بدون زعل ياشباب الفرق واضح

[فراشة الجامعه]

[align=center]مافينا من الزعل.....كاااااااااااك


بسم الله الرحمن الرحيم





في الحقيقه والواقع .. المقارنه ثقيله على جبد الشباب .. لكن هذا شي ( لابد ) ان يكون .. عشان شبابنا المحترمين .. دايما كانو يقارنون بنات الخليج بـ هيفا ونانسي و رولا وغولا وغوريلا .. لكن جا الوقت اللي لازم يشوفون الحقيقه بعيونهم الاربع




- مهند -

يرجع من الدوام في الشركة .. يروح لـ نور .. يبوس راسها .. وبحنان يحضنها .. الللله يا حلاتهم عصافير الجنة .. يقولها :
( وحشتيني .. ما بـقدر اتحمل بُعدك عني ! بكفــي 8 ساعات بالشركة ما بشوووفـك ..!

شباب الخليج -

يرجع الخليجي من الدوام .. يروح لـ زوجته .. ويهه مكشر صايدته الشمس .. يدش على زوجته لا سلام ولا كلام .. يفصخ هدومه ويحذفهم على السرير او على الشماعة .. ويزيد على برودة المكيف ويقول لزوجته :

( بسرعه حطي الغدا ميت يوووع .. المدير ذبحني بالشغل الله ياخذه ! بسررررررررعه حطي الغدا ما تشوفيني تعبان وابي اكل وانام ؟؟)



- مهند -

نور حامل .. يا الله على الدلع ! خايف عليها من نسمة الهوا .. ويقولها :

( كلّي حبيبتي مشانك ومشان ابننا ! وديري بالك على صحتك .. وما تزعلي ابـــداً مشان البيبي ما يزعل منــــووووووب)


- شباب الخليج -


مرت الخليجي حامل ! ومسكينه الحرمه متنسيه بـ تفاح اخضر .. عاد يقولها :


( اووووووووفففف !! شوفي لا اتنسين فوق راسي !! بلعي تفاح احمر وانتي ساكته .. مو لازم اخضر ! اهو كله تفاح .. لا اتفلسفين علي)

- مهند :


مهند طالع مع نور السوق .. يشترون لهم هدوم .. ودار الحوار التالي :
نور : حبيبي .. شو رايك بالفستان الاحمر .. حلو مو ؟!
مهند : أيـــــــه ! حلو كتير .. بس لو لبستيه بيجنن اكتر .. انتي بتحلّي الفستان !
نور ( مستحيه ) : بحبـــــــــــك .. دخيلك منين جايب كل هالغزل هااد ؟
مهند : دخيلك انتي ! تؤبرنـــي ابتسامتييك شو حلوه !

- شباب الخليج -



الخليجي طالع مع زوجته السوق .. ما دار بينهم حوار .. ليش ؟!
لان اهو يمشي قدام .. وهي وراه تركض ..



وكل اللي قاله ( بسرعه خلصي .. ابي ألحق على ديوانية الربع ) !


- مهند -


قام من النوم نص الليل .. ما شاف زوجته يمه .. جان يخاف .. راح يدورها ويحاتيها .. ويوم لقاها رايحه تشرب ماي بالمطبخ .. قال لها


( لِـــك ! شغلتي بالي عليكــي .. وين كنتي ؟! بتشربي ميّ ؟! بالهنا حبيبتي مطرح ما يسري يمري)


- شباب الخليج -


قام من النوم نص الليل .. ما شاف زوجته يمه .. فتح الليتات .. قام يصارخ :



( فطووووووووووووم ويهـــــــد .. فطووووووووووووم وطاعون .. فطووووم وايدز .. فطووووم كنسر ان شاء الله .. وينج انتتتتتتتي ؟؟!! خليتي باب الدار مفتوح نص سنتيمتر .. وهوا المكيف كله طلع برا وصار حرررر .. ما تحسين .. دمج بارد .. الله ياخذ اليوم اللي فكرت اخذج من اهلج فيه)


- مهند -

قاعد يقرا كتاب .. وفجاه ياته نور .. لابسه فستان يديد .. وصار هالحوار ..


نور : حبيبي شو رايك بالفستان الجديد ؟!
مهند : بيجنن عليكي ! اخذ من جمالك قطعـــه ..


- شباب الخليج -


قاعد يطالع مباراه ريال مدريد وبرشلونه .. خو شبابنا مو مال كتب وثقافه !
و زوجته مستانسه بالفستان اليديد .. تبيه يشوفها .. طافت جدامه عشان يشوف .. وصار هالحوار :

الخليجي : قوووووووووووومي قامت ركبّج وما اقعدت ! ما تشوفيني اطالع المباراه ؟!
الزوجه : حبيبي شفيك .. كنت ابيك تشوف فستاني اليديد .. شرايك ؟!
الخليجي : وجذي تخربين علي المباراه .. ما شفت حركة رونالدينهو الحين طافتني كله منج !
الزوجه : انزين عاااد .. شرايك بالفستان ؟!
الخليجي : شالموضة الخايسه اللي طالعين فيها انتو يالبنات ؟! هذا فستان بذمتج ؟! لو لابسه خيشة البصل وايد احلى .. مخصره خيشة البصل ما تفرق !!




طبعا الفروق لو بقعد من الصبح للحين .. ما بخلص ..
لان 180 درجه فرق .. ولكن شنسوي .. الله كاتب لنا ان نجابل شبابنا
ونحتسب الاجر عند الله ..


الله ياجركم يا بنات الخليج ..
صدقوني .. كله اجر وثواب ..

م . ب . ي . و . ق

[MiLano]

أول شي يا فراشة الجامعة مشكووووورة على هذا الموضوع اللي راح يلقى

ردود ومناقشات كثيرة ..


ثاني شي مو كل شباب الخليج مثل ما قلتي انتي

في ناس رومنسيتهم مالها حدود وما تنوصف وماتتقارن بمسلسلات

وبعدين كل اللي قاعدة تقولينه عن مهند ونور ومادري منو .. هذا كله ( تمثيل في تمثيل )

والواقع شي ثاني .. وأنا قاري خبر عن نور أن زوجها الحقيقي رافع عليها قضية بسبب لقطات

بالمسلسل مع مهند ... هذيل اللي تبينا نقتدي فيهم !!!!؟؟ قضايا ومحاكم وبلاوي !!!!؟؟


الزواج توفيق من رب العالمين وكل واحد فينا بيآخذ نصيبة سواء يلقى بنت الحلال اللي تسعده

ويسعدها وإلا اللي تلقى ولد الحلال اللي يصيرلها ستر وغطا ويعيشها بسعادة وهنا ..


وإذا إهي راده على نور ومهند ويحيى ولميس وشلتهم عسانا ما نصير مثلهم

ولا نقتدي فيهم ... ما دام الحمل عندهم قبل الزوااااااااج !!!!!!!!!!!!!!!!


وسوري على الإطالة ومشكوووووووورة فراشة مرة ثانية :)

تحياتي لج

.
.

MiLano

[غلا الكويت]

مشكوره عالموضوع الحلو

بس انا اختلف معاج

موكل الرياييل يعاملون حريمهم بالطريقه الي تتكلمين فيها


عندنا شباب مثل الذهب ويدارون حريمهم مدارى ولا احلى

لايقصون عليج مهند ويحيى

وتقبلي مرري ومشاركتي عزيزتي

[الصفي]

والله عقب ميلانووو و غلا الكويت

لا تعليق على الموضوع

وتقبلوووا مروري

[أحلى البنات]

الوسامة لاتتوقف عند هؤلاء كيحيى ولميس ونور ومهند وليس في الشعر الأصفر أو العينين الزرقاوين أو اللباس الرائع الجميل أو لون البشرة ولا بالرومانسيه المصطنعه بل تتوقف في مكارم الاخلاق واجمل معاني الرجوله العربيه الاسلاميه


بالله عليكي أخبريني هل الوسامة توقفت عند هؤلاء !
بالله عليكي هل نحن متعطشون لقصص حب و حنان و دفء و مشاعر تركية؟!
بالله عليكي أخبريني لما تحولت متابعة المسلسلات من تسلية إلى هوس!

<< اعترف لج وبكل صراحه انا تابعت الحلقات الأولى من المسلسل ولكن !!!!

ولله الحمد توقفت من متابعته لأسباب لا استطيع حصرها وايضا حتى لا ابتعد عن صلب هذا المووضوع ...


وبصراحه انا عندي الرجل العربي -- والكويتي بصفه خاصه -- اظفره بمليوووون من مهند :Encourages:


اللهم اهدنا وثبتنا على دينك


تقبلي مروري ونقدي حبوبه

[عادل العنزي]

والله بصراحه انا اشوف المقارنه واقعيه ههههههههههاي حلوة

[فراشة الجامعه]

اشكر كل اللي مروا وشاركوا بالموضوع

وتفاعلوا في ردودهم

صح كلامكم مو كل الشباب شينين ولا كل البنات زينين

في الزين وفي الشين بس هذا مايمنع انى اوضح الفرق في الاسلوب والتعامل

ولا تقولون لي انكم بيرفكت بالتعامل مع زوجاتكم

[فراشة الجامعه]

وبصراحه انا عندي الرجل العربي -- والكويتي بصفه خاصه -- اظفره بمليوووون من مهند


عزيزتى احلا البنات اشكر لج مرورج وردج علي هالموضوع

وتعليقا علي كلامج

انا اقولج الرجل الخليجي يسوى الف واحد من اشكال مهند وخاصه الكويتى مانختلف

بالراي بس انا حبيت اوضح الفرق بالاسلوب وهذا موراي راي اغلبية البنات اللي اعرفهم واللي

اشوفهم واللي تفاعلوا معاي بهالنقطه من قبل

وعلي فكره انا مااشوف مسلسل نور ومهند لانه وايد ماصخ

بس هذا مايمنع انى اعلق علي اسلوبه الراقي في التعامل

[فراشة الجامعه]

مشكوره غلا الكويت علي مرورج

وشي اكيد انه تمثيل بس ياجماعه لاتخلونه ننكر الواقع واللي نشوفه انا مااتكلم علي تجربه

شخصيه انا اتكلم بصوره عامه ومجتمعنا خاصه

[فراشة الجامعه]

يسعدنى مرورك ميلانوا ومشاركتك بالموضوع واحترم رايك

وانا من الناس اللي الله عطانى ذهبه في التعامل الراقي واسلوب احلي منه مافي بس انا قاعده اطرح مشكله وايد يعانون منها في مجتمعات وايد

وتقبل تحياتي

[شقردي]

مشكوره فراشه على الموضوع ويعطيج العافيه متالقه دائما في مواضيعك
بس انا اختلف وياك مو كل الشباب نفس الي وصفتيهم في موضوعك مع انه فيه شباب نفس الي وصفتيهم في مو ضوعك لانكنهم اقليه بس الاغلبيه يحترم زوجه ويقدرها
ولا لاني انه لازم يكون الشباب الخليجي لازم يكون نفس الافلام او المسلسلات
---------
انا ملاحظ انه صار اقبال على مسلسل نور وصار بعض الاشخاص يبي يكون نفس شخصيات مسلسل نور
------
تقبلي مروري
الموسى

[bo mash3l]

مشكورة فراشة على مقارنتج السهلة جدا" ،،،
وانا ابي أضيف على مقارنتج بعض النقاط عشان صج تكتمل المقارنة وصج يكون في فرق واضح ولا بدرجة 360 بعد ،،
مهند ،،،
شاب مثلي شاذ جنسيا ، عضو في جمعية المثليين الجنسية الالمانية ، عارض أزياء ( موديل ) لمجلة ألمانية جنسية ، مع العلم ان هذا الشاذ عنده جنسيتين ( تركية و ألمانية ) ، في تركيا يعتبر ممثل من الدرجة الثالثة ، الاتراك نفسهم لا يشاهدون مسلسل مهند بطلة لأنهم يعرفون ماضيه ،
شباب الخليج ،،،
رجال بمعنى الكلمة ، تعاملهم راقي مع أزواجهم ، يغارون عليهم من باب الحب وليس الشك ، يلبون طلبات حريمهم بأسرع صورة ،

اقول : صحيح ان في بعض الرياييل لا يصلح لأن يكون زوج وهذ شي واقعي قاعد نشوفه بحياتنا اليومية ومن ناس مقربين واصدقاء ، ولكن هذا الشي لا يعمم لأن في هناك أزواج صالحين ويخافون الله في حريمهم ،،

اقول : ان الغرب اذا بقى يصدر شي للمسلمين ما يصدرلهم الا الشي الهابط والفاسد والمسلمين اذا بقوا يستوردون شي من الغرب ما ياخذون الا الفاسد والهابط ،،
وهذ الشي احنا قاعد نشوفه في بعض من المسلمين ( أوكد ان في ناس تخاف الله وما تسوي هالشي ) ،،
عموما ، ان اعتقد ان المسلسلات بصورة عامة وبدون استثناء ( لا تخدم المجتمعات الاسلامية والعربية بل تحطم وتهدم ) ، ولا تقولولي ان هذا فن والفن رسالة والرسالة خدمة المجمتع وتوعيتيه وتثقيفه ،،،،
شنو سويتوه ( رسول والعياذ بالله ) !!!!
ماني مطول عليج ولا على جميع اللي يقرون الموضوع ، ولكن بإختصار وبسهولة المقارنة مفقودة وذلك لأنج تقارنين بين السماء والارض ، وبين الشمس والقمر ،،
وتقبوا تحياتي ،،

[مسلم الرشيدي]

السلام عليكم ورحمة الله وبركاته..........


اختي فراشه الاخوان والخوات قالوا قبلي وماقصروا عن هالموضوع وانا جيت متاخر بس حبيت اقول كلمه لج ولكل البنات خواتنا الخليجيات خصوصا اللي متعلقين بالمسلسل وابطاله.....

الدين الاسلامي والحمدلله يفخر انه اكثر دين عز المره وعطاها قدرها وقيمتها والشاب او الزوج اذا التزم بتعاليم دينه راح يكون احسن من مليون مهند بالمعامله ويكفي ان الرسول صلى الله عليه وسلم حتى باخر حياته يوصي بالنساء((استوصوا بالنساء خيرا"))((رفقا" بالقوارير)) ((خياركم خياركم لنسائهم)) والاحاديث كثيره في ذلك فلو التزم الجميع بتعاليم واوامر ديننا الحنيف لما اشتكى احد من الاهمال العاطفي....


والموضوع ليس للرجال فقط بل حتى البنات والزوجات لهم نصيب يعني كل بنات الخليج ينفع معاهم اسلوب الحب والرومنسيه...؟؟؟


بعض الشباب يشتكي ان زوجته بالاسبوع مره تطبخله او ماتطبخله ولا تغسل هدومه ولا تخدمه ولا حتى تهتم فيه والشغل على المسكينه الخدامه والزوج كل مايبي شغله نادى ميري تعالي عطيني ماي تعالي حطيلي الغدا.....

صح ولا لا....؟؟؟؟


يعني لاتشكيلي ابكيلك.....


تقبلي تحياتي....

[فراشة الجامعه]

اشكر كل اللي مروا بس للاسف مافي احد فهم اللي اقصده وانا مو ضد شباب الخليج بالعكس وضحت ان الشاب الخليجي اظفره يسوى الفواحد من مهند بس انا اقصد الاسلوب للتوضيييييييييح

[جـــوري]

اهلا فراااشه .. الجاامعه ..... أسعدتني بهذااا الطرح ... فقد أدخلتي علياا البهجه والسرور ...

ربماا اختلط .. على الجميع ... مااكتب في هذاا الموضوع .... وربما اخذالبعض الموضوع على

محمل الجد ...

والذي يظهر لي من خلال طريقه العرض ... والطرح .. ان الهدف فقط من الموضوع ..

اثاره البهجه والسرور ...والذي يظهر ايضااا من خلال العنوان ايضااا

( بدون زعل يا شباب الفرق واضح )

ولكن ربما لو كان هذا الموضوع .. في الفرفشه .. لكان افضل .. لان البعض حمله .. على

محمل الجد ...وظن انه موضوع لنقااش ....

وليس المقصود منهالطراافه والضحك .. .لك كل الشكر على اشااعه البهجه ...

وكلناا شوووق إلى جديدك ....

اختك قلم حر .....

[جـــوري]

السلام عليكم ورحمة الله وبركاته..........


اختي فراشه الاخوان والخوات قالوا قبلي وماقصروا عن هالموضوع وانا جيت متاخر بس حبيت اقول كلمه لج ولكل البنات خواتنا الخليجيات خصوصا اللي متعلقين بالمسلسل وابطاله.....

الدين الاسلامي والحمدلله يفخر انه اكثر دين عز المره وعطاها قدرها وقيمتها والشاب او الزوج اذا التزم بتعاليم دينه راح يكون احسن من مليون مهند بالمعامله ويكفي ان الرسول صلى الله عليه وسلم حتى باخر حياته يوصي بالنساء((استوصوا بالنساء خيرا"))((رفقا" بالقوارير)) ((خياركم خياركم لنسائهم)) والاحاديث كثيره في ذلك فلو التزم الجميع بتعاليم واوامر ديننا الحنيف لما اشتكى احد من الاهمال العاطفي....


والموضوع ليس للرجال فقط بل حتى البنات والزوجات لهم نصيب يعني كل بنات الخليج ينفع معاهم اسلوب الحب والرومنسيه...؟؟؟


بعض الشباب يشتكي ان زوجته بالاسبوع مره تطبخله او ماتطبخله ولا تغسل هدومه ولا تخدمه ولا حتى تهتم فيه والشغل على المسكينه الخدامه والزوج كل مايبي شغله نادى ميري تعالي عطيني ماي تعالي حطيلي الغدا.....

صح ولا لا....؟؟؟؟


يعني لاتشكيلي ابكيلك.....


تقبلي تحياتي....

عذرااا أخي كويتي ... بالنسبه للحديث ,,,

قال ..الرسول عليه الصلاة والسلام قال : " خيركم خيركم لأهله وأنا خيركم لأهلي ..."

عذراا على المدااخله ... ولك كل الشكر والا متنااان ...

[مسلم الرشيدي]

عذرااا أخي كويتي ... بالنسبه للحديث ,,,

قال ..الرسول عليه الصلاة والسلام قال : " خيركم خيركم لأهله وأنا خيركم لأهلي ..."

عذراا على المدااخله ... ولك كل الشكر والا متنااان ...

السلام عليكم ورحمة الله وبركاته....

اختي واستاذتي قلم حر.......


بالنسبه للحديث الليانا ذكرته هو حديث عن الرسول صلى الله عليه وسلم برواية الترمذي وصححه الالباني وهو حديث اخر غير اللي انتي ذكرتي.....

للعلم فقط استاذه....

"" فقد رواه الترمذي بلفظ: أكمل المؤمنين إيماناً أحسنهم خلقاً وخياركم خياركم لنسائهم. وقد صححه الألباني.""


تقبلي تحياتي....

[جـــوري]

السلام عليكم ورحمة الله وبركاته....

اختي واستاذتي قلم حر.......


بالنسبه للحديث الليانا ذكرته هو حديث عن الرسول صلى الله عليه وسلم برواية الترمذي وصححه الالباني وهو حديث اخر غير اللي انتي ذكرتي.....

للعلم فقط استاذه....

"" فقد رواه الترمذي بلفظ: أكمل المؤمنين إيماناً أحسنهم خلقاً وخياركم خياركم لنسائهم. وقد صححه الألباني.""


تقبلي تحياتي....

لله درك يااكويتي ...

صدق رسول الله عليه الصلاة والسلام ,,, وعذراا كويتي ربماا اعتقدت .. انه الحديث الذي كثير

مايتدواله الناس .. وآسفه ,,, وهااا هناااانت كنت استااذااااا راائع لي .. ومنكم

نستفيد ...ونحمد الله اننا مسلمااات .. فقط منا الله ...علينااا بحقوق .. ميزنا بهاا عن الدياانا ت

الاخرى...ويكفيناافخراا .. أن خطبه وداع النبي عليه الصلاة والسلالام .. كان بها الرسول

يستوصي بالنسااء فهنئياا لناا نحن امعشرر النساااء ....

[عبدالله المطيري]

شكرا جزيلا علي الموضوع بالنسبه لمهند صراحه المسلسل تمثيل بتمثيل وهذا مطلوب منه ان يؤدى الدور المطلوب منه وياخذ مبلغ من المال علي ذلك والكاتب طلب منه ان يكون بهذه الصوره والمسلسل عن قصة حب ولا زم يكون الممثل جذيه ولا نعرف بالحقيقه شلون اهو يعامل حبيبته او زوجته وبالنسبه للخليجي اصابعج مو سوى


والخليجي فيه حب ورومنسيه وعلاقته مع حبيبته او زوجته كلها حب وحنان وبعضهم عكس ذلك


تقبلي تحياتي
عبدالله المطيري

[محمد الصليلي]

يعطيج العافيه اختي فراشه والمعلومه وصــلت


ومشكوره على الموضوع


تحياتي

[جار القمر]

اساساً كاتب الموضوع

دمج مفارقات غير واقعية

غير منصفة

وبدأت بأن "شباب الخليج"

يضعون الفرق بين نانسي عجرم

وبنات الخليج

اصلاً نانسي وغيرهم من اللي

الله يهديهم

ما ييون شعرة من بنات الخليج

الشريفات العفيفات

والموضوع ليس إلا

محاولة يائسة لوضع اسباب

لمتابعة المسلسل الذي لا يعد

سوى "نزوة" وتعدي

لكن الخوف من ما سيليها

من نزوات

اتمنى أن لا تنقاد اسراب الحمام

لدينا إليها

فهي فخاخ اعلامية ليست إلا

هدانا الله وكفانا شر هذه

التمثيليات والمسلسلات

ومضيعة الأوقات


بس لا تتحاملون على فراشة المنتدى
اهي باين ناقله الموضوع على سبيل الدعابه
واهي قالت رايه بالموضوع

تشكرين على النقل الجميل
دمتِ بخير