذي أول و آخر لعبة
أحمد : اوكي على راحتج
ندى : و بقعد يم عبير
أحمد : ( يضحك ) اوكي بس خلصي امشي
عبير : ( تصرخ من بعيد ) يللا بسرعه دورنا وصل
أحمد : شوفو اشلون تصرخ جدام الاوادم .. والله على يوم راح اذبحها
فرح : ( تضحك ) زين روحوا يالله .. وانتي لا تخافين غمضي ولا تفكرين بشي
ندى : اوكي

- خلصوا وانزلوا .. ندى حست انها وايد استانست .. أول مره تركب جذي لعبة .. حتى واهي صغيرة ما اختبرت جذي احساس .. كانت امها دايما تبعدها عن هالأجواء –

فرح : ها بشري ؟
ندى : ( مبتسمه حيل ) وايد وناسة
أحمد : شفتي قلتلج
عبير : اصلا طول اللعبة مغمضة
ندى : ( تضحك )
فرح : صورتو ؟
حمد : لا الريال قالنا ان الكاميرا خربانه
فرح : حسافة

- كملوا يتمشون و حمد وفرح راحو يقعدون بمطعم لأن فرح تعبت من المشي –

عبير : خل نلعب عاصفة الصحراء
أحمد : لا لا هذي تقلب و ندى ماراح تركب
عبير : زين انا بلعبها انطروني بره
أحمد : اوكي امشي

- دشو الصالة – اللي فيها لعبة عاصفة الصحراء - ( حق اللي مايعرفها اهي من النوع اللي يقلب ويفتر و يكون ظلمة بس فيها ليتات تشب وتطفي عالسريع مثل الفلاش ) .. عبير اركبت اللعبة و أحمد وندى واقفين بره ناطرينها تخلص –

أحمد : ماودج تجربينها ؟
ندى : ( حست بدوخه ) لا ودي اطلع من اهني
أحمد : فيج شي ؟
ندى : لا بس بطلع
أحمد : نطري شوي .. بس خل تخلص عبير ونمشي كلنا
ندى : لا انت خلك معاها انا بروح شوي وراجعه ( خلته و اطلعت من الصالة )
أحمد : لحظة نطري شوي ( طلع وراها وكان يناديها بس اهي تمشي سريع و مو راضية توقف )

ندى اقعدت اتطالع حواليها .. كل شي ازعجها الليتات والالوان واصوات صراخ الناس بالألعاب .. امسكت راسها واقعدت تمشي بممر تقريبا خالي ..

أحمد : ( لحقها ومسكها من زندها ) اشفيج وين رايحه
ندى : ( وخرت ايده عنها ) وخر عني
أحمد : ليش ؟
ندى : ( اتدزه من صدره وتصرخ ) أقولك وخر عنييي خلني بروحي
أحمد : انتي اشفيج ؟

- ندى فجأه طاحت عالارض واقعدت ترجف واطرافها كلها متصلبه ومشدودة –

( أحمد واقف يطالعها مصدوم واهي طايحه يم ريوله ومو عارف شيسوي )

أحمد : ( من الصدمة رجع لي ورى )

- كان في شوية ناس يمهم .. كانو واقفين يطالعون من بعيد .. بس في ريال كبير يه يمها –

الريال : ( قعد على اركبه يمها ) عندك شي انحطه بحلجها
أحمد : لأ
الريال : تعرف حق الصرع ؟ انت تصيرلها ؟
أحمد : ( سكت واقف يطالعها )
الريال : ( حط ايده تحت راسها عشان لا يطق بالأرض .. وخلاها تعضه ) نادو الأمن خل ياخذونها العيادة

- راح مصري – من اللي كانو واقفين يطالعون- عشان ينادي احد من العيادة اللي بالمدينة .. بعد دقيقتين هدت ندى –

الريال : في احد عنده كلينكس ؟

- يابوله كلينكس و مش حلجها ولف بوكه وحطه يمه –

ندى : ( بطلت عينها و خافت يوم شافت الريال ماسكها ) انت منو ؟
الريال : يبه لا تخافين انتي بخير .. بنوديج العيادة الحين
ندى : ( اقعدت و طالعت احمد )

أحمد : ( طالعها مده بعدين مشى و دق على حمد ) الو
حمد : هلا أحمد
أحمد : قول حق فرح اختها طاحت و انصرعت جدامي .. خل تروح لها العيادة .. وبالمرة دق على عبير اخذها معاك .. انا طالع من اهني ( سكر الخط بويهه قبل لا يسمع رده )
---

- راحو حمد و فرح العيادة لقوا ندى اهناك قاعدة تبجي –

فرح : ( لمت ندى ) اهدي حبيبتي
ندى : اشلون اهدى .. ماشفتوه اشلون طالعني ومشى عني
فرح : اهو يمكن انصدم لأن ماكان يدري .. وانتي كان المفروض تقوليله من نفسج
ندى : ( تبجي ) و ليش راح ؟؟ ليش حسسني ان فيني وباء وخايف ينعدي منه
فرح : لا حياتي اهو مايقصد جذي .. بس انصدم .. اعذريه شوي
حمد : فرح انا بشوف وين عبير نطروني اهني
فرح : اوكي

- راح حمد ياب عبير وخذى فرح وندى و مشو –
( ندى طول الطريج كانت تبجي بس من غير صوت )

- اوصلو بيت ندى –

فرح : ( افتحت الباب ) بوصلج داخل
ندى : لا خليج اعرف انزل بروحي
فرح : ندى انتي تعبانه خل اوصلج
ندى : ( انزلت من السيارة ) لا تقولين حق امي شي .. لو درت والله يافرح ماراح اسامحج ( خلتها ودشت البيت )
ندى : ( تضايقت حيل ) اشلون الحين ؟
حمد : انا راح اكلمه
عبير : شالسالفة اهي شفيها ؟ و شكو أحمد شالموضوع ؟

- الكل حقرها و كملو الطريج واهم ساكتين –

[SHwarviskya]

- 19 / ماراح اجازف -

- ندى دشت البيت و اهي حابسه دموعها –

أمل : ها يمه استانستو ؟
ندى : اي الحمدلله .. بس احس بتعب شوي وبروح ارتاح
أمل : ( قامت راحت يمها ) ليش اشفيج ؟
ندى : مافيني شي بس وايد تمشينا و تعبت
أمل : خلاص روحي ارتاحي انا بعد شوي اطل عليج
ندى : لا لا يمه بنام مايحتاي اتيين .. تصبحين على خير
أمل : وانتي من اهله حبيبتي

- اصعدت ندى غرفتها وانسدحت بملابسها واقعدت تبجي حيييل و تفكر باللي صار –

ندى : ( بقلبها ) منحقه يروح .. منو يبي يرتبط بوحده جذي

- تمت تبجي 10 دقايق بعدين نامت من التعب –
---

- شقة حمد ( بالصالة ) –

فرح : ها مايرد ؟
حمد : ( وخّر التلفون عن اذنه ) لا والله
فرح : جد طاح من عيني
حمد : صراحه فروح اهو يمكن غلط لأن مشى وخلاها .. بس ماغلط لأن زعل منها
فرح : ليش كل هذا عشانها مريضة ؟
حمد : ماقلت لأنها مريضة .. بس متى كانت ناويه تقوله ؟ حزة الخطبة مثلا ؟؟ مو لازم تعطيه خبر منزمان ؟؟ مو منحقه يختار اذا حاب يكمل او لأ ؟؟
فرح : وليش ما يكمل ؟؟ اهي مافيها مرض معدي
حمد : استغفرالله .. انا شقول واهي شتقول
فرح : و لو هذا مايبرر اللي سواه
حمد : انا من اول شي كنت متردد و ماحبيت ازعلج بس بقولج الحين .. تره أحمد مو مال جذي .. اهو يحب الطلعات الكشتات المغامرات .. يموت على شي اسمي مخاطرة .. ندى ماتصلحله
فرح : ( طالعته مده بعدها قامت ) الحمدلله والشكر ( راحت غرفتها )
---

- الفير عالساعه 3 ونص رد أحمد البيت و كلش ماله خلق شي –

أم حمد : ( مبين عليها التعب ) يمه احمد وين كنت ؟ وليش ادق ماترد علي
أحمد : ( بعصبيه ) يعني مايصير الواحد يتمشى مع ربعه
أم حمد : بلى يمه يصير بس عالأقل اترد علينا تطمنا
أحمد : يمه خلاص عفية والله تعبان
أم حمد : اشفيك حبيبي
أحمد : ( بصوت هادي ) مافيني شي بس بروح انام
أم حمد : اوكي على راحتك
---

- الساعه 4 الفير .. ندى افتحت عينها لقت نفسها للحين بملابس الطلعة –

( قامت بدلت و دشت الحمام – عزكم الله – وردت انسدحت و امسكت تلفونها قاعده تفكر بأحمد ودموعها تنزل .. ماقدرت اتطول اكثر .. اكتبت له هالمسج ودزته )

" ماوصلني منك حتى مسج .. لهالدرجة كشيت مني ؟ "

شوي رد عليها بهالمسج " استغفلتيني كل هالوقت ؟ كنتي تبين تعلقيني فيج أول بعدين تصارحيني صح ؟ "

اكتبت له و دموعها تنزل " لا والله ماقصدت اعلقك .. بس دامك للحين ما تزوجتني ولا بينا خطبة عيل مو منحقك تعرف هالشي "

رد عليها " اي يعني كنتي تبيني انصدم بهالشي بليلة دخلتنا مثلا ؟ "

- ندى قرت المسج اقعدت تبجي اكثر .. تحس قلبها احترق حييل .. قطت التلفون بالارض و اقعدت تبجي وتشاهق مده لين نامت –
---

- الظهر .. بيت حمد –

فرح : ( انزلت الصالة ) السلام عليكم
مشاعل : ( خزتها من فوق لي تحت ) وعليكم السلام
عبير : هلا فروح ها اشلون اختج ؟
فرح : الحمدلله
عبير : متى راح تفهموني اللي صار ؟
فرح : ( خزت عبير )
مشاعل : اشفيكم ؟؟ تره انا مو طرطور اهني اشعندكم انتي وياها ؟
فرح : ماكو شي وين خالتي ؟
عبير : نايمه للحين
فرح : مو بالعادة تنام لي هالحزة
عبير : خل اروح اشوفها ( راحت لها )
فرح : ( تكلم مشاعل ) أحمد نايم ؟
مشاعل : اشتبين فيه ؟
فرح : لا بس اسأل
مشاعل : مادري عنه

- يتلهم عبير تركض –

عبير : مشاعل تعالي بسرعة امي تعبانه
مشاعل : ( قامت ) اشفيها ؟
عبير : مادري حيل مسخنة

- فرح الحقتهم غرفة أم حمد لقتها منسدحه و مبين ويهها اصفر حيل –

مشاعل : يمه اشفيج
عبير : ( تبجي ) يمه الله يخليج كلميني
ام حمد : ( افتحت ) حمد .. نادولي حمد
مشاعل : ( تصرخ على فرح ) روحي ناديه بسرعة لا توقفين تتطمشين

- فرح اصعدت بسرعة ( كان حمد نايم لأن اليوم عطلة ) –

فرح : ( تهزه حيل ) حمد حمد قوم خالتي تعبانة وايد
حمد : ( فز ) اشفيج ؟ أي خاله ؟
فرح : ( حدها خايفة وتحس فيها بجية ) امك تعبانة وتبيك
حمد : امي ؟؟ ( نزل بسرعة واهو عالشورت )

- فرح انزلت وراه و اوقفت عند الباب تطالعهم –

حمد : ( قعد عالسرير ومسك ايد امه ) اشفيج يمه ؟ ( حط ايده على راسها ) امشي اوديج المستشفى
ام حمد : لا مابي اروح مكان طلعهم بره بكلمك بروحك
حمد : يمه مايصير جذي .. كان المفروض مسافرين منزمان .. العلاج اهني ماينفع معاج .. لا تعاندين اكثر
ام حمد : مابي اسافر مره ثانيه و خلاص حمد طلعهم بره

( مشاعل وعبير يبجون )

مشاعل : الله يخليج يمه .. سافري خلاص عاد
حمد : ( بعصبيه ) طلعو بره
مشاعل : ( طالعت عبير ) امشي

- اطلعو بره وسكرو الباب وراهم –

مشاعل : ( اتخز فرح ودموعها تنزل ) ويهج نحس عالبيت
فرح : ( واقفه مصدومة وماقالت شي )

[SHwarviskya]

- بالغرفة –

ام حمد : ( بصوت تعبان ) انا مابي كيماوي .. ولا ابي مستشفيات .. ابي اقعد اهني بينكم وابيك...
حمد : يمه لازم تـ...
ام حمد : خلني اكمل .. ابيك تدير بالك على البيت .. انت الكبير يا يمه
حمد : ( بعصبية ) لا تقولين جذي .. راح تسافرين معاي غصب زين ؟؟ والحين امشي المستشفى
ام حمد : حمد انت عندك زوجة و ولد ياي بالطريج .. خلاص خلك معاهم وخلني اهني بينكم
حمد : زوجتي ومرتي يبتهم عشانج .. و راح اخليهم هم عشانج .. يمه انتي كل شي بالنسبة لنا
ام حمد : ( ابتسمت و شكلها حيل تعبان )
حمد : يللا انا رايح البس و بنادي مشاعل تساعدج تلبسين
ام حمد : خلاص اللي تشوفه
حمد : ( باس راسها وقام )

- طلع بره الغرفة –

حمد : مشاعل روحي ساعدي امي خل تلبس
مشاعل : ان شاءالله ( راحت حق امها بسرعة )
فرح : توديها المستشفى ؟
حمد : ( هز راسه – اي – و صعد )
---

- مر اسبوع .. وكانت حالة ندى من سيئ الى اسوء .. صارت ماتاكل عدل .. وكله ساكته وبالليل تبجي .. اما احمد ف نفسيته اتعبت زيادة على أمه وماكان له خلق أي احد .. و حمد حجز التذاكر وصار اليوم اللي بيسافرون فيه لندن –

فرح : ( تلم حمد ) راح اوله عليك
حمد : آنا بعد راح اشتاق لكم وايد .. بس هذي امي لازم اروح معاها
فرح : ادري .. بس اخاف اتطول حيل
حمد : على حسب العلاج
فرح : أحبك
حمد : ( باسها بعدين باس خدها و نزل على اركبه باس بطنها ) بابا يمكن ارجع القاك بره دير بالك على امك عدل
فرح : ( بجت زياده )
حمد : ( قام ورد لمها ) خلاص بسج بجي يللا لازم امشي الحين
فرح : ( مو راضيه تهده ) خل احمد يروح مكانك اهو ماعنده احد اهني
حمد : لا انا بروح معاها .. يللا حبيبتي هديني تأخرت
فرح : ( هدته واهي تبجي )
حمد : ( باس راسها ) مع السلامه ( طلع من الغرفة )

( فرح اقعدت عالسرير واهي تبجي .. ماكانت تدري اشكثر راح يتمون اهناك .. بس اللي تعرفه ان المدة مو قصيرة )
---

- موعد ندى عند الدكتور –

الدكتور : ها ندى اشلون صحتج ؟
ندى : الحمدلله
أمل : لا والله يا دكتور حالها مو عاجبني كلش .. كله ساكته وماتاكل الا شوي
الدكتور : ماتاخذين الأدوية ؟
ندى : بلى
الدكتور : وليش ماتاكلين عدل تحسين انج تعبانه ؟
ندى : لا ما فيني شي بس ما اشتهي
الدكتور : لا يا ندى مايصير لازم تتغذين عدل
ندى : ( طالعت الدكتور بعدين طالعت امها )
الدكتور : ام عبدالله ممكن تنطرين بره بكلم ندى شوي
أمل : ليش ؟ اشفيها ؟
الدكتور : مافيها شي بس حاب اعرف منها جم شغلة
أمل : ( اسكتت بعدين قامت اطلعت بره )
الدكتور : ندى صارحيني يتلج النوبة و امج ماتدري ؟
ندى : لا دكتور مايت
الدكتور : ندى انا ماعرفج من يوم او يومين .. انا صارلي معاج 7 سنين .. و أدري ان فيج شي وخاشته
ندى : صراحة في أسئلة ودي اسألك اياها .. و ابيك تجاوبني عليها بكل صراحة
الدكتور : تفضلي
ندى : اللي مثل حالتي .. يقدرون يتزوجون ؟
الدكتور : اكيد يقدرون
ندى : يعني اشلون عالنوبات ؟؟
الدكتور : عادي مثل ما تاخذين الأدويه الحين .. تاخذينها بعدين وانتي عند ريلج ان شاءالله
ندى : و مايأثر عاليهال
الدكتور : ( ابتسم ) يبه انتي انخطبتي ؟
ندى : ( ابتسمت ) لا بس اسأل
الدكتور : بخصوص الحمل بعدين اكلمج عنه لأن في شوية امور ضروري تعرفينها
ندى : لا انا بعرفه الحين
الدكتور : ( يتغشمر معاها ) انتي انخطبي أول بعدين اقولج
ندى : ( تضايقت ) ودي اعرف الحين .. هذي حياتي وودي اعرف كل شي عنها
الدكتور : خلاص بكون صريح معاج وبقولج كل شي
ندى : ( تطالعه واهي ساكته )
الدكتور : عندي حالة مثلج و متزوجة وعندها اعيال حلوين ماشاءالله .. بس ما لازم اكون صريح معاج فترة الحمل راح تزيد النوبات .. وممكن يكون الجنين حامل للمرض بس النسبة مو عالية .. يعني الاحتمال الأكبر يكون الطفل سليم
ندى : ( ساكته )
الدكتور : يعني لا تحاتين شي .. وايد حريم فيهم هالمرض و يابو اطفال اصحاء ومافيهم الا العافية
ندى : قلت ان النوبات تزيد فترة الحمل ؟
الدكتور : اي بس هذا مايعني ان الحياة توقف النوبات صج انها تتكر كل.... ( كمل الدكتور كلامه بس ندى ماكانت تسمع شي بس تطالعها و اهي سرحانه )
ندى : مشكور دكتور .. اقدر اطلع الحين ؟
الدكتور : اي و ديري بالج على نفسج يبه .. ولا تفكرين بشي انتي مثلج مثل غيرج تتزوجين وتييبين عيال ان شاءالله

( ندى اسكتت واطلعت بره واهي تفكر بشيين .. النوبات ( أكثر شي تكرهه بحياتها ) و اللي راح تزيد وقت الحمل .. و بالاحتمال اللي يخليها تييب طفل يعاني مثل معاناتها )
---

- بالبيت –

أمل : يمه لي متى بتسكتين اشفيج اشقالج الدكتور ؟
ندى : ماقال شي
أمل : طولتو داخل شنو ماقال شي
ندى : يمه خلاص الله يخليج مالي خلق
أمل : ندى اذا ماقلتيلي تره والله ادق عالدكتور واهو يقولي
ندى : ( انزلت دموعها ) سألته اقدر اتزوج مثل غيري ولا لأ ؟؟
أمل : و اشقال ؟
ندى : ( تبجي ) يقول تقدرين بس في احتمال اييب ياهل في صرع .. و غير هذا النوبات تزيد وانا حامل .. يمه منو اللي له خلق ياخذ وحده جذي ؟؟
أمل : مالج شغل بالدكتور مايعرف صدقيني
ندى : مايعرف ؟؟ ليش مو اهو الدكتور ؟؟ ولا انتي تفهمين اكثر منه ؟
أمل : اهدي يمه خلاص
ندى : ( تصرخ واهي تبجي ) انا ادري ان محد يخطبني لأن يدرون اني مريضة ؟؟؟ محد وحده مثلي .. منو هالمينون اللي راح ياخذ وحده ممكن تطيح بمكان عام وتفشله جدام الناس
أمل : ( امسكتها بتلمها ) خلاص حياتي والله ماراح يصير الا كل خير
ندى : ( ارجعت لي وره ) بس يمه تعبت والله .. خليني اروح داري
أمل : زين عفية لا ..
ندى : لا تخافين ماراح اقفل الباب متى ماتبين طلي علي يمكن اكون منصرعه او شي ( خلتها ومشت )
أمل : ( اقعدت عالغنفة و محترق قلبها على بنتها ) الله يشافيج يارب
---

- مر شهر وخلص الكورس .. صارت فرح بالشهر السابع –

( بالصالة في بيت أم حمد )

أحمد : ( توه دش البيت ) السلام عليكم
عبير : هلا وعليكم السلام
فرح : ( ماردت عليه )
أحمد : عبير ممكن تروحين شوي .. بكلم فرح
عبير : ( طالعتهم وقامت ماقالت شي )
أحمد : ( قعد عالغنفه ) اشلونج فرح
فرح : الحمدلله
أحمد : ادري انج ماتكلميني بس يا فرح انا انصدمت والله انصدمت ماتوقعت انها مريضه ومو قايلتلي
فرح : ( اسكتت )
أحمد : فرح ردي علي قاعد اكلمج انا
فرح : انت مو قلت ماراح أأذيها كلش ؟ وهذا اللي سويته شنو ؟
أحمد : اهي خشت عني شي كبير اشلون ماتبيني انصدم
فرح : زين الحين اشتبي ؟
أحمد : صارلي اسبوع ادق وماترد علي
فرح : اهي ماتبي تكلمك خلاص خلها بحالها
أحمد : دقي عليها وعطينياها
فرح : ليش ؟ قادر تتزوجها واهي جذي ؟
أحمد : تو الناس عالزواج .. بس ابي اكلمها وماتدرين اذا الله كاتب نصيب بيصير
فرح : ( خزته مده ) ماراح ادق عليها و خلها بحالها

- رن تلفون فرح وكانت اللي داقه ندى –

فرح : طالعت الرقم بس ماردت
أحمد : هذي ندى ؟
فرح : لا ( افتحت الخط وقامت )
---

- اصعدت شقتها و ردت عليها –

فرح : هلا ندى
ندى : ليش خليتيني مدة عالخط ؟
فرح : كنت اكلم أحمد .. يقول يبي يكلمج
ندى : خلاص فرح انا مابي اكلمه والعيب مو فيه .. فيني انا .. مابي اتزوج خلاص
فرح : ندى مايصير تقولين جذي
ندى : فرح انا مو مستعدة اتعب زياده واتعـّب غيري معاي .. ولا ابي تزيد نوباتي اللي عندي مكفين وموفين .. ولا بخاطر بالياهل اللي راح اييبه .. انسي فرح انا نسيت خلاص
فرح : ( دمعت عينها على ندى ) الله كريم لا تفقدين الأمل ندوي
ندى : انا مو فاقدته .. بس والله حياتي جذي احسن .. مابي اتزوج و أأذي الناس أو أضر ولدي من غير قصد
فرح : زين واذا أصر يكلمج ؟
ندى : لا تخافين اهو بس حاس بتأنيب ضمير مو أكثر .. اهو ماحبني والله .. و مادق وايد .. كلها مكالمة وحده باليوم ومايتعب نفسه اكثر .. وخليج مني و قوليلي اشلون حمد ؟
فرح : امس كلمته قبل لا انام .. مسكين كله بالمستشفى
ندى : الله يكون بعونهم ويشافي امه يارب
فرح : آمين
ندى : يللا عيل اخليج بروح اقعد مع امي
فرح : اوكي .. مع السلامه
ندى : مع السلامة ( سكرت الخط )

( حطت التلفون يمها و انسدحت تفكر بحالها و دموعها تنزل عالمخدة )
" لي وين راح أوصل ؟ .. و لي أي مدى راح أتحمل ؟"


كثير من العنا فيني .. وأقول اخفيه وأكابر
وانا ادري كثير الهم .. يشيب العمر به بدري
على حمل الأسى مقوى .. ولا لي خافق ٍ قادر
تراني مكتفي بلحيل .. ثقيل الهم في صدري
عسى الأيام تنصفني .. تعدل حضي العاثر
تحس بجيمة إحساسي .. تحس بوضعي وقدري

~ اسمعوها والله مو طبيعية .. خصوصا آخر مقطع .. لايق على احساس ندى ~

http://www.6rb.com/songs/44978.html (http://www.6rb.com/songs/44978.html)

---

[SHwarviskya]

- 20 / اشتقت لك -

- مرت الأيام .. دشت فرح بداية الشهر التاسع .. يعني حمد صارله غايب قريب الثلاث اشهر .. والدوام صارله شهر بادي بس فرح وقفت قيدها لأنها بدت تتعب ووراها ولادة .. اما ندى فهي للحين على رايها ماتبي تتزوج .. شالت الفكرة من راسها .. وأحمد ما يسأل وايد يعني بالاسبوعين مره -

- بالليل ندى كانت نايمه رن تلفونها جان ترفعه من غير لا تشوف الرقم –

ندى : الو
أحمد : زين رديتي علي
ندى : ( استوعبت ) أحمد ؟
أحمد : ادري انج رديتي من غير لا تشوفين الرقم .. بس احلفج ماتسكرينه
ندى : خلاص احمد روح الله يوفقك .. وتره العيب مو منك انا مابي اكلم
أحمد : ندى افهميني انا انصدمت .. والله ماتوقعت انج خاشة عني سر قوي مثل هذا
ندى : شوف أحمد .. انا وحدة خلاص صرفت نظر عنك وعن كل الشباب .. ولا ابي اتزوج
أحمد : اوكي انا بعد متفق معاج انا هم مابي اتزوج .. بس ليش ماتكلميني
ندى : ( لاعت جبدها منه ) انت اشفيك ؟ ليش اتكلمني اذا ماتبي تتزوج يعني ؟
أحمد : انا مقدر شعورج الحين .. و بخليج ترتاحين بس تره انتي غالية علي ومابي اكلم الا انتي
ندى : والله هذا شي راجعلك .. الحين بكمل نومتي مع السلامة
أحمد : راح ادق عليج وقت ثاني يمكن تكونين رايقة اكثر
ندى : لا تدق
أحمد : اشوفج على خير .. باي
ندى : ( سكرت التلفون وفيها بجية واقعدت تتذكر كلام الدكتور )

الدكتور : لازم اكون صريح معاج فترة الحمل راح تزيد النوبات .. وممكن يكون الجنين حامل للمرض

(ندى اطردت الافكار من مخها و ادفنت راسها بالمخدة ودموعها تنزل واقعدت تقرى آية الكرسي و المعوذات لين ردت نامت )
---

- اليوم الثاني الساعه 9 الصبح .. فرح متمللة و موقادرة ترد تنام جان تنزل تحت –
( واهي عالدري اسمعت صوت أحمد طالع من غرفته )

أحمد : ( يتكلم بالتلفون ) وانتي ليش مو مقعدتني مبجر ؟؟ زين جذي الحين بروح متأخر بسبتج .. لو نايمه اعذرج بس قاعدة ومداومة وهم ناسيتني .. لا تقولين حبيبي لو كنت حبيبج جان ماخليتيني انام لي .... ( صوته بدى يبتعد لين طلع من البيت )
فرح : ( تمت واقفة عالدري منصدمة بعدين ردت اصعدت شقتها و انسدحت تفكر )
فرح : الله يعوضج يا ندى
---

- المغرب .. بالصالة .. قاعدين هدى ومشاعل و عبير و فرح –

فرح : ( تكلم نوره بالتلفون ) اي عادي هذي نساة .. من صجج انا يننت حمد مسكين .... ( تمت تسولف مع نوره مدة طويله وبعدها سكرت التلفون )

هدى : ( تطالعها بنظره ) اقول فرح
فرح : هلا
هدى : عفوا بس يعني لي متى ما تلبسين جناط ماركات ؟
مشاعل : ( تبتسم وتطالع فرح )
فرح : عادي أي جنطه تعجبني اخذها
هدى : لا حبيبتي بما انج حرم حمد ال... ضروري تلبسين ماركات .. وصراحة فشلتينا باستقبال احلام كان لبسج مو ذاك الزود
- احلام وحده تصير حق حمد من بعيد –

فرح : ( تضايقت حيل ) بالعكس انا شايفه ان لبسي كان حلو
هدى : يا ماما الحلو غير والراقي غير .. لازم تلبسين شي يليق فينا وتنسين حياتج الأولية وانتي في بيت اهلج
فرح : مابي انسى .. و مابي اتعود على سخافاتكم
مشاعل : ( تضحك ) سخافات ؟؟ الحين اتسمين الكشخة والماركات والرزة سخافات ؟
عبير : بنات خلاص عاد
فرح : اي اسميها سخافات
هدى : ( حطت ريل على ريل ) وانا اسمي اللي انتي فيه تخلـّف

- دش أحمد –

أحمد : السلام عليكم
الكل : وعليكم السلام
أحمد : ( قعد يم هدى ) ها وين عيالج ؟
هدى : نايمين
أحمد : يحليلهم

- رن تلفون فرح وكانت اللي داقة ندى –

فرح : ( قامت اصعدت فوق من غير لا تقول أي شي )
أحمد : ( طالعها بعدين قام دش غرفته )
هدى : ليش ماردت جدامنا ؟
مشاعل : تره هذي مو اول مره .. من سافر حمد واهي كل مايرن تلفونها تصعد فوق
هدى : تهقين تكلم ؟؟
مشاعل : مادري بس اتوقع تسويها
هدى : يا بعد عمري حمد مايستاهلها والله
---

- فوق بغرفة فرح –

فرح : ندى لاعت جبدي من هالثنتين .. خلاص ماني قادرة اتحملهم
ندى : اهدي بس لا تولدين علينا
فرح : على طاري الولادة والله متضايقه حييل فوق ما تتصورين اشلون راح اولد واهو مو موجود ؟
ندى : عادي فرح هذي امه اكيد ماراح يخليها و يرجع
فرح : و ليش مايروح أحمد شنو مو ولدها اهو بعد ؟
ندى : ( تضايقت من اسمعة اسمه )
فرح : وانتي ليش ساكته تحبينه يعني ؟
ندى : أمس كلمته
فرح : شنو ؟؟
ندى : ماكنت مستوعبة قعدني من النوم و رديت من غير لا اشوف الرقم
فرح : واشقال ؟
ندى : يبيني ارد اكلمه
فرح : خيولي لو يموت لا تردين عليه
ندى : ليش ؟
فرح : اليوم الصبح سمعته يكلم وحده
ندى : اها .. الله يهنيه معاها
فرح : ندوي انا ماقلت هالشي عشان تتضايقين .. بس ابيج تدرين ان الدنيا فيها وايد رياييل احسن من هالأحمد
ندى : ومنو قالج ان دنيتي واقفه عليه .. انا مابي اكلمه ولا ابي شي لا منه ولا حتى من غيره
فرح : زين ندى اكلمج بعدين حمد قاعد يدق
ندى : اوكي مع السلامه

[SHwarviskya]

- عند ندى –
( ندى سكرت التلفون من فرح واهي تبتسم )

ندى : يحليلك أحمد .. داق علي و اتقولي ابيج و طلعت تكلم ؟؟ .. يللا الله يوفقك

(حطت التلفون يمها و حست انها شوي وتنفجر ودها لو كانت حياتها غير .. استغفرت و بطلت اللاب توب اقعدت تتدرب على تمارين البرمجة .. صج ان مالها خلق هالمادة بس ماكان عندها أي شي تسويه و تبي تشغل نفسها بأي شي عشان لا تفكر )
----

فرح : ( تكلم حمد بالتلفون ) نومه في بيت اهلي ماتخليني الا بالعطل .. و انا خلاص ماني قادرة اتحمل خواتك اذبحوني مناشبيني على كل شي
حمد : لأنهم يحاسبونج على طلعاتج ورداتج صارو مناشبينج ؟؟
فرح : ليش تكلمني جذي ؟
حمد : خلاص فرح انا الحين مشغول بروح اشوف امي
فرح : ( تبجي ) بس عاد خلاص حرام عليك هم احنا لنا حق مو بس امك
حمد : اللهم طولج يا روح
فرح : حمد انا اشتقت لك حيل و احس اني راح اولد هاليومين متى ترد .. لهالدرجة ما ولهت علينا ؟؟
حمد : ( بعصبية ) يا فرح هذي امي .. لا تخيريني بينج وبينها
فرح : آنا ماخيرتك .. بس ارجع خل احمد ياخذ مكانك
حمد : أحمد توه متوظف مايقدر ياخذ مكاني .. وبعدين اهو مو قد المسؤولية وما اقدر اخليه اهني مايعرف شيسوي معاها.. جم مره اشرحلج
فرح : بس اهو مو ياهل وبعدين الشهر اللي طاف كان عندكم يعني يقدر ياخذ مكانك اهي امه بعد مو بس امك بروحك
حمد : ( يصرخ ) خلاص فكيني تعبت من حنتج كل يوم .. قلتلج هذي امي .. وحالتها كل ماله وتصير أسوء فهمي عاد وعن الدلع .. وبس مابي اسمع حجي زيادة ( سكره بويهها )
فرح : ( قطت تلفونها عالارض واقعدت تبجي )
---

- بعد اسبوع ( كلية الهندسة ) –
(مثل ماقلنا فرح وقفت قيدها هالكورس معنـّى اهو آخر كورس لها )

- ندى كانت تتمشى بالكلية بروحها فجأة اوقفت مو مصدقة عينها .. كانت جدامها ( دلال ) ومبين انها ضعفانه وايد .. و شعرها مسويته ذيل حصان .. عقب ماكان دايما كيرلي –

ندى : ( منصدمه تطالعها )
دلال : ( اوقفت جدامها ) ندى ...
ندى : ( ارفعت ايدها – جنها تقول خليني بحالي – وكملت طريجها )
دلال : ( امسكتها ) لحظة ندى خل اكلمج
ندى : ( اسحبت ايدها ) مابي اسمع شي وخري عني
دلال : ( اوقفت جدامها ) والله ماراح اخليج الا اذا سمعتيني
ندى : مابي اسمع شي منج كافي اللي ياني بسبتج
دلال : ندى والله اني ماقلت أي شي عنج
ندى : ( ساكته )
دلال : امشي نقعد بالسيارة واقولج كل اللي صار
ندى : مابي اعرف شي ومابي صداقتج
دلال : الله يخليج عطيني فرصة بس اقولج اللي صار وبعدها خليني
ندى : ( طالعتها مدة ) اوكي امشي السيارة
----

- بنفس هالوقت -

( فرح قاعده تتمشى بشقتها واهي تحس بألم خفيف و فجأة طاح ماي الياهل بالصالة عالرخام .. اوقفت مكانها خايفة و موعارفة شتسوي .. راحت غرفتها بتاخذ تلفونها والماي للحين يصب منها .. اول مره تشوف جذي ماي غزير .. اللي تعرفة ان الماي يصب شوي و يوقف .. بس مايها كان ينزل واهي تمشي )

فرح : ( امسكت تلفونها دقت على امها بس ماردت عليها )

- حست فجأة بألم قوي خذت تلفونها و اطلعت من غرفتها ارجعت الصالة جان تزلق بسبة الماي اللي طاح منها .. بس اشوه قبل لا تطيح امسكت بالغنفة –

فرح : ( بجت من الخوف .. وردت دقت على امها .. بعد خامس رنة ردت عليها )
فاطمة : الو هلا فرح
فرح : ( تبجي ) يمه ليش مارديتي علي .. نزل مني ماي وايد و موراضي يوقف للحين قاعد ينزل
فاطمة : اسم الله عليج .. قلتلج نامي عندي دام ريلج مو موجود
فرح : يمه اقولج للحين مو راضي يوقف ليش للحين ينزل ؟
فاطمة : اهدي يمه الماي عندج وايد وهذا شي عادي يمه لا تخافين .. مافي احد عندج يوصلج المستشفى ؟
فرح : ( تبجي ) مادري يمكن كلهم بالدوام الحين
فاطمة : زين اهدي حبيبتي .. الحين امر عليج نطريني
فرح : اوكي بسرعة ( سكرت التلفون بس ماقدرت تنطر اكثر كانت تحس بألم قوي .. البست عباية و ملفع و اطلعت من شقتها )

فرح : ( تنادي ) في احد اهني ؟؟

- انزلت شوي شوي من الدري واهي تبجي وتنادي –

فرح : أحمد .. مشاعل .. أي احد الله يخليكم
أحمد : ( طلع من غرفته و اهو بالدشداشة .. شكله توه راد من الدوام ) اشفيج ؟
فرح : ( منحرجة منه لأن الماي قاعد ينزل منها عالارض بس عالخفيف مثل ال... ) تعبانة ودني الطبيب
أحمد : ( راح يمها مسكها واهو مرتبك ) وين امج انا ماعرف واذا ولدتي بالسيارة شسوي ؟
فرح : ماراح اولد بس عفية ودني الماي كله طاح
أحمد : ( يأشر عالارض ) هذا ماي ؟
فرح : ( تصرخ ) اسكت و ودني السيارة
أحمد : اوكي بسم الله ( ركبها السيارة ومشى )
فرح : دق على حمد
أحمد : اشفيج الله يهداج نطري ان شاءالله تولدين بالسلامة بعدين نكلمه
فرح : ( واهي متألمة ) ابي حمد
أحمد : خلاص فرح لا تربكيني اكثر سكتي شوي
فرح : زين دق على امي قولها اتروح المستشفى
أحمد : ( مسك تلفونه ) جم رقمها ؟
فرح : ( نقلته الرقم )
أحمد : ( دق عليها ) الو .. خالتي ام فرح ؟ انا احمد ... اي انا ماخذها سبقينا اهناك .. مع السلامة
فرح : ( تتألم ) ها وين صارت ؟
أحمد : بالطريج لا تحاتين
فرح : ( تنفخ ) كل شي يعورني بمووت خلاص
أحمد : ( خاف ) فرح عفية لا تولدين اهني كاني وصلت صبري ثواني بس
فرح : ( بجت واهي تتألم ) ماقدر برجـّع
أحمد : لا عفية كاني دشيت المسافط
فرح : ( ماقدرت تنطر اكثر و رجعت بسيارته مكان الدواسات )
أحمد : ( بطل الدرايش واهو حيل معصب بس ماقال شي و صلها عند باب المستشفى وطق هرن يو خذوها من السيارة ودخلوها داخل )
---

- مسافط الكلية –

دلال : والله ياندى مايبت طاريج .. بس كان فيني نزيف و ماقدرت اتحمل رحت حق امي و قلتلها اني غلطت وابيها توديني المستشفى .. و طقتني وايد و انا كنت انزف فطحت غشيانه .. و عقب ماخلصنا من دوامة المستشفى كانت تصرخ ويابت طاريج .. قالت انتي السبب .. وقالت راح تفضحج بس انا مارضيت قلت لها انتي مالج شغل .. واني عرفته بروحي بس ماكانت راضية تسمع
ندى : ( ساكته )
دلال : والله يا ندى اني حاولت ادق عليج احذرج بس جهازج كله مسكر ماقدرت اكلمج
ندى : تدرين اشسوت فيني امج ؟ بسبتها دشيت المستشفى بغيبوبه
دلال : والله ماقصدت ادخلج بالموضوع كلش آسفه سامحيني
ندى : ( اسكتت )
دلال : ندى عفية سامحيني والله ماكنت قاصده
ندى : و اشصار عليج بعد مادرت امج ؟ قالت حق ابوج و اخوج ؟
دلال : لا ماقالتلهم .. تدرين ابوي لاهي مع مرته .. من طلق امي واهو مايسأل .. و اخوي مسافر يدرس صارله 3 سنين .. ( اسكتت مده ) بس هم ما اسكتت و سوت شي ثاني
ندى : اشسوت ؟

[SHwarviskya]

- 21 / بداية شك -

دلال : لا ماقالتلهم .. تدرين ابوي لاهي مع مرته .. من طلق امي واهو مايسأل .. و اخوي مسافر يدرس صارله 3 سنين .. ( اسكتت مده ) بس هم ما اسكتت و سوت شي ثاني
ندى : اشسوت ؟
دلال : طقتني طق والله يا ندى ماخلت فيني شي صاحي
ندى : ( ساكته وتطالعها )
دلال : و خلتني ادق على علي و اقوله بشوفك .. طبعا حاطته سبيكر ومايدري ان امي واقفه فوق راسي .. و انا اكلمه كنت ميته بجي من الطق والموقف وكل شي .. عاد اهو قعد يهديني و يقولي كل شي بينحل
ندى : لا جنتل والله
دلال : ( اسكتت )
ندى : كملي
دلال : اتفقنا اني اشوفه بكوفي شوب .. و ودتني امي و انطرت بعيد و اول ماشافته قعد معاي يت اسحبت كرسيها واقعدت يمنا .. وانا طول الوقت منزله راسي .. اسوء موقف مريت فيه
ندى : هذا اسوء موقف ؟؟ ليش روحتج معاه الشقه واللي هببتيه اهناك مو اسوء موقف ؟ اشلون قدرتي تسوين اللي سويتيه ؟؟
دلال : ندى والله ماكان قصدنا نسوي هالشي فجأة صار بقوة و حسيت روحي اطلعت وصار النزيف
ندى : اشلون مو قاصدين فهميني بالله ؟؟
دلال : ماكنا قاصدين ذاك المكان .. خلاص ندى مابي اشرح اكثر
ندى : احسن لأن بدت تلوع جبدي .. كملي اشصار عليكم ؟
دلال : امي قالتله اذا ما تزوجني .. تسويله فضيحة .. وافق وقال راح ياخذني بس يطلقني بعد جم شهر
ندى : قال هالشي جدامج ؟؟
دلال : ( ابتسمت ابتسامة ضيق ) اي والله
ندى : الحقير
دلال : يقول باخذها واستر عليها جم شهر لأني اعزها بس مو دلال اللي ابيها تكون مرتي
ندى : هذا لأن جاسج .. زين امج شقالت يوم قالها جذي وانتي اشسويتي
دلال : انا انصدمت حيل ماتوقعت علي يقول جذي .. وامي على طول قالت موافقه .. ماتبي فضايح على قولتها وصج خطبني وابوي ماقال شي بس قال اذا شايفينه زين انا موافق .. و اخوي نفس الشي بعد .. و تزوجني و امي سوت حفلة نادت معارفها عشان يدرون اني تزوجت .. وكانت حياتي كلها نجره .. بس كان ياخذ اللي يبيه و يحبسني بالبيت و يطلع .. وايد كلمته عشان مايطلقني بس مو راضي و مايبي يكمل معاي يقولي اعرف سوالفج و انج تكلمين غيري مليون .. وطلقني بعد 4 اشهر .. و بس ما ادري عنه أي شي
ندى : زين والحين اشلون معاملة امج لج ؟
دلال : صايره على طول تحبسني بالبيت .. و اهي اللي تييبني اهني .. و خذت مني السيارة
ندى : ( اسكتت )
دلال : هذا كل اللي صار معاي باختصار .. عقب ماسمعتيه ماسامحتيني ؟
ندى : أول توعديني ما تردين حق سوالفج
دلال : ( ابتسمت ) وامي ماعطتني مجال عشان ارد ؟
ندى : والله خايفه اعطيج فرصة و تخربينها
دلال : اذا خربتها لا تكلميني مره ثانيه كلش
ندى : بس تره بعد اللي صار ماراح ترد علاقتنا مثل قبل
دلال : ادري اصلا انا ماعندي سيارة و لا تلفون نفس الناس .. فيعني بس اشوفج اهني
ندى : اي احسن
---

- بالمستشفى –
( دخلو فرح الولادة ودشت معاها امها .. و أحمد و نوره و ساره و ريم واقفين بره ناطرينها )

أحمد : مو جنها طولت ؟
ساره : لا عادي ماصارلها وايد
أحمد : اهي السالفة وايد تطول ؟
ساره : على حسب الولادة
نوره : ساره تره فرح وصتني وايد اني انادي ندى بس مادري احس ماله داعي اناديها الحين
أحمد : ( قط اذنه يسمعهم )
ساره : لا شنو ماله داعي .. اهي اختنا بعد .. تعرفين رقمها ؟
ريم : ( تضحك ) توها اختنا وحالتج حاله و آخر شي حتى رقمها مو عندج
ساره : زين خلصو تعرفونه ولا لأ
أحمد : ( وده يعطيهم الرقم بس ساكت )
نوره : ( طلعت تلفون امها من الجنطه ) لحظه تلفون امي عندي خل ادور رقمها .. كاهو .. هاج دقيت ( عطتها التلفون )
ساره : ( حطت التلفون على اذنها ) الو .. ندى ؟
ندى : هلا خالتي
ساره : انا ساره
ندى : ( استغربت ) هلا ساره اشلونج
ساره : الحمدلله .. بغيت اقولج تره فرح دخلناها المستشفى بتولد
ندى : صج ؟؟ أي مستشفى ؟
ساره : السلام
ندى : اوكي الحين يايتلكم
ساره : اوكي مع السلامة ( سكرت التلفون ) كاهي الحين اتيي
نوره : تعبت من الوقفه
ساره : قعدي مو زين عليج توج حامل
نوره : اي والله حدي تعبت ( راحت اقعدت عالكراسي )
أحمد : ( واقف يطالعهم .. شكله غلط بينهم بس مايبي يروح قبل لا يشوف ندى )
ساره : أقول أحمد كلمت اهلك ؟
أحمد : اي كلمت هدى قالت اذا اولدت اقولهم
ساره : الله يسهل عليها
---

- بعد ربع ساعة يت ندى .. أول ما شافت أحمد .. جان توقف –
ساره : تعالي ندى
ندى : ( لفت ويهها عنه و راحت سلمت على خواتها ) ها اشلونها ؟
ساره : للحين داخل بس طمنونا كل شي طبيعي
ندى : الحمدلله
أحمد : ( يطالعها بس اهي صاده عنه )

- بعد شوي اطلعت فاطمة –

فاطمة : ( مبتسمه ) اولدت اسم الله عليه قمر يهبل
نوره : ( قامت يت يمهم ) صج ؟؟
ساره : وينه بنشوفه ؟
فاطمة : تعالو ادخلكم اتشوفونه
ندى : و اشلون فرح ؟
فاطمة : اتعبت مسكينة .. نايمة الحين
ندى : ( ابتسمت ) يحليلها

- الكل راح مع فاطمة عشان يشوفون الياهل –

أحمد : لحظة ندى
ندى : ( التفتت عليه ) أحمد خلاص اشتبي مني ؟
أحمد : ابي نرجع حق بعض
ندى : ما ينفع .. لا انا ابي ارجع .. ولا انت تبي هالشي
أحمد : بلى والله ابيه
ندى : أحمد بطل جذب .. اتقولي ابي اكلمج .. وانت تكلم غيري ؟
أحمد : آنا ؟؟؟؟
ندى : اي انت .. كنت تكلم وحدة و فرح سامعتك باذنها
أحمد : متى ؟ اكيد سامعه غلط
ندى : لا مو سامعه غلط .. و عشان اكون دقيقة معاك .. اسمعتك على طول بعد اليوم اللي كلمتني فيه وقلت مابي غيرج
أحمد : ( سكت ماعرف شيقول )
ندى : وخلاص أحمد خلني بحالي .. تره دنيتي مو ناقصتك ( دشت داخل عشان تشوف الياهل )
أحمد : ( تم واقف مكانه .. جان يرن تلفونه ) الو
حمد : ها اشصار عليها ؟
أحمد : الحمدلله اولدت بالسلامة
حمد : الف حمدلله .. شفته ؟ يشبه منو ؟
أحمد : لا ما شفته للحين
حمد : أحمد ابيك اتيي تاخذ مكاني يومين بس بشوفهم وارجع
أحمد : خلاص اوكي متى تبي ؟
حمد : بأقرب وقت يعني لو يصير باجر تعال
أحمد : خلاص اشوف شيصير واردلك خبر يللا مع السلامه

( سكر التلفون وطلع من المستشفى )
---

- الكل يه حق فرح بالمستشفى .. حتى خوات حمد –

مشاعل : ( تطالع الياهل ) اسم الله عليه يهبل .. طالع على اخوي
هدى : اي كله حمد
مشاعل : اشوه طلع علينا
فاطمة : ليش اشفيها بنتي ؟ اصلا هالياهل نسخة فهد
فرح : مو مهم يشبه منو المهم اهو بخير الحمدلله
مشاعل : يا بعد قلبي يا يمه .. اكيد ودها تشوفه
فاطمة : الله يردها لكم بالسلامة يارب
الكل : آمين
---

- مر جم يوم .. و رد حمد الكويت .. وعلى طول على بيت فرح .. ماقالها ان ياي .. كان يبيها مفاجأة –

( طق الجرس .. افتحت الخدامه )

حمد : وين ماما ؟
الخدامه : موجود داخل
حمد : ناديها

- راحت الخدامه .. نادت فاطمة جان تتفاجئ بحمد –

فاطمة : ( مو مصدقه ) حمد ؟؟ ليش ماقلت انك ياي
حمد : ( يبتسم ) بغيت اسويها مفاجأة
فاطمة : واحلى مفاجأة والله .. اهي الحين نايمه .. لو قايل قبل عالاقل تتسنع مسكينه
حمد : لا احسن خليني اروح اقعدها
فاطمة : على راحتك .. حياك .. ماكو احد بس فهد

- دش حمد الصالة وسلم على فهد .. و وصله فوق لي غرفة فرح وراح –

( حمد بطل الباب ودش لقى فرح نايمه و يمها سرير يهال طل فيه لقى نواف نايم .. كان شكله وايد صغير بس حلو اسم الله عليه .. مد اصبعه و نعـّم على خده .. وبعدها راح انسدح يم فرح .. وبدى يلعب بشعرها )

( فرح بطلت عينها لقت حمد يمها .. ماصدقت .. ردت غمضت و بعد ثواني افتحت عينها لقت حمد يضحك )

حمد : ( يضحك ) حياتي صج صج مو حلم
فرح : ( من الصدمه اقعدت ) متى ييت ؟؟
حمد : ( قعد ) توني واصل من المطار
فرح : ( عيونها غورقت وحنجها بدى يرجف )
حمد : ( سحبها ولمها على صدره قعد يبوس راسها ) لا تبجين حبيبتي
فرح : ( لامته ) أحبك عمري لا تخليني مره ثانيه
حمد : ( وخرها عنه ) فرح حبي جم مره اقولج امي اهناك وماقدر اخليها .. لازم ارجع لها
فرح : ( امسحت دموعها ) الله يشافيها .. خل اييبلك نواف ( قامت شالت نواف و عطته حمد )
حمد : ( خذاه واهو يبتسم ) بسم الله
فرح : حلو صح ؟
حمد : ( باسه وشم ريحته ) وايد .. طالع على امه
فرح : ( باست خد حمد ) حياتي خلك معاه اغسل وارجع

- راحت فرح الحمام – عزكم الله – وبعدها ارجعت .. كان حمد منوم نواف على ايده –

فرح : ( اقعدت يمه واهي مبتسمه ) مستانس ؟
حمد : اي وايد
فرح : طالع اسود مثلك
حمد : ( يضحك ) حرام عليج اشحلاته حنطاوي
فرح : ( خذته منه ) خل ارده سريره لا يقوم و يزعجنا

- حطته بسريره .. و ارجعت اقعدت يم حمد .. لمته حيل بعدين باسها –

حمد : ( لمها على صدره ) للحين تحبيني ؟
فرح : تشك بهالشي ؟
حمد : يقولون البعد يغير
فرح : غيرّك ؟
حمد : اذا قدر يغيرج راح يقدر يغيرني
فرح : ( وخرت عنه وطالعته ) ليش جذي تقول ؟
حمد : ( فصخ جوتيه – عزكم الله – وانسدح ) تعالي انسدحي يمي
فرح : ( انسدحت يمه ) اشفيك حياتي ؟
حمد : ( قرب منها و باس يبهتها ) مافيني شي بس تعبان شوي
فرح : عيل نام
حمد : ( غمض عينه )
فرح : ( تمت تطالعه واهو مغمض ) الله لا يحرمني منك
حمد : ( مارد وتم مغمض عيونه )

- فرح اقعدت تطالعه واهو مغمض .. لين داخت ونامت –

( بعد ساعتين قامت على بجي نواف .. لقت حمد للحين نايم يمها .. شالت نواف و اقعدت ترضعه )

حمد : ( فتح عينه لقاها قاعده يمه ترضع نواف من صدرها ) اشكثر نمت ؟
فرح : تقريبا ساعتين
حمد : ( قام يلبس جوتيه – عزكم الله - ) لازم اروح البيت .. مامريت عليهم
فرح : تروح ترتاح وترجع ؟
حمد : اي .. ( قعد يطالع ولده واهو يرضع .. بعدين باس راس فرح و قام )
فرح : حمد فيك شي ؟
حمد : لا حبيبتي مافيني شي
فرح : احبك
حمد : ( ابتسم لها وطلع من الغرفة )

[SHwarviskya]

- وصل حمد بيتهم .. لقى خواته قاعدين بالصالة –

هدى : ( أول ماشافته قامت ) انت وينك ؟؟ طيارتك صارلها اكثر من 4 ساعات واصله
عبير : الحمدلله عالسلامه ( اركضت لمته )
حمد : ( لم عبير و يكلم الباجي ) أول شي سلمو ما اشتقتولي ؟

- هدي و مشاعل يو سلموا عليه .. بعدها اقعدو كلهم بالصالة –

هدى : وين كنت ؟
حمد : يعني وين كنت .. عند مرتي وولدي
مشاعل : ( تطالع هدى )
هدى : بعدين
حمد : شنو بعدين ؟
هدى : موضوع بنكلمك فيه بعدين .. المهم الحين امي اشلونها ؟
حمد : ( يطالع عبير ) الحمدلله بخير
هدى : عبوره روحي غرفتج شوي
عبير : لا ماراح اروح ولازم اعرف اشصار على امي ؟
مشاعل : خلاص عبير صعدي فوق امي مافيها الا العافية بنكلم حمد بموضوع ثاني
عبير : ( عصبت وقامت راحت غرفتها )
هدى : امي اشفيها ؟
حمد : تعبانه وايد .. الدكاتره يقولون بيستمرون عالكيماوي وبيزيدون قوته
مشاعل : ( تبجي ) اشلون يعني ؟ ماراح ترد لنا بالسلامة ؟
حمد : لا تقولين جذي .. ترد واحسن من اول بعد .. بس يبيلها وقت لأن جسمها مو راضي يتقبل هالكمية من الكيماوي
هدى : اذا لندن مو قادرين يساعدونها وين نوديها عيل ؟
حمد : المشكلة مو بالمكان .. اهي جسمها مايتقبل الكيمو وبعد كل جلسه تتعب اكثر
هدى : بسافر معاك
مشاعل : و انا بعد
حمد : لا مايصير اتيون انتو الأثنين .. وحده لازم تقعد مع عبير ؟
هدى : أحمد راح يكون موجود
حمد : لا صعبه .. مايصير نخليها بالبيت بروحها و أحمد كله يطلع
هدى و مشاعل : ( ساكتين )
حمد : هدى .. شكنتي تقصدين يوم قلتي ان فرح قاعده تغلط بحقي ؟
هدى : مادري بس كله يرن تلفونها و ماترد جدامنا .. يا تحطه ميوت .. او تصعد تتكلم فوق
حمد : و ليش تفترضون الشي الشين ؟ يمكن رفيجاتها خواتها أي احد
مشاعل : لا عادي تكلم خواتها جدامنا بس مرات يرن وتطالع الرقم بعدين تقوم
حمد : ( سكت مده )
هدى : ( حطت ايدها على ايد حمد ) حبيبي انت اخوي .. اكيد ما يرضينا نشوف شي من وراك ونسكت
حمد : فرح ما عندها هالاشياء اللي تفكرون فيها .. و يللا بروح ارتاح ( قام )
هدى : حمد .. اذا رجعت لندن .. راح يبين كل شي
حمد : ( مارد عليها وكمل طريجه )
---

- اليوم الثاني فرح دقت على حمد –

حمد : ( رد عليها ) الو
فرح : ها قلبي تأخرت صارت الساعه 11 الظهر وما ييت .. نواف يسأل عنك
حمد : شوي واييكم
فرح : ناطرينك حبيبي
حمد : باي ( سكر التلفون )

- وصل حمد بعد ساعه .. و راح غرفة فرح –

حمد : ( بطل الباب ) السلام
فرح : ( قاعده تنوم نواف و ابتسمت لمه شافته ) اهلين عمري
حمد : ( قعد جدامها ) اشلونكم ؟
فرح : ولهانين عليك
حمد : ( سكت )
فرح : شكلك مو نايم عدل .. صارحني حمد .. خالتي مافي مجال انها تتحسن ؟
حمد : لا اسم الله عليها .. ان شاءالله راح تتحسن
فرح : عيل اشفيك ؟
حمد : مافيني شي بس احس شوي مختنق
فرح : من شنو ؟
حمد : مادري
فرح : ( ارفعت نواف واهو نايم ) هاك شيله
حمد : ( شاله وباس راسه ) فرح
فرح : هلا عمري
حمد : لا خلاص مافيه شي
فرح : اشبغيت تقول
حمد : لا لا انسي خلاص
فرح : امانه عليك اشبغيت تقول
حمد : ( بنبره عالية ) قلتلج ماكو شي

- فز نواف وقعد يبجي .. جان يعطيها اياه –

فرح : ( خذته واقعدت تهزه ) انت شصايرلك ؟
حمد : مو صايرلي شي بس نفسيتي شوي تعبانه
فرح : اي مبين عليك
حمد : ( حط ايده على يبهته ) استغفرالله

- انطق الباب ودشت ام فرح –

فاطمة : يمه عطيني نواف
فرح : ( عطتها اياه واهو يبجي ) مشكوره يمه
فاطمة : ( ابتسمت وشالته ) شنو مشكوره هذا ولدي الثاني بعد فهود .. يللا عن اذنكم ( اطلعت وسكرت الباب وراها )
فرح : ( امسكت ايد حمد ) اشفيك قلبي صارحني
حمد : ( لمها حيل وما تكلم )
فرح : ( واهو لامها ) اشفيك حمد لا تخوفني
حمد : مافي شي .. انا برجع باجر
فرح : ( وخرت واقعدت تطالعه ) شنو ؟؟
حمد : باجر راح...
فرح : ادري ادري سمعت بس ليش ؟ توك امس ييت
حمد : لازم ارجع .. و انتي بعد النفاس على طول تردين بيتنا
فرح : بس ماكو احد اهناك ومابي ارجع حق خواتك مايحبوني
حمد : ( عصب ) خلاص راح ترجعين بعد النفاس على طول و هذا آخر كلام
فرح : ليش يعني ؟
حمد : بس لأنج تزوجتي وصار عندج بيت
---

- اليوم الثاني حمد يه يسلم على فرح قبل لا يروح .. وكانت فرح تبجي حيل وتلمه -

حمد : تذكري اني احبج ( لمها وباس راسها بعدين راح )
---

[SHwarviskya]

- 22 / عافك الخاطر -

- حمد واهو بلندن وصى أحمد ان اييب حق فرح خدامة بأسرع وقت .. وفعلا يابلها الخدامة عشان تساعدها مع الياهل –

- بعد الاربعين ( بعد النفاس ) -

فاطمة : يمه ليش رايحه هذا بيتج .. ريلج مو موجود واهناك ماكو لا ابو ولا ام ليش رايحه ؟
فرح : ( تلم اغراضها ) يمه خلاص عاد جم مره تكلمنا بهالموضوع لازم اروح هذاك بيتي الحين
فاطمة : بيتج ماقلنا شي .. بس ريلج مسافر وبيطول شهور أو سنين الله العالم
فرح : ( فيها غصة ) عفية يمه اترجاج لا تزعلين وخليني اروح
فاطمة : خلاص يمه على راحتج
فرح : ( باست امها ) يللا حياتي مع السلامة
---

- بيت ندى –

ندى قاعدة بالصالة و يمها عبودي قاعده تلعب معاه .. دشت عليها امها

أمل : ( اقعدت يمهم واهي مبتسمه ) اشحلاتكم وانتو مع بعض
ندى : اي تصدقين يمه .. ماقص عليج كنت متضايقة يوم انولد .. بس الحين احسه يونس
أمل : ( تنعم على شعر عبود ) اي يمه هذا اخوج مالكم الا بعض
ندى : راح يصير رفيج نواف .. مافي فرق كبير بينهم
أمل : اي صح يحليلهم .. ندى يمه اتعرفين رفيجتي ام محمد ؟
ندى : أي وحده .. عندج ثنتين ام محمد
أمل : ام محمد اللي كانت بالفريج اللي ورانا بعدين انتقلت
ندى : اي تذكرتها اشفيها ؟
أمل : امس دقت علي اتقول في ناس يبون يتزوجون وقالتلهم عنج
ندى : اكيد ما يعرفون حالتي
أمل : يمه لا تقولين جذي ماله شغل هذا بالزواج
ندى : بس لو فرضنا انهم يدرون وطبعا ماتوقع .. بس لو نفرض .. هم انا مابي اتزوج وقلتلج من قبل مو مستعدة اجازف بعيالي .. ولا مستعدة ازيد النوبات جذي عاجبيني
أمل : ( تهز راسها ) لا حول ولا قوة الا بالله العلي العظيم
ندى : ( حطت ايدها على ايد امها ) يا قلبي شاللي مضايقج والله العظيم انا مرتاحه جذي
أمل : بس يا يمه سالفة العيال وانهم يحملون المرض تره مو اكيده يعني نسبة قليلة و..
ندى : يمه الريال بيتزوج عشان يرتاح ولا يتأذى ؟؟ محد مجبور ياخذ وحده ويبتلش فيها .. فخلاص والله يمه انسي عفية
أمل : لا ماراح انسى بس بخليج تفكرين عدل
ندى : ( قامت ) خل اروح اسوي الهوم وورك احسلي
أمل : فكري عدل .. واخذي ادويتج
ندى : اوكي حق الثانيه الاولى انا خلصت منها ( خلتها واطلعت من الصالة )

دشت غرفتها .. اقعدت عالسرير و امسكت تلفونها لقت 5 مسد كول .. كلهم من أحمد

ندى : ( بقلبها ) ليش داق شنو بتقول بعد
( احذفت تلفونها عالسرير وبطلت اللاب توب عشان تسوي شغل الكلية )
---

- شقة فرح –

مشاعل : ( شايلة نواف ) حياااتي اغووو اغووو
فرح : اتحبين اليهال ؟
مشاعل : ( تطالعها بنظرة ) يعني ولد اخوي اشلون ما احبه ؟
فرح : لا ماقصد نواف .. اقصد اليهال بشكل عام
مشاعل : اي احبهم
فرح : الله يرزقج زوج و اعيال صالحين يارب
مشاعل : ( بعصبية ) شاكيتلج انا شاكيتلج ؟؟
فرح : ( انصدمت ) اشفيج اشقلت ؟؟
مشاعل : لا انا فاهمة قصدج فروح هالاستهبال مو علي

- نواف قعد يبجي واهو بيد مشاعل –

فرح : ( مدت ايدها ) عطينياه خوفتيه مسكين
مشاعل : ( عطتها نواف ) هاج اخذيه الشرهه انا اصلا مليت من القعدة اهني ( اطلعت من الشقة )
فرح : ( تكلم نواف ) عميمة مينووونة صح ماما ؟

- بعد ما رضعت نواف و نومته .. امسكت التلفون ودقت على حمد .. وبعد ثالث رنه ... –

حمد : الو
فرح : هلا قلبي اشلونك ؟ اشلون خالتي
حمد : الحمدلله انتي اشلونج ؟
فرح : تعبانه من غيرك
حمد : ميخالف فرح صبري .. زين اشلون نوافو ؟
فرح : مشتاق لك
حمد : وانا اكثر والله .. فروح رديتي البيت ؟
فرح : اي اليوم رديت
حمد : عفية عليج اي جذي ابيج على طول .. تسمعين كلام ريلج
فرح : حمد .. بطلبك طلب
حمد : تفضلي
فرح : ابيك تشبك كل يوم قبل لا انام بشوفك بالكام
حمد : حاضر من عيوني
فرح : ( استانست حيل ) فديت عيونك يا قلبي .. بوسلي خالتي وتحمد لها بالسلامة
حمد : اوكي يوصل .. اخليج الحين ديري بالج .. وتذكريني قبل لا تسوين أي شي
فرح : على طول بعيوني والله
حمد : فديت عيونج .. يللا حبي اخليج .. مع السلامة
فرح : باي ( سكرت التلفون واهي مبتسمة )
---

- ثاني يوم بالكلية –

دلال : ندى اشفيج صايرة ماتسولفين مثل قبل
ندى : بس مالي خلق
دلال : ( تطق جتف ندى ) يللا عاد سولفي
ندى : دلال خلاص خليني بتمشى بروحي
دلال : ليش اشصاير ؟ كلمتي واحد وانا مادري ؟
ندى : لا شكو
دلال : اشدراني قلت ماكو غير الشباب اهم اكثر شي يعكرون المزاج
ندى : ( ساكته )
دلال : اوف صايره مليقة
ندى : خلاص دلال انا وصلت كلاسي عن اذنج
دلال : بكون عند الباب اذا خلصتي تلقيني
ندى : ( انفخت ودشت الكلاس )

- كان اللي يدرسها المادة اهو نفسه الدكتور ثامر بمادة داتا ستركجر –

( بنص الشرح رن تلفون ندى .. نست تحطه سايلنت .. بسرعة امسكته وحطته ميوت .. ارفعت راسها ولا الدكتور موقــّف الشرح و يطالعها )

ندى : عفوا دكتور نسيت احطه سايلنت
دكتور ثامر : ( يتطنز ) لا اخذي راحتج ردي عليهم
ندى : ( طالعت الشاشة لقت اللي داق أحمد .. حطته سايلنت وارفعت راسها مره ثانيه عالدكتور )
دكتور ثامر : الحمدلله اخت ندى خلصت نقدر نكمل شرح الحين
ندى : ( بقلبها ) هذا كله جذي يعاملني جدامهم

- بعد ماخلصت المحاضرة .. وقبل لا يطلعون اللي بالكلاس –

دكتور ثامر : ندى مشعل
ندى : هلا دكتور
دكتور ثامر : لا تطلعين من الكلاس ابي اكلمج
ندى : ( لمت كتبها و اوقفت )

- اطلعو الطالبات من الكلاس و مابقى فيه الا ندى و الدكتور –

الدكتور ثامر : ندى هالشي اللي صار مابي يتكرر عندي مرة ثانية
ندى : ان شاءالله ماراح يتكرر
الدكتور ثامر : يعني حتى لو كانت المكالمة مهمة .. ماتكون اهم المحاضرة من مستقبلج عدل ؟
ندى : اي ادري دكتور وقلتلك ماراح يتكرر هالشي
الدكتور ثامر : ( يبتسم ) اي جذي الحين ارتحت .. لأن بنت مثلج كاملة والكامل الله المفروض ماتغلط جذي غلطات
ندى : ( ابتسمت بس كلش ماحبت جملته الاخيرة )
الدكتور ثامر : أي شي تبينه سواء عن الدرس او بره الدرس انا موجود ومكتبي مفتوح لج على طول

- دلال بطلت الباب طلت عليهم بعدين اطلعت وسكرت الباب وراها –

ندى : اوكي دكتور الحين اقدر اروح ؟
الدكتور ثامر : اي تقدرين .. اشوفج عقب باجر بالمحاضرة ان شاءالله .. أو اذا كنت سعيد حظ فراح اشوفج منوره مكتبي باجر
ندى : ( اسكتت واطلعت بسرعة )
---

[SHwarviskya]

- بره الكلاس –

دلال : ( تبتسم ) اشبغى منج ؟
ندى : اشدراني عنه قطيعه
دلال : تبين ال a لا تنفسين عليه يالهبلة
ندى : انتي للحين نفسج ماتغيرتي .. اللهم لوكج صار اركد شوي
دلال : حرام عليج والله تغيرت و ما اكلم احد .. هالتلفون مال امي و اول ما تاخذني من الكلية تقولي عطينياه و تقعد تفحصه وتشوف السجل 3 ساعات
ندى : اي يمكن تغيرتي لأنها مو ماعطيتج مجال .. ولا انتي الود ودج ترجعين حق سوالفج
دلال : ندوي خلاص عاد خفي علي والله انا اكسر الخاطر
ندى : ( اسكتت وكملت طريجها ودلال يمها )
---

- بعد الدوام .. غرفة ندى –

ندى امسكت التلفون ودزت حق احمد " خلاص أحمد الله يوفقك لا تدق علي لو سمحت "

- بعد عشر دقايق تقريبا دق –

ندى : ( ردت عليه ) نعم ؟؟
أحمد : نعم مره وحده ؟؟ أول شي السلام عليكم
ندى : أحمد اشبغيت ؟ تبي تردلي قلتلك مابي ارد مو لازم يعني
أحمد : ندى والله انا ارتحت لج وايد .. وادري غلطت بحقج يوم تركتج
ندى : أحمد بس عاد .. دام عندك وحده تكلمها اشتبي مني الحين ؟
أحمد : سولفيلي عن مرضج
ندى : ( انصدمت ) نعم ؟
أحمد : اي صج سولفيلي بحس فيج
ندى : اقول احمد .. تكفى راسي مصدع .. تبي تسولف دق على أي وحده انا مابي اتكلم .. ولا تخليني اضطر اغير رقمي
أحمد : ندى اشفيج انا احمد
ندى : ومنو هذا أحمد انا طلعت ما اعرفك عدل
أحمد : واذا قلتلج احبج ؟
ندى : ( اسكتت )
أحمد : ندى معاي ؟
ندى : اي و بسوي روحي ماسمعتك
أحمد : ليش عاد ؟
ندى : بس جذي
أحمد : لا صج انا أحبـ...
ندى : ( قاطعته ) أحمد عفية خلاص و اذا ماتبي تفشل نفسك لا تدق مره ثانية
أحمد : هذا آخر شي عندج ؟
ندى : اي واكون شاكرة لو سويته
أحمد : اوكي الله يوفقج
ندى : ويوفقك ان شاءالله .. باي ( سكرت التلفون )

- اقعدت ندى اتطالع رقمه بالشاشة وهالمرة دمعت عينها .. ماتدري انزلت دموعها عليه ولا على نفسها .. امسحت دموعها وسوتله دليت من التلفون –

خلاص .. عافك الخاطر خلاص
هذا القرار الأخير وإعتبرنا منتهين
لا تنتظر لحظة حنين هذا القرار الأخير
ما أحبك .. بقناعة قلتها
إنتهى الحب إنتهى
إلتهى القلب إلتهى
وهذا القرار الأخير
روح بطريج وأنا بطريج
خلني على جرحي العتيج
خلاص عافك الخاطر

---

- بعد جم يوم –

فرح : ( تكلم ندى بالتلفون ) ندوي حدي متمللة
ندى : امشي نطلع
فرح : وين نروح ؟
ندى : أي مكان مطعم سوق سينما كيفج
فرح : و حمد ؟
ندى : قوليله
فرح : نايم الحين
ندى : اهو يعصب لو طلعتي شميتي هوا ؟
فرح : لا بس .. اوكي خلاص بلبس وامرج
ندى : اوكي بقوم ابدل باي
---

- البست فرح وشالت نواف .. وانزلت معاها خدامتها شايلة جنطة البيبي –

( هدى كانت زايرتهم مع اليهال .. وكلهم قاعدين بالصالة وشافوها نازلة )

هدى : اهلين مرت اخوي .. شنو طالعة ؟
فرح : اي والله مليت من البيت قلت اغير جو
هدى : اهاا .. زين وين بتروحين ومع منو ؟
فرح : ( اضحكت ) ضروري تعرفين ؟
مشاعل : اكيد ضروري .. ولا بس تعرفين تحبسين عمرج فوق وماتنزلين الا عشان تطلعين ؟
عبير : ( تضايقت من خواتها ) خلاص بنات اشصار يعني تلقونها بتروح بيت امها
مشاعل : كل يوم عند امها اشدعوه !!
فرح : ( منغثة من هدى ومشاعل ) لا حياتي عبير ماراح اروح عند امي .. ضايق خلقي وبطلع اتمشى ..ومحد له حق يمنعني أو حتى يسأل وين رايحه اشوفكم على خير ( اطلعت وخلتهم )
مشاعل : ( تكلم عبير ) شفتيها ؟؟ شفتيها ؟ عشان لا تقولين احنا نتبلى عليها
هدى : انا اشكبري اتيي هذي تقل ادبها علي .. ماشي والله اذا ماخليتها تكره اليوم اللي اعرفت فيه حمد .. ما اطلع هدى
---

- فرح ودت ولدها وخدامتها عند امها .. وراحت خذت ندى –
( بالسيارة )

ندى : ها وين نروح ؟
فرح : مادري احس حيل متضايقة
ندى : ليش اشصاير ؟
فرح : هدى و مشاعل .. علقو علي قبل لا اطلع
ندى : يعني شي يديد ؟ على طول اهم جذي
فرح : لا بس مادري مو مرتاحة .. وايد تمادو معاي
ندى : تبين نرجع نقعد عندي بالبيت احسن ؟
فرح : لا لا .. خل نروح مطعم انا حتى غدى مو متغدية .. والسبه اني ما احب اقعد اجابلهم
ندى : ( تضحك ) الله يعينج

- اوصلو مطعم ( قيصر ) بالسالمية .. وانزلو –

ندى : شخبار نوافو الخايس ؟
فرح : يهبل
ندى : اشتقت له ودي اطقه
فرح : ( تضحك ) حرام عليج
ندى : عسول الله يحفظه

- اقعدو يسولفون و توه وصل اكلهم الا يرن تلفون فرح مكالمة خارجية –

فرح : ( مبتسمة ) هذا حمد
ندى : سلمي عليه
فرح : ( ردت عليه ) الو هلا عمري
حمد : ( بعصبيه ) انتي وين طالعة ومو قايلتلي ؟
فرح : انت كنت نايم عمري
حمد : ( يصرخ ) عيل ماتطلعين دام انا نايم و تنطريني لين اقوم وتستأذنين .. وبعدين انتي شنو قايله حق خواتي ؟
فرح : اشقلت ماقلت شي وتره اهم تمادو معاي وايد
حمد : سمعي يا فرح .. مو لي غاب القطو العب يا فار
فرح : شنو ؟؟ انت اشفيك شنو قالولك عشان تصرخ جذي
حمد : رجعي الحين الحين .. وماتطلعين من البيت الا بإذني فاهمة
فرح : انت من صجـ...
حمد : ربع ساعة وارد ادق .. اذا كنتي للحين بره ماتلومين الا نفسج ( سكر التلفون بويهها )
فرح : ( منصدمه ونزلت التلفون من اذنها )
ندى : شالسالفة ؟
فرح : ( عيونها انترست دموع ) طلبي الحساب خل نمشي

- ادفعو الحساب وقامو وفرح ماتكلمت كلش .. و ندى ما اسألتها عشان لا تزيد عليها –

[SHwarviskya]

- 23 / كل شي له حد -

- بعد ما فرح ردت ندى بيتهم .. راحت خذت نواف والخدامه من بيت امها .. وبالطريج دق حمد عليها –

فرح : ( صوتها متضايق ) هلا حمد
حمد : رديتي البيت ؟
فرح : توني خذيت نواف من بيت امي والحين راجعه
حمد : مره ثانيه ماتطلعين الا اذا قلتيلي .. فرح انا مابي أي شي يصير من وراي اعتبريني للحين يمج
فرح : وليش انا اشسويت ؟ تمللت بالبيت و رحت مع ندى المطعم .. شالغلط اللي سويته
حمد : ( بعصبيه ) خلاص قلتلج ماتطلعين الا اذا قلتيلي مفهوم ؟
فرح : ( ساكته )
حمد : ( بصوت هادي ) يللا الحين اخليج
فرح : لحظة حمد
حمد : نعم ؟
فرح : بشوفك بالكام اليوم
حمد : ( سكت )
فرح : حمد ؟
حمد : خلاص اوكي يللا باي
فرح : مع السلامه ( سكرت التلفون وانزلت دموعها )
فرح : ( بقلبها ) اشقالولك عني .. وليش كلمتني بهالاسلوب ؟؟

انت منت الاولاني .. صرت اشوفك شخص ثاني
منت ذاك اللي نحبك .. وين شوقك وين قلبك
شفت لك شوفه جديده .. ولاتتغلى في حبك
وش حصل بينك وبيني .. منت كنت تموت فيني
والله وتغير مكاني .. انت منت الاولاني
---

- اوصلت البيت لقت مشاعل قاعدة بالصالة مع عبير جدامهم عصير وكيك –

فرح : ( تكلم خدامتها ) ودي نواف فوق
مشاعل : ( مبتسمه ) رادة مبجر
فرح : ( بصوت عالي ) انتو شقايلين حق حمد ؟
مشاعل : ( تشرب عصير ) قلناله انج استخفيتي وقعدتي .. وقاعده تقلين ادبج على هدى اللي اهي اخته الكبيرة
فرح : و طبعا ماقلتوله اشلون كنتو تكلموني
عبير : ( قامت امسكت ايد فرح ) خلاص فروح امشي نقعد فوق
فرح : ( اسحبت ايدها ) هديني
مشاعل : هديها هديها هذي ماتستحي يعني عادي تطقج
فرح : والله اذا مافكيتوني من شركم انتي واختج ماتلومون الا نفسكم
مشاعل : ( اشرقت بالعصير واقعدت تكح ) الله يخس ابليسج ضحكتيني ( تكح )
فرح : ( عصبت حيل و خلتهم واصعدت فوق )

- أول مادشت شقتها اقعدت عالسرير تبجي –

فرح : خلاص ماقمت اتحمل .. متى ترجع عشان كلنا نرتاح
---

- بالليل عالساعه 2 .. حمد دز لها مسج كاتب " انا شابك " .. اشبكت وبطلو الكام .. واقعدو يتكلمون بالمايك –

فرح : والله يا حمد ولهت عليك .. ليش جذي ضعفان وايد
حمد : انا مو رايح سياحه ولا وناسه .. اكيد بضعف وانا اشوف امي هالحالة
فرح : الله يشافيها يارب .. زين حمد انا ماودي ازيد عليك بس اللي قاعد يصير فينا مو عاجبني
حمد : ولا انا عاجبني
فرح : حمد صراحه انا ماقمت اتحمل خواتك .. كل ما اشوفهم لازم يتناجرون معاي
حمد : خواتي مايتناجرون من غير سبب
فرح : بلى والله من غير سبب
حمد : ( مسك راسه ) خلاص فرح انا شابك عشان ارتاح .. تكفين مابي اسمع شي عن هالمواضيع
فرح : زين ليش صرخت علي وخليتني ارجع البيت ؟
حمد : لأني ماحبيت انج تطلعين من غير علمي .. فرح انا ريلج لازم تحطيلي اعتبار
فرح : ماولهت علي ؟
حمد : بلى
فرح : حمد صايرلك اكثر من 4 اشهر مسافر
حمد : فرح الشهر اللي طاف ييتلج نسيتي ؟
فرح : هذي تحسبها بعد ؟؟ ييت يومين ورحت !!!
حمد : فرح راسي بينفجر نامي الحين انسولف وقت ثاني
فرح : اوكي تصبح على خير
حمد : وانتي من أهله

- طفت اللاب توب وانسدحت تفكر بحمد وباللي صاير لها –
---

- ثاني يوم بالكلية –
( بالكافتريا )

دلال : تعبت من امي وحبستها .. ندوي خل نطلع عفية
ندى : ( تطالعها ) نعم ؟ تنسين الفكرة والله لو اشوفج تموتين جدامي ماطلعتج معاي
دلال : ندوي عن السخافة والله متملله حيل و ماطلعت منزمان
ندى : خلاص دلال قلت لأ
دلال : ( تمسك راس ندى وتبوسه )
ندى : ( تدزها ) وخري عني جنج طرارة
دلال : عفيه طلعييني
ندى : ( قامت ) انا شمقعدني معاج

- اول ما اطلعت من باب الكفتريا ادعمت واحد وطاحت كتبها ودلال كانت وراها –

الشاب : ( شال كتبها وقام ) عفوا صارلج شي ؟
ندى : ( تطالعه ) لا .. آسفه طلعت بسرعة و ..
الشاب : لا عادي لا يهمج ( عطاها الكتب )
دلال : اشلونك عثمان
عثمان : هلا دلال
ندى : ( تطالع دلال مستغربة )
عثمان : فرصة سعيدة ندى ( دش الكفتريا )
ندى : من وين تعرفينه ؟ و اشلون عرف اسمي ؟
دلال : ماعرفه اهو .. كنت اعرف ربعه .. اهو يعني ثقيل ماكان يعطي ويه بس سألتهم عن اسمه وقالولي
ندى : اشلون يعني اتعرفين ربعه ؟
دلال : يعني ربعه كانو ربعي بعد شنو شلون
ندى : واشلون يعرف اسمي ؟
دلال : اللي يعرفني أكيد يعرف اسمج عادي يعني
ندى : وانتي شكو تقولين اسمي حق الشباب اصلا
دلال : اشفيج ندوي كله اسم اشصار يعني ؟
ندى : لا مو كله اسم .. و عسى ما سولفتي عن حياتي اكثر يعني
دلال : لا والله ماسولفت عنج كلش بس يدرون انج رفيجتي واسمج ندى لا اكثر ولا اقل
ندى : ( اسكتت وكملت طريجها )
---

- المغرب بيت فاطمة –

فاطمة : ( شايله نواف ) يا حياااتي اسم الله عليه جنه فار صغيّر
فرح : لا تقولين فار .. والله انه يهبل
فهد : اي طبعا الشاذي بعين امه غزال
فرح : فهود عاد شنو شاذي اشفيكم انتو .. والله حلو مو لأني امه بس والله حلو
فاطمة : ( تضحك وتبوس نواف ) ندري يمه بس قاعدين نتغشمر معاج

- رن تلفون فرح رقم غريب –

فرح : ( ردت ) الو ؟
هدى : ها وينج
فرح : منو انتي ؟
هدى : هدى
فرح : ماعرفت رقمج
هدى : زين وينج
فرح : عند امي
هدى : سلمي عليها
فرح : يوصل
هدى : سلمي عليها الحين ولا اقولج عطينياها اسلم عليها
فرح : هدى اشبغيتي ؟
هدى : بس بغيت اعرف وينج
فرح : لا والله ؟؟
هدى : اي والله .. يللا باي ( سكرت التلفون )
فرح : ( اسكتت من الصدمه )
فاطمة : اشفيج فرح ؟
فرح : لا ماكو شي
فاطمة : اشبغت هدى
فرح : ماني مرتاحه
فاطمة : ليش اشصاير
فرح : والله مادري يمه .. خلينا منها .. قوليلي اشلون ابوي صارلي جم يوم ايي ما اشوفه
فهد : أحسلج لا تسألين
فرح : ليش ؟
فاطمة : رد يلعب بالفلوس و الناس تطالبه من كل صوب
فرح : استغفرالله .. لي متى يعني
فاطمة : والله ما أدري لي متى
فرح : أي شي محتاجينه قوليلي
فاطمة : لا يمه الحمدلله مو محتاجين شي

- تمت فرح تسولف مع امها واخوها واهي بالها مع هدى .. ليش داقه اشتبي يعني ؟ -

- مر اسبوع و فرح كل يوم اتدق على حمد بس مايرد عليها .. و بيوم شافته شابك و ماقالها عشان تشبك وتكلمه –
( بكتب المحادثات وبخلي التوبكات بأساميهم )

Farah :
وينك صارلي اسبوع ما ادري عنك خوفتني اشصاير ؟
Hamad :
موصاير شي
Farah :
عيل ليش ماترد علي ؟ وليش الحين شابك وماقلتلي عشان اشبك واكلمك عالأقل
Hamad :
مشغول
Farah :
زين ماعندك وقت تكلمني لو 3 دقايق مو اكثر ؟؟
Hamad :
خلاص ندى قلتلج مشغول
Farah :
زين سمعت ان هدى بتييلك .. عاد اذا قررت اتسافر بحجز و بيي معاها اشتقتلك
Hamad :
هدى عقب باجر طيارتها
Farah : ( انصدمت )
وليش ماقالتلي ؟ كنت بيي معاها
Hamad :
لا تيين خليج مع نواف
Farah :
بس ليش ماقالتلي ؟ اهي تدري ان ودي اسافر معاها .. خلاص عيل انا بحجز بروحي
Hamad :
قلتلج لأ لاتيين
Farah :
ليش ؟
Hamad :
فرح انا مشغول بطلع
Farah :
لحظة
Hamad :
نعم ؟
Farah :
زين تبي شي اطلعه لك من اهني عشان تاخذه معاها ؟ ملابس أو أي شي
Hamad :
لا تعبين نفسج هدى طلعتلي كل اللي ابيه
Farah :
شنو ؟؟ هدى ؟ ليش و متى ؟ انا وين رحت
Hamad :
انتي ماكنتي بالبيت .. كنتي عند امج كالعادة .. واهي طلعتلي اللي ابيه .. ويللا انا مشغول بطلع

( تم تسجيل خروج – حمد - )

فرح : ( عيونها غورقت ) ليش؟؟ انا اشسويت اشفيه يعاملني بهالطريقة .. خلاص بس .. كل شي له حد وانا ماقمت اتحمل
---

- بالليل غرفة ندى البيت –

أمل : ( طقت الباب ودشت على ندى الغرفة ) يمه ندى بقولج شي و ابيج تسمعيني عدل
ندى : ( تأشر عالسرير يمها ) حياج ليش واقفة عند الباب
أمل : ( اقعدت يمها عالسرير ) الناس اللي قالتلي عنهم ام محمد .. دقو وانتي بالجامعة
ندى : بس يمه انا...
أمل : ( امسكت ايدها ) احلفج ماتقولين شي غير حياهم الله
ندى : بس يمه هذي حياتي .. انا اللي اقرر اذا ابي اتزوج أو لأ
أمل : زين عشاني بس شوفيهم يمكن ترتاحين وتغيرين رايج
ندى : ( اضحكت من القهر ) والله مايدرون ان فيني صرع لو يدرون ما اخطبو
أمل : ( تحط شعر ندى ورى اذنها ) يمه يابعد عمري خل ايون بعدين يصير خير
ندى : لا انا عندي لج راي ثاني .. قوليلهم بالتلفون ان فيني هالمرض .. واذا بيون والله اطلع واقعد معاهم ومن عيوني بعد
أمل : ( اسكتت )
ندى : ليش ساكته ؟
أمل : انا اقول خل ايوون أول وبعدين نصارحهم بكل شي
ندى : لأ .. اول تقوليلهم بعدين اذا بيون حياهم
أمل : ( تنهدت ) خلاص .. اذا دقو بقولهم ( قامت ) اخليج تنامين
ندى : ( ابتسمت ) سكري الليت ماعليج أمر
أمل : ان شاءالله ( سكرت الليت واطلعت )
ندى : ( تطالع السقف ) الحمدلله على كل حال
---

[SHwarviskya]

- 24 / جرحتني !! -

- هدى سافرت لندن وفرح اقعدت بغرفتها تبجي بحسرة -

فرح : ( بعصبية ) ليش اهي تروح وانا لأ .. ليش يعاملني بهالطريقة ماقمت اتحمله ولا اتحمل خواته

- نواف فز وقعد يبجي قامت شالته ولمته على صدرها –

فرح : ( دموعها تنزل ) خلاص يمه لا تبجي .. بابا راح يرجع .. والله ابوك للحين يحبنا

( اقعدت فرح تواسيه - أو بالأحرى تواسي نفسها - فترة طويله لين اتعبت وبعدها نومته ونامت يمه )
---

- اليوم الثاني .. كلية الهندسة –
( ندى عندها اختبار عملي عند الدكتور ثامر )

- الدكتور ثامر يه يم ندى ونزل شوي لي مستوى كرسيها وقعد يطالع شاشتها واهو لازق يمها –

ندى : ( دنت شوي عند زميلتها )
الدكتور ثامر : ( يأشر عالشاشة ويبتسم لها و قام كمل يمشي بين الطالبات )
ندى : ( طالعت المكان اللي أشر عليه جان تلقى غلطة بالبرمجة .. عدلتها بسرعة وطالعته لقته يبتسم لها .. بسرعة لفت ويهها عنه وردت تكمل الامتحان )

- بعد الامتحان .. الكل قام بيطلع من الكلاس –

الدكتور ثامر : ( راح عند كمبيوتر ندى ) ندى لحظة شوي
ندى : ( كانت بتطلع جان تلتفت ) نعم دكتور
الدكتور ثامر : انتي مو مسيفه شغلج تبيني اسيفه لج يعني ؟
ندى : بلى دكتور حفظته بفولدري
الدكتور ثامر : مو محفوظ وكاهو للحين مبطل تعالي حفظيه لو سمحتي

( ندى راحتله والكل طلع من الكلاس )

الدكتور ثامر : شوفي مو محفوظ
ندى : ( احفظته بفولدرها الخاص ) كنت حافظته بس مادري وين اختفى
الدكتور ثامر : ( ابتسم ) عدلتي الغلطه اللي أشرتلج عليها ؟
ندى : ( ارتبكت ) اي دكتور مشكور
الدكتور ثامر : ( قعد يطالع ويهها وشعرها و ارقبتها ) العفو
ندى : عن اذنك دكتور
الدكتور ثامر : ندى انتي مرتبطة ؟
ندى : ( انصدمت ) شنو ؟
الدكتور ثامر : يعني مالجة مخطوبة .. تحبين واحد مثلا
ندى : ليش هالسؤال ؟
الدكتور ثامر : بعرف عنج اكثر
ندى : دكتور عن اذنك انا لازم اروح
الدكتور ثامر : ( يبتسم ) اي روحي .. اذنج معاج

- اطلعت من الكلاس معصبة حيل .. واقعدت تتمشى بروحها –

عثمان : ( مشى يمها ) اشلونج ندى
ندى : ( طالعته مستغربه ) هلا اشبغيت ؟
عثمان : ماعرفتيني انا اللي ..
ندى : ادري انت اللي دعمتك عند الكافتريا
عثمان : اذا مو ذاكرة اسمي معاج عثمان
ندى : هلا اخوي
عثمان : جني ييت بوقت مو مناسب .. احسج معصبة
ندى : ( تنهدت ) لا مو معصبة بس ماحب توقف يمي والناس تطالعنا .. في شي تبي تقوله قبل لا اروح ؟
عثمان : باين عليج بنت محترمة و زينه عشان جذي بغيت اسألج سؤال و ادري مو من اختصاصي هالشي .. بس لازم اقوله
ندى : و شنو هالسؤال ؟
عثمان : ليش تماشين دلال ؟
ندى : نعم ؟؟
عثمان : البنت موزينه .. والله انها كلمت نص ربعي اذا مو اكثر
ندى : لو سمحت اول شي ما اسمحلك تتكلم عنها بهالطريقة ثاني شي انت قلتها بالسانك مو من اختصاصك هالشي .. عن اذنك ( خلته ومشت )
عثمان : ( قعد يطالعها بعدين كمل طريجة )
---

- بيت ندى –

سامي : اشفيج أمل ؟ شكلج متضايقه ؟
أمل : وايد متضايقه
سامي : ليش عسى ماشر ؟
أمل : تذكر يوم قلتلك ندى اطلبتني اقول حق اللي يبون يخطبونها عن مرضها قبل لا اييون لنا
سامي : اي و اشصار ؟
أمل : قبل اسبوع دقو وقلتلهم .. وبينت لهم ان حالتها مستقره ومافيها الا العافية .. بس حسيت الأم ماتقبلت الموضوع .. قالت اكلم الولد وادق عليكم
سامي : ومادقت عدل ؟
أمل : اي والله مادقت .. و ام محمد توها كلمتني قالت الناس اعتذرو ومافي نصيب
سامي : خيره .. اكيد في نصيب احسن ناطرها
أمل : اي بس ماني عارفة شقولها
سامي : والله مادري .. ماعرف حق هالمواضيع .. عبود نايم ؟
أمل : اي
سامي : حسافة كنت بلعب معاه
---

- الساعه 7 بالليل .. بيت أم حمد –

( فرح نازلة من شقتها ووراها الخدامه شايله نواف .. رن تلفونها وكان فهد اخوها )

فرح : ( ردت عليه ) هلا حبيبي
فهد : هلا فرح .. بدش بالموضوع على طول .. في شي بطلبج اياه وماني عارف اشلون
فرح : اطلب اللي تبيه
فهد : انا محتاج فلوس
فرح : جم تبي ؟
فهد : انتي كريمه وانا استاهل
فرح : خلاص ان شاءالله الحين اسحبلك و اييبهم لي عندك .. انت بس تدلل
فهد : تسلمين حبيبتي .. مشكوره
فرح : يللا باي حبيبي

- مشاعل كانت بالممر تسمعها .. و أول ما اطلعت فرح من البيت راحت بسرعة و دقت على هدى ( بلندن ) عشان تقولها شسمعت –
---

- بلندن –

هدى : ( سكرت السماعه وويها معتفس )
حمد : خير اشفيج ؟
هدى : ( ساكته )
حمد : اشفيج هدوي صاير شي لهم ؟؟
هدى : كمل ريوقك لا تفكر بشي
حمد : اخواني فيهم شي ؟؟ فرح و الولد فيهم شي تكلمي ؟
هدى : الصراحة مشاعل اسمعت فرح تتكلم بالتلفون مع واحد
حمد : شنو؟
هدى : اي وقالتله حبيبي اطلع واشوفك وبتعطيه فلوس
حمد : اهي متأكده ان واحد غريب
هدى : اي تقول قالتله وين ماتبي اشوفك واعطيك الفلوس
حمد : ( ساكت ويتنفس سريع )
هدى : حمد ؟
حمد : ( قام وطلع من الشقه )
هدى : حسبي الله عليج يا فرح .. عذبتي اخوي .. الله يستر لا يصيرله شي
---

- بعد اسبوعين .. بيت فاطمة –
( الكل كان موجود .. حتى ندى )

فرح : ( تبجي ) مايرد علي كلش .. ماقمت اتحمل يمه والله تعبت
ريم : اخاف شافله شوفه اهناك
فاطمة : ريم !!
ساره : ريم اشهالكلام .. امه مريضة واكيد مشغول معاها لا تزيدين عالبنت
فرح : ( تمسح دموعها ) انا مو مرتاحه كلش .. وقررت اسافر له
فاطمة : لا يمه اذا ماناداج لا تروحين
فرح : بلى بروح
ندى : فروح حياتي صج مايصير تروحين و اهو مايدري
فرح : واشلون يدري اذا اهو كلش مايرد على مكالماتي ولا يشبك ؟؟
نوره : ( شايله نواف ) وهذا بتخلينه اهني ولا اهناك
فرح : طبعا اهني .. بخليه عندج يمه
فاطمة : يمه فرح سمعي الكلام و عفية لا تروحين
فرح : والله راح اروح ولحد يحاول يقنعني
ساره : اشلون تدلين مكانه ؟ ماتاخفين تروحين وتضيعين ؟
فرح : بخلي أحمد يساعدني
نوره : هذا اخوه اكيد بيقوله
فرح : عاد اذا ركبت الطيارة خل يقوله بس حاليا بحلفه مايقول شي
ندى : ( تتطنز ) اي صح راح يسمعج
فرح : ( تطالعها ) يسمع .. ان شاءالله يسمع
نوره : زين فروح اشكثر صارلكم انتي وريلج ما صار بينكم شي حميم
فاطمة : نوره و ويعه عيب .. انتي شكو
نوره : لا يعني يوم يه اهي كانت بالنفاس اكيد ماصار شي صح ؟
فرح : اي ماصار شي تقريبا 5 اشهر
نوره : اوله .. وايد .. عيل اذا رحتي روحيله وانتي عروس يديده
فاطمة : نورو سكتي خلاص
نوره : عادي يمه كلنا متزوجين .. وي نسيت ندوي للحين بيبي
ندى : ( ابتسمت وقامت ) اصلا انا تأخرت لازم ارجع البيت
فاطمة : لا يمه تو الناس
ندى : لا صج لازم اروح .. اشوفكم وقت ثاني .. مع السلامه
الكل : مع السلامه
فاطمة : الله معاج يمه
---

- اوصلت ندى البيت لقت امها وابوها وعبود بالصالة –

ندى : السلام عليكم
أمل وسامي : وعليكم السلام
أمل : ها اشلونهم ؟
ندى : زينين الحمدلله .. يمه ممكن اكلمج شوي ؟
سامي : اسرار بنات يعني ؟
ندى : ( ابتسمت )
أمل : ( قامت ) دير بالك على الولد
سامي : بعيووني عبود
أمل : ( تكلم ندى ) يللا يمه

- اصعدو غرفة ندى .. و اقعدو عالسرير –

أمل : ها حبيبتي اشفيج ؟
ندى : يمه اشصار عالناس اللي قلتيلهم اني مريضة ؟ مادقو صح ؟
أمل : ( اسكتت )
ندى : يمه والله عادي .. انا اصلا مابي اتزوج بس فيني فضول بعرف اشصار
أمل : ( اسكتت )
ندى : أدري مايبون اييون .. طبيعي يعني أي واحد مايعرف البنت وقايل حق امه تخطبله اكيد بيدور الأحسن .. منو بيختار زوجة مريضة .. يعني الريال بيتزوج ولا يزيد همه ؟
أمل : لا يمه لا تقولين جذي انتي مافي منج
ندى : اوكي معاج .. بس هم مافي واحد بياخذ وحده فيها صرع
أمل : ( بجت ولمت ندى ) انتي مافيج شي .. والله مافي مثلج
ندى : ( لامه امها ) حياتي زين ليش تبجين ؟؟ والله عادي عندي وتره خيرة عشان لا اتعب اكثر .. وبعدين يمه الزواج مو راحه بالعكس زيادة تعب و عوار قلب وراس
أمل : ( وخرت عنها و امسحت دموعها ) مو دايما الزواج جذي
ندى : اوكي 90% جذي
أمل : الله يعوضج خير يا بعد عمري
ندى : ( ابتسمت ) ان شاءالله
أمل : تعشيتي ؟
ندى : اي تعشيت عند خالتي
أمل : تنزلين تقعدين معانا ؟
ندى : لا والله بنام
أمل : خلاص عيل نوم العوافي يمه تصبحين على خير
ندى : وانتي من أهله

- اطلعت أمل من الغرفة .. وندى قامت بدلت ملابسها و البست بجامتها وانسدحت وتلحفت –

ندى : ( تتذكر كلام أمها وكلام الدكتور و كل شي صارلها ) الحمدلله على كل حال .. خيره .. كل شي خيره

- معنها قاعده تحاول تخفف على نفسها بس هم ماقدرت توقف دموعها وغصبن عليها انزلو على المخده .. بعدها اقعدت تبجي حيل و تشاهق و غطت راسها عشان لحد يسمع صوتها –

ياقلبي شوف هالدنيا .. تعبت ومابقى بي حيل
أعشم حالي و أتصبر .. و أقول باكر جروحي تزين
و يجي باكر بلا فرحة .. يعاند قلبي وجرحه
و أقول ال آآه .. وتقول البشر ( الله ) وماتدري
----

- بيت أم حمد -
- بعد الغدى بالصالة .. محد موجود غير عبير و أحمد وفرح –

فرح : أحمد ممكن أكلمك بموضوع
عبير : ( قامت ) قايمه بكرامتي قبل لا أنطرد
فرح : ( ابتسمت لها )
أحمد : خير اشفيج ؟
فرح : ابي منك خدمة
أحمد : وانا على أي اساس اسويلج خدمة ؟
فرح : علساس انك حماي أخو ريلي
أحمد : انتي وصلتي كلام حق ندى وانا للحين مو ناسيه .. انتي اللي خربتي بينا
فرح : انا ؟؟ وانا شكو .. انت اللي خربت كل شي بيدك
أحمد : يعني افهم انج ماوصلتيلها شي
فرح : بلى قلت لها انك تكلم وحده وتقولها حبيبتي وحياتي .. و انت بنفس الوقت تطلب من ندى انها ترجعلك .. شي طبيعي ماراح اسكت يعني
أحمد : عاد تروحين تخربين جذي مره وحده
فرح : أحمد مو هذا موضوعي
أحمد : بس انا هذا موضوعي
فرح : ( صوتها بدى يتغير جنه فيها بجيه ) أحمد انا يايتك اطلبك خدمة .. والله اني محتاجة مساعدتك الله يخليك اسمعني
أحمد : ( اكسرت خاطره ) اشفيج ؟ عسى ماشر ؟
فرح : حمد مايرد علي كلش صارله اسبوعين وانا قمت احاتي
أحمد : غريبه مايرد عليج .. اليوم الصبح مكلمه ومتطمن على امي
فرح : مادري اشفيه علي .. زين ابي منك خدمة
أحمد : آمريني
فرح : ابيك تساعدني من غير لا يدري عشان اروحله
أحمد : شنو ؟؟
فرح : الله يخليك .. بس احجزلي و عطني العنوان وبس مابي شي اكثر
أحمد : لا لا فرح طلعيني من السالفة مالي شغل
فرح : ( دموعها انزلت ) الله يخليك قاعده اترجاك
أحمد : ( عوره قلبه عليها ) زين ليش تبجين الحين ؟
فرح : والله ولهت عليه وايد الله يخليك لا تردني
أحمد : زين لو نقوله احسن صدقيني
فرح : ( امسحت دموعها ) لا لاتقوله بس ساعدني
أحمد : بعدين كل شي يرد على راسي
فرح : لا صدقني انا رايحه اصلح كل شي بينا
أحمد : اهو في شي صاير بينكم ؟
فرح : والله مادري .. ها راح تساعدني ؟
أحمد : اوكي خلاص راح اشوفلج اقرب حجز
فرح : مشكور وايد .. بس عفية لا تقول حق احد .. ولا حتى حق مشاعل لأنها راح توصـّل الأخبار لهم
أحمد : ولا يهمج خلاص ومالي شغل بحمد .. ومايقص هالراس غير اللي ركبه
فرح : تسلم أحمد مشكور ماقصرت ( قامت ) عن اذنك رايحه اجهز الجنطة
أحمد : نطري تو الناس اشفيج
فرح : ( ابتسمت ) لا ميخالف بسوي كل شي من الحين عن اذنك ( اصعدت فوق )
---

- قبل سفرتها بيوم راحت الصالون سوت كل شي .. جنها عروس يديدة و صار اليوم اللي لازم تسافر فيه فرح .. كانت طيارتها الساعه 10 الصبح .. واهي قامت من 7 الصبح راحت مع أحمد وودو نواف وخدامتها عند امها وبعدها خذاها المطار –

أحمد : فرح لا يضيع منج العنوان .. أول ماتوصلين دقي علي خل اعرف لا تخليني احاتي
فرح : خلاص اوكي
أحمد : يللا روحي الله معاج
فرح : مشكور احمد .. مع السلامه
أحمد : مع السلامه

- صار وقت رحلة فرح .. اركبت الطيارة و اقعدت مكانها و قلبها يرقع .. أول مره تسافر بروحها .. رايحه ولا تدري شنو ممكن تكون ردة فعل حمد اذا شافها –

[SHwarviskya]

- بعد 6 ساعات تقريبا اوصلت لندن و عطت العنوان حق التاكسي اللي بيوصلها .. و انزلت عمارة فخمة نظام فندق ( اهي العمارة اللي شارين فيها شقق لهم ) –

- اصعدت بريل مترددة .. سمت بالرحمن .. و طقت الجرس .. بعد 3 دقايق .. افتحت لها هدى باب الشقه –

هدى : فرح ؟؟!!! اشيايبج ؟
فرح : ( صج ما تحب هدى بس ارتاحت يوم شافتها عالأقل ماضاعت ) هلا هدى
هدى : ( وخرت عنها خلتها اتدش وسكرت الباب ) اشيابج ؟
فرح : ييت اشوف حمد وخالتي
هدى : ( بنفسية ) حمد بالمستشفى عند امي
فرح : متى يرجع ؟
هدى : مادري .. بس ماتوقع راح يستانس .. بالعكس بيعصب لأنج ييتي
فرح : ميخالف راضيه .. وين غرفته ؟
هدى : ( راحت حق غرفة حمد و فرح الحقتها ) هذي
فرح : اوكي مشكورة ( دشت الغرفة حطت جنطتها )
هدى : افف الله يستر بروحه تعبان من المستشفى .. اكملت الحين ( خلتها و راحت الصالة )

( فرح سكرت الباب و بدلت ملابسها و امسكت التلفون اللي بالغرفة ودقت على أحمد طمنته انها اوصلت وبعدها حطت راسها ونامت )

- بعد أقل من ساعة رد أحمد ودش الغرفة كانت فرح نايمة –

حمد : ( قعد عالسرير يم فرح ) فرح قومي كلميني
فرح : ( قامت و ابتسمت أول ماشافته ) حبيبي
حمد : ليش ييتي من غير علمي
فرح : حمد والله اشتقت لك وانت ماكنت ترد علي
حمد : ( طالعها مده واهو ساكت )
فرح : ( قربت يمه واقعدت على اركبها ولمته حييل وباست ارقبته واهي تبجي ) ولهانه عليك حيل .. والله ولهت على كل شي فيك
حمد : ( ساكت )
فرح : ( وخرت عنه ودموعها على خدها ) اشفيك حمد ؟ ماولهت علي ؟
حمد : فرح انا تعبان
فرح : ( امسحت دموعها ) اشفيك عمري ؟ خالتي فيها شي ؟
حمد : لا لا امي بخير
فرح : ( امسكت ايده ) عيل اشفيك ؟
حمد : انا بس كنت ياي اشوف ليش ييتي .. والحين لازم ارجع حق امي عندها جلسه
فرح : ايي معاك ؟
حمد : لا لا انا بروح و ارد بعد ساعتين
فرح : ( باست شفايفه بس اهو ما تحرك ولا تجاوب معاها .. وخرت عنه ) حمد ؟
حمد : ( قام ) نامي انا بروح ( خلاها وطلع )
فرح : ( حطت ايدها على شفايفها ودموعها تنزل ) اشفيك حمد اشصاير لك ؟

- بعد ما هدت شوي قامت اسبحت و اطلعت استشورت شعرها وحطت تاج ضعيف و البست قميص أحمر .. و حطت مكياج ناعم .. ودهنت جسمها وحطت عطر ريحته حيل حلوة .. و اقعدت عالسرير تنطر حبيبها و زوجها اللي ماجاسها تقريبا 5 أشهر -
( اتعبت من النطرة خافت اتدق عليه يعصب .. انسدحت تنطره أول ما اسمعت صوت أحد ياي .. اقعدت و وخرت الغطى عنها .. كانت تحس انها شوي مستحية لأن مدة طويله ماشافها بهالشكل .. بس تشجعت و اقعدت بشكل مغري شوي )

- أول مادش الغرفه تم واقف عند الباب يطالعها واهي تبتسم له .. ما رد لها الابتسامه .. راح بدل ملابسه و تم عالشورت .. دش الحمام بعدها طلع .. سكر الليتات و عطاها ظهر وانسدح -

( فرح انكسرت حييل من داخل و لا شعوريا ادموعها انزلت وقامت ترجف .. الحركة اللي سواها قوية حيل .. حست قلبها انطعن .. مو قادرة اتصدق ان هذا حمد .. راحت من وراه وحطت ايدها على ظهره )

فرح : حمد ليش ؟
حمد : ( مغمض عيونه ) تعبان وبنام تصبحين على خير

- فرح حست الدنيا تفتر فيها .. اكرهت نفسها حيل .. واكرهت حمد أكثر .. قامت دشت الحمام غسلت ويهها اهي تبجي بس من غير صوت .. قطت التاج بالحمام و لمت شعرها .. واطلعت بدلت والبست بجامة و عطته ظهرها وغمضت عينها ودموعها تنزل و ماتوقف –

فرح : ( بقلبها ) كسرت قلبي يا حمد .. جرحتني !!!

غيروك الناس عني ياحبيبي غيروك
وش لهم منك ومني ليش يبغوا يبعدوك

سمموا فكرك وجابولك كلام
غيرك خلاك طولت الخصام
وانت لوتدري الحقيقه
ماتفارقني دقيقه
غيروك غيروك

[SHwarviskya]

- 25 / وحده من الثنتين -

- فرح ماقدرت تنام عقب اللي صار .. تمت تبجي من غير صوت واهي يمه لين تعبت و غفت –

( قامت بعد 4 ساعات على حركة بالغرفة بطلت عينها لقت حمد يلبس ملابسه أول ما طالعته حست بغصه )

حمد : ليش قمتي ؟ ردي نامي
فرح : ( قامت اقعدت و فيها بجية ) حمد ليش سويت جذي امس ؟
حمد : ( يلبس جوتيه – عزكم الله - ) انا رايح حق امي ماعندي وقت حق سوالفج
فرح : سوالفي ؟ حمد اشفيك انا مرتك
حمد : لا !! صج ؟؟
فرح : ( دموعها انزلت ) ليش تكلمني جذي اشفيك قول شي
حمد : ( يصرخ ) مابي اقول شي .. خليني ساكت احسن
فرح : ( تعلي صوتها ) لا مابيك تسكت قولي اشفيك
حمد : ( راح لها ومسكها من زنودها حيل ) صوتج قصريه وانتي تكلميني فاهمة
فرح : ( تتألم ) هدني لا تمسكني جذي
حمد : ( دزها على الفراش )
فرح : ( تبجي حيل ) حمد شاللي صارلك ؟؟ شاللي غيرك
حمد : ( غمض عيونه ثواني و تنسـّم بعدين فتحهم ) فرح مابي اسمع صوتج
فرح : اوكي برجع الكويت
حمد : انتي ليش ييتي اصلا
فرح : ييت عشان اشوف حمد اللي حبيته و تزوجته .. بس مالقيته والحين برجع

( حمد من غير ولا كلمة قعد عالطرف الثاني من السرير و دق عالمطار و سألهم عن اقرب رحلة )

حمد : ( سكر التلفون ) انا رايح المطار احجزلج حق باجر الصبح .. و بعدها بروح حق امي ( قام وطلع من الشقة )

- فرح انصدمت حيل و ماقدرت تمسك نفسها اقعدت تبجي بحرقه و تشاهق .. بعد فتره طويله تعبت من البجي وراسها صدع .. قامت اطلعت من غرفتها وراحت الصالة .. بس مالقت احد بالشقه .. ردت غرفتها و انسدحت تدعي ربها ان يعدي هاليوم بسرعة عشان ترد الكويت -

( بعد جم ساعه حمد رد وفرح سوت نفسها نايمه دش الغرفة بدل ملابسه وانسدح يمها )

حمد : فرح ؟
فرح : ( مغمضه عينها و أول ما اسمعت صوته دموعها انزلت )
حمد : فرح ؟
فرح : ( واهي ماعطيته ظهر ) نعم
حمد : الصبح مبجر بقومج عشان اوديج المطار
فرح : اشلون خالتي
حمد : بخير كملي نومتج ( عطاها ظهره و غمض عينه و ماندري شاللي يفكر فيه )

- كان هاليوم كئيب وطويل .. وهذي وحده من الليالي اللي ماراح تنساها فرح –

- الصبح حمد قوّم فرح بدلت ملابسها بالحمام – عزكم الله – بعدها اطلعت لقته لابس ملابسه وناطرها –

حمد : هدى سوت ريوق
فرح : مابي اكل
حمد : عيل امشي خل اوديج المطار ( شال جنطتها – هاند باق صغيرة - )

- اطلعت الصاله مع حمد .. لقت هدى قاعده عالطاوله اللي عليها الريوق –

هدى : صباح الخير
حمد : صباح النور
هدى : ماتاكلون ؟
حمد : لا انتي اكلي انا بوديها المطار و ارجع اخذج
هدى : ( تشرب حليب ) اوكي الله معاك
فرح : ( تطالع هدى بحقد تدري ان لها علاقة بتغيير حمد )
هدى : اشفيج تطالعيني جذي ؟
فرح : بكلمج داخل
حمد : ماكو وقت امشي فرح
فرح : لازم اعرف اهي شقايلتلك .. وشاللي خلاك تتغير جذي
حمد : ( يصرخ ) اقولج امشي ماعندي وقت
فرح : ( تعلي صوتها حيل ) والله ما اطلع من اهني الا اعرف اشقالتلك عني
هدى : ( ببرود ) قلتله عن .. ( اتحط ايدها على اذنها - حركة تلفون - )
فرح : عن شنو مافهمت ؟
حمد : ( مسكها حيل من زندها ) خلاص فرح امشي
فرح : ( تبي تفلت ايدها بس موقادره ) هدني اول بعرف اشتقصد هذي
هدى : اقول روحي الله يستر عليج ويفكنا منج
حمد : ( يصرخ على هدى ) خلاص انتي بعد
فرح : ( بجت ) حمد بدال لا تمسكني قول شي قول اشفيك قولولي شاللي صاير
حمد : ( من غير أي كلمه سحبها وطلعها من الشقه غصب )

- بالطريج اهي تبجي وتسأله عن اللي تقصده هدى واهو مايرد عليها و بعدها كملو الطريج واهم ساكتين .. نزل معاها المطار وعطاها تذكرتها و خلاهم يدخلون جنطتها داخل .. واهي قاعده تطالعه و عيونها حمر من البجي والقهر –

حمد : يللا دشي من اهني وعطيهم التذكرة .. انا بروح الحين
فرح : حمد ؟ انت ماتحبني صح ؟
حمد : مع السلامه فرح

( خلاها ومشى واهي تمت واقفه مكانها مو مصدقه ان هذا حمد اللي حبته )
---

- اوصلت مطار الكويت عالمغرب .. بطلت جهازها .. و أول شخص فكرت اتدق عليه اهو ندى –

ندى : الو ؟
فرح : ( صوتها متضايق ) قوه ندى
ندى : فرح ؟ وينج
فرح : بالمطار تقدرين اتيين تاخذيني ؟
ندى : ليش راده اشصاير ؟
فرح : تعاليلي الحين وبعدين نتكلم
ندى : اوكي قعدي بستار بكس يايتج
فرح : اوكي مع السلامه ( سكرت التلفون )

- بعد دقايق يالها أحمد –

فرح : أحمد ؟
أحمد : و أخيرا طلعتي .. ناطر منزمان
فرح : حمد قالك تنطرني ؟
أحمد : اي .. اشفيه كان صوته جنه معصب ؟ وليش رجعتي بسرعة
فرح : ( ساكته )
أحمد : عطيني جنطتج
فرح : لأ خلها عندي .. وخلاص روح انا ماراح ارجع معاك
أحمد : ليش ؟
فرح : بروح بيتنا
أحمد : زين امشي انا اوصلج
فرح : لا تسلم ندى يايه تاخذني
أحمد : أوكي ننطرها
فرح : خلاص أحمد روح
أحمد : شوفي اشكثر شباب اهني .. راح أنطر معاج و اذا يتلج اروح
فرح : ( اسكتت )

- مشو اقعدو بستار بكس .. ناطرين ندى –

( بعد شوي يت ندى شافت أحمد تضايقت )

ندى : السلام
أحمد وفرح : وعليكم السلام
ندى : ( باست فرح ) اشلونج حبيبتي
فرح : ( ويهها مبين انها متضايقه وباجيه ) الحمدلله
أحمد : اشلونج ندى ؟
ندى : زينه .. ( تكلم فرح ) يللا نمشي ؟
فرح : يللا

( أحمد مشى معاهم لي البوابه )

أحمد : فرح متى تردين البيت ؟
فرح : الله العالم
أحمد : واذا بنشوف نواف اشلون ؟
فرح : حياك بيتنا اذا تبي تشوفه
أحمد : يعني ماراح تردين بعد جم يوم ؟
فرح : لأ
أحمد : لا عيل السالفه جايده
فرح : دام حمد مو بالكويت ماله داعي اقعد عندكم
أحمد : على راحتج .. ( يطالع ندى ) ندى للحين على رايج ؟
ندى : اي .. يللا فروح
فرح : آسفه لأنك تعنيت عالفاضي
أحمد : لا و لايهمج
فرح : مع السلامه
أحمد : الله معاكم

- اصعدت فرح مع ندى و مشو –

ندى : اشصار معاج ؟
فرح : اخذيني بيتكم
ندى : ماتبين تشوفين امج و وولدج ؟
فرح : ( دموعها انزلت ) الله يخليج ندى ودي اقعد و اطلـّع كل اللي قبلي قبل لا انفجر عندهم
ندى : اوكي على راحتج .. زين اشصار قوليلي
فرح : ماصار شي
ندى : شنو يعني
فرح : ( اسكتت ودموعها تنزل )

- اوصلو البيت دشت ماكان في احد بالصاله اصعدو على طول غرفة ندى –

ندى : غسلي ويهج وبدلي ملابسج عشان ترتاحين خل اطلعلج بجاما
فرح : ( افصخت ملفعها و جوتيها – عزكم الله – وقطت عمرها عالسرير ) لا مابي خليني جذي
ندى : ( اقعدت يمها ) اسكر الليت واخليج تنامين شوي ؟
فرح : ( امسكت ايد ندى ) لا خليج معاي .. ندى انا تعبانه حيل
ندى : اشفيج قلبي ؟
فرح : ( اقعدت ) تصدقين لبست له وتكشخت ولا جاسني ؟
ندى : ( انصدمت ) ليش ؟
فرح : ( دموعها تنزل ) تخيلي شافني جذي لابستله وناطرته جان يبدل ملابسه و عطاني ظهر وقالي تصبحين على خير
ندى : امه فيها شي ؟
فرح : لا لا خالتي مافيها شي .. بس مادري ليش عاملني جذي ( حنجها بدى يرجف بعدين انفجرت بجي )
ندى : ( حطت ايدها على جتفها ) خلاص فروح لا تبجين كل شي راح ينحل
فرح : ( مهستره ) اقولج عطاني ظهره ونام .. كسر فيني دقرني حيل .. والله وقتها كرهت نفسي وكرهته
ندى : زين اهو شاللي قلب حاله ؟
فرح : ( تشاهق ) خواته .. هالثنتين يكرهوني .. وهدى قالت انها قالتله شي عني .. بس ماعرفت شنو اهو .. واهو مثل ( الحمـ...) صدقهم
ندى : اهدي حياتي خلاص عفية لا تبجين
فرح : ( واهي تبجي ) اشلون اهدى والله احس اني بموت مو قادره اتحمل .. زين حتى لو قالولك شي .. تعال كلمني قول شي مو تسكت وتعطيني ظهرك
ندى : كلامج كله صح .. بس تصرفاته مو طبيعيه والله هذا شكله السانه مربوط مخه ممسوح
فرح : ( هدت شوي ) اشلون يعني ؟
ندى : مادري بس جنه تصرفات واحد مسحور
فرح : مسحور ؟
ندى : يمكن .. ولا ليش مايكلمج ولا يقولج شي .. لو مثلا قالوله شي قوي ايي يقوله لج يتفاهم معاج مو جذي يسكت
فرح : انا بعد استغربت منه .. بس ماتوقع سحر .. وليش يسحرونه يعني ؟
ندى : مادري بس اللي قلتيلياه يأكد ان تصرفاته مو طبيعيه
فرح : ( اسكتت شوي تفكر بعدها ردت تبجي حيل ) مادري والله مادري
ندى : خلاص فروح حبي انتي .. انسدحي نامي
فرح : ( انسدحت واهي تبجي )
ندى : ( اقعدت يمها تهديها لين خلتها تنام )
---

- بعد ساعه ونص قامت فرح على صوت خالتها أمل كانت قاعده عالغنفه اللي يم السرير –

أمل : ( بصوت واطي ) انا طمنت فاطمة وقلت لها انها متضايقه شوي وقاعده عندج
ندى : اهي كانت تدري انها يايه ولا انتي قلتيلها
فرح : ( قامت ) اشلونج خالتي
أمل : ( اقعدت يمها وباستها ) ارتاحي يمه انتي راده من سفر وتعب نامي
فرح : لالا خالتي مشكوره بروح البيت
أمل : انا كلمت امج وقلت لها الليله بتمين عندنا
فرح : ليش قلتولها مابغيتها تعرف اني وصلت ومارحت لها
أمل : ميخالف اهي امج لازم تدري انج رديتي
فرح : زين ندى قومي وصليني اكيد الحين تقعد تحاتي
أمل : لا ماله داعي .. نامي اليوم اهني انا عطيتها خبر
فرح : لا خالتي انا هم ودي اشوف نواف
أمل : ( ابتسمت ) اذا جذي مانقدر انقول شي
ندى : والله فروح كان ودي انام عندج بس باجر وراي دوام و كل أغراضي اهني
فرح : لا عادي بس وصليني
أمل : ديري بالج على نفسج وعلى ولدج
فرح : ان شاءالله

[SHwarviskya]

- ندى وصـّلت فرح بيتهم ومشت .. دشت فرح لقت امها بالصالة لمتها و اقعدت تبجي حييل و يوم اسألتها عن السبب قالت لها انها متهاوشه مع ريلها لأنها سافرت من غير لا يدري –

- ثاني يوم الصبح نوره يتلهم واقعدت مع فرح بالغرفة –
( بعد ما اسمعت السالفة من فرح )

نوره : تدرين اهو ممكن كلام ندى صح بس هم في شي يفكرون فيه الشباب وايد و شكله ريلج واحد منهم
فرح : ( دموعها على خدها ) شنو هالشي ؟
نوره : يعني مو انتي كنتي تكلمينه قبل الزواج ؟
فرح : اي ؟
نوره : احنا ماندري اهم شنو قالو بالظبط بس اهي دام سوتلج حركة تلفون اتوقع قصدها تكلمين او شي .. و اذا اهو من النوع اللي اقولج عنه فأي شي يسمعه يصدقه على طول .. و نظريته دام كلمتني وخانت اهلها اكيد بتخون زوجها
فرح : لا مو معقوله يفكر جذي
نوره : عيل هذا اللي اهو فيه شتسمينه ؟ ماجاسج 5 اشهر و يعطيج ظهره وينام ؟ اهي وحده من الثنتين يا ان حاط في باله دام كلمتني اتكلم غيري .. او ان مسحور و ممسوح مخه مثل ماقالت ندى
فرح : ( تمسح دموعها ) مادري يا نوره تعبت من كثر التفكير و سألته وايد بس مايرضى يقول شي
نوره : حسبي الله عاللي كان السبب .. شراح تسوين ؟
فرح : ماراح اكلمه .. بخليه لين يرجع و يحس باللي سواه ويعتذر لي ساعتها افكر ارد معاه
نوره : الله يهديه
---

- كلية الهندسة -

ندى : هذا يا ان لاحقني ووين ما اروح يطلع بويهي .. أو انا ظالمته وماكنت انتبه عليه لأني ماكنت اعرفه
دلال : منو تقصدين عثمانو
ندى : شنو عثمانو ؟ متى طاحت ميانتكم ؟
دلال : لا وين طاحت .. هذا مايعطي ويه لو يعطي جان كلمته والله شكله مزيون
ندى : دلال ردينا ؟
دلال : ( تضحك ) اشفيج اتغشمر والله ماعندي تلفون اكلمه بشنو .. الا اذا خليته اهو اييبلي واحد هذا شي ثاني
ندى : اقول بسج عاد .. و ادعيلي رايحه محاضرة الدكتور العله
دلال : موفقه يارب
---

- بالمحاضرة –

( كالعادة الدكتور يوزع ابتساماته عالبنات وبالأخص ندى )

- واهو يفتر على الطالبات يشوف شغلهم عالكمبيوتر مد ايده من غير لا احد ينتبه و حطها على ظهر ندى –

ندى : ( انقزت واشهقت بصوت عالي والكل التفت عليها )
الدكتور ثامر : اشفيج ؟
ندى : ( اسكتت )
الدكتور ثامر : ( يرقع الموقف جدام البنات ) اشفيج ؟ ليش شهقتي ؟
ندى : لا ماكو دكتور
الدكتور ثامر : عيل كملي شغلج وعينج عالكمبيوتر
زميلة ندى : ( بصوت واطي ) اشفيج ؟ ليش شهقتي يوم يه وراج ؟
ندى : خفت ما انتبهت ان احد وراي
زميلة ندى : اها
الدكتور ثامر : بس انتي وياها
---

- بعد المحاضره –

الدكتور ثامر : ندى ممكن اتيين معاي المكتب بكلمج بخصوص مادة خذتيها عند الدكتور فهد العمر
ندى : الحين ماقدر دكتور
الدكتور ثامر : ماراح اخذ من وقتج وايد
ندى : ( اسكتت و مشت وراه )

- اوصلو المكتب –

الدكتور ثامر : تفضلي قعدي
ندى : لا عادي
الدكتور ثامر : تفضلي ماحب اكلمج وانتي واقفه
ندى : ( اقعدت )
الدكتور ثامر : ( قعد بالكرسي اللي يمها – يعني مو كرسي المكتب - )
ندى : ( ارتبكت )
الدكتور ثامر : ماشاءالله
ندى : ( ابتسمت من الخوف ) ماشاءالله على شنو ؟
الدكتور ثامر : عليج انتي
ندى : ( اوقفت )
الدكتور ثامر : ( وقف جدامها ) اشفيج وقفتي
ندى : ( صارت الطاولة وراها و الدكتور جدامها ماكو الا فتحه عاليمين تقدر تطلع منها ) دكتور لو سمحت انا ماحب هالاشياء
الدكتور ثامر : ( قرب يمها ) أي اشياء
ندى : ( تطالع الباب ) دكتور لو سمحت ...
الدكتور ثامر : ( قاطعها ) لا تحاتين محد يدش مكتبي الا بإذن
ندى : ( راحت يمين عشان تطلع جان يمسكها )
الدكتور ثامر : لحظة شوي
ندى : ( دزته حيل خلته يقعد عالكرسي ) وخر عني ( اطلعت من المكتب بسرعة و اهي تبجي كانت خايفه حيل )

- عثمان شافها طالعه من المبنى تركض و تبجي و وقفت عند سور الحديقة جان يروح لها –

عثمان : اشفيج عسى ماشر ؟
ندى : ( ترجف و تبجي )
عثمان : ( طلع من مخباته كلينكس وعطاها اياه ) تفضلي
ندى : ( حاقرته )
عثمان : ( قرب ايده من ايدها عشان يمسكها الكلينكس ) اشفيج عسى ماشر ؟
ندى : ( اول ماشافته قرب ايده جان تصرخ عليه ودزته ) وخر عني لا تمسكني ( مشت بسرعة وراحت سيارتها )

- عثمان وقف منصدم ومنحرج يطالع حواليه و كان فيه شباب و بنات واقفين يطالعونه –
---

[SHwarviskya]

- 26 / كرهتك بعد ماحبيتك -

- اقعدت ندى بالسياره تبجي حيل .. كانت خايفه وايد .. عمرها ماحست جذي احساس .. حركت السياره و طول الطريج كانت تتذكر اللي صار معاها –

( اوصلت البيت انزلت ودشت الصاله كانت امها موجودة )

أمل : ها يمه راده مبجر
ندى : ( ماردت عليها و اصعدت فوق بسرعة )
أمل : ( قامت وراها ) اشفيها الله يستر

- أمل دشت الغرفه لقت ندى منسدحة ومتلحفة –

أمل : ( اقعدت يمها ) يمه ندى اشفيج ؟ اشصار معاج ؟
ندى : ( قامت لمت امها و اهي تبجي )
أمل : اشفيج حبيبتي تكلمي لا تخوفيني
ندى : ماكو شي بس احس بتعب
أمل : قومي معاي اوديج الطبيب
ندى : لا لا مابي
أمل : زين اوديج عند الدكتورة غالية ؟ ( النفسيه )
ندى : ( تبجي وحطت راسها على حضن امها ) لا مابي
.. راح اصير احسن
أمل : باجر اذا حالج ماتعدل بتروحين معاي غصب
ندى : ( اسكتت بس قاعده تبجي )
أمل : ( اقعدت تمسح على شعرها وتقرى عليها قرآن )
---

- بيت فاطمة –

مشعل : ( يصرخ ) ماعندي بنات يردون من بيت زوجهم
فاطمة : يا مشعل ريلها مسافر يعني تقعد عندنا لين يرجع اشفيك تصرخ الله يهداك بس
مشعل : فاطمة انتي بنفسج قلتي ان في مشكله ردتها
فاطمة : و اذا في مشكلة ؟؟ عادي يرجع ريلها ويحلونها ان شاءالله
مشعل : ( بصوت عالي ) و متى يرد حضرته ؟ ناديها لي بسرعة بكلمها
فاطمة : خلها يا مشعل اللي فيها كافيها حرام عليك لا تزيد عليها
مشعل : ( راح وقف عند الدري ويصرخ ) فرح .. فرح نزلي بسرعة
---

- غرفة فرح –

- اسمعت صراخ ابوها .. حطت نواف بفراشه و انزلت –

فرح : ( و اهي عالدري ) هلا يبه
مشعل : ( يصرخ ) تعالي اهني
فرح : ( انزلت اوقفت يم امها )
مشعل : ليش خليتي بيت ريلج وييتي ؟
فرح : يبه اهو مسافر و قلت اقعد اهني لين يرجع وايد قاعده اتملل اهناك
مشعل : ( يصرخ ) لا تجذبين .. انتي رديتي اهني لأنج متهاوشه مع ريلج .. بس سمعي يا فرح .. هالشي لج انتي وخواتج .. هذا مو فندق كل ما تناجرتو مع ازواجكم اتيوله
فاطمة : يا مشعل مايصير هالكلام
مشعل : جب .. محد اهني يعصي كلمتي
فرح : ( دموعها انزلت ) يبه اهو مسافر بس يرجع الديره اوعدك راح ارد معاه
مشعل : زين ذلفي فوق
فرح : ( اصعدت بسرعة من غير لا تقول ولا كلمة )
فاطمة : لا حول ولا قوة الا بالله
مشعل : شوفي انتي وبناتج .. انا ما ازوجهم عشان يردولي .. أي وحده تتهاوش خل تنطم و تمسك بيتها ماعندي شي اسمه طلاق فاهمه
فاطمة : ( ساكته )
مشعل : ( يصرخ ) فهمتي كلامي عدل
فاطمة : فهمت
---

- مرت 3 ايام .. ندى ماكانت ترضى تداوم .. و فرح محد سأل عنها لا حمد ولا خواته –

- بيت ندى .. الصبح الساعه 10 –

سامي : ( قاعد بغرفة ندى ) يبه قوليلنا اشفيج ؟ وليش ماتبين تدوامين ؟
أمل : خلاص سامي لا تضغط عالبنت .. الدكتورة غالية قالت خلوها على راحتها
سامي : بس لازم اعرف اشفيها و هذا نهاية الكورس مايصير تقعد جذي ويضيع عليها تعبها
ندى : خلاص يبه خل يضيع الكورس كله بس انا مابي اداوم
سامي : ليش ؟ شنو صار اهناك ؟
ندى : ( ساكته )
أمل : خلاص سامي خلها
سامي : لا ماراح اخليها ردي علي .. اشصار اهناك الموضوع يخص دلال و أمها ؟
ندى : لأ
سامي : عيل اشفيج ؟
ندى : ( ساكته )
سامي : تكلمي يبه قوليلي اشصاير ؟
ندى : الدكتور ثامر
سامي : منو هذا ؟
ندى : يدرسني بالكلية
أمل : اشفيه يمه ؟
ندى : ( اقعدت تبجي )
سامي : ( بدى يعصب ) ليش تبجين اشصار ؟
ندى : ( ماترد بس تبجي )
أمل : ( لمتها ) اهدي يمه .. سامي لا تصرخ عليها
سامي : يبه ليش تبجين قوليلي ؟
أمل : ندى ردي على ابوج قولي اشفيج
ندى : الدكتور .. تحرش فيني
سامي : ( عيونه اطلعت ) شنو ؟؟
أمل : ( اشهقت ) اشلون تحرش يعني ؟
ندى : بالمكتب .. مسكني بس دزيته و انحشت ( لمت امها و اهي تبجي )
أمل : ( تمسح على ظهرها ) خلاص حبيبتي لا تبجين
سامي : ( معصب و جنه الدنيا كلها طايحه على راسه ) اشكبره هالحقير ؟
ندى : بالثلاثينات
سامي : قومي لبسي بنروح الكلية
ندى : لا مابي اروح
سامي : بتروحين معاي غصبن عليج
ندى : مابي اروح انت روح بروحك
سامي : ( يصرخ ) الاداره اكيد يبون يكلمونج قومي امشي معاي
أمل : خلاص سامي بس تهدى راح تروح معاك
سامي : ( قام ) انا بلبس دشداشتي و ابيج تكونين جاهزه ( طلع و خلاهم )
ندى : ( تبجي ) يمه مابي اروح .. مابي اشوفه اهناك كرهت الكلية كلها
أمل : يمه اليوم تحرش فيج باجر يتحرش بغيرج لازم تشتكين عليه
ندى : بس ..
أمل : ( باست راس ندى ) لا بس ولا شي عفية قومي بلسي و روحي مع ابوج
ندى : ( امسحت دموعها وقامت ) ان شاءالله
---

- راحت مع ابوها .. اوصلو الكلية .. و انزلو من السيارة –

سامي : اخذيني حق الادارة ؟
ندى : ( مشت و قلبها يرقع ماكانت تبي تنحط بجذي موقف كلش )

- واهي تمشي مع ابوها شافت عثمان كان واقف مع مجموعة شباب و يطالعها من بعيد –

( أول مادشت مبنى الادارة شافت الدكتور ثامر يكلم دكتور ثاني .. لا شعوريا اوقفت .. سامي طالعها و رد طالع المكان اللي قاعده تشوفه )

سامي : أي واحد فيهم ؟
ندى : ( ساكته )
سامي : ( بصوت عالي ) دكتور ثامر ؟
الدكتور ثامر : ( التفت ) هلا ( شاف ندى جان ويهه ينعفس )
سامي : ( راحله من غير لا يتكلم مسكه من ملابسه و كفخه بالطوف )
الدكتور الثاني : ( يوخر سامي عنه ) لا ياخوي هذا مو اسلوب تعامل
الدكتور ثامر : نزل ايدك
سامي : ( للحين ماسك قميص الدكتور ثامر ) تتحرش ببنتي يالنذل .. تتحرش بطالبة عندك ؟

( طلع من الادارة جم واحد و اقعدو يوخرونهم عن بعض )

- ندى خافت حيل وقلبها كان يدق بسرعه .. ماقدرت توقف يمهم اكثر التفتت لقت مجموعة شباب وبنات واقفين يشوفون الهوشة و عثمان معاهم –

( اطلعت بسرعة من المكان و عثمان يطالعها .. راحت عند السياره .. تحاول تبطلها بس كانت مقفولة .. بعد 5 دقايق )

عثمان : ( يه يمها ) السلام
ندى : ( تطالعه ومالها خلقه كلش )
عثمان : يعني قبل جم يوم كنتي تبجين والسبه هالدكتور اللي ماخله بنت ماتحرش فيها .. بس جنج حطيتي الحره فيني
ندى : انت شتبي مني ؟
عثمان : والله مابي شي بس احسج خوش وحده و بساعدج
ندى : انا شكيتلك ؟؟؟
عثمان : اشفيج جذي معصبه ؟
ندى : ( فيها بجية ) ابوي داخل مادري اشصار عليه وانا ... انت اشتبي مني ؟
عثمان : والله مابي شي .. و لا تحاتين ابوج دش الادارة مع الدكتور .. ( تسند يمها عالسيارة ) بس تدرين ليش تجرأ و تحرش فيج ؟
ندى : ( ودها تزفه لأن خذى راحته بالسوالف )
عثمان : انا اقولج .. والله لأنج تماشين دلال صدقيني
ندى : ( عصبت ) ما اسمحلك
عثمان : عباله انتي مثلها .. انا شايفها تتمشى معاه وتضحك .. و تعرف كل الشباب اللي اهني .. الله يستر عليها
ندى : ممكن مانتكلم عنها ؟
عثمان : والله يا ندى انا اعرف البنت الزينه من نظراتها .. وانتي والله زينه و قلت احذرج بعدي عنها تره سمعتج تتأثر والسبه اهي
ندى : ( عصبت توها بترد عليه جان يرن تلفونها .. طالعت الرقم الا ابوها اللي داق ) الو ؟
سامي : يبه انتي وينج ؟
ندى : عند السيارة
سامي : تعالي الادارة
ندى : ان شاءالله ( سكرت التلفون )
عثمان : اكيد هذا ابوج .. الله يهداج خليتيه وييتي اهني
ندى : ( احقرته و راحت الادارة )
عثمان : يحليلها كله معصبة
----

- راحت لهم و اهي حيل مرتبكة .. اقعدت و خلوها تقول كل اللي صار و الدكتور ثامر نكر .. بس اطلعت هذي مو أول شكوى عليه .. و قررو ياخذون الاجراءات اللازمة –
---

- كملت ندى امتحانات الفاينل و احمدت ربها لأن الدكتور مو مبين بالكلية كلها .. و كانت تشوف عثمان من بعيد يبتسم لها بس تصد عنه وتمشي مع دلال -
---

- خلص الكورس .. و بدت عطلة الصيف –

( بيت فاطمة )
- ندى زايره فرح –

ندى : للحين مادق عليج ؟
فرح : ولا راح يدق
ندى : زين ما دق يسأل عن نواف ؟
فرح : ( تبتسم بقهر ) لا والله
ندى : والله مسحور
فرح : لا تحلفين .. ماندري شاللي صايرله بس اللي اعرفه اني خلاص مابيه
ندى : فرح منصجج ؟
فرح : ( دموعها انزلت ) ندى عقب ماكسر فيني تنازلت و دزيتله وايد مسجات اسأله ليش تغير بس مايرد علي كلش خلاص والله لاعت جبدي
ندى : اذا كان مافيه شي راح يرجع و يبوس ريلج عشان تسامحينه .. بس لو مسحور ماراح يرجع
فرح : ( تبجي ) خلاص بس .. كل شوي تقولين مسحور .. اهو مو مسحور .. اهو مايحبني .. لو كان يحبني ماسوى جذي .. اهو مايحب الا امه و بس .. قالتله تزوج .. راح تزوج .. امرضت .. كرهني و صدق كل شي ينقال عني
ندى : الله ياخذ حقج من كل شخص ظلمج
فرح : ( امسحت دموعها ) وديني بيته
ندى : بتردين ؟؟
فرح : لا بس بييب سيارتي و اغراض نواف ملابس حفاضات كل شي .. لأن اهني ابوي فلس احمر مايقط علي دام انا متزوجه
ندى : و حمد مايحولج على حسابج كل شهر ؟
فرح : لا كان مايخلي بوكي فاضي ويعطيني كل ما بغيت مايقصر علي .. و يوم سافر كان يخلي احمد يعطيني كل شهر 300
ندى : وليش مايحولهم على طول على حسابج
فرح : كان بيحول بس بعدها لهى مع امه وبعدين تغير علي و نسى السالفه .. المهم وديني خل آخذ الاغراض
ندى : بس ماراح انزل معاج
فرح : عادي قطيني و امشي اصلا برد بسيارتي
---

- اوصلو عند بيت اهل حمد –

فرح : ( مستغربه ) سيارتي مو اهني
ندى : يمكن احد طالع فيها
فرح : زين بنزل آخذ الاغراض وارجع نطريني
ندى : لا تطولين عفية مابي اشوف أحمد
فرح : اوكي ( انزلت و طقت الجرس )

- الخدامه بطلت لها الباب .. دشت داخل .. مالقت احد بالصالة اصعدت شقتها لمت كل شي تبيه بجنطة يهال وانزلت .. لقت مشاعل توها طالعه من غرفتها –

مشاعل : اووو فرح اهني ؟؟
فرح : هلا مشاعل
مشاعل : شنو ماخذه معاج
فرح : اغراض حق نواف
مشاعل : مافكرتي اتييبينه نشوفه ؟
فرح : قلت حق احمد اللي يبي يشوفه حياه الله
مشاعل : لا شيودينا بيتكم .. خل يرد حمد و نشوف شنو بيسوي بالضبط
فرح : زين وين سيارتي ؟
مشاعل : ( ابتسمت ) ماتدرين ؟
فرح : شنو ؟
مشاعل : حمد قالنا بيعوها .. وقبل اسبوع انباعت
فرح : ( حست انها داخت من الصدمه ) شنو ؟ باعها ؟
مشاعل : اي والله
فرح : ( اطلعت من البيت و اهي مختنقة )

[SHwarviskya]

- اصعدت سيارة ندى واهي تتنفس بصعوبه –

ندى : اشفيج فرح ؟
فرح : ( تتنفس بصوت مسموع )
ندى : اشفيج لا تخرعيني اشصاير ؟
فرح : ( صوتها يرجف ) باع سيارتي .. حمد قالهم يبيعون السيارة
ندى : ( انصدمت ) من صجه ؟
فرح : ( اتصرخ ودموعها تنزل ).. ليش يبيعها ؟ هذا دليل ان خلاص مايبيني
ندى : يعني سوالهم توكيل خلاهم يبيعونها ؟
فرح : ( تبجي ) ليش يا حمد ؟؟
ندى : ( حركت السيارة ) خلاص تعوذي من ابليس خل يولي اهو وسيارته
فرح : ( طلعت تلفونها واهي تبجي واقعدت تكتبله مسج )
ندى : فروح لا تدزين شي وانتي معصبه
فرح : ( بصراخ ) والله مايستاهل اخش شي بقلبي بطلع كل اللي فيه عشان ارتاح

- اكتبت له هالمسج واهي تبجي ودزته له " انت واحد خسيس وحقير و حيوا... ماتستاهل حبي لك دام ماتبيني طلقني مو تعلقني جذي وتعذبني معاك .. و لو فيك خير جان كلمتني وقلت اشفيك مو تسوي حركات واحد جبان " –

ندى : اشدزيتي ؟
فرح : ( تبجي ) سبيته
ندى : ( ابتسمت ) اذا يريحج هالشي زين سويتي
فرح : ( دموعها تنزل ) ماريحني مافي شي يريحني
---

( بهالوقت هالقصيدة كانت تعبر عن احساس فرح )

ماراح تلاقي أحد حبك مثـل جنونـي ولا أحد يغليـك مثـل ما أنا أغليتك

بس اليوم أقولها بصدق يا مخيب ظنونـي والله العظيـم كرهتـك بعد ما حبيتك

ولا بتلاقي أحد كرهك مثـل جنونـي خسرتنـي و حرام فيك كلمـة هويتك

بعد ما أهديتك حبي وأصدق شجونـي الكره و الكره بكـل اخلاص أهديتك

بعد ماكنت أقول أحبك يانور عيونـي وبعد ماكنت أغـازلك و أقول فديتك

صرت أنا أقول أكرهك كره جنونـي وحرام فيك كـل الحب اللي عطيتك

وعادي لو كل الناس عنـك سألونـي بقولهم أكبر غلطـه بعمري يوم لقيتك

لو الأطباء اجتمعـوا عشان يداوونـي و لو كل النـاس لامـوني لأني نسيتك

والله مايقدرو من كرهي لك يشفونـي و لايقدرو يمنعـوني أكره طـريق بيتك

أنا ودي أصرخ وكل الناس يسمعونـي وأقول أكرهك وبعتك برخص ماشريتك

---

- مر شهرين و ماوصل أي رد حق فرح –
( حالتهم حيل تعبانه ومشعل ماعنده يصرف عليهم .. وكل يوم يصرخ اذا سمعها تطلب شي .. فكانت مرات ندى تشتري حق الياهل حفاضات وحليب - وكل مره فرح تزفها لأنها انحرجت منها - ومرات خواتها يقطون عليها جم شغله يساعدونها فيها )

- و بيوم انطق جرس بيت فاطمة –

الخدامه : ماما في واحد هندي يبي فرح
فرح : يبيني انا ؟
الخدامه : اي
فاطمة : شالسالفه ؟ قعدي يمه انا اروح اشوفه
فرح : لا لا انا بروح

- راحت فرح البست عباية و ملفع و راحت اتشوف اشيبي الريال –

الهندي : انتي ماما فرح ؟
فرح : اي منو انت ؟
الهندي : انا سايق مال بيت ماما هدى .. اسمي كريم
فرح : ( تضايقت من اسمعت اسم هدى ) هلا كريم
كريم : ماما هدى قول لازم الحين جيب بيبي نواف مع هوا خدامه ودي بيت قادسيه كله يبي شوف
فرح : روح قولهم نواف مريض تعبان
كريم : لا ماما هدى قول لازم جيب .. انتي سوي تلفون كلمي انا مايصير روح بيت لازم اول ياخذ بيبي
فرح : ماراح ادق على احد .. انت روح قولهم بيبي مريض يللا مع السلامه ( سكرت الباب بويهه )

- دشت الصاله –

فاطمة : ها اشيبي ؟ منو هذا ؟
فرح : ( معصبه ) هدى مطرشه سايقها عشان ياخذ نواف توهم اولهو عليه وحسو فيه
فاطمة : و ليش ما خليتيه ياخذه ؟ يمه اهم لهم حق يشوفونه
فرح : ( بعصبيه ) اشلون اوديه ؟؟ ماشفتي ملابسه ؟ والله ماعنده شي قده كل شي صغر عليه
فاطمة : وديه بلبس صغير عليه .. خل يشوفون الحاله اللي اهو فيها
فرح : لا والله ما يشوفونه الا بأحسن لبس .. مابي يحسون انّ مايعيش الا اذا كان تحت خيرهم
فاطمة : ( تنهدت ) الله كريم

- بعد نص ساعه .. رد انطق الباب .. وهم كان السايق كريم .. يقول ما امشي الا اذا خذيت نواف معاي .. بس فرح طرشت الخدامه تقوله نواف مريض و سكرت الباب بويهه –

- بعد ثلث ساعه رد الباب انطق .. والخدامه يت قالت يبون نواف –

فرح : ( قامت ) هذا مايفهم ؟؟ والله الحين اخليه يحرم يرجع

- بطلت الباب وانصدمت من اللي شافته .. حست الدنيا ظلمت عليها .. اللي جدامها ماكان ( السايق كريم ) .. اللي واقف جدامها وويهه كله شرار .. كان حمد –

فرح : ( منصدمه ) حمد ؟؟ متى رديت!!
---

[SHwarviskya]

- 27 / وليد -

- بطلت الباب وانصدمت من اللي شافته .. حست الدنيا ظلمت عليها .. اللي جدامها ماكان ( السايق كريم ) .. اللي واقف جدامها وويهه كله شرار .. كان حمد –

فرح : ( منصدمه ) حمد ؟؟ متى رديت!!
حمد : ( بعصبية ) روحي ييبي نواف
فرح : ( عيونها تغورق من القهر ) متى رديت ؟
حمد : مالج شغل متى رديت روحي ييبي نواف .. يعني انتي طول هالمدة قاعده تمنعينه من اهلي
فرح : ( بصوت عالي ) رد علي متى رديت ؟

- يت فاطمة على صوتهم –

فاطمة : ( انصدمت يوم شافت حمد ) يمه اهدو لا يطلع صوتكم جذي بالشارع
حمد : خالتي قولي حق الخدامه تييب ولدي
فاطمة : حمد انت ريال عاقل مايصير جذي تفضل بالدوانية اقعد مع مرتك تفاهموا مايصير اللي قاعد تسويه
حمد : ( بعصبيه ) اللي قاعد اسويه انا ولا بنتج ؟ وبعدين مالي تفاهم مع احد ياي اخذ الولد و امشي
فرح : ( تبجي ) شنو يعني تاخذه توك تحس ان عندك ولد ؟
حمد : ( بصوت هادي ) جدام عيني صار الموضوع مرتين رديتي السايق و رفضتي تخلينهم يشوفون نواف .. والحين انا ياي اخذه بنفسي
فرح : اشلون يعني تاخذه ؟
فاطمة : عليك الله حمد دش الدوانيه معاها مايصير تتفاهمون عند الباب
حمد : ( دش البيت )
فاطمة : ( دخلته الدوانيه و اطلعت حق فرح )
فاطمة : يمه روحي تفاهمي معاه وحاولو تحلون الموضوع قبل لا يرجع ابوج
فرح : ( دموعها تنزل وميته قهر – بصوت واطي - ) يمه اكرهه مابيه
فاطمة : عشان خاطري حبيبتي دشي كلمي ريلج
فرح : ( امسحت دموعها ودشت الدوانيه )
حمد : ( بنفسيه ) وين نواف ؟
فرح : ( اقعدت على غنفة بعيدة شوي عنه ) حمد ليش كل هذا ؟
حمد : ليش يوم طرشو السايق عشان يشوفونه مارضيتي ؟ وليش تركتي البيت وانا قايلج لا تتركينه ؟
فرح : تسأل ليش تركت البيت ؟؟ ما تسأل نفسك انت ليش تعاملني جذي وليش تسكت وماتقولي شنو عندك ؟
حمد : مو مجبور اقول شي .. اللي اعرفه اني غلطت يوم خذيتج وانا مو عارفج عدل سالفة جم شهر ماخلتني اعرف معدنج
فرح : ( ابتسمت و انزلت دموعها ) غلطت يوم تزوجتني ؟ عيل طلقني اشناطر ؟
حمد : ( ولع زقاره و دخن منها شوي ) حاب اخليج جذي
فرح : تعلقني يعني ؟
حمد : اي .. والحين قومي ييبي نواف .. ولا تخافين برده بعد جم ساعه
فرح : ( كل ماتمسح دموعها تنزل غيرهم ) حسبي الله عاللي كان السبب
حمد : آمين .. يالله قومي ييبي الولد لأني مستعيل
فرح : انا بعرف اهي اشقالت لك عني ؟
حمد : انتي ادرى
فرح : حمد انت .. ولا تدري ماينفع الكلام صج حسافة .. لا ليش حسافة اصلا حسافة اتحسف عليك
حمد : ( بعصبية ) فرح انا للحين هادي
فرح : ( قامت من غير لاتقول شي واطلعت من الدوانية )

- دشت الصالة و دموعها تنزل –

فاطمة : ها يمه اشصار ؟
فرح : ( تكلم خدامتها ) عطيني نواف و روحي فوق حطي بجنطته حليب وحفاض و اثنين ملابس مع صدرية
الخدامه : ( عطتها نواف ) جم واحد هفاض ؟
فرح : ( شالته ) حطي 4 وانتي بعد لبسي بتروحين القادسيه
الخدامه : اوكي ( راحت فوق )
فاطمة : بياخذه ؟
فرح : راح يرجعه بعد جم ساعه
فاطمة : اشصار ليش هالدموع ؟
فرح : ماكو شي
فاطمة : شنو ماكو شي ؟
فرح : خلاص يمه الله يخليج مو حابة اتكلم الحين
فاطمة : انا رايحه اتفاهم معاه
فرح : ( امسكتها ) لا الله يخليج لاتروحين .. خليه انا لاعت جبدي منه مابيج تحاولين فيه
فاطمة : اشلون يعني ؟
فرح : يعني خلاص .. لا اهو يبيني ولا انا ابيه
فاطمة : اي ليش عاد ؟

- يت الخدامه ويابت جنطة نواف –

فرح : يللا تعالي بتروحين مع بابا ( راحت الدوانيه )
حمد : ( قام و خذه نواف من ايد فرح ) اشوفه مو مريض
فرح : انت اول ذاكر شكله ؟ شوف ملابسه .. عرفت ليش ما وديته بيتكم ؟ لأن كل ملابسه صغار عليه .. وانت ماتدري عنه
حمد : انتي اللي تركتي البيت بقرارج محد طردج .. ( يكلم الخدامه ) يللا تعالي ( راح لي الباب )
فرح : لحظه .. بسألك اخر سؤال
حمد : ( وقف و ماتكلم )
فرح : متى رديت الكويت ؟
حمد : من اسبوع ( كمل طريجه وطلع من البيت )
فرح : ( اقعدت عالغنفه ودموعها تنزل وتحرق خدها و بلعومها يعورها من القهر )
فاطمة : ( دشت عليها واقعدت يمها ) يمه تعوذي من ابليس كل شي راح يتصلح
فرح : ( انفجرت بجي وصراخ ) مابي اصلح شي كرهته والله كرهته خلااص بتطلق منه
فاطمة : ( اشهقت ) اعوذ بالله يمه .. راح ترجعون صدقيني بس عطيه وقت
فرح : مابيه خلاص .. يقول يبي يعلقني .. الحقير يبي يقهرني زيادة
فاطمة : ( لمتها ) خلاص حبيبتي صدقيني دام مافي سبب للزعل راح يرجعلج
---

- مر تقريبا شهرين وبدت الدوامات .. و حمد مايسأل بس كل ويك اند ياخذ نواف و يرده ومعاه 20 دينار مصرف و فيه الخير كذا مره راده ومعاه ملابس من مذر كير .. الظاهر خواته تعبو نفسهم و تسوقوله .. و فرح ردت تداوم مع ندى وهذا اخر كورس لها -

- بيت فاطمة –

مشعل : ( سكر التلفون وبدى يصرخ ) كله من بنتج .. اكيد اهي ميبسه راسها وغاثته
فاطمة : اشصار ؟؟ اشقالك ؟
مشعل : اسأله ماتبي تاخذ مرتك ؟ يقولي لأ اهي جذي مرتاحه وانا مرتاح بعد !!! يعني لي متى بيخليها عندنا ؟
فاطمة : زين اهي مأذيتك بشنو ؟ حتى صرف مو قاعد تصرف عليها .. مصروف ولدها يوصلها كل اسبوع .. محتر ومعصب ليش ؟
مشعل : تسألين ليش ؟ اذا اسمترت على هالحال وماردت بيتها راح تتطلق
فاطمة : بعيد الشر عنها لا تقول جذي
مشعل : وهذا اللي اهي فيه شتسمينه ؟؟
فاطمة : الله يهدي نفوسهم ويرجعون حق بعض
مشعل : هذا اللي خذته من خلفة البنات .. الله يلعن الساعة اللي انولدو فيها
فاطمة : استغفر ربك اشهالكلام ؟
مشعل : ( قام واهو يصرخ و يتحلطم و طلع من البيت )
---

- بالكلية .. أول يوم دوامات –

ندى : انا وايد مستانسه لأنج رديتي تداومين عالأقل تنسين حمد و سوالفه
فرح : انا خلاص نسيته والله طلع من قلبي .. خل يعلقني كثر مايبي .. المهم اني مو يمه
ندى : امه ردت معاه ؟
فرح : اي كلمت عبير وتطمنت عليها .. اتقول صارت احسن بس للحين تعالج اهني
ندى : الحمدلله .. زين و ماقالت شنو ردة فعلها على موضوعج ؟
فرح : عبير مارضت تتكلم .. و حسيت من كلامها ان حتى خالتي صدقت اللي انقال عني
ندى : زين انتي جان بررتيله و حلفتي ان ماعندج شي
فرح : شالفايده ؟ اهو دام متأكد وواثق لهالدرجة يعني خلاص ماينفع يكون زوج
ندى : ( تنهدت ) والله العزوبية ارحم
فرح : اي والله ارحم بوايد

- اوقفت دلال من بعيد تأشر حق ندى من غير لا تشوفها فرح –

ندى : ( ويهها قلب )
فرح : اشفيج ؟
ندى : صراحه بقول شي بس لا تزفين
فرح : قولي
ندى : تره انا للحين اكلم دلال
فرح : ( انصدمت ) شنو ؟؟
ندى : والله تغيرت ماتطلع مثل اول ولا تكلم شباب و..
فرح : ندى انتي من صجج ؟ وينها هذي والله انتفها
ندى : فرح عاد اشفيج ؟؟ شكلج بتحطين حرة حمد فيها
فرح : اي والله بطلع حرة الدنيا على راسها .. وينها اهي تداوم ؟
ندى : اي
فرح : حسافه والله .. المفروض تنطرد مع ثامر
ندى : ( تطالع مكان دلال بس مالقتها )
فرح : اذا كلمتيها مره ثانيه والله اقول حق عمي سامي
ندى : بلا سخافه والله اني ما اطلع معاها اللهم نتمشى بالكلية وبس
فرح : اوكي انتي كلميها وانا والله اقول حق عمي ماراح تكسرين خاطري

- راحت ندى محاضرتها .. لقت دلال معاها بنفس الكلاس –

دلال : ( لمت ندى ) وااي ماني مصدقة اني معاج بهالمادة
ندى : ( وخرت عنها ) جم مره اقولج ماحب التلمم
دلال : اي صج تعالي هذي السعلوّه ليش ردت داومت والله اخاف منها
ندى : لاتقولين سعلوّه ما ارضى عليها .. وصج دلال والله ماني ناقصه مشاكل مع ابوي .. اهي لو شافتنا نتكلم مع بعض بتروح تقوله
دلال : ليش انا اشسويت ؟ اشفيهم اهلج علي
ندى : دلال من صجج تسألين اشسويتي ؟
دلال : امي اللي سوت انا مالي شغل

- دشت الدكتورة جان الكل يسكت –

( بعد المحاضرة .. اطلعت ندى مع دلال جان اتييلهم فرح )

فرح : دلال تعالي معاي شوي بكلمج
ندى : خلاص فروح
دلال : ( اتعفس ويهه ) اشتبين ؟
فرح : بكلمج شوي
دلال : اوكي
ندى : كلميها يمي
فرح : مابي بكلمها بروحنا
دلال : اوكي امشي

- راحت دلال مع فرح يتكلمون بعيد –

- وندى .. اقعدت على الكراسي بالحديقة .. يه عثمان وقف يمها –

عثمان : السلام اشلونج ندى
ندى : وعليكم السلام .. و لاتناديني جذي جدام الناس جني اعرفك
عثمان : يبه من الآخر ابي اكلمج
ندى : ( انصدمت ) نعم ؟
عثمان : والله بالعطلة كلها وانا افكر فيج وانطر متى يبدي الدوام عشان اشوفج و تره صارلي اكثر من 4 ساعات وانا افتر ادورج
ندى : لو سمحت الف مره قلتلك خلني بحالي
عثمان : اول شي اخذي رقمي وبعدها اوخر وماتشوفين ويهي
ندى : وايد مصدق عمرك (خلته ومشت )
عثمان : ( لحقها ) زين قوليلي انتي مرتبطه يعني ؟
ندى : ( اوقفت ) انت ماتفهم ؟؟؟ قلتلك حل عني
عثمان : زين لا تعلين صوتج قاعدين نتفاهم
ندى : مابي اتفاهم معاك .. وماحب توقف تتكلم معاي والناس تطالعنه
عثمان : صدقيني وانتي مع دلال الناس تطالعج اكثر
ندى : استغفرالله يارب .. انت شايل حاط بالبنية
عثمان : والله ياندى ابي مصلحتج .. ماله داعي اقولج سوالفها .. اصلا عيب اقولها .. و غير جذي انا صارلي جم يوم احلم فيج ماني قادر اشيلج من بالي
ندى : ( اسكتت )
عثمان : وتره والله مو من نوعي اركض ورى البنات وارقمهم .. بس فيج شي شدني احسج غير
ندى : دام تدري اني غير يعني لازم تدري اني مابي اكلم
عثمان : والله اني ماراح اطلب شي غير التلفون .. واذا عالشوفه كل يوم اهني اقدر اشوفج حتى لو بعيد لي بعيد يكفيني
ندى : وانا مابي لا تلفون ولا غيره
عثمان : ليش ؟
ندى : بس جذي
عثمان : لا لازم فيه سبب

- يت فرح يمهم –

فرح : ( تطالع عثمان )
ندى : يللا عن اذنك ( مشت مع فرح )
فرح : منو هذا ؟
ندى : اسمه عثمان .. صارله من الكورس اللي طاف يطلع بويهي وين ما اروح
فرح : اشيبي ؟
ندى : يقولي لا تماشين دلال .. والحين يقول يبي يكلمني
فرح : دام قال لا تماشين دلال عيل شكله خوش واحد
ندى : زين اشقلتي حق دلال ؟
فرح : ماقلتلها شي بس تفاهمت معاها .. وياعمري خلاص لاتماشينها البنت سمعتها وصخه ليش تشوهين سمعتج والسبه اهي
ندى : انا اصلا عقب اللي سوته فيني صارت علاقتي فيها مو ذاق الزود .. وانتي ماكنتي تداومين والبنات الثانيين احسهم ملاقه فرديت امشي معاها
فرح : يعني اهي الحين مو ملاقه ؟
ندى : ( تبتسم ) اهي صج ماتستحي بس تره قلبها طيب
فرح : والله سمعتها اكس وتره كل اللي صارلج بسبتها حتى سالفة الدكتور ثامر
ندى : تتكلمين جنج عثمان
فرح : قالج جذي ؟
ندى : اي
فرح : والله يفهم هالصبي .. زين ماراح تعطينه مجال ؟
ندى : لا طبعا .. مابي اعيد السالفه من يديد .. واصلا خلاص قلتلج انا صرفت نظر عن الزواج وعن الحب وعن كل شي .. وبعد اللي صارلج صرفت نظر اكثر واكثر
فرح : ( تبتسم بضيق ) محد يدري شنو الله كاتبله .. يمكن حظج يكون احسن من حظي
ندى : تضايقتي من كلامي ؟ والله ماقصدت اذكرج
فرح : لا عادي والله .. اصلا انا مو متحسفه عليه اهو مافي خير والحمدلله ان افتكيت منه بس ابيه يطلقني عشان ارتاح
ندى : يعني كلش ما ودج ترجعين له
فرح : لا والله طلع من قلبي وخاطري وكل شي
ندى : ( اسكتت )
---

- مر شهرين و علاقة ندى بدلال ماتتعدى سوالف بالكلاس .. و عثمان بس يبتسم لها اذا شافها ومايه يمها من عقب ذاك اليوم .. اما حمد فما صار ياخذ ولده الا بالاسبوعين مره –

( ندى زايره فرح )

ندى : ( تلاعب نواف ) يا حلاته كبر صاير يهبل
فرح : ودي اعرف حمد شيفكر فيه ؟
ندى : اشتقتيله ؟
فرح : قلتلج ندى انا كرهته والله .. بس جذي فضول ودي اعرف اشلون عايش يعني مايحس ان مشتاق حق ولده ؟ تره ماياخذه الا بالاسبوعين مره
ندى : يمكن امهم ردت تعبت و قاعد يسافر معاها
فرح : بدق على أحمد اسأل

[SHwarviskya]

- دقت على أحمد بعد جم رنه رد عليها –

أحمد : الو هلا فرح
فرح : اشلونك أحمد
أحمد : تمام انتي اشلونج .. و نواف اشلونه ؟
فرح : ماتدق تسأل عن ولد اخوك ولا شي قلت انا ادق اسأل عنكم
أحمد : فيج الخير والله .. بس تدرين دوامات و شغل يعني زين يطلعلي وقت انام فيه
فرح : الله يعينك .. زين اشلون خالتي ؟
أحمد : بخير الله يسلمج
فرح : دوم ان شاءالله
أحمد : فرح انتي و حمد متفقين عالطلاق ولا شنو ؟
فرح : لا اهو قال بيعلقني جذي بس مايبي نرد حق بعض
أحمد : والله امركم غريب .. انا متهاوش معاه والسبه انتي
فرح : و ليش تتهاوش خله جذي متى ماقرر يطلقني خل يطلق
أحمد : يعني ماتبين تردين له ؟
فرح : لأ
أحمد : متأكده
فرح : اي متأكده
أحمد : عيل خل اقولج اللي صار و اتوقع ماراح تزيد مشاكلكم
فرح : شنو صار ؟
أحمد : حمد ملج صارله شهر ونص تقريبا
فرح : ( فجأه حست مثل سجين طعنها بقلبها ) صج ؟ من بنته ؟
أحمد : يعني عادي عندج ؟
فرح : ( قلبها يرقع وويهها تغير لونه ) اي عادي اصلا حمد ماعاد يهمني .. زين قولي من بنته ؟
أحمد : تصيرلنا من بعيد

- بجى نواف –

فرح : الله يوفقهم .. اخليك الحين نواف قاعد يبجي
أحمد : اوكي .. اسف على هالخبر بس قلت دامج مرته حرام اللي قاعد يسويه يا يطلقج يا يردج .. عشان جذي تهاوشت معاه
فرح : تسلم لازم اسكره الحين .. يللا مع السلامه ( سكرت التلفون و دموعها انزلت )
ندى : اشصاير اشفيج ؟ و شنو من بنته ؟ لا يكون حمد ...
فرح : ( تهز راسها وحنجها يرجف ) ملج
ندى : الحقير
فرح : ( شالت نواف واهو يبجي واقعدت تبجي معاه )
ندى : ( تهديها ) خلاص حياتي الله يردلج حقج ان شاءالله
فرح : والله اني مو قاعده ابجي عليه .. قاعده ابجي على حظي تزوجت واحد مثل هذا .. واللي راح ينظلم بينا هالياهل المسكين
---

- بالليل بعد ماراحت ندى –
( فرح تمت تبجي طول الليل متحسرة على نفسها وعلى ولدها .. بعد ماهدت امسحت دموعها ودقت على حمد .. وطلع عنده ويتنق .. تمت تشكل عليه ساعه كاملة واهو عالويتنق .. بعدها رد عليها )

حمد : نعم ؟
فرح : يالنذل طلقني
حمد : فرح عدلي اسلوبج معاي لا اخليج تندمين والله
فرح : ( تصرخ ) اقولك طلقني .. انت ماتبيني .. وتزوجت علي .. اشتبي مني ليش تبي تعذبني ليش ؟
حمد : وصلج الخبر يعني ؟
فرح : ( تبجي من غير صوت ماكانت تبيه يشوفها ضعيفه ) ليش تعلقني جذي ؟
حمد : بس جذي
فرح : الله يعينها عليك .. تدري لو اشوفها والله احذرها منك لأن صج انخدعت فيك
حمد : ( يضحك ) الحين انتي اللي انخذعتي فيني ؟ عيل انا شقول ؟
فرح : الاقيكم انت وخواتك يوم القيامه .. بهاليوم ربي راح ياخذ حقي منكم

( سكرت التلفون بويهه .. واقعدت تبجي بحرقة وتحط ايدها على قلبها .. كانت تحس ان روحها بتطلع )

الله حسيبك ... اجرح قريبك
وخط بيدك خط النهايه
نهايه احلى واصدق بدايه
واجرحني اجرح وبجرحي افرح
سو ما بدالك وابدأ مغيبك
روح روح روح الله حسيبك

---

- بعد جم يوم ( العصر ) فرح كانت مختنقه حيل .. راحت تتمشى عالبحر .. اوقفت عند واجهة أبل بيز وانزلت تتمشى و اقعدت عالكراسي .. كانت تحس بهم و بثقل بصدرها .. و كانت تبي تسوي أي شي عشان ترتاح .. اقعدت مده بمكانها تطالع البحر ودموعها تنزل .. بعدها يو مجموعة شباب وبنات .. جان تمسح دموعها وقامت اركبت سيارتها .. اقعدت تبجي حييل وبصوت عالي بعدها اطلعت من المسفط .. ومشت شوي جان توقف تدور كلينكس لأن من البجي خشمها بدى يصب .. اول ما امسحت خشمها و لا ترجع عليها السياره اللي اهي سافطة وراها .. كانت جيب مرتفع و سيارة ام فرح صغيره وواطيه .. الجيب دعمها بقوه من صوب بابها جان يصير فيه خفسه كبيرة بسبة الحديدة اللي تقلص –

( نزل من السياره شاب ابيض شعره كثيف .. حواجبه عراض .. لابس دشداشة و نظارة طبية من غير اطار .. اللي يشوفه على طول يقول شكلة مؤدب )

الشباب : ( راح حق فرح ) اختي انتي بخير
فرح : ( طالعته جان تبجي زياده )
الشاب : اختي صارلج شي ؟ ليش تبجين ؟
فرح : ( افتحت الدريشه وامسحت دموعها بس خشمها صاير احمر وحالتها حاله ) لو سمحت يعني انت ماتشوف وراك ؟
الشاب : ( كان وده يضحك على جملتها بس احترم نفسه ) والله ما انتبهت سيارتج واطيه وماشفتها اسف بس انتي صارلج شي ؟؟ تعورتي ؟ ليش قاعده تبجين
فرح : ( بصوت واطي ) لا مافيني شي
الشاب : ( يطالع سيارتها ) أول شي معاج وليد ال... وثاني شي الصراحه سيارتج تعورت وايد .. اخذي رقمي وخلي أي احد يكلمني الوالد اخوج أي احد
فرح : ( تخيلت ابوها اشكثر بيعصب اذا شاف الدعمه )
وليد : تبين بطاقتي بعد يعني ضمان يمكن ما ارد عليكم او شي
فرح : لا مو لازم بس عطني رقمك
وليد : ( نقلها رقمه )
فرح : ( دقت عليه عشان تتأكد من الرقم )
وليد : ( رن عنده ) خلاص .. متى ماتبون تدقون دقو وانا حاضر باللي تامرون فيه
فرح : اوكي
وليد : قولي حق الوالد في واحد ماكان يقصد ودعمني .. مابي يدق يتهاوش معاي تره والله ماقصدت ادعمج .. ولاتبجين مره ثانيه تره ماصار شي يستاهل .. اهم شي ان بالحديد مو فيج
فرح : ( ابتسمت ) اوكي .. عن اذنك
وليد : اذنج معاج
- حركت السيارة واهو ركب سيارته –

وليد : ( يضحك ) شكلها خوافه على طول بجت .. يحليلها
---

[SHwarviskya]

- 28 / انساني والتوقيع .. محبوبـك المظلـوم -

- أول ما اوصلت فرح البيت اسفطت سيارتها بطرف المظلة ( يعني ماتبين الدعمه اذا ابوها سفط على يمينها ) .. امسحت ادموعها وانزلت .. لقت امها قاعدة بالصالة –

فاطمة : ( منومه نواف يمها عالغنفه ) يمه طولتي وين كنتي ؟
فرح : أذاج نواف ؟
فاطمة : لا مسكين يهبل .. بس انتي وين رحتي ؟
فرح : كنت متضايقه شوي ورحت اتمشى
فاطمة : زين قعدي بكلمج
فرح : اذا عن حمد بروح داري والله مالي خلق اسمع شي عنه
فاطمة : بس يا فرح ابوج ....
فرح : ( اخنقتها العبرة ) ادري ابوي قالج خليها ترد بيت ريلها .. سمعته .. بروح غرفتي و خلي الخدامه تصعد نواف
فاطمة : لا خلاص خليه اهني نايم .. روحي انتي ارتاحي
فرح : ( خلتها واصعدت )

- دشت غرفتها بدلت ملابسها و غسلت و صلت المغرب .. و أول ما خلصت انسدحت تتذكر كلام حمد ونظراته و اشلون كان بكل برود يكلمها و يدخن.. انزلت دموعها جان تقعد امسكت تلفونها ودقت على عبير –

فرح : الو عبير ؟
عبير : هلا والله
فرح : في احد يمج ؟
عبير : اي الحمدلله
فرح : اقدر اكلمج ولا ماتقدرين ؟
عبير : بعد هذا اول كورس لازم الواحد يشد حيله
فرح : ( حست بغصه ) حمد يمج ؟
عبير : اي والله
فرح : ممكن تروحين بروحج اكلمج ؟
عبير : خلاص عيل اذا ببدي ادرس اقولج عشان نشوف الحل مع بعض
فرح : ناطرتج لاتطولين .. باي

- سكرت التلفون ودموعها تنزل .. كانت تحس انها محترقه من داخل .. بعد ربع ساعه دقت عليها عبير –

فرح : ( امسحت دموعها ) الو ؟
عبير : هلا فرح .. اسفه ماكنت اقدر اتكلم
فرح : عبير في سؤال بسألج اياه واحلفج بأغلى ماعندج تقوليلي اللي تعرفينه وماتخشين عني شي .. ( صوتها تغير من العبره ) انا وحمد ماعاد بينا شي و ماراح نرجع حق بعض بس مابي اروح وانا مو فاهمه شي .. الله يخليج قوليلي اللي تعرفينه
عبير : ( تضايق عليها ) شنو تبين تعرفين ؟
فرح : هدى شنو قايله عني عند حمد خلاه يتغير علي ؟
عبير : ( اسكتت )
فرح : ( بجت ) عبير الله يخليج قوليلي وتره اهو خلاص تزوج وانا واهو راح نتطلق بس بعرف اللي صار من حقي اعرف
عبير : اشدراج ان تزوج ؟
فرح : مو هذا المهم .. الله يخليج قوليلي اللي تعرفينه
عبير : الصراحة مشاعل اسمعتج تكلمين واحد وتقوليله حبيبي متى اشوفك ولهت عليك
فرح : ( انصدمت ) انا ؟؟ والله العظيم ماصار هالشي
عبير : مشاعل ماتحلف جذب
فرح : ( بجت اكثر ) بس والله ماصار شي من جذي
عبير : اتقول بعد كنتي بتعطينه فلوس .. فرح الصراحه انا بعد كذا مره كنت اشوف تلفونج يرن وانتي يمنا بس تحطينه ميوت وماتردين و مرات تفتحين الخط وتصعدين غرفتج
فرح : ( دموعها تنزل مصدومه .. استوعبت ان مكالمتها ذاك اليوم كانت مع فهد اخوها ) و حمد ليش مايه كلمني وقال اللي عنده ؟
عبير : مادري عنه
فرح : ( اضحكت واهي تبجي ) زين انتي وخالتي مصدقين هالكلام ؟
عبير : فرح والله اني احبج بس مادري اصدق منو
فرح : والله اني ما خنت حمد و اللي كنت اكلمه اهو فهد اخوي
عبير : بس انتي قلتي حبيبي متى اشوفك ولهت عليك وكلام وايد بعد و ما يتصدق ان هذا اخوج
فرح : ( حست راسها صدع ) خلاص ماعاد ينفع الكلام لا معاج ولا مع حمد .. الله يوفقه ويوفقكم

( سكرت التلفون .. واقعدت تبجي و تشاهق .. بس من القهر ماقدر تمنع نفسها و دزت حق حمد هالمسج )

" صدقت خواتك و بعتني بكل سهوله .. واللي قالولك اني اكلمه كان اخوي فهد .. بس تدري والله لو اشوفك جدامي تبجي دم مارجعت لك .. وابي اتطلق منك اليوم قبل باجر .. لأنك مو ريال و ما اقدر اعيش مع واحد مثلك"

بعد ساعه وصلها رد حمد

" انا مابي اوصخ الساني معاج .. خليني ساكت احسن .. مابي اطلع فضايحج و خلي عنج الترقيعات البايخة .. و لاتردين على هالمسج مابي اشوف رقمج "

ردت عليه " قلتلك انت مو ريال .. لو ريال جان طلقتني بعد اللي سمعته وصدقته "

- وبس بعد هالمسج ما وصلها شي من حمد –

فرح : ( تحس قلبها بيوقف ) بعتني بهالسهوله يا حمد !!

شكراً على كل شي .. قلته كذب عنـي
وأنا اللي غير الخير ما جاك شي منـي
واللـي علـي قلتـه .. لا مـا توقعتـه
ياليت كل النـاس باعونـي مـو انـت
مو قـادر أتصـور .. إن انـت تتغيـر
طيب أنا اشسويت ؟ وفي ايش أنا مقصر
أهديت لك ( قلبي ) وأخلصت في حبـي
ولكن علـى كلـن .. يسامحـك ربـي
في رايك و ظنك .. بعد اللي جا منـك
غلطان أنا لو قلت : الله الغنـي عنـك ؟
واسمحلي وبلا لوم .. لك أختصر هاليوم
انساني والتوقيع .. محبوبـك المظلـوم

http://www.6rb.com/songs/25.html (http://www.6rb.com/songs/25.html)

~ لحنها يعور القلب و أكثر مقطع يقهر ( موقادر اتصور ) ~
---

فرح : ( اقعدت تبجي لين تعبت .. بعدها دقت على ندى )

ندى : ( ردت ) الو ؟
فرح : ( صوتها باجي ) قوه ندى
ندى : اشفيج فروح ؟
فرح : عرفت اشقايلين حق حمد
ندى : صج ؟
فرح : اي يقولون اني اخونه و قالوله اسمعوني اكلم واحد و بعطيه فلوس
ندى : ( اشهقت ) ليش يجذبون جذي ؟
فرح : لا صج انا قلت هالشي بس كنت اكلم فهد اخوي
ندى : زين قوليله خل يعرف الصج
فرح : ( بجت ) ماعاد ينفع يا ندى .. صدقهم من غير لا ايي ويكلمني .. وبكل سهوله تزوج علي ؟؟!! اشلون تبيني اثق بجذي انسان ؟؟ خلاص انا لاعت جبدي منه والله لو اييني يزحف ويترجاني هم ما ابيه خلاص
ندى : خلاص حبيبتي هدي نفسج وحاولي ترتاحين
فرح : ( تشاهق ) ما ارتاح الا اذا طلقني و مابي أي شي يربطني فيه والله لو يرجع الزمن ما جان رضيت اكلمه ولا اخذ رقمه الحقير الحيـ...
ندى : خلاص فرح الله يخليج لا تبجين والله قطعتي قلبي
فرح : ( امسحت دموعها ) خلاص ندى اشوفج باجر بالكلية
ندى : اوكي .. لا تفكرين وايد .. اقري قرآن و نامي
فرح : ان شاءالله .. مع السلامه

( سكرت التلفون وتمت تبجي وتتحسر على نفسها و بعد ساعتين قامت غسلت ويهها وصلت العشى .. شوي جان تسمع صراخ ابوها .. أول شي طرى على بالها دعمة السيارة )

فرح : ( بقلبها ) الله يستر ( انزلت تحت بتشرحله اللي صار )

- بالصالة –

مشعل : ( يصرخ ) يقول مابي ارجعها .. شنو يعني بتقعد عندنا اهي وولدها ؟
فاطمة : قصر صوتك يا ريال هذي بنتنا يعني وين تروح ؟

- دشت فرح عليهم –

مشعل : ( اول ما شافها صرخ عليها ) توني دقيت اكلم ريلج قالي مايبي يرجعج انتي شمسويه هاا ؟؟
فرح : ( شوي وتبجي ) ماسويت شي
مشعل : اشلون مو مسويه شي يعني اهو مينون ؟؟ من الله جذي مايبيج ؟
فرح : ( بجت ) يبه حمد تزوج علي
فاطمة : ( اشهقت ) تزوج ؟؟
مشعل : ( يصرخ ) من رداتج تزوج ولا شاللي خلاه يسوي هالشي
فرح : ( انقهرت حيل من ابوها ) اوكي انا رديه وما ابيه بتطلق منه
مشعل : ماعندي وحده تتطلق
فرح : ( بصراخ ) مو كيفكم هذي حياتي وانا ابي اتطلق
مشعل : ( طقها طراق ) لا تعلين صوتج علي مره ثانيه
فاطمة : ( يت بينهم ) مشعل اشقاعد تسوي
فرح : ( دموعها تنزل وتحس بنار داخلها ) يمه قوليلهم يصعدون نواف ( خلتهم واصعدت فوق )
فاطمة : ليش سويت جذي ؟
مشعل : عشان تتأدب شكلج ماعرفتي تربينها عدل
---

- ماراح اشرح حالة فرح من اصعدت فوق لين نامت ( لأنها ماتنوصف ) –
- اليوم الثاني ( بالطريج واهي رايحه الكلية ) –

[SHwarviskya]

( فرح من سالفة امس واهي ماتبي تفتح على نفسها باب يديد مع ابوها .. فقررت اهي بنفسها اتدق على اللي دعمها امس ( وليد ) وتتفاهم معاه بخصوص السيارة )
– تذكير : فهد عمره 15 فما راح يفيدها .. عشان جذي اهي بروحها بتحل الموضوع –

فرح : ( دقت على وليد بعد جم رنه رد عليها ) الو السلام
وليد : هلا وعليكم السلامه والرحمه
فرح : مادري قعدتك من النوم ولا...
وليد : ( يقاطعها ) لا وين نوم انا الحين بالدوام
فرح : عيل خلاص نتفاهم وقت ثاني
وليد : لا عادي فاضي ماعندي شي
فرح : تره الوالد مسافر واخوي صغير ومايسوق فمادري اشلون عالسيارة ؟
وليد : والله اهي اظن انها تاخذ جم يوم فلازم اتفاهم مع احد من اهلج يعني عشان انخليها اهناك يصلحونها
فرح : يعني ماينفع نفس اليوم تخلص ؟
وليد : باجر عطله ( الويك اند ) نخليها عندهم و اردلج اياها بعد يومين احسن من قبل ان شاءالله
فرح : ( اسكتت )
وليد : الو ؟
فرح : خلاص باجر ادق عليك ان شاءالله
وليد : على خير .. الله معاج
فرح : مع السلامه
--

- اوصلت فرح الكلية .. وانزلت راحت محاضرتها –

( عند ندى .. كانت قاعده بروحها بالكفتريا تشرب عصير و تراجع امتحان .. و عثمان موجود بالكفتريا و كل ما ترفع راسها عن الكتاب تشوفه يطالعها .. ردت نزلت راسها و فجأه بدون مقدمات بدت تدوخ وتنمـّل )

ندى : ( بصوت واطي ) لأ لأ الله يخليك مو الحين الله يخليك مو الحين

- زاد عليها الخدار .. قامت بسرعة خلت كل شي على طاولتها ( جنطتها .. تلفونها .. الكتب ) خلت كل شي بس خذت علبة كلينكس من على الطاولة و قلمها اللي بيدها و اركضت حمام الكفتريا –

( عثمان طالعها مستغرب .. قام من مكانه وراح قعد على طاولتها )

- ندى لفت القلم بكلينكسات و دشت الحمام لقت بنتين واقفين عند المغسله يعدلون مكياجهم –

ندى : ( بصوت تعبان ) لو سمحتو طلعو بره
البنات : ( يطالعون بعض ويضحكون )
بنت 1 : اشفيها هذي ؟
بنت 2 : اشدراني الحمدلله عالعافية

- ندى وقتها ما اقدرت اتدش الحمام ( الشخصي ) لأن صغير وماراح تقدر تنسدح كانت مضطرة تنسدح بأرضية الحمام صوب المغاسل .. بنتين احسن من كفتريا كاملة .. ماقدرت تجادلهم انسدحت عالأرض و حطت القلم بحلجها .. و بدت نوبتها .. اقعدت ترجف حيل و اطرافها تشد –

( البنات أول ماشافوها اخترعو و اطلعو بره )
---

- عند عثمان .. كان قاعد يطالع كتابها .. يشوف المادة اللي تدرسها ندى .. كان تلفونها موجود عالطاولة بس كلش مافكر يمسكه .. شوي رن التلفون .. طالع الشاشه لقى مكتوب " فروحه " .. بس مارد عليها .. بعد 5 دقايق رد رن مره ثانيه هم " فروحه " ومارد عليها خلاه يرن .. واهو يطالع الكتاب سمع صوت يمه –

فرح : وين ندى ؟
عثمان : ( رفع راسه طالعها ) والله مادري
فرح : ندى دايما تنطرني اهني .. و هذي اغراضها .. اهي وين وليش انت قاعد على هالطاولة ؟
عثمان : اكيد انتي فرح صح ؟
فرح : اي انا فرح .. وين ندى ؟
عثمان : والله مادري فجأة قامت خلت كل اغراضها وراحت الحمام اللي اهناك ( أشر لها على زاوية الكفتريا ) عاد قلت اقعد احرسهم
فرح : ( خافت ) لايكون .... ( اسكتت )
عثمان : لايكون شنو
فرح : ( خلته وراحت الحمام )

- دشت لقت ندى واقفه عند المغسلة وويهها اصفر –

فرح : ندى اشفيج ؟
ندى : ( ساكته )
فرح : اشفيج كلميني ؟
ندى : ( انزلت دموعها ) ليش ردت .. كنت مرتاحه وايد .. مافي سبب يردها
فرح : صارتلج نو...
ندى : اي معني كل يوم آخذ ادويتي مادري ليش صارلي جذي فجأة
فرح : زين غسلي ويهج وامشي نرجع البيت
ندى : ( مشت دموعها وامسحت الكحل اللي ساح ) ماقدر عندي امتحان
فرح : اخذي طبية
ندى : لا مابي بمتحن
فرح : على راحتج متى محاضرتج ؟
ندى : الحين
فرح : عيل امشي اوديج
ندى : ( ساكته )
فرح : ( تحاول تضحكها ) في حارس قاعد على الطاولة
ندى : منو ؟
فرح : تعالي شوفيه

- راحت عند الطاولة لقت عثمان قاعد يتصفح الكتاب .. أول ماشافهم قام وقف –

عثمان : ( لاحظ ويهها تعبان و الكحل مخترب ) عسى ماشر ندى اشفيج ؟
ندى : مافيني شي بس شوي تعبت
عثمان : لا ماتشوفين شر ان شاءالله
ندى : الشر ما اييك
عثمان : لا تخافين محد باق شي كنت احرسلج أغراضج
ندى : مشكور ماقصرت
فرح : ( شالت اغراض ندى ) مشكور

- راحت فرح مع ندى وصلتها لي المحاضرة .. وبعدها راحت محاضرتها و أول ماخلصت ارجعت حق ندى وخذتها –

فرح : ها اشلون الامتحان ؟
ندى : الحمدلله زين
فرح : الحمدلله .. زين امشي اوصلج البيت
ندى : وسيارتي ؟
فرح : خليها اهني
ندى : لا ماقدر .. خلاص راح امشي شوي شوي وانتي سايريني
فرح : زين باجر لاتسوقين انا امر اخذج
ندى : باجر عطله
فرح : اي صح نسيت .. ( تذكرت موضوع السيارة ) ندى
ندى : هلا
فرح : امس دعمني واحد
ندى : متى ؟
فرح : العصر عند البحر .. و السيارة تعورت لازم نوديها يصلحها .. بس ما ابي ابوي يدري
ندى : ليش ؟
فرح : بس جذي مابي مالي خلق صراخه
ندى : زين عيل اشلون بتخلينه يعدلها ؟
فرح : بقولهم خليت سيارتي بالكلية لأنج تعبتي و ماقدرت اخليج تسوقين اشرايج ؟
ندى : زين يعني بتخلينه ياخذها الحين ؟
فرح : اي يردها اذا داومت بعد يومين
ندى : خلاص اوكي

- اوصلو عند سيارة ندى –

فرح : قعدي ارتاحي انا ادق اتفاهم معاه
ندى : اوكي ( دشت السيارة )
فرح : ( تمت واقفه بره ودقت على وليد ) الو ؟
وليد : الو يا هلا
فرح : آسفه اذا ازعجتك اخوي
وليد : لا مافيها ازعاج ولا شي
فرح : اذا مافي أي احراج تقدر تاخذ السيارة الحين ؟ وتردها يوم السبت ( اول يوم دوامات – سابقا - )
وليد : اي اكيد تبين ادليج الكراج بالشويخ والقاج اهناك ولا اشلون ؟
فرح : على راحتك
وليد : خلاص عيل 5 دقايق واطلع من الدوام وادق عليج
فرح : اذا مشغول تره مو لازم
وليد : لا افا عليج لو مو فاضي افضي نفسي غصب مو انا اللي داعمج ؟
فرح : ( انحرجت منه ) تسلم
وليد : ياللا 5 دقايق وادق مع السلامه
فرح : مع السلامه ( سكرت التلفون واركبت السيارة )
ندى : ها اشصار؟
فرح : لازم اودي السيارة الشويخ
ندى : يعني الحقج بسيارتي ؟
فرح : زين انتي تعبانه اشلون
ندى : لا عادي و بالرده انتي راح تسوقين يعني نفس الشي جذي جذي كنت راح اروح بيتنا
فرح : ( باست خدها ) اوكي بس ديري بالج عفية
ندى : ( ابتسمت ) ان شاءالله يللا روحي خل الحقج

( فرح انزلت من السيارة وراحت اركبت سيارتها .. دق عليها وليد وقعد يدليها المكان عدل وتم معاها عالخط لين اوصلت .. لقته ناطر اهناك بدشداشه و قحفية – مبين ان قط الغتره بالسيارة - )

( وليد اول ماشافها يه ومعاه صاحب القراج و اقعدو يطالعون الدعمه مده بعدها راح معاه بعيد كلمه و رجع حق فرح يكلمها من الدريشه )

وليد : السلام
فرح : وعليكم السلام
وليد : كلمته وقال يوم السبت الصبح تكون خالصه
فرح : ان شاءالله
وليد : اخذي كل اغراضج من السيارة لا تخلين شي
فرح : مافيها شي اصلا .. اخذ دفتر السيارة ؟
وليد : ( يضحك ) لا شكو خليه
فرح : ( سكرت السياره وانزلت ) تسلم ماقصرت
وليد : ( يبتسم ) العفو بس ماعرفت اسمج
فرح : فرح
وليد : عاشت الاسامي
فرح : عاشت ايامك

- خلته فرح وراحت عند سيارة ندى .. اقعدت مكان السايق و مشت –
( بالطريج )

ندى : هذا اللي دعمج ؟
فرح : اي
ندى : عبالي ريال كبير
فرح : ليش يعني شاللي اوحالج ؟
ندى : مادري
فرح : قال يوم السبت الصبح تخلص
ندى : يعني نسوي نفس الحركه وانيي ناخذها ؟
فرح : اذا تقدرين
ندى : اي اشدعوه اكيد اقدر
فرح : زين انتي ماراح تسوقين هاليويمن يعني آخذ سيارتج ؟
ندى : اي بس قطيني البيت واخذيها
---

- خلصت العطلة و صار وقت الدوام .. عالساعه 9 الصبح دق عليها وليد –

فرح : ( توها راكبة السيارة ) الو ؟
وليد : هلا اخت فرح .. تره السيارة خالصة تقدرين تمرين الحين تاخذينها ؟
فرح : اي ان شاءالله يعني ساعه بالكثير اكون اهناك
وليد : تدلين المكان عدل ؟
فرح : لا والله مو عدل عدل
وليد : انا ماراح اكون اهناك للأسف بس راح ادليج عالتلفون اوكي ؟
فرح : اي عادي مو مشكله
وليد : خلاص عيل بس تدشين الشويخ دقي علي
فرح : ان شاءالله

- راحت خذت ندى من بيتهم –

ندى : ( اصعدت معاها ) السلام
فرح : وعيلكم السلام والله منحرجه منج راح أأخرج عن الدوام
ندى : عادي اذا مالحقت أول محاضرة مولازم احضرها
فرح : اكيد ؟
ندى : اي والله عادي

- اول ما دشت الشويخ دقت على وليد .. و تم معاها عالخط لين اوصلت المكان –

فرح : اي كا وصلت .. مشكور ماقصرت
وليد : والله ماودي اقولج مع السلامه
فرح : ( اسكتت )
وليد : أقدر اسمع هالصوت مره ثانيه ؟
فرح : الصراحه لأ
وليد : خلاص على راحتج
فرح : مشكور مع السلامه
وليد : الله يسلمج .. باي
--

( بعد جم يوم .. فرح كانت تدرس .. جان يرن تلفونها .. طالعته و قلبها انقمت .. كان اللي يدق عليها اهو حمد .. فرح ردت عليه وايدها ترجف )

فرح : الو ؟
حمد : ( بعصبيه ) انا مابي اردج .. اذا ابوج مو راضي يفهم هالشي انتي فهميه
فرح : ( امسكت نفسها عشان لا تبجي ) ولا انا ابي اردلك .. ومالك شغل بأبوي انت بس طلقني واهو راح يسكت
حمد : ماراح اطلقج بخليج جذي عشان تتمين طول عمرج معلقة ولا تتزوجين
فرح : ( قلبها محترق ) و مرتك عادي عندها ؟
حمد : مالج شغل بمرتي .. و قولي حق ابوج لايدق علي .. تره والله اقوله عن سوالفج فاهمه ( سكره بويهها )
فرح : ( دموعها انزلت واقعدت تصرخ ) اكرهه ياربي اكرهه ريحني وخله يطلقني

( تمت مده تدعي - واهي تبجي يارب ريحني منه ماني قادره اتحمل اللي قاعد يصير فيني - .. واهي تبجي رن تلفونها بس هالمره كان وليد )

فرح : ( طالعت الرقم لقته وليد .. استغربت بس امسحت دموعها و ردت عليه ) الو ؟
وليد : الو السلام عليكم
فرح : وعليكم السلام
وليد : نايمه ؟
فرح : لا لا قاعده
وليد : مادري صوتج يا انج تعبانه او نايمه
فرح : لا مافيني شي
وليد : صج انج قلتي لا تدق .. ماقلتيها حرفيا يعني بس انا فهمتها جذي
فرح : ( اسكتت )
وليد : بس صراحه ماقدرت .. وتره انا من اول يوم شفتج وانا احس ان فيج حزن كبير .. و مادري من وقتها والله وانا افكر فيج
فرح : مافيني شي يتراوالك .. ولا تتضايق مني بس مابيك اتدق
وليد : ليش عاد ؟ والله انا حاس ان هالدعمه فال خير
فرح : دعمه فال خير ؟؟ اشلون
وليد : مادري بس احساسي يقول انها فال خير وانا على طول احساسي مايخيب
فرح : ( للحين مكالمة حمد الاخيره وطريقة كلامه ترن باذنها )
وليد : فرح انتي معاي ؟
فرح : اي معاك
وليد : يعني موافقه ؟
فرح : على شنو ؟
وليد : واتقولين معاك
فرح : لا كنت شوي سرحانه
وليد : قلت ودي تعطيني فرصة ادق عالأقل باليوم مره اتطمن عليج .. لأني للأمانه احسج مو بخير
فرح : لا انا بخير الحمدلله و مافيني شي
وليد : زين الحمدلله .. بس هم مايمنع اني اتطمن عليج
فرح : ( اسكتت )
وليد : اعتبر سكوتج موافقه .. يللا اشقاعده تسوين ؟
فرح : عندي امتحان باجر وقاعده ادرس
وليد : انتي وين تدرسين ؟
فرح : كلية الهندسه وهذا آخر كورس
وليد : بالتوفيق ان شاءالله .. يللا عيل اخليج تدرسين شدي حيلج باجر ادق عشان اشوف طلعتي الأولى ولا لأ
فرح : ( ابتسمت ) اوكي
وليد : يللا ديري بالج مع السلامه
فرح : مع السلامه

- اول ماسكرت منه التلفون .. دمعت عينها .. وارفعت ايدها تدعي –

فرح : يارب لا تخليه يعذبني اكثر .. انا مابيه ولا اهو يبيني .. يارب خله يطلقني بفضلك يا ارحم الراحمين
---

[SHwarviskya]

- 29 / سامحني -

- ثاني يوم بالكلية –

( ندى قاعده بروحها ناطرة فرح تخلص محاضرتها .. شوي جان ايي يمها عثمان )

عثمان : السلام
ندى : ( طالعته جان تحك يبهتها ) وعليكم السلام
عثمان : جنج تبيني اروح ؟
ندى : عثمان خلاص بس والله تعبت وانا اقولكم مااااابي اكلمك ولا ابي اكلم غيرك
عثمان : زين ليش يعني ؟ اكيد فيه سبب ولا شاللي يخليج ترفضيني وانا اشملحي

( عثمان طويل جسمه زين لا حلو ولا خايس .. حنطاوي فاتح .. وبس تخيلو ويهه على كيفكم بس تره اهو مو جيكر )

ندى : ( بقلبها ) اشهالثقه
عثمان : زين خلينا من هالموضوع قوليلي اشلونج بعد اللي صارلج ؟
ندى : ( ارتبكت ) اشصارلي ؟
عثمان : مو تعبتي فجأة وطحتي ؟
ندى : ( شكت ) عثمان انت تعرف شي و خاشه ؟
عثمان : ( ابتسم ) يمكن اعرف ويمكن ماعرف المهم انتي قوليلي شنو خاشه عني
ندى : وليش اقولك بصفتك شنو ؟
عثمان : بصفتي شاريج و احس بالراحه كل ما اشوفج
ندى : ( تنرفزت ) انت متى تتخرج ؟
عثمان : ( يضحك ) اي والله شكلي راح انطرد من الكلية.. قاعد على جم مادة ان شاءالله اتخرج معاج مو انتي بتتخرجين هالسنه ؟
ندى : ( قامت ) خلاص انا بروح جنه وايد تكلمنا ( مشت عنه )
عثمان : لحظة ندى
ندى : ( التفتت عليه ) نعم ؟
عثمان : أدري شنو مرضج
ندى : ( انصدمت ) من قالك ؟
عثمان : سويت تحرياتي الخاصه وعرفت اللي خاشته عني و لو اني كنت ابيه يطلع منج
ندى : دلال ؟
عثمان : زين انها قالتلي ولا جان لي الأبد الحقج وانتي ترفضيني
ندى : ( خلته ومشت )
---

- بعد المحاضرة اطلعت فرح لقت مسج من وليد كاتب فيه " ناطر البشاره " –


- فرح ابتسمت وقلبها يعورها .. بعدين دزتله " الحمدلله توني خلصت و كان سهل مشكور عالسؤال " –

( ما مداه المسج يوصل جان يدق عليها )

فرح : ( ردت ) الو ؟
وليد : هذي ثاني شي اعرفه عنج
فرح : شنو ؟
وليد : الأول انج حزينه .. والثاني انج شاطره
فرح : ( اسكتت )
وليد : ان شاءالله اقدر اوخر هالحزن
فرح : ماتقدر
وليد : ليش ؟
فرح : بس صعب
وليد : انا مستعد احاول
فرح : راح تتعب معاي
وليد : ميخالف راضي

- يت ندى لقت فرح تتكلم بالتلفون –

فرح : خلاص أكلمك وقت ثاني
وليد : على خير .. مع السلامه
فرح : مع السلامه ( سكرت التلفون )
ندى : منو هذا ؟
فرح : وليد
ندى : وليد اللي دعمج ؟
فرح : اي
ندى : شكو داق ؟
فرح : يسلم
ندى : فرح انتي من صجج ؟
فرح : اشفيج منفعله ؟
ندى : فرح انتي متزوجه
فرح : ( بعصبيه ) وهذا اتسمينه زواج ؟؟
ندى : بغض النظر عن ظروفج تره انتي للحين متزوجه
فرح : ( شوي وتبجي ) ندى حمد كان داق علي يقولي راح اعلقج لين تموتين و مابيج ولا بطلقج وخيسي عند اهلج .. شفتي الحقاره اللي فيه ؟؟ و تسمين هذا زوج ؟
ندى : ادري ان حمد مو ريال وحقير واناني بس هم اللي انتي تسوينه غلط
فرح : ماراح اطلع معاه .. ولا راح ادق عليه .. واذا اهو يبي يدق يسأل خل يدق عالأقل يخف عني القهر اللي اعيشه كل يوم
ندى : أكلملج ابوي أخليه يطلقج من حمد بطريقته
فرح : لا عفية مابي يقاطع اخوه بسبتي وهم مابي ابوي يغثني اكثر بكلامه ( ابتسمت ) اهو حتى ايده مدها علي
ندى : ( انصدمت ) شنو ؟ طقج ؟
فرح : اي والله طقني طراق لأني قلت بتطلق
ندى : وتلوميني لأني ماحبه
فرح : لا والله ما الومج

- اقعدو يتمشون واهم ساكتين فترة –

ندى : فرح
فرح : نعم ؟
ندى : يمكن مايبي يطلقج لأن مايبي يعطيج المؤخر
فرح : انا اصلا مابي منه شي
ندى : اهو جم ؟
فرح : 15 الف
ندى : انا اقول هذا السبب اللي مو مخليه يطلق
فرح : بس اهو مايتكلم عن الفلوس كلش
ندى : حتى لو ماتكلم يمكن هذا سببه
فرح : خلاص انا بقوله اني مابي منه شي ومستعده اتنازل بس خل يطلق
ندى : اي قوليله .. وساعتها لو بتكلمين وليد كيفج
فرح : ( اضحكت ) اصلا انا غبية .. المفروض بعد حمد ما أفكر اني اعرف احد كلش
ندى : ( ابتسمت ) اي والله خليج مثلي عزوبية فور ايفر
فرح : ( طقت جتف ندى ) انا راح اكون مطلقه مو عزوبيه .. انتي تزوجي وتطلقي وصفي معاي
ندى : وي اسم الله علي خليني جذي احسن ليش عوار الراس
فرح : استغفرالله صج شر البلية مايضحك
ندى : اي والله

- واهي تمشي شافت دلال مع شلة بنات لايقين عليها –

ندى : فرح شوي بكلمها بموضوع
فرح : لا تعالي والله ياويلج
ندى : شوي بس في موضوع ضروري بكلمها فيه و ارجع اقولج اياه كله
فرح : بيي معاج
ندى : لا بكلمها بروحي ثواني بس
فرح : اوكي

- راحت ندى حق دلال –

ندى : دلال تعالي شوي ابيج
دلال : حلفي بس ؟ الحين تبين تكلميني
ندى : دلال امشي شوي بكلمج بموضوع
دلال : روحي روحي حق امج اللي ناطرتج اهناك ( تقصد فرح )
ندى : ( امسكت دلال من زندها وخذتها على صوب ) قلتلج بكلمج شوي بروحنا
دلال : اشتبين ؟
ندى : انتي ليش تكلميني جذي ؟ قاعده اشوفج كل يوم بالكلاس و مافينا شي
دلال : اي اوكي وبره الكلاس مانعرف بعض .. وبعدين اشتبين تكلميني جدام فرح ؟ مو اهي مهددتني ان اذا شافتني امشي معاج راح تقول حق امي اني اماشي شباب الكلية ؟
ندى : دلال اذا في احد لازم يعصب اهو انا مو انتي
دلال : ليش يعني ؟
ندى : انتي اشقايله حق عثمان ؟
دلال : اهو سألني اشفيها مبين انها مريضه واكيد في شي خاشته عني.. عاد قلتله اللي فيج
ندى : ( منفعله ) وليش تقولين ؟ انا جم مره قلتلج هالشي ماحب اقوله حق احد
دلال : اهو قاعد يمشي وراج وانتي تصدينه من غير أي سبب .. خليه يعرف انتي اشفيج
ندى : مو منحقج تقولين هالشي اذا انا مابيه يعرفه
دلال : الحين قلته وخلصت اشصار يعني .. وبعدين اهو ماقال شي بالعكس ابتسم وقال : بس ؟ مافي شي بعد ؟
ندى : ( عصبت ) حتى لو طار من الفرح هم مو منحقج تمشين وتقولين .. هذي مرضي انا و انا الوحيده اللي لي الحق اني اقول او لأ ( خلتها وردت حق فرح )
دلال : ( طالعتها و هزت ايدها بعدين راحت حق رفيجاتها اليدد )
---

فرح : ها عن شنو تكلمتو ؟
ندى : ( قالت لها اللي صار )
فرح : دام يه وقالج شاريج واهو يعرف عن مرضج .. خلاص عيل كلميه يمكن اهو زوج المستقبل
ندى : ( اسكتت )

[SHwarviskya]

- بالبيت بعد ماردت فرح من الكلية –
( غرفة فرح )

- فرح منسدحه ترتاح ويمها نايم نواف .. رن تلفونها .. طالعت الشاشه وكان وليد –

فرح : ( ردت ) الو ؟
وليد : اشلونج فرح
فرح : الحمدلله بخير
وليد : اشقاعده تسوين ؟
فرح : والله منسدحه
وليد : عيل اخليج تنامين
فرح : بغيت شي ؟
وليد : اي بس بغيت اسمع صوتج قبل لا اقيّـل
فرح : ( اسكتت و قلبها يعورها )

- قام نواف من النوم وقعد يبجي –

وليد : منو هالياهل ؟
فرح : ( ارتبكت ) اخوي
وليد : يحليله جم عمره ؟
فرح : 7 شهور تقريبا
وليد : ريال الله يخليه
فرح : تسلم
وليد : قاعده تنومينه يعني ؟
فرح : ( تحس بتأنيب الضمير ) اي امي كبيره وماتقدر عليه وانا معاها بالبيت فكله عندي
وليد : شسمه الحلو ؟
فرح : ( خلت نواف يقعد وعطته مصاصة ) نواف
وليد : الله يحفظه هذا اخر العنقود عدل
فرح : ( ماحبت اسئلته ) اي .. خلاص وليد انا بنومه اكلمك وقت ثاني
وليد : يللا انا بنام شوي
فرح : نوم العوافي .. مع السلامه

( سكرت التلفون .. وشالت نواف تبوسه و دموعها تنزل )

فرح : ( بقلبها ) أكرهك يا حمد

- بعد مانام نواف .. دزت حق حمد مسج –

" انا متنازلة عن المؤخر .. و مابي منك شي والله .. بس طلقني ابي ارتاح "

( بعد ساعه : ياها رد من رقم غريب )

" فرح انا مريم مرت حمد .. لا تدزين له مسجات و صدقيني راح اخليه يطلقج لا تحاتين "

فرح : ( واهي تقرى المسج لا شعوريا اقعدت تضحك وتبجي بنفس الوقت ) يارب لا تريحه .. ويارب يحترق دمه مثل ماحرق دمي
---

- بالكلية ثاني يوم –
( عثمان يكلم ندى )

عثمان : اي انا ادري وراضي فيج .. و بعدين تره الصرع مو مرض معدي عشان انحاش منج
ندى : ( ابتسمت منحرجه )
عثمان : تدرين عاد .. ولد ولد عم رفيجي في صرع
ندى : شنو ؟ ماستوعبت شيصيرلك مره ثانيه ؟
عثمان : رفيجي الروح بالروح عنده ولد عم وهذا عنده ولد .. هالولد في صرع عرفتي ؟
ندى : ( تضحك ) اي استوعبت الحين
عثمان : عاد مره طاح جدامنا بس بعدين والله قام ولا جنه في شي عادي يعني مو أزمه السالفه
ندى : ( اسكتت )
عثمان : 9958
ندى : ( اضحكت ) و من قالك وافقت
عثمان : ندى خلصيني عاد ذبحتيني
ندى : ( اسكتت وامسكت تلفونها )
عثمان : ( نقلها الرقم )
ندى : ( استحت ) رايحه محاضرتي
عثمان : ( ابتسم ) الله معاج

- اطلعت فرح من محاضرتها لقت ندى ناطرتها –

ندى : ها شنو الموضوع اللي كنتي بتقولينه لي ؟
فرح : ( ابتسمت بضيق ) امس مرت اللي مايتسمى دزت لي مسج
ندى : اشتبي ؟
فرح : انا دزيت حق حمد مسج قلتله طلقني ومابي المؤخر .. جان ترد علي كاتبه لا تدزين شي و راح اخليه يطلقج
ندى : قطيعه احسها شيفه مادري ليش
فرح : عاد شيفه ولا حلوه ماتفرق دامها من مستواهم اكيد بتكون مثل مايبون
ندى : الله حسيبهم
فرح : تدرين .. احس ان اهي تنام عنده بالشقه
ندى : ليش ؟
فرح : يعني هالوقت حمد يكون نايم .. يمكن قرت المسج و اهي نايمه عنده
ندى : تحسين بغيره ؟
فرح : تصدقين لأ .. اللي سواه خلاني اكرهه .. فماحسيت بغيره .. بس حسيت بقهر على نفسي و عاللي سواه فيني لأن يدري مالي ولي سنع
ندى : الله سبحانه راح ياخذ لج حقج
فرح : اي صح ربي فوقهم و بشوف فيهم يوم
---

- مرت الأيام و خلص هالكورس .. تخرجت فرح من الجامعة .. وندى باقيلها كورس واحد تكمله بعد عطلة الربيع .. ونوره اولدت يابت بنت حلوه سمتها جنى –

( حمد مايسأل عن فرح كلش ولا يصرف عليها .. اللهم ياخذ نواف كل اسبوع او كل اسبوعين مره .. و مشعل ماكان له أي دور بمحاولة صلح .. عايش حياته سهر و ديون و صراخ )

- ندى تحس انها وايد مرتاحه مع عثمان .. و كان اذا يبي يشوفها تروح مكان عام وتشوفه غير جذي ماكنت ترضى –

( أما بالنسبة حق وليد .. فاهو صار يدق عليها اكثر من مره باليوم .. و يسولف لها عن كل شي يصادفه .. سواء بالشغل او مع ربعه او مع اعيال اخوه يعني يسولف سوالف عاديه جنه يتكلم مع واحد من ربعه .. واهي كانت ترتاح اذا دق وكلمها )


- بيوم –
( وليد يكلم فرح بالتلفون )

وليد : فرح ؟
فرح : هلا
وليد : أهلج يعطون ( .... )
- مذهب غير مذهب فرح –
فرح : ( انصدمت من سؤاله ) ليش تسأل ؟
وليد : انا وايد ارتحت لج .. حسيت انج انسانه شفافه و لو اني حاس ان في سر بحياتج .. بس انا مو نوعي الف وادور .. والصراحه ابيج بالحلال
فرح : ( حست قلبها يرقع حييل و داخت ماعرفت شتقوله )
وليد : اشفيج ساكته ؟ صدمتج ؟
فرح : ( ساكته )
وليد : ليش انتي مو حاسه اني احبج ؟
فرح : ( حست بنغزه بقلبها ) وليد والله مادري شقولك
وليد : ليش ماتدرين ؟ يعني انتي مو حابتني ؟ أو عالأقل مرتاحتلي ؟
فرح : ( اسكتت )
وليد : اشفيج ليش تسكتين ؟ قولي أي شي خل اعرف رايج بالموضوع
فرح : ماعندي شي اقوله
وليد : انا عمري 27 و ابي الحلال .. و من يوم ما دعمتج وانا احس ان انتي اللي ابيها
فرح : ( تتنفس بصعوبه )
وليد : فرح ؟ اشفيج
فرح : وليد انا ... ( اسكتت )
وليد : كملي اشفيج ليش سكتي
فرح : وليد بقولك شي وابيك تسامحني
وليد : قولي
فرح : ( بصوت مخنوق ) انا متزوجه
وليد : شنو ؟
فرح : ( صوتها يرجف ) سامحني
وليد : ( سكت فتره ) يعني الولد ..
فرح : ( تكلمه ودموعها تنزل ) ولدي
وليد : ( مصدوم ومو قادر يتكلم )
فرح : بس زوجي مايدري عني و قاطني عند اهلي و انا ...
وليد : ( من غير أي رد .. سكر التلفون بويهها )

- فرح اقعدت تبجي حيل .. وتحس بقهر وحرقة وكل ماكانت تبجي أكثر كانت تدعي على حمد –
---

[SHwarviskya]

- 30 / تحررت –

بعد هاليوم تمت فرح اتدق على وليد بس مرات مايرد عليها ومرات يحوله مغلق وكانت تدزله وايد مسجات بذكر بعضهم

" سامحني ماقصدت اجرحك "
" انا ادري اني غلطانه بس انا انظلمت وايد من ريلي وماكنت قاصده اظلمك معاي "
" ريلي ماخذاني الا جم شهر بعدها قطني من غير أي سبب و انا كنت ضايعه و مختنقه و ماقصدت اعلقك معاي "
" آسفه .. قولي سامحتج خلني ارتاح .. قول أي شي بس لا تسكت "

( بس ما وصلها أي ارد .. وحالتها ردت مثل أول وكله تبجي وتعبانه نفسيا )
---

- بيت أمل –

أمل : ( دشت على ندى الغرفة ) ها يمه قاعده ؟
ندى : ( منسدحة ) اي بغيتي شي ؟
أمل : فاطمة توها دقت علي تقول ان حالة فرح مو عاجبتها وكل يوم تبجي
ندى : ( اقعدت ) اي قبل شوي كلمتها .. لازم ابوي يتصرف مع حمد
أمل : مشعل مو راضي يقول لا تتطلق ومع الايام زوجها راح يردها
ندى : بس اهي ماتبيه يعني مو غصب خلاص
أمل : اي يمه بس لاتنسين ان عندهم ولد يعني حرام يضيع بين الأثنين
ندى : اهو ولد مو بنت مايضيع عادي
أمل : هالسالفه مافيها ولد أو بنت اهو ياهل وضروري امه وابوه يمه وبعدين صج يمكن يرد حق عقله ويردها
ندى : ومرته ؟ اهو خلاص تزوج يعني ليش نذبح فرح اكثر .. ماتبيه تره مولازم
أمل : الله يهدي بالها

- يالهم عبود –

عبدالله : ماما
أمل : تعال يمه
عبدالله : ( راحلها )
ندى : ( تبتسم له ) انت خايس
عبدالله : لاااء مو خايس
ندى : بلى خايس
عبدالله : لااااااا ( قعد يبجي )
أمل : ( شالت عبود وقامت ) تستانسين تبجينه
ندى : ( تضحك ) اهو على كل شي يبجي

( انطرت امها تطلع من الغرفه جان تمسك التلفون ودقت على فرح )

فرح : ( ردت عليها وصوتها متضايق ) هلا ندى
ندى : تبين تردين حق حمد ؟
فرح : طبعا لأ ليش ؟
ندى : لأني بخلي ابوي يطلقج منه وغصبن عليج خلاص عاد لاعت جبدي وانا اشوفج تبجين
فرح : ( اسكتت )
ندى : و اذا على وليد يمكن هالشي خيره لج
فرح : بس انا جرحته
ندى : خلاص انسي .. اهم شي هذا يطلقج
فرح : و اشلون على ابوي ؟
ندى : كيفه عاد بيذبحج يعني ؟
فرح : والله مادري
ندى : بخلي ابوي يتصرف وان شاءالله يقدر يسوي شي
فرح : اخاف يقول اشياء عني و عمي يصدقه
ندى : عاد صدق او لأ .. اهم شي تتطلقين ونفتك منه .. المهم عطيني رقمه بعطيه ابوي
فرح : ( نقلتها الرقم ) والله خايفه من ابوي
ندى : خليه يصرخ يمد ايده أي شي بس المهم انتي بعدين ترتاحين .. فروح معاي خط اكلمج بعدين
فرح : اوكي مع السلامه ( سكرت التلفون )
ندى : ( ردت عالخط الثاني ) الو هلا عثمان
عثمان : منو تكلمين ؟
ندى : فرح
عثمان : فرح ولا مفرح ؟؟ اعترفي
ندى : ( تضحك ) يعني مالقيت اكلم الا مفرح ؟
عثمان : اي ليش يعني مفرح ماله رب ؟
ندى : ( تضحك )
عثمان : زين صج اشصار على فرح
ندى : اليوم بكلم ابوي اخليه يكلم ريلها .. مايصير جذي معلقها
عثمان : الله يسهل عليها ويوفقها
ندى : آمين
عثمان : و يوفقنا بعد
ندى : ( ابتسمت ) هم آمين
عثمان : اشتقت حق الدوام
ندى : ويع
عثمان : افا .. والله اشتقت له عشان اشوفج كل يوم
ندى : ( تضحك ) عبالي مشتاق حق الدراسه
عثمان : لا اشفيني مينون
ندى : لا محشوم

- واقعدو يسولفون مدة لين اسمعت ندى صوت ابوها –

ندى : عثمان ابوي وصل خل اروح اكلمه عن فرح
عثمان : اوكي سلميلي عليه
ندى : ( تضحك ) اي اوكي يوصل .. باي

( سكرت التلفون وراحت تكلم ابوها )

- بعد ماكلمته وخلصت اصعدت مره ثانيه غرفتها ودقت على فرح –

ندى : الو
فرح : هلا ندى
ندى : توني كلمت ابوي وعطيته رقم حمد قال بيكلمه الحين
فرح : ( خافت ) صج ؟
ندى : اي يمكن الحين قاعد يكلمه
فرح : الله يستر .. يارب كل شي يعدي على خير
ندى : ان شاءالله لا تحاتين
فرح : لازم اسكره الحين نواف قاعد يبجي .. طمنيني أول بأول
ندى : اوكي مع السلامه
فرح : باي
---

- عند سامي–
( يكلم حمد بالتلفون )

سامي : يعني انت الحين متزوج و هادها ببيت اهلها كل هالمده .. خلاص عيل دام ماتبيها طلقها
حمد : انا مفكر اطلقها بس مو الحين
سامي : ليش يعني ؟ تعلق البنت جذي شنو ماوراها اهل ؟ ترى نقدر بكل سهولة نشتكي عليك و نخليك تطلق غصب وتعطيها حقوقها كلها بعد
حمد : اسمحلي عمي بس ماتقدرون .. مو من صالحها انها تشتكي
سامي : بعطيك مهله تفكر يا انك تردها .. او تطلقها .. اما هالحال اللي اهي فيه ماينسكت عنه
حمد : خلاص انا راح اتفاهم معاها
سامي : اي يا حمد مايصير جذي البنت بصوب وانت بصوب
---

- بعد جم ساعه وصل حق فرح مسج من حمد –

" راح اطلقج بس مثل ماقلت تتنازلين عن المؤخر "

- فرح شافت المسج حست براحه لأنها و اخيرا راح تتحرر منه .. ردت عليه –

" موافقه "
---

- بعد اقل من ساعه دق عليها عمها سامي –

سامي : الو يبه فرح ؟
فرح : هلا عمي
سامي : انتي قايله حق حمد انج راح تتنازلين عن المؤخر ؟
فرح : اي
سامي : ليش يبه ؟ المؤخر من حقج وحق ولدج
فرح : عمي اهو موراضي يطلقني وبيعلقني بس جذي وانا كلش مو مرتاحه .. خلاص مابي فلوسه بس المهم ابي اتطلق منه
سامي : يبه المحكمه راح تطلقج منه وانا راح اساعدج بس ليش تتنازلين ؟
فرح : عمي السالفه جذي راح تطول و خلاص انا ابي اتطلق بسرعه
سامي : ماتخافين من ردة فعل ابوج
فرح : عمي انت خلص مع حمد كل شي واذا تبوني اوقع على شي قولي بس مو شرط ابوي يدري
سامي : متأكده يبه ؟
فرح : اي والله متأكده
سامي : اللي تشوفينه .. مع السلامه
فرح : مع السلامه عمي

( سكرت التلفون واهي تبتسم بس انزلت من عينها دمعة ندم مو لأنها تطلقت .. لأ كانت ندمانه على اليوم اللي اعرفت فيه حمد )
---

- مرت 3 شهور .. فرح ماصارت اتدق على وليد .. ولا اهو دق عليها من ذاك اليوم .. وندى صارت على امتحانات الفاينل –

ندى : ( تتكلم بالتلفون ) شنو ؟؟
عثمان : حبيبتي والله ادري انها مفاجأة بالنسبة لج بس والله هالشي حاب ادرسه منزمان
ندى : انت منصجك ولا تتغشمر معاي ؟
عثمان : ليش عمري ؟ مو منحقي اصير طيار ؟
ندى : بلى بس فاجأتني
عثمان : والله انا ودي منزمان بس كنت متردد والحين ربعي قاعدين يسجلون و بسجل معاهم
ندى : ( مصدومه ) يعني خلاص راح تسافر ؟
عثمان : اي بدرس بالاردن
ندى : ( ساكته )
عثمان : كل عطله راح ارجع .. وماراح اخليج صدقيني
ندى : ( من القهر طلعت اللي بقلبها ) يعني انت مو ناوي تتزوج ؟
عثمان : اذا نويت والله ماراح تكون وحده غيرج .. بس حاليا انا بكمل دراستي و اذا صرت طيار ساعتها بتفتخرين فيني اكثر
ندى : ( انزلت دموعها .. أول مره تحس انها تحب .. اهي من قبل ممكن تكون تعلقت بأحمد بس ماحبته )
عثمان : ندوي ؟
ندى : ( بصوت مخنوق ) هلا
عثمان : قاعده تبجين حياتي ؟
ندى : لأ
عثمان : صدقييني على طول بينه تلفون و نت وكل شي
ندى : الله يوفقك
عثمان : يللا عاد بسمع ضحكتج
ندى : ( اضحكت غصب )
عثمان : ولو انها مصطنعه بس مقبوله منج .. باجر حق الدوام لبسي احمر
ندى : شكو
عثمان : بس جذي خاطري اشوفج بالأحمر .. بس مو تلبسين ضيج تره ازفج جدام الناس
ندى : ( للحين متضايقه ) ان شاءالله
---

- بيت فرح –
( فرح اوصلت لها اورقة طلاقها لي البيت .. طبعا المؤخر متنازله عنه .. بس في نفقه يصرفها لهم كل شهر )

فرح : ( ماسكه اورقة طلاقها وايدها ترجف و دموعها تنزل ماتوقف )
فاطمة : ( حطت ايدها على جتف فرح ) خلاص يمه الله يعوضج ان شاءالله
فرح : ( امسحت دموعها واهي تضحك ) يمه انا مو زعلانه .. بالعكس احس برااحه

- دش عليهم مشعل –

مشعل : اشفيكم ؟
فرح : ( واهي مبتسمه ) حمد طلقني
مشعل : شنووو!!!
فرح : اي يبه طلقني واخيرا طلقني
مشعل : ( يصرخ ) تقولينها وانتي مستانسه ؟
فاطمة : خلاص يا مشعل صار اللي صار ليش تصرخ
مشعل : بنتج تطلقت واتقولين ليش اصرخ ؟
فرح : يعني عيشتي قبل كانت زينه نفس الشي كنت مطلقه مع وقف التنفيذ
مشعل : بلا تفلسف وقف تنفيذ ما وقف تنفيذ .. خلصيني عطاج المؤخر ؟
فرح : ( تطالع امها )
فاطمة : ( ارتبكت لأنهم مو قايليله انها متنازله )
مشعل : اشفيكم ساكتين ؟
فرح : انا تنازلت عنه
مشعل : ( من الصدمه عطاها طراق قوي خله اذنها تطن ) تنازلتي ؟؟
فرح : ( تصرخ ) اي وكيفي هذي فلوسي
مشعل : ( رد طقها طراق ثاني ) واتقولين كيفي بعد
فاطمة : ( امسكت ايد مشعل ) خلاص خلها حرام عليك
فرح : ( اصعدت فوق بسرعه و اقفلت عليها الباب )

- بعد ما بجت وايد وطلعت كل اللي بقلبها.. امسكت تلفونها ودزت حق وليد مسج –

" وليد .. انا تطلقت .. و مابي منك شي بس ودي اسمع صوتك .. ابوي طقني لأني تنازلت عن المؤخر مايبي يفهم ان فلوس الدنيا ماتغني عن راحة بالي .. انا كنت تعبانه وايد .. توني اليوم احس بالراحه .. الله يخليك رد علي لو حتى بمسج "

- بعد ساعه دق عليها –

فرح : ( مو مصدقه عيونها ردت عليه و دموعها تنزل ) الو ؟
وليد : ( ساكت )
فرح : وليد ؟
وليد : هلا فرح
فرح : ( بجت ) ماكنت ادري اني راح اشتاقلك هالكثر
وليد : ليش خدعتيني ؟
فرح : ماكنت قاصده .. انا كنت معلقه ولا جني متزوجه ماعرفت شقولك
وليد : اتقوليلي الصج .. مو تصدميني فجأة
فرح : ( تبجي )
وليد : ليش تبجين ؟
فرح : مادري
وليد : تطلقتي اليوم ؟
فرح : اي
وليد : وليش تنازلتي عن المؤخر ؟
فرح : لأن لو عليه يعلقني لي الأبد .. و انا خلاص مليت .. مابي فلوسه ولا ابي شي منه
وليد : و اشلون على ولدج ؟
فرح : راح يتم عندي واهو ياخذه كل ويك اند
وليد : ( ساكت )
فرح : اذا ماودك تكلمني خلاص والله راح اتفهم
وليد : سولفيلي عن كل شي
فرح : اشلون يعني ؟
وليد : يعني كل شي .. من تزوجتيه لي هاليوم
فرح : اوكي
وليد : ومن غير أي تحريف او حذف
فرح : اوكي

- تمت فرح تسولفله عن كل شي حتى موقف لندن قالته له –

وليد : هذا مو ريال
فرح : ( ساكته )
وليد : لو كان ريال جان قعد وتفاهم معاج .. وهذا وانتي رايحه لي عنده جذي صد عنج
فرح : خله الله فوقه
وليد : زين بطلبج طلب
فرح : آمرني
وليد : مايامر عليج عدو .. بس ابي اشوفج

[SHwarviskya]

- 31 والأخير / يا دنيا ارحميني –

وليد : زين بطلبج طلب
فرح : آمرني
وليد : مايامر عليج عدو .. بس ابي اشوفج
فرح : تشوفني ؟؟
وليد : اي بشوفج انتي وولدج .. اسمه نواف عدل ؟
فرح : اي
وليد : خلاص عيل بشوفكم انتو الأثنين
فرح : ( اسكتت )
وليد : ها ؟ اشقلتي ؟
فرح : ليش تبي تشوفنا ؟
وليد : بس جذي
فرح : خلاص بس مو هالأيام .. لأن ابوي حاط علي
وليد : مو مشكلة خليها الاسبوع الياي
فرح : اوكي
----

- بعد اسبوع خلصت امتحانات الفاينل –
( آخر يوم بالكلية )

- عثمان واقف يم ندى –

عثمان : ليش تحسسيني اني بسوي جريمه .. رايح ادرس وارجع اشفيج عاد فرديها
ندى : ( ساكته )
عثمان : ( مسك ايدها ) حياتي
ندى : ( اسحبت ايدها ) عثمان خلاص عاد قلتلك اصلا ماحب تكلمني جدام الأوادم .. فاشلون لو تمسكني
عثمان : زين خلاص لاتعصبين .. كلميني اول ماتوصلين البيت
ندى : ان شاءالله

- مشت عنه .. و اوصلت لي سيارتها جان تسمع دلال تناديها –

ندى : ( التفتت )
دلال : ( لمتها حيل ) ادري ان صارت بينا وايد سوالف بس والله لج معزه بقلبي وراح افقدج
ندى : ( وخرت عنها وابتسمت ) صج انج ماكنتي خوش وحده .. بس مرات تضحكيني .. يللا كل عام وانتي بخير
دلال : وانتي بخير .. راح تتوظفين ولا مالج خلق ؟
ندى : ان شاءالله بس تطلع الشهاده اتوظف مو شي قعدة البيت تعودنا عالدوام
دلال : انا ماراح اتوظف .. امي مو راضيه .. شكلها بتزوجني
ندى : الزواج زين لج
دلال : ( ابتسمت ) راح اشتاق لج
ندى : اتصدقين انا بعد راح اشتاق لج عاد مادري على شنو
دلال : ( لمت ندى ) حبيبتي انتي
ندى : ( دزتها ) بسج بسج اشكثر تحبين التلزق والتلمم
دلال : ( تضحك ) يللا اخليج مع السلامه
ندى : موفقه يارب
( اركبت سيارتها ومشت )
---

- العصر .. بيت فرح –
فرح : ( شايله نواف ) يمه انا رايحه حق ندى
فاطمة : ماتاخذين خدامتج ؟
فرح : لا خليها ما احتاجها
فاطمة : منو يمسكه وانتي تسوقين ؟
فرح : احطه بكرسي اليهال
فاطمة : زين ردي مبجر مالنا خلق ابوج
فرح : لا تحاتين قبل ال8 انا اهني مع السلامه ( اطلعت مع ولدها )

- بالطريج دقت على ندى –

فرح : الو ندوي
ندى : ( صوتها نايم ) الو
فرح : قعدتج من النوم ؟
ندى : اي اشتبين ؟
فرح : انا قلت حق امي اني بشوفج .. أي شي يصير بقول تأخرت لأن كان في حادث وصاير زحمة.. وبعد مشواري راح ايي عندج
ندى : لحظه مافهمت ليش انتي وين بتروحين ؟
فرح : بشوف وليد
ندى : واي فروح اشلون ماتخافين الحين وضعج غير و تره كل العيون عليج
فرح : ادري وان شاءالله مايصير شي لا تخوفيني وتره ماخذه نواف معاي يعني ماراح يسويلي شي لا تخافين
ندى : اي احسن .. ديري بالج
فرح : اوكي مع السلامه

- اوصلت فرح عند المكان اللي ناطرها فيه وليد .. انزلت من السيارة واهي حيل مرتبكه راحت صوب الباب الثاني وشالت ولدها .. وبعدين اصعدت مع وليد وقلبها يرقع –

وليد : ( يطالعها وماكو أي تعبير بويهه ) اشلونج ؟
فرح : ( مرتبكه ) الحمدلله
وليد : أول مره شفتج حطيت في بالي كل شي الا انج تكونين متزوجه.. والحين اشوفج وبيدج ولدج ( ضحك ضحكه قصيره ) صج دنيا غريبه
فرح : ( تضايقت وماعلقت على كلامه )

- نواف قاعد يخربط سوالف يهال كلمات مو مفهومه –

وليد : ( قعد ينعم على ويه نواف ) الله يخليه لج
فرح : تسلم

- نواف مد ايده بيقط نفسه على وليد –

وليد : ( شاله من فرح و حطه بحضنه )
فرح : ( حست ودها تبجي ماتدري ليش )
وليد : ( يحرك فخذه و نواف يضحك .. باسه و طالع فرح ) ولدج دش قلبي
فرح : ( ابتسمت ) صج ؟
وليد : و امه دشت قبله
فرح : ( اسكتت )
وليد : ( مد ايده حق فرح ) عطيني ايدج
فرح : ( مدتله ايدها واهي ترجف )
وليد : ( مسك ايدها ) يمكن انا استحق اني اخذ بنت مو متزوجه .. بس والله اني حبيتج .. و حبيت هالولد بعد
فرح : ( عيونها غورقت )
وليد : من اليوم هالدموع مابيها أول ماتخلص العده بخطبج
فرح : لا .. مابي بهالسرعه
وليد : 5 اشهر زين ؟
فرح : متأكد ان اهلك بيرضون ؟
وليد : اهلي عمرهم ماتدخلو بحياة احد
فرح : اكيد ؟
وليد : اكيدين بعد .. وحتى لو سووها وتدخلو تره انا ريال .. والريال الصجي مايخلي احد يتحكم فيه
فرح : ( ابتسمت لأنها افهمت منو يقصد )
وليد : ( باس نواف ورده حق فرح ) يللا روحي الحين .. لا يحاتونج
فرح : وليد
وليد : هلا
فرح : دير بالك بالطريج
وليد : ان شاءالله .. وانتي بعد ديري بالج
---

- صار يوم سفرة عثمان .. كان طالب من ندى ان يشوفها قبل لا يروح .. و كانت هذي أول مره تصعد معاه سيارته –

عثمان : طيارتي بعد 3 ساعات .. ماراح تقوليلي شي يريح قلبي قبل لا اروح ؟
ندى : ( عيونها مغورقه ) الله معاك
عثمان : ( مسك ايد ندى وباسها ) والله أحبج
ندى : ( قلبها يدق بسرعه )
عثمان : ( رد يبوس ايدها ) تحبيني ؟
ندى : ( ساكته )
عثمان : ندوي تحبيني ؟
ندى : ( هزت راسها )
عثمان : ابي اسمعها
ندى : أحبك
عثمان : بعد عمري انتي .. ديري بالج على نفسج عدل .. انا بأقرب عطلة راح ارجع وكل يوم راح اكلمج
ندى : ( انزلت دموعها )
عثمان : ( مسح خدها ) لا تبجين عاد خليني اروح وانا مرتاح
ندى : ( ساكته )
عثمان : مابي اقولج خل ابوسج اخاف انطق .. بس ودي تلميني قبل لا اروح
ندى : ( اضحكت واهي منحرجه )
عثمان : اروح فدوه حق غمازتج
ندى : ( استحت )
عثمان : زين ممكن لمه وحده صغيييره ؟
ندى : ( هزت راسها – اي - )

( عثمان قرب منها ولمها .. واهي حطت ايدها على ظهره .. بعدها باس خدها و راسها ووخر عنها )

عثمان : ديري بالج على نفسج
ندى : وانت بعد .. تروح وترجع بالسلامه .. شد حيلك
عثمان : ان شاءالله
ندى : ( باست خده و انزلت من السياره )
عثمان : ( بطل الدريشه عشان يكلمها قبل لا تصعد سيارتها ) خدي هذا ماراح ينغسل لين ارد من السفر
ندى : ( اضحكت و اصعدت سيارتها ومشت و قلبها معورها على فراقه )
---

- مر جم شهر .. و بيوم كانت فرح بغرفتها تلبـّس نواف رن تلفونها .. شالته من غير لا تشوف الرقم –

فرح : الو
حمد : الو
فرح : ( انصدمت ) منو ؟
حمد : ناسيه رقمي اتهون بس هم نسيتي صوتي ؟
فرح : اشتبي داق ؟
حمد : فرح انا طلقت مريم
فرح : ( انصدمت بس سوت نفسها مو مهتمه ) وانا شكو ؟
حمد : فرح انا مو مرتاح .. كل يوم احلم فيج ونفس الحلم يتكرر.. فسرت حلمي عند كذا شيخ و طلع معناته ان انا ظالمج
فرح : ( تضحك من القهر ) لا والله ؟ توك تحس ؟
حمد : فرح خواتي ماكانو قاصدين يخربون بينا بس اللي صار ان اهم اسمعوج تتكلمين و تصرفاتج تصرفات وحده تخون وانا الحين داق ابيج تريحيني وتشرحيلي كل شي
فرح : وليش اشرحلك ؟؟ انا مو مجبوره اشرح
حمد : بس انا طلقتها
فرح : ليش خانتك اهي بعد ؟
حمد : ما ارتحت معاها ولا اهي ارتاحت معاي و اشوه كانت فترة ملجه يعني مادخلت عليها
فرح : حمد لا تدق مره ثانيه
حمد : فرح انا داق ابي اسمعج
فرح : وانا مابي اشرحلك ( سكرته بويهه )

- رد حمد يدق عليها وايد بس اهي ماترد عليه –

فرح : ( بقلبها ) توك تحس ؟ ومايتلك هالأحلام الا بعد ما عذبتني معاك

- شوي دق عليها وليد .. ردت عليه –

فرح : الو
وليد : اشلونج حبيبتي
فرح : بخير بس في شي توه صار لازم اقوله لك
وليد : ان شاءالله خير ؟
فرح : حمد دق توه
وليد : ( تنرفز ) اشيبي ؟
فرح : يقول ندمان .. و حاس ان ظلمني
وليد : نعم ؟ توه يحس ؟
فرح : اي والله توه .. و يقول طلق مرته
وليد : ( سكت )
فرح : الو ؟ وليد ؟
وليد : فرح جاوبيني بكل صراحه انتي تبـ..
فرح : ( قاطعته ) مابي ارجعله لو يوقف على راسه ويترجاني
وليد : ( ضحك ) عاد يوقف على راسه ؟
فرح : ( تضحك ) اي
وليد : يعني تبيني انا ؟
فرح : اي
وليد : انا وبس ؟
فرح : انت وبس
وليد : احبج .. عطيني رقم امج هالاسبوع بندق عليها
فرح : ( عطته الرقم ) انت كلمتهم عني ؟
وليد : اي وابوي قال دام تبيها نخطبها لك
فرح : يحليله عمي
وليد : وحتى امي تهبل تره .. واختي عمرها 13 سنه يعني لا تخافين
فرح : ( تضحك ) احسن شي
---

- وليد خطب فرح .. و فاطمة تضايقت شوي لأن مذهبه غير عن مذهبهم .. بس مشعل عصب وقال خل تتزوج ولا تقعد مطلقه –

- حالة وليد الماديه وايد زينه يعتبر غني بس مو مثل حمد –

- اتفقو وليد و فرح ان مايسوون عرس يعني مجرد حفله ملجة وتكون اهي العرس بنفس الوقت –

- قبل الملجة بيوم –

ندى : زين و اشلون على نواف .. يعني بعد ماتتزوجين وين يعيش ؟
فرح : معاي طبعا
ندى : اشلون انتي تزوجتي ؟
فرح : اي عادي لو تزوجت الحضانه حق امي .. و وليد اجرلنا يمنا عشان محد يقول شي
ندى : يحليله
فرح : زين صج ندى انا حيل متضايقه
ندى : ليش ؟
فرح : بطني للحين مارجع مثل قبل
ندى : ( تضحك ) عادي اشفيج
فرح : لا موعادي شوفي ( ارفعت بلوزتها ) للحين اهني في خطوط و ملمسه مو مثل قبل ..( نزلت بلوزتها ) وايد مستحيه منه
ندى : لا مافيج شي تهبلين .. عادي شنو يعني .. المهم ان يحبج ويحب نواف
فرح : صج ؟ يعني عادي اكيد ؟
ندى : اي والله عادي
فرح : مادري ليش احس اني مرتبكه معنه مو أول زواج لي
ندى : اي عادي شي طبيعي
فرح : زين اشلون عثمان ؟
ندى : توني كلمته .. كان يدرس عنده امتحان
فرح : يللا الله يوفقه
ندى : ماراح تقدمين على وظيفه ؟
فرح : انا بقدم بعدين .. لأني توني عروووس
ندى : ( تضحك ) اوكي عيل انا بقدم عالشهر الياي
---

- صار وقت الملجة و كان شكل فرح وايد حلو لابسه نفنوف اوف وايت وايد ناعم ورافعه شعرها .. كانت جد حلوه .. و جسمها كان وايد حلو و مومبين عليها ان عندها ولد -

( ندى اقعدت ساعه ونص تقريبا عقب ردت البيت لأنها خافت تتعب )
--

- وليد كان طاير بفرح و بنواف بعد .. و أهل وليد كلهم طيبين مع فرح –

كل شي في دنيتي له طعم ثاني .. الليالي طولها طول الثواني
والعمر مره وانا عمري معاك .. ياعساني ما انحرم شوفك عساني
ابتدى عامي وشمسك ماتغيب .. لو يغيب الكون كله ماتغيب
من خريف القلب لك ببني قصور .. تآمر وكل الأماني لك تجيب
في شتاء عمري ألاقي بك دفا .. ياللي نظراتك تعلمني الوفا
وآخر فصولك ربيع مزدهر .. مايل بغصنه لوردك تقطفه

[SHwarviskya]

- بعد زواجهم باسبوعين –
( كان اليوم اللي ايي السايق ياخذ نواف و يوديه بيت أهل حمد )

- بهاليوم طلع وليد مع فرح من البيت و كان شايل نواف .. يعني علساس يعطون نواف حق السايق وبعدها يطلعون اهو و فرح السينما .. بس لقو حمد واقف ناطر بره –

فرح : ( وخرت ويهها ماتبي تطالعه )
حمد : ( يطالع وليد بنظرات غريبه ) اشلونك يالمعرس
وليد : الحمدلله بخير و مرتاح
حمد : ( خذه نواف من ايد وليد واهو يطالع فرح ويخزها )
وليد : ممكن ما تطالع مرتي بهالطريقه
حمد : قاعد اتذكر ايامنا الخوالي
وليد : ( عصب حيل ) والله لو مو الياهل بيدك جان عرفت أأدبك
فرح : ( امسكت زند وليد ) خلاص وليد امش مانبي مشاكل
وليد : ( مسك ايد فرح ومشى )
حمد : ( قعد يطالعهم و بنظرته حسره وندم )
---

- بعد جم شهر ندى توظفت وبيوم كانت راده من الدوام الظهر عالدايري السادس.. الشمس قويه و ندى كانت تعبانه من الشغل .. فجأة حست بدوخه قوية و جسمها بدى ينمل –

ندى : لا يارب ( تطق هرن حييل عشان السيارات والشاحنات توخر عنها كانت تبي تروح على حارة الأمان ) وخروو ( تطق هرن حيل و تحاول تقرب عاليمين بس محد يعطيها مجال )

- ندى خافت حيل لأن خلاص اهي على خط سريع والسيارات ماتعطيها أي مجال عشان توقف .. فجأة يتها النوبه وقلبها يقول خلاص كافي (( يادنيا ارحميني )) .. شدت كل اطرافها .. ريلها داست البانزين بكل قوتها .. واهي عالخط السريع .. مشت السياره بسرعه كبيرة وطق طرفها بالصبه بعدها اقعدت تقلب 4 مرات .. حاشت وايد سيارات يمها و الشارع وقف .. في ناس تعورو بس مو وايد مجرد جروح انزلو الناس من سياراتهم بيشوفون ندى .. كانت سيارتها مقلوبه و مخفوسه .. أي احد يطالع شكلها يقول صاحبها مات –

- يو الشرطه والاسعاف طلعو ندى من السياره كانت كلها دم مو مبين لونها .. و بسرعه انقلوها عالمستشفى –

- و الشرطه دقت على أهلها وقالت لهم ان بنتكم مسويه حادث والكل راح عالمستشفى –

( بالمستشفى )

سامي : ( لام أمل ) تعوذي من ابليس وان شاءالله مافيها الا العافيه
أمل : ( ميته بجي ) بس للحين محد طلع و بشرنا والله اذا راحت بنتي اموت
سامي : لا تقولين جذي تعوذي من ابليس الله رحيم .. وراح تقوم صدقيني

- فاطمة و بناتها يو يركضون –

فاطمة : ( ايدها على قلبها ) ها بشرو اشلونها ؟
أمل : ( تبجي ) والله للحين محد طمني بنتي راح تروووح مني
سامي : خلاص يا أمل استغفري ربج
فاطمة : ( دموعها انزلت ) يارب رحمتك
فرح : ( تبجي من غير صوت ) الله يشافيج يارب

- شوي طلع الدكتور وويهه مايبشر –

الدكتور : خلو ايمانكم بالله قوي
أمل : ( امسكت سامي ) اشلون بنتي ؟
الدكتور : البنت فيها وايد كسور حتى عمودها الفقري متضرر .. وفي شرخ بجمجمتها و ..
أمل : ( اقعدت عالأرض واهي تبجي ) بنتيي .. لا الله يخليك لاتقول عنها جذي
سامي : ( يقومها) قومي قعدي عالكرسي خلاص انا اكلم الدكتور
فاطمة : ( تبجي ) كمل دكتور بنتي اشفيها بالضبط ؟؟
الدكتور : يطالع امل وماتكلم
أمل : ( تصرخ واهي تبجي ) قول اشفيها لا تسكت
الدكتور : ندى دشت غيبوبه دائمه
أمل : ( امسكت قلبها ) يعني ماراح تقوم ؟؟
الدكتور : خلو ايمانكم بالله كبير .. بس حالتها ماظن راح تقوم منها .. بس الله كبير و...
أمل : ( انهارت جان يمسكها سامي )
سامي : ( دموعه تنزل ) الله كبير حبيبتي الله كبير
فاطمة : ( لامه فرح واهم ميتين بجي )
نوره : ( دموعها تنزل .. يمكن اندمت عاللي كانت تسويه بحق ندى )


- و كل يوم ولمدة (( سنتين )) يعني لي هاليوم و اهل ندى يزورونها ويدعون لها انها تقوم من غيبوبتها –

- نفسية فرح اتعبت و صارت مو مثل فرح الأوليه .. كل ما تشوف ندى بهالحالة تبجي .. بس مع الأيام الواحد يتأقلم
و ماله الا الدعاء .. بس أمل اللي للحين حالتها تكسر الخاطر .. بس الله عوضها بعبدالله .. واللي اسمعوه من الأطباء ان في ناس يقعدون يغيبوبتهم 12 سنه وفي بعضهم يتمون جذي لين القلب يوقف بروحه .. وفي اللي الله يرحمهم برحمته ويقومون .. الله يوقمها بالسلامه يارب -

----

- فرح قالت حق عثمان اللي صار .. و تأثر وايد و تعبت نفسيته و يه زارها و طالعها من بعيد .. بعدها رد سافر .. و ماندري عنه شي .. يمكن عاش حياته ولهى بدراسته الله يوفقه –


- و وصل خبر حق فرح من عبير ان حمد حالته مو زينه و كله ساكت و متضايق .. و امه الحمدلله تحسنت وراح عنها المرض و حاولت تزوجه وايد بس مارضى يتزوج مره ثالثه .. اما هدى فسمعنا عنها خبر يضيق الخلق .. ولدها اصغر واحد عمره 4 سنين اندعم و مات .. فرح وايد تضايقت من هالخبر .. مهما كان الضنى غالي و محد يبي هالشي يصير حتى لو حق عدوه .. بس أمر الله ومحد يعترض عليه .. ومشاعل على حطتها –

- اما وليد .. فالله يخليه حق فرح .. لأن حاط عينه عدل عليها اهي و نواف .. واهي احملت منه مره بس طاح الياهل بالشهر الرابع .. و الحين اهي حامل بشهرها الثالث الله يثبته و يقومها بالسلامه يارب –

~ كل الحب حق ندى .. الله يقومج بالسلامه يارب ~

ساعات احس ان الزمن قاسي ولايمكن يلين
وساعات احس ان الفرح محال ولا يمكن يحين
هذا اللى شفته بدنيتى وكل ما مضالى من سنين
يا من يعلمنى الفرح وفرح القلب الحزين
اشكي مرارت حيرتى بدنيا ماضنى بتزيل
واذا بدي بعينى الامل تجد احزانى وتبين
روح زمانى وانتهى وترك لى الجرح الدفين
دنيا كفى الله شرها تخلى كل قاسي يلين

http://www.6arab.net/ViewSong/206998.html (http://www.6arab.net/ViewSong/206998.html)

---

[شفايف عسل]

شوارفسكيا الله يعطيج الف عافية عالقصة بس اخر شئ عورنى قلبى على ندى.. شووقى لقصصك الجديدة والمشووقة لا تحرمينا جديدج.

[SHwarviskya]

الله يسلمج نورتي وانشالله انتظري الجديد

[@أمير الشوق@]

شوارفيسكيا قصة جميله الله يعطيج العافيه عليها

وتقبلي مروري
امير الشوق

[SHwarviskya]

الله يسلمك نورت اخوي